Atënë so azo ahunda

A fâ pëpe David na Bath-Séba so asala lango-sioni, me molenge ti ala ni akui, ngbanga ti nyen?

Ndia ti Moïse atene: “Tongana zo abungbi na wali ti mbeni zo, a lingbi ala use kue akui, koli ni na wali ni nga. Na lege so fade i lungula sioye na popo ti azo ti Israël.” (Deutéronome 22:22). Tongana Jéhovah azi lege lani na ajuge so ayeke na gbe ti Ndia ti fâ ngbanga na ndo siokpari ti David na Bath-Séba, ka fade a fâ ala ndali ti lango-sioni ti ala. Teti azo so ayeke ajuge alingbi pëpe ti hinga tënë so ayeke na yâ ti bê ti zo, ala yeke fâ lani ngbanga gi na ndo sioni ye so azo ni asala, so asigigi polele. Ti sala lango-sioni alingbi lani na kuâ. A hunda pëpe na awafango ngbanga ti Israël ti pardone siokpari so.

Na mbeni mbage, tâ Nzapa adiko ye so ayeke na bê ti zo na lo pardone asiokpari ti lo tongana Lo bâ so mbeni raison ayeke dä ti sala ni. Teti tënë ni andu David, so Lo te na lo mbele ti Royaume, Jéhovah amû desizion ti leke tënë ni lo mveni (2 Samuel 7:12-16). “Juge ti sese kue” ayeke na ngangu ti soro ti sala ye tongaso.​—Genèse 18:25.

Ye nyen Jéhovah ahinga lani tongana lo bâ yâ ti bê ti David? Psaume 51 versê 2 afa atënë ti bê ti David “tongana prophète Nathan aga na lo tënë ti ye so [lo sala] na Bath-Séba.” Psaume 51:3-6 atene: “O Nzapa, Mo sala be-nzoni na mbi, na lege ti nzobe ti Mo. Na lege ti kota nzobe ti Mo, Mo mbô kengo-ndia ti mbi. Sukula mbi nzoni si sioye ti mbi kue awe, Mo sukula mbi si siokpari ti mbi awe. Teti mbi hinga kengo-ndia ti mbi, na siokpari ti mbi ayeke na gbele mbi lakue. Mbi sala siokpari so ake Mo, gi Mo oko, na mbi sala ye so ayeke sioni na lê ti Mo.” Jéhovah abâ lani kota vundu ti bê ti David tongana mbeni fä ti tâ gbiango bê ti lo na Lo bâ so mbeni nda ti tënë ayeke dä ti fa be-nzoni na awasiokpari ni. Na mbage, David lo mveni lo yeke mbeni zo ti be-nzoni, na Jéhovah ayeke sala be-nzoni na zo ti be-nzoni (1 Samuel 24:5-8; Matthieu 5:7; Jacques 2:13). Ndani la, na ngoi so David ayeda na siokpari ti lo, Nathan atene na lo: “L’Eternel alungula ngbanga ti sioye ti mo awe, fade mo kui pëpe.”​—2 Samuel 12:13.

David na Bath-Séba alingbi lani pëpe ti kpe aye kue ti peko ti siokpari ti ala. Nathan atene na David: “Me molenge so wali so adü na mo, fade lo kui; teti ye so mo sala amû lege na awato ti L’Eternel ti zonga Lo.” Molenge ti ala ni atï kobela na lo kui atâa so David ate kobe pëpe na lo duti na vundu lâ mbasambala.​—2 Samuel 12:14-18.

A yeke ngangu na ambeni zo ti yeda na nda ni so molenge ni akui, teti Deutéronome 24:16 atene: “A lingbi ababâ akui teti siokpari ti amolenge pëpe, na amolenge akui teti ababâ pëpe.” Me a lingbi e dabe ti e so, tongana a yeke fade ajuge ti sese si abâ tënë ni, ka babâ na mama ni nga na molenge ni so ade ti dü lo pëpe si ayeke wara kuâ. Kuingo ti molenge ni alingbi lani ti mû lege na David ti bâ polele tongana nyen siokpari ti lo na Bath-Séba aso bê ti Jéhovah. E lingbi ti hinga na bê ti e kue so Jéhovah aleke tënë ni mbilimbili, ngbanga ti so “lege ti Nzapa alingbi kue”.​—2 Samuel 22:31.

[Foto na lembeti 31]

David afa na gigi so lo gbian bê ti lo biani