E zia pëpe ti sala kusala ti nzoni

BAZENGELE Pierre amû wango so: “I tambela mbilimbili na popo ti aGentil.” (1 Pierre 2:12). Tënë ti yanga ti Grec so a kiri pekoni ge na “mbilimbili” wala “nzoni” aye ti fa mbeni ye so ayeke “pendere, a mû nengo na ni, a lingbi na gonda, a yeke nzoni mingi”. Laso, a yeke peut-être ngangu ti ku ti tene mingi ti azo aduti na mbeni tambela so ayeke tâ nzoni wala so alingbi na gonda. Ye oko, mingi ni, azo ti Jéhovah ti laso ayeke bata biani wango ti Pierre so. A hinga ala na ndo sese kue na nzoni tambela ti ala.

A yeke ye so a lingbi e bi bê dä mbilimbili tongana e yeke bâ atara na akpale so e yeke tingbi na ni na “lâ ti ye ti ngangu” so (2 Timothée 3:1). Atara ayeke mbage ti fini ti e ti lâ oko oko, nga azo mingi ake dutingo ti aChrétien. Na ndo ni, atâa so ambeni tara ni ayeke gi teti kete ngoi, ambeni ayeke ninga, même ayeke ga ngangu ahon ti kozo. Ye oko, bazengele Paul amû wango so: “A lingbi bê ti e anze pëpe na salango kusala ti nzoni; teti na ngoi so alingbi, fade e fâ lengo ni ti nzoni, tongana bê ti e anze pëpe.” (aGalate 6:9). Tongana nyen e lingbi ti sala ye ti nzoni, na ti ngbâ ti sala ni, atâa atara so ayeke mû kota vundu na e nga na akengo ndo so ayeke gi dä lakue?

Aye ti mû maboko ti sala kusala ti nzoni

Ti duti zo so ‘a mû nengo na lo, alingbi na gonda nga ayeke nzoni mingi’ andu biani zo ti yâ ni ti mbeni zo, mara ti bê so lo yeke na ni. Tongaso, ti bata nzoni salango ye na gbele atara nga na aye ti ngangu ayeke pëpe mbeni ye so zo ayeke londo gi tongaso ti sala ni. Me a yeke ga na peko ti salango ye lâ oko oko alingbi na akpengba-ndia ti Bible na yâ ambage kue ti fini ti e. Ambeni ye so alingbi ti mû maboko na e dä ayeke nyen? Zia e bâ ni.

E gi ti duti na mara bibe ti Christ. Ti kanga bê na gbe ti ye so akpa mo bâ mo tene ye ti kirikiri si a sala na mo ahunda tâ be-ti-molenge. A yeke ngangu na mbeni zo so agonda tele ti lo mingi ti yeda na ye ti sioni so a yeke sala na lo. Ye oko, Jésus ‘asala Lo mveni kete, Lo mä Babâ ti Lo juska na kui’. (aPhilippien 2:5, 8). Na mungo tapande ti lo, ‘bê ti e ayeke nze’ wala ayeke woko pëpe na yâ kusala ti e ti nzoni-kue (aHébreu 12:2, 3). Na tâ be-ti-molenge, mä yanga na dutingo ndulu ti sala kua maboko na maboko na ala so amû li ni na yâ kongregation ti mo (aHébreu 13:17). Manda ti bâ azo tongana azo so ayeke “kota” ahon mo, zia aye so agbu bê ti ala kozo na ti mo.​—aPhilippien 2:3, 4, Fini Mbuki, 2001.

E dabe ti e so Jéhovah andoye e. A lingbi e hinga biani na bê ti e so Jéhovah “ayeke [dä], na Lo yeke Zo ti futa ye na ala so agi Lo” biani (aHébreu 11:6). Lo yeke bi bê ti lo biani na e na lo ye si e wara fini ti lakue lakue (1 Timothée 2:4; 1 Pierre 5:7). Ti dabe ti e so ye oko alingbi pëpe ti zi ndoye ti Nzapa na mbage ti e ayeke mû ande maboko na e ti woko pëpe na gbe ti tara.​—aRomain 8:38, 39.

