A lingbi e bâ atara tongana nyen?
ATARA! Azo kue ayeke wara ni. Atara ni so alingbi ti si ngbanga ti amango tele pëpe na popo ti azo, kpale ti nginza, kobela, ambeni ye so atara bê ti e, ngangu so azo asala ti pusu zo na yâ sioye, salango ngangu, aye so agi lege ti buba dutingo nde ti e wala ti pusu e ti voro ayanda, nga na gbâ ti aye tongaso. Atâa atara wa e lingbi ti wara, mingi ni ala yeke ga na kota gingo bê. E lingbi ti hon ndo ti ala nzoni tongana nyen? Mbeni lege ayeke dä so e lingbi ti wara nzoni dä?
Nzoni mungo maboko so e lingbi ti wara
Na yâ fini ti lo, Gbia David awara giriri gbâ ti atara, me atâa so kue lo kui be-ta-zo. Nyen si amû maboko na lo ti gbu ngangu? Lo fa zo so amû ngangu na lo tongana lo tene: “L’Eternel ayeke Berger ti mbi; ye alingbi manke mbi pëpe.” Lo kiri lo tene: “Biani, même tongana mbi hon na popo-hoto ti bingo ti kui, mbito ti sioye asala mbi pëpe, teti Mo yeke na mbi; keke na bâton ti Mo alungula vundu ti mbi.” (Psaume 23:1, 4). Biani, Jéhovah ayeke lingu ti ngangu so ayeke hunzi lâ oko pëpe. Lo fa lege na David na ngoi ti akota kpale, na Nzapa ayeke ndulu ti sala ye legeoko tongaso nga na mbage ti e.
E lingbi ti wara mungo maboko ti Jéhovah tongana nyen? Bible afa ni tongana lo tene: “Tara L’Eternel, na fade mo bâ Lo yeke nzoni!” (Psaume 34:9). Wango so alondo na bê, me a ye ti tene nyen? A wa e ti sala na Jéhovah na ti sala ye alingbi na ye so bê ti lo aye na yâ fini ti e kue. A hunda ti tene e gbanzi ambeni ye na tele ti e. Na ambeni ngoi, a lingbi même ti ga na atara, tongana salango ngangu nga na bango pasi. Me, azo so ayeda na bê ti ala kue na hiringo ndo ti Jéhovah, a lingbi ala wara vundu dä lâ oko pëpe. Jéhovah ayeke sala ande ye na ala na nzobe mingi. Lo yeke fa ande lege na ala na lo yeke bata ala na lege ti yingo. Na lege ti Tënë ti lo, yingo vulu ti lo, nga na kongregation ti aChrétien, lo yeke mû maboko na ala na yâ atara ti ala. Nga, na nda ni, lo yeke mû na ala fini ti lakue lakue.—Psaume 23:6; 25:9; Esaïe 30:21; aRomain 15:5.
Azo so amû kpengba desizion ti sala na Jéhovah, na so aluti ngangu na ndo desizion so, abâ so Jéhovah ayeke sala si azendo ti lo kue aga tâ tënë. Azo ti Israël so amû peko ti Josué ti lï na yâ Sese ti Zendo abâ tâ tënë ti ye so na lê ti ala mveni. Na ngoi so ala fâ Ngu ti Jourdain awe, ala wara atara, ala tiri abira, na ala manda aye na lege ti ambeni ye ti ngangu so asi na ala. Me nde na ababâ ti ala so asigigi na Égypte na akui na yando, azo so aduti be-ta-zo mingi na Jéhovah. Tongaso, Jéhovah amû maboko na abe-ta-zo so, nga na ndo dutingo ti ala na lâ ti mbakoro ti Josué, Bible atene: “L’Eternel amû na ala siriri na mbage kue, na lege ti tënë kue so Lo deba na akotara ti ala . . . Mbeni ye oko ti nzoni amanke pëpe ti ye kue so L’Eternel aze na azo ti da ti Israël; tënë ni kue aga tâ tënë.” (Josué 21:44, 45). Mara ti ye tongaso alingbi nga ti si na e tongana e zia bê ti e kue na Jéhovah na ngoi so e yeke wara atara nga na ambeni ngoi nde.
