“Ngia ayeke na azo so ahinga ye ti yingo amanke ala”
TONGANA andeke azingo na lango na ndapelele, mingi ni ala yeke toto kete awe si na pekoni ala hulu ti gue ti gi kobe. Na lakui, ala kiri na da ti ala, ala yeke toto kete tongaso si ala lango. Na mbeni ngoi ti ngu, ala bungbi, ala dü para na ala bata amolenge ti ala. Ambeni nyama nga asala tongaso.
Me e azo, e yeke ti e nde. Tâ tënë, e yeke te, e yeke lango na e yeke dü, me mingi ti e ayeke na ngia pëpe gi na yâ ti aye so. E ye ti hinga ngbanga ti nyen e bâ gigi. E yeke gi ti hinga ye ti sala na fini ti e. E yeke nga na nzara ti duti na beku teti kekereke. Akota bezoin so agboto lê ti e na ndo mbeni ye so gi azo si ayeke na ni: nzara nga na ngangu ti bi bê na aye ti yingo.
A sala e na image ti Nzapa
Bible afa nda ni so zo ayeke na nzara ti aye ti yingo na bê ti lo, na tenengo: “Nzapa acréé zo na image ti Lo mveni, na image ti Nzapa Lo créé lo; Lo créé ala koli na wali.” (Genèse 1:27). Tele ti e so a sala ni na “image ti Nzapa” aye ti tene so atâa so sioye ti siokpari ayeke na yâ e, e yeke na ngangu ti fa na gigi na yâ fini ti e asalango ye ti Nzapa (aRomain 5:12). Na tapande, e lingbi ti gbu li ti e ti leke mbeni ye. E yeke nga na ndara kamême, tënë ti mbilimbili ane na lê ti e na e yeke na ngangu ti fa na popo ti e ndoye so agbanzi ye na tele. Nga, e lingbi ti gbu li na ndo ye so ahon awe na ti leke ye teti kekereke.—aProverbe 4:7; Zo-ti-fa-tene 3:1, 11; Michée 6:8; Jean 13:34; 1 Jean 4:8.
Ngangu so a sala e na ni ti bi bê na aye ti yingo asigigi polele mingi na yâ nzara so bê ti e ayeke na ni ti voro Nzapa. Tongana e kaï nzara so nzoni na gango ndulu na Wasalango e, e lingbi biani ti wara tâ ngia so aninga. Jésus atene: “Ngia ayeke na azo so ahinga ye ti yingo amanke ala.” (Matthieu 5:3). Ye oko, a lingbi e sala hange ti kaï nzara so na tâ tënë: tâ tënë na ndo Nzapa nga na akusala ti lo, aye so lo hunda na e nga na ye so lo leke ti sala teti azo ti sese kue. Na ndo wa si e lingbi ti wara tâ tënë? Na yâ ti Bible.
“Tënë ti Mo ayeke tene-biani”
Bazengele Paul asû lani na mbeti: “Tënë kue ti Mbeti ti Nzapa alondo na yanga ti Nzapa, na a yeke nzoni ti fa nda ti tënë, ti zingo na zo, ti kiri zo na lege ni.” (2 Timothée 3:16). Atënë ti Paul ague oko na ti Jésus, so asambela Nzapa lo tene: “Tënë ti Mo ayeke tene-biani.” Laso, e hinga so Tënë so ayeke Mbeti ti Nzapa. Nga, lege ti ndara ayeke ti tene e bâ wala aye so e mä na bê dä nga na asalango ye ti e ague oko na ni.—Jean 17:17.
Na hakango atënë ti mabe ti e na Tënë ti Nzapa, e mû peko ti azo so ayeke giriri na Bérée, so agi ti hinga biani wala afango ye ti Paul alingbi na ti Mbeti ti Nzapa. Ahon ti kasa azo ti Bérée, Luc agonda ala teti salango ye ti ala. Lo tene so “ala yeke na nzara ti mä tënë so, na ala gi Mbeti ti Nzapa lâ na lâ ti bâ tongana tënë so ayeke biani.” (Kusala 17:11). Na bango kangbi so ayeke na yâ atënë ti mabe nga na afango ye mingi na ndo tambela ti azo laso, a yeke kota ye ti tene e mû tapande ti nzoni bê ti azo ti Bérée.
Mbeni lege ti hinga na tâ tënë so alondo na Nzapa ayeke ti bâ tongana nyen tâ tënë ni asala ngangu na yâ fini ti azo (Matthieu 7:17). Na tapande, ti duti na fini alingbi na atâ tënë ti Bible alingbi ti sala si mbeni zo aga nzoni koli, nzoni babâ, lo ga nzoni wali wala nzoni mama, na tongaso lo kono ngia ti sewa ni, na tele ti azo kue anzere. Jésus atene: “Ngia ayeke mingi ahon na ala so amä Tënë ti Nzapa na ala bata [ni].”—Luc 11:28.