E zia bê ti e kue na Jéhovah. Ziango bê kue na Jéhovah ayeke kota ye mingi, mbilimbili tongana ye ni akpa mo bâ mo tene atara ni ayeke hunzi pëpe wala aye ti sala sioni na fini ti e. A lingbi e hinga tâ na bê ti e kue so Jéhovah ayeke zia ande pëpe si mbeni tara ‘ahon ngangu ti e’, me lakue lo yeke “leke lege ti sigigi” dä (1 aCorinthien 10:13). Tongana e zia bê ti e kue na Jéhovah, e lingbi ti luti na mbito pëpe, même tongana a tene a ye ti fâ e.​—2 aCorinthien 1:8, 9.

E ngbâ ti sambela lakue. Ti sambela na bê kue ayeke tâ kota ye mingi (aRomain 12:12). Mbeni oko ti alege so e yeke ga ndulu na Jéhovah ayeke na lege ti sambela so e tene ni na bê kue (Jacques 4:8). Na lege ti aye so asi na e mveni, e manda so tongana e ‘hunda Nzapa na mbeni ye so alingbi na ye so bê ti lo aye, lo yeke mä e.’ (1 Jean 5:14, FM 01). Tongana Jéhovah azia si atara ni angbâ ti sala ye na ndo dutingo be-ta-zo ti e, e yeke sambela lo ti mû maboko na e ti gbu ngangu (Luc 22:41-43). Sambela ayeke fa na e so e yeke gi e oko pëpe. Teti so Jéhovah ayeke lakue na tele ti e, fade e yeke sö gi benda lakue.​—aRomain 8:31, 37.

Anzoni kusala ayeke ‘ga tënë ti sepela nga na yango-iri’

Ngoi na ngoi, aChrétien kue ayeke wara “vundu na yâ ye nde nde so atara [ala]”. Ye oko, a lingbi ‘bê ti e anze pëpe na salango kusala ti nzoni’. Tongana mo yeke na yâ ti akpale, hingango so dutingo be-ta-zo ti mo ayeke ga ande “tënë ti [sepela, NW ], na gloire, na yango-iri” ayeke sala si mo wara ngangu (1 Pierre 1:6, 7). Wara nzoni biani na lege ti aye kue so Jéhovah aleke na lege ti yingo ti mû ngangu na mo. Tongana a lingbi mo wara mungo maboko, gue na mbage ti ala so ayeke sala kua tongana aberger, awafango ye nga na awawango na yâ kongregation ti aChrétien (Kusala 20:28). Gue lakue na abungbi kue so ayeke ‘wa e ti ndoye azo na ti sala anzoni kusala’. (aHébreu 10:24). Kapa ti dikongo Bible lâ oko oko nga na ti mandango ye mo mveni ayeke mû ande maboko na mo ti lango pëpe na ti kpengba na lege ti yingo. Mo yeke kpengba nga na lege ti yingo na mungo mbage ti mo na kusala ti fango tënë lakue.​—Psaume 1:1-3; Matthieu 24:14.

Tongana mo yeke bâ mingi ndoye nga na bingo bê ti Jéhovah na mbage ti mo, fade nzara ti mo ti duti zo so ayeke na wâ ti “sala nzo kusala” ayeke duti nga kota mingi (Tite 2:14). Girisa pëpe, “zo so agbu ngangu juska na nda ni, fade A sö lo.” (Matthieu 24:13). Biani, leke na bê ti mo ti ‘nze pëpe na salango kusala ti nzoni’!

[Kete tënë na lembeti 29]

A lingbi e hinga tâ na bê ti e kue so Jéhovah ayeke zia ande pëpe si mbeni tara ‘ahon ngangu ti e’, me lakue lo yeke “leke lege ti sigigi” dä

[Afoto na lembeti 30]

Dutingo na aye mingi ti sala na yâ kusala ti Nzapa alingbi ti leke e ti luti na gbele atara