Ye nyen alingbi ti sala si e ye ti zia bê mbeni pëpe na ndo Jéhovah? Jésus afa mbeni ye ni tongana lo tene: “Zo oko alingbi sala boi na azo use pëpe . . . I lingbi ga boi ti Nzapa na ti Mosoro legeoko pëpe.” (Matthieu 6:24). Tongana e zia bê ti e na Jéhovah, e yeke gi pëpe nzoni duti na ndo so azo mingi ayeke gi ni, so ti tene na lege ti mosoro. Jésus amû wango so na adisciple ti lo: ‘I gi royaume ti Nzapa na mbilimbili ti Lo kozoni, na fade A mû ye so kue [aye ti mitele so e yeke na bezoin ni] na i nga.’ (Matthieu 6:33). Chrétien so abata nzoni bango ndo na ndo aye ti mitele na azia Royaume ti Nzapa na kozo ndo na yâ fini ti lo, lo soro ye tâ na lege ni (Zo-ti-fa-tene 7:12). Peut-être a hunda na lo ti futa mbeni ye. Lo lingbi peut-être ti gbanzi tele ti lo na aye ti mitele. Me fade lo yeke wara aye ti nzoni mingi. Nga Jéhovah ayeke mû maboko na lo.—Esaïe 48:17, 18.
Ye so atara afa na e
Zo so asoro ti ‘tara L’Eternel na ti bâ so Lo yeke nzoni’, abata tele ti lo biani pëpe nde na akpale ti gigi so zo aku pëpe; na a zi lo kue pëpe na gbe ti ngangu so Satan na azo ti lo na sese ayeke sala ti kinda lo (Zo-ti-fa-tene 9:11). Ye so alingbi ti sala si nzoni bibe ti mbeni Chrétien nga na desizion so lo mû awara tara. Ngbanga ti nyen Jéhovah azia awakua ti lo na gbe ti mara ti atara tongaso? Bazengele Pierre afa mbeni oko nda ni tongana lo sû na mbeti: “Kamême fadeso, teti lâ oko oko, a yeke ngbanga ti i ti wara vundu na yâ ye nde nde so atara i, si tarango ti mabe ti i, so ngele ni ahon ngele ti lor so afuti, kamême a tara lor ni na yâ wâ, alingbi ga tënë ti mû singila, na gloire, na yango-iri, na lâ ti singo ti Jésus Christ.” (1 Pierre 1:6, 7). Biani, atara amû lege na e ti fa ngangu ti mabe ti e nga yengo so e ye na Jéhovah. Na ndo ni, atara amû maboko na e ti kiri tënë na azonga nga na atënë ti mvene ti Satan Zabolo.—aProverbe 27:11; Apocalypse 12:10.
Atara amû nga maboko na e ti lë ambeni lengo nde ti Chrétien. Bâ tapande ti atënë ti wasungo psaume so: ‘[Jéhovah] abâ ala so ayeke na kete ndo, na Lo hinga azo ti fandara, même tongana ala yeke na yongoro ndo.’ (Psaume 138:6). Mingi ti e, a dü e na lengo so ayeke tâ be-ti-molenge pëpe. Me atara alingbi ti mû maboko na e ti lë kota lengo so. Dabe mo na ye so asi na lâ ti Moïse, tongana azo ti Israël abâ manne tongana mbeni kobe so bê ti ala anze ti te ni lâ na lâ. A duti biani mbeni tara teti ala, même tongana manne ni ayeke mbeni kobe so aga na lege ti ye ti kpene. Me nda ti tara ni ayeke lani nyen? Moïse atene na ala: “[Jéhovah a] mû na i manne ti te na yando, . . . tongaso si Lo lingbi sala si mo ga kete na lê ti mo mveni, na Lo lingbi tara mo.”—Deutéronome 8:16.