Tënë ti Jésus so adabe ti e na tënë so Babâ ti lo ti yayu atene na Israël ti giriri: “Mbi yeke L’Eternel Nzapa ti mo, Lo so awa mo si mo ga nzoni, Lo so afa na mo lege so a lingbi mo tambela dä. O, tongana mo mä komandema ti Mbi giriri! ka siriri ti mo aga tongana ngu so asua, na mbilimbili ti mo aga tongana mapo ti kota ngu ti ingo.” (Esaïe 48:17, 18). Fade bê ti azo kue so andoye nzobe na mbilimbili ayeke pusu ala ti yeda biani na hiringo ndo so!
Ambeni zo aye atënë so “anzere na mê ti ala”
Na bê ti lo kue, Nzapa asala tënë so na azo ti Israël ngbanga ti so amvene na ndo vorongo anzapa ahanda ala (Psaume 106:35-40). A lingbi e nga e sala hange na atënë ti mvene. Na ndo azo so atene ala yeke aChrétien, Paul asû na mbeti: ‘Mbeni ngoi ayeke ga so fade azo ayeke ke ti mä fango ye so ayeke mbilimbili. Ala yeke sala ande gi aye ti bê ti ala mveni si ala yeke hiri gbâ ti awafango-ye ti ga ti fa na ala tënë so anzere na mê ti ala. Fade ala kanga mê ti ala ti mä tâ tënë.’—2 Timothée 4:3, 4, Fini Mbuki, 2001.
Amokonzi ti abungbi ti vorongo Nzapa ayeke tene atënë so anzere na mê ti azo na kangango lê na ndo asalango ye so azingo asioni nzara ti bê, tongana bungbingo koli na wali na gigi ti mariage, bungbingo koli na koli wala wali na wali, na nyongo sämba ahon ndo ni. Mbeti ti Nzapa atene polele so azo so ayeda na mara ti aye so na asala ni, fade ala yeke ‘ga ahéritier ti royaume ti Nzapa pëpe.’—1 aCorinthien 6:9, 10; aRomain 1:24-32.
Kite ayeke pëpe so a yeke kete ye pëpe ti duti na fini alingbi na ye so Bible ahunda, mbilimbili na gbele hengo ndo, me zo alingbi ti sala ni. Na popo ti aTémoin ti Jéhovah, a wara azo mingi so giriri ayeke angbâa ti ambangi, so anyon sämba mingi, so asala pitan, agodobe, azo ti nzi na azo ti mvene. Me na mungo bê ti ala na Tënë ti Nzapa nga na maboko so yingo vulu amû na ala, ala gbian fini ti ala tongaso si ala “tambela na lege so alingbi na Seigneur”. (aColossien 1:9, 10; 1 aCorinthien 6:11). Teti ala duti na siriri na Nzapa, ala wara nga siriri ti bê na, tongana ti so e yeke bâ ande, mbeni tâ beku teti kekereke.
Beku ti Royaume
Beku so Bible amû na ndo siriri ti lakue lakue teti azo so amä yanga ayeke ga ande tâ tënë na lege ti Royaume ti Nzapa. Jésus atene na yâ tapande ti sambela ti lo: “E ye royaume ti Mo aga. E ye ala sala na sese ye so bê ti Mo aye legeoko tongana ala sala na yayu.” (Matthieu 6:10). Biani, gi Royaume ti Nzapa oko si alingbi ti sala si ande tâ ye so bê ti Nzapa aye aduti na ndo sese. Ngbanga ti nyen? Ngbanga ti so Royaume ti yayu so (mbeni ngorogbia so Jésus Christ si ayeke na ndo ni) ayeke mbeni lege so Nzapa asala na kusala ti fa droit ti lo ti komande na ndo sese kue.—Psaume 2:7-12; Daniel 7:13, 14.
Teti lo yeke gbia ti Royaume ti yayu so, fade Jésus Christ azi azo so amä yanga na gbe ti asioye kue, so na popo ni siokpari ti Adam so aga na kobela na kui. Apocalypse 21:3, 4 atene: “Bâ, Tabernacle ti Nzapa ayeke na popo ti azo . . . fade Lo [Jéhovah Nzapa, lo] mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.”
Fade siriri amû ndo kue nda ndo sese. Ngbanga ti nyen e tene so a yeke tâ tënë? Esaïe 11:9 afa na e nda ni: “Fade [azo so aduti na gbe ti Royaume ni a]sala ye ti ngangu, wala a futi ye pëpe na Hoto ti Mbi ti nzoni-kue; teti fade sese ni asi na ndara ti L’Eternel, legeoko tongana kota ngu ti ingo asi na ngu.” Biani, fade azo kue na ndo ti sese awara tâ hingango ye ti Nzapa na amä yanga ti lo. Beku so apika bê ti mo pëpe? Tongana a yeke tongaso, a yeke fadeso ngoi ti komanse ti wara kota “ndara” wala hingango ye ti Jéhovah.
