‘Ye ti bata mbi alondo na Jéhovah’

Amaseka so asepela Jéhovah awara nzoni na yâ fini ti ala

“MBI ye ti wara aye ti nzoni mingi so fini ayeke na ni!” So ayeke lege so mbeni maseka-koli afa beku ti lo teti kekereke. Me tongana nyen mbeni maseka alingbi ti wara atâ pendere ye so fini ayeke na ni ti mû? Bible amû wango so polele: “Dabe mo na Lo so acréé mo, na lâ ti pendere ti mo.”​—Zo-ti-fa-tene 12:3.

Ti sepela na ti voro Jéhovah ayeke gi pëpe ti akota zo. Samuel, mbeni molenge ti Elkana na Anne, ade lani kete mingi na ngoi so lo sala na Jéhovah na tabernacle (1 Samuel 1:19, 20, 24; 2:11). Mbeni kete molenge-wali ti Israël afa kota mabe na Jéhovah tongana lo tene na Naaman, mokonzi ti aturugu ti Syrie, ti gue ti bâ prophète Elisée, tongaso lo zi kobela ti buruma ti lo (2 aGbia 5:2, 3). Na Psaume 148:7, 12, a hunda na amolenge ti koli na ti wali ti sepela Jéhovah.a Na ngoi so lo yeke lani gi na ngu 12, Jésus abi bê ti lo mingi na ndo kusala ti Babâ ti lo (Luc 2:41-49). Ndali ti fango ye so ala wara na ndo Mbeti ti Nzapa, ambeni molenge so abâ Jésus na yâ ti temple adekongo: “Hosanna na Molenge Ti David!”​—Matthieu 21:15, 16.

Sepelango Jéhovah laso

Laso, amaseka mingi na popo ti aTémoin ti Jéhovah apika kate ti ala na ndo atënë ti mabe ti ala, na ala sala tënë ni na mbito pëpe na amba ti ala na ekole nga na ambeni ndo nde. Zia e bâ atapande use.

Na Grande-Bretagne, Stéphanie, so ayeke na ngu 18, lo na amba ti lo apika lani patara na klase na ndo tukungo ngo nga na ndo ambeni tënë so azo abâ ni nde nde. Wafango ye ti ala ni atene so azo mingi ayeda na tukungo ngo, na amaseka-wali ayeke na mbeni nda ti tënë ti ke ni pëpe. Tongana amba ti lo kue ayeda na tënë ni, bê ti Stéphanie apusu lo ti fa bango ndo ti lo so aluti na ndo Bible. Lege ti sala ni azi na ngoi so wafango ye ni ahunda na Stéphanie ti fa bango ndo ti lo. Atâa so lo sala lani mbito kozoni, Stéphanie agbu ngoi so ti fa bango ndo ti Bible. Lo sala tënë ti Exode 21:22-24 na lo fa so, tongana a yeke sioni ti sala ye ti ngangu na molenge so ade ti dü lo pëpe, a yeke polele so tukungo ngo na mbana ague nde na ye so bê ti Nzapa aye.

Wafango ye ni, mbeni mokonzi-nzapa, ade ti diko aversê so lâ oko pëpe. Fango tënë ti Stéphanie na mbito pëpe amû lege na lo ti sala anzoni lisoro mingi na akamarade ti lo ti klase na ndo atënë mingi. Mbeni maseka-wali oko ayeke mû fadeso anuméro ti Tour ti Ba Ndo na ti Réveillez-vous!, na ambeni use nga ague na kota bungbi ti district ti aTémoin ti Jéhovah ti bâ mungo batême ti Stéphanie ti fa mungo tele ti lo na Nzapa.

Vareta, so ayeke na ngu omene na kodoro ti Suriname, na Amerika ti Mbongo, agbu lani lege so azi na lo ti sepela Nzapa na ngoi so wafango mbeti ti lo (ti wali) ayeke na bezoin ti dengo bê ti Mbeti ti Nzapa. Na kiringo ti lo na peko ti lango ota so lo sala kua pëpe, lo hunda na a-élève ti lo wala ala hinga ndani so lo ga na ekole pëpe. Ala tene na lo: “Tele ti mo aso, ni la pëpe?” Lo tene na ala: “Ên-ën. Yaya ti mbi ti wali akui, na mbi yeke na vundu mingi. Tongaso i duti kpô.”

Na peko ti bekombite ni, na ngoi so mama ti lo angbâ ti lango, Vareta asala kua ngangu ti gi na popo ti angbele périodique, na dikongo ali ti atënë ni. Lo tï na ndo Tour ti Ba Ndo ti lango 15 ti juillet 2001, so li ni atene “Na Peko ti Kuâ Fini Ayeke?” Na nzerengo tele, lo zingo mama ti lo, lo tene: “Mama, mama, bâ! Mbi wara mbeni périodique na ndo ti kui teti madame ti mbi!” Ala tokua périodique ni na wafango mbeti ni na mbeni lettre ti Vareta. Vareta atene: “Mbeti so ayeke tâ gi ti mo. Na yâ ti Paradis, fade mo yeke bâ yaya ti mo mbeni teti Jéhovah atene mvene lâ oko pëpe. Lo mû zendo so fade lo yeke ga na mbeni paradis na sese, me pëpe na yayu.” Wafango mbeti ni akiri singila mingi teti dengo bê so a-article so amû na lo.

Lekengo ye teti kekereke

Jéhovah ayeke “Nzapa so ayeke na ngia,” na lo ye si amaseka nga aduti na ngia (1 Timothée 1:11, NW ). Tënë ti lo atene: “Mo sala ngia, pendere-koli, na lâ ti pendere ti mo.” (Zo-ti-fa-tene 12:1). Jéhovah abâ gi aye ti ngoi so pëpe, me lo bâ aye so ayeke si kekereke na peko ti nzoni na sioni salango ye. Ndani la Mbeti ti lo awa amaseka: “Fadeso, mo dabe mo na Lo so acréé mo, na lâ ti pendere ti mo, kozoni si lâ ti sioni aga, na ngu ni asi, so fade mo tene, Mbi wara ngia na yâ ala pëpe.”​—Zo-ti-fa-tene 12:3.

Tâ tënë, Jéhovah aye si amaseka awara ngia mingi na yâ matabisi ti fini so lo mû. Na dango bê na Nzapa nga na sepelango lo, amaseka alingbi ti wara mbeni fini so amû ngia, so futa ni ayeke dä. Même tongana ala tingbi na akpale, ala lingbi ti tene na bê kue: “Ye ti bata mbi alondo na [Jéhovah, NW ].”​—Psaume 121:2.

[Kete tënë na gbe ni]

[Kete tënë na lembeti 9]

“Na sese, i sepela [Jéhovah, NW ], . . . apendere-koli na amasia.”​—PSAUME 148:7, 12

[Encadré na lembeti 8]

JÉHOVAH AMÛ MABOKO NA AMASEKA

“O Seigneur [Jéhovah, NW ], Mo yeke Lo so mbi zia bê ti mbi na Mo! Bê ti mbi ayeke na Mo, a komanse na lâ ni so mbi de molenge.” ​—Psaume 71:5.

“[Nzapa] amû ye ti nzoni na mo alingbi na nzara ti mo, si lâ ti pendere ti mo akiri aga tongana ti ngualo.” ​—Psaume 103:5.