Tondo ti awafango tënë ti Royaume
Azo so asala ye na lege ni asepela Jéhovah
NA NDO lê sese kue, azo ahinga aTémoin ti Jéhovah (maseka wala kangba) teti salango ye ti ala na lege ni. Bâ atapande so alondo na ando nde nde ti sese.
Olusola, mbeni maseka-wali so ayeke na ngu 17, ayeke lango na kodoro ti Nigeria. Mbeni lâ, na londongo ti lo na ekole ti kiri na kodoro, lo wara mbeni bozo ti nginza na sese. Lo gue na ni na wayinda ti ekole ni, so adiko nginza ni kue asi 19 680F CFA. Wayinda ni akiri na nginza ni na wafango mbeti so agirisa ni. Ti kiri singila na Olusola, wafango mbeti ni amû na lo 3 280F CFA, na lo tene na lo ti futa na ekole ti lo. Na ngoi so amba ti lo awamandango mbeti amä tënë ti ye so asi, ala he Olusola. Ayenga kete na pekoni, mbeni wamandango mbeti oko atene so mbeni zo na klase anzi nginza ti ni, tongaso a hunda na awafango mbeti ti gi nginza ni na tele ti ala kue. Wafango ye ni atene na Olusola: “Mo ga mo luti ge. Mbi hinga so, teti mo yeke Témoin ti Jéhovah, mo lingbi ti nzi pëpe.” A wara nginza ni na tele ti amaseka-koli use so ahe lani Olusola kozoni, na a se lani ala ngangu mingi. Olusola asû tënë so: “Mbi yeke na ngia mingi so a hinga mbi tongana Témoin ti Jéhovah so ayeke nzi ande lâ oko pëpe, na tongaso a mû gloire na Jéhovah.”
Na sigingo ti lo na da, Marcelo, ti kodoro ti Argentine, awara na sese mbeni bozo ti ziango ambeti na yâ ni na peko ti da ti lo. Lo mû ni lo ga na ni na da, na lo na wali ti lo abâ yâ ni. Li ti ala akpe kue ti wara na yâ bozo ni mbeni kota wungo ti nginza, acarte ti mungo na nginza wala ti futango na aye nga na achèque mingi so a sû maboko na gbe ni awe, so mbeni oko ayeke ti 163 989 250F CFA. Na mbeni mbage ti yâ ti bozo ni, ala wara numéro ti téléphone, na ala hiri mveni ni; ala mä tele ti kiri na lo aye ni kue na place ti kua ti Marcelo. Na ngoi so mveni ti aye ni asi, lo gi bê ti lo. Patron ni atene na lo ti gi bê ti lo pëpe, ngbanga ti so Marcelo ayeke mbeni Témoin ti Jéhovah. Ti kiri merci na Marcelo ndali ti so lo wara bozo ni, koli ni amû na lo gi 2 625F CFA. Ye ni aso bê ti patron ti Marcelo mingi ngbanga ti so salango ye na nzi pëpe ti Marcelo apika lani bê ti lo mingi. Ye so asi amû lani lege na Marcelo ti fa so, teti lo yeke mbeni Témoin ti Jéhovah, a lingbi lo sala ye na lege ni na ngoi kue.
Na Kirghizistan, e wara tënë ti ye so asi kâ. Rinat, mbeni kete molenge-koli ti ngu omene, awara bozo ti mbeni wali so alango a yo na ala pëpe. Na yâ ti bozo ni, 10 500F CFA ayeke dä. Na ngoi so Rinat na mama ti lo amû bozo ni ti kiri na ni na wali ni, wali ni adiko nginza ni na lo tene na mama ti Rinat so 2 200F CFA amanke na ndo ni. Rinat atene ni la ni mû nginza ni pëpe. Ala ota kue ague ti gi tanga ti nginza ni na ala wara ni ndulu na place so a wara bozo ni dä. Li ti wali ni akpe kue. Lo kiri singila mingi na Rinat nga na mama ti lo, kozoni teti ala kiri na bozo ni so lo girisa ni, na use ni teti fango ye ti aChrétien so Rinat awara.