Fade mo mä tënë ti Royaume ni?
Na lege ti Royaume ni, fade Nzapa afuti akusala kue ti Satan na lo fa na azo ambilimbili lege ti lo. Ni la bê ti e adö pëpe so Royaume ni ayeke lani kota mama-tënë ti fango ye ti Jésus. Lo tene: “A yeke ngbanga ti Mbi ti fa Tene-nzoni ti royaume ti Nzapa na ambeni kodoro nga; teti A to Mbi teti tënë so.” (Luc 4:43). Christ akomande adisciple ti lo ti tene oko tokua so na azo (Matthieu 28:19, 20). Lo tene lani so “fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” (Matthieu 24:14). Nda ni so ayeke pusu ndulu mingi. Tongaso, a yeke kota ye ti tene azo ti nzoni bê amä nzo tënë ti salut so pëpe?
Albert, so e sala tënë ti lo na yâ kozo article ni, amä tënë ti Royaume na ngoi so lani wali ti lo na molenge ti lo ti koli ato nda ti manda Bible na aTémoin ti Jéhovah. Kozoni, Albert ayeke lani na kite na bê ti lo. Lo hunda lani même na mokonzi-nzapa ti ndo so ala yeke dä ti ga ti bâ wali ti lo na molenge ti lo ti fa na gigi atënë ti wataka ti aTémoin ti Jéhovah. Me mokonzi-nzapa ni aye lani ti yôro tele ti lo na yâ ti tënë ni pëpe. Tongaso Albert amû desizion ti mä gi lisoro ni ti bâ wala atënë ti wataka ayeke na yâ afango ye ti aTémoin ni. Gi na peko ti lisoro oko senge, lo mû mbage na étude ni na nzara ti manda ye mingi ahon so. Na pekoni, na fango nda ni so bango ndo ti lo achangé, lo tene: “A yeke lani ye so mbi zia pëpe ti gi ni.”
Na nda ni, Albert ato nda ti kaï nzara ti aye ti yingo so lo yeke na ni, na lo wara vundu lâ oko pëpe na pekoni. Tâ tënë ti Mbeti ti Nzapa amû lani na lo ye so ngbele ye lo yeke gi na yâ fini ti lo: kiringo tënë na ndo aye ti kirikiri na asioye nde nde so amû ndo na popo ti azo, nga mbeni beku teti kekereke. A mû nga na lo siriri ti bê. Mo kaï nzara ti mo teti aye ti yingo awe? Ngbanga ti nyen ti mû mbeni ngoi ti diko ahundango tënë so a fa na li ti tënë so ayeke na lembeti 6 pëpe? Tongana mo ye ambeni sango na ndo ni, fade aTémoin ti Jéhovah ayeke duti na ngia ti mû maboko na mo.
[Encadré/Afoto na lembeti 6]
MO KAÏ NZARA TI MO TETI AYE TI YINGO NA LEGE NI?
Nzara ti yâ ti mo akaï na lege ti kobe ti yingo so mo yeke te? E tisa mo ti diko ahundango tënë so na ti bâ ala so mo lingbi ti kiri tënë dä nzoni.
□ Nzapa ayeke zo wa? Na iri ti lo ayeke nyen?
□ Jésus Christ ayeke zo wa? Ngbanga ti nyen a lingbi lo kui? Kui ti lo alingbi ti sala nzoni na mo tongana nyen?
□ Zabolo ayeke dä biani? Tongana a yeke ni la, lo londo na ndo wa?
□ Ye nyen ayeke si na e tongana e kui?
□ Ye nyen Nzapa aleke teti sese nga teti azo kue?
□ Royaume ti Nzapa ayeke nyen?
□ Akpengba-ndia ti Nzapa so andu tambela ti zo ayeke so wa?
□ Na yâ ti sewa, kusala wa Nzapa amû na koli nga na wali? Ambeni kpengba-ndia ti Bible wa alingbi ti maï tâ ngia ti sewa?
Tongana mo hinga atâ kiringo tënë ni pëpe, mo lingbi ti hunda ti wara brochure Ye Wa Nzapa Ahunda na E? A-Témoin ti Jéhovah asala mbeti so na ayanga ti kodoro ndulu na 300; brochure ni asala tënë ti akota ngbongboro tënë 16 ti Bible, na lo mû akiringo tënë so alondo na Bible na ahundango tënë kue so a fa fade na nduzu ge.
[Afoto na lembeti 4]
Nde na anyama, azo ayeke na bezoin ti aye ti yingo
[Foto na lembeti 5]
‘Ala yeke hiri gbâ ti awafango-ye ti ga ti fa na ala tënë so anzere na mê ti ala.’—2 Timothée 4:3, FM 01
[Foto na lembeti 7]
Fade siriri ti lakue lakue aga na lege ti Royaume ti Messie