Dutingo ti e na bê ti molenge alingbi ti wara tara tongaso nga. Tongana nyen? Na tapande, e yeke sala ye tongana nyen tongana a leke tambelango ti ambeni ye na yâ bungbi? (Esaïe 60:17). E yeke mû mbage ti e na kusala ti fango tënë na ti fango ye na bê kue? (Matthieu 24:14; 28:19, 20). E yeda na bê kue na afango nda ti tâ tënë ti Bible so “ngbâa be-ta-zo na ti ndara” amû? (Matthieu 24:45-47, NW; aProverbe 4:18). E yeke sala kue ti ke ngangu so asala na ndo e ti wara afini mozoko so asigigi, afini bongo, wala afini kode ti leke kuä ti li? Zo so ayeke na tâ be-ti-molenge ayeke yeda biani na mara ti ahundango tënë so.—1 Pierre 1:14-16; 2 Pierre 3:11.
Atara amû maboko na e ti lë mbeni kota lengo nga: gbungo ngangu. Disciple Jacques atene: “Aita ti mbi, tongana ye nde nde atara i, i bâ ye so kue tongana ye ti tâ ngia; teti i hinga ye so atara mabe ti i asala si bê ti i azia pëpe.” (Jacques 1:2, 3). Tongana e zia bê kue na Jéhovah na e gbu ngangu na yâ atara nde nde, e yeke luti ngangu, nga e yeke ngbâ be-biani. A mû ngangu na e ti luti na gbele ambeni tara so Satan, nzapa ti sese so, so kota ngonzo ayeke na bê ti lo, ayeke ga na ni.—1 Pierre 5:8-10; 1 Jean 5:19; Apocalypse 12:12.
Bâ atara na nzoni lê
Lani so lo de na sese, Molenge ti Nzapa so ayeke mbilimbili-kue, Jésus Christ, awara gbâ ti atara, na teti so lo gbu ngangu, lo wara gbâ ti aye ti nzoni dä. Paul asû na mbeti so Jésus ‘amanda ti mä tënë na lege ti ye so Lo hu pono dä’. (aHébreu 5:8). Dutingo be-biani ti lo juska na kui asala si iri ti Jéhovah awara gonda, na a mû lege na Jésus ti mû ngele ti fini ti lo so ayeke mbilimbili-kue tongana kota ngele ti sö na azo. Ye so azi lege na azo so amä na bê na Jésus ti wara beku ti duti na fini teti lakue lakue (Jean 3:16). Teti so Jésus angbâ be-ta-zo na gbele tara, lo yeke fadeso Kota Prêtre nga na Gbia ti e so ayeke komande.—aHébreu 7:26-28; 12:2.
Me ti e, a yeke tongana nyen? Tongana e ngbâ be-biani na gbele atara, e yeke wara nga akota deba nzoni. Na ndo ala so ayeke na beku ti gue na yayu, Bible atene: “Ngia ayeke na zo so agbu ngangu na yâ ye so atara lo, teti tongana A tara lo A bâ lo lingbi, fade lo wara couronne ti fini ti lakue lakue so Seigneur aze na ala so andoye Lo.” (Jacques 1:12). Ala so ayeke na beku ti ngbâ na fini na ndo ti sese ahinga biani so, tongana ala gbu ngangu na yâ be-biani, ala yeke wara fini ti lakue lakue na yâ sese so ayeke ga paradis (Apocalypse 21:3-6). Na kota ye ni ayeke so, teti so ala gbu ngangu na yâ be-biani, ala sala si iri ti Jéhovah awara gonda.
Na ngoi so e yeke tambela na senda ti Jésus, e lingbi ti hinga na bê ti e so biani lege ayeke dä ti hon ndo ti atara kue so e wara na yâ sese so (1 aCorinthien 10:13; 1 Pierre 2:21). Tongana nyen? Na ziango bê ti e kue na Jéhovah, lo so amû na azo so azia bê ti ala na lo “ngangu so ahon ti senge ni”. (2 aCorinthien 4:7, NW). Zia e duti na oko bibe ti Job so, atâa so lo wara angangu tara, lo tene na bê ti lo kue: “Tongana Lo tara mbi awe, fade mbi sigigi tongana lor.”—Job 23:10.
[Foto na lembeti 31]
Dutingo be-biani ti Jésus na gbele tara asala si iri ti Jéhovah awara gonda. Ti e nga alingbi ti duti tongaso