‘Ye ti bata mbi alondo na Jéhovah’

Kumbamba, me na ngia na yâ kua ti Jéhovah

MBENI ita-wali na Espagne atene: “Atâa so e sala mariage pëpe, mingi ti e ayeke na kota ngia.” Ngbanga ti nyen lo yeke na ngia tongaso? Lo kiri lo tene: “Mariage ayeke ga na agingo bê mingi, me e yeke na ngia ti duti yamba na ni si e sala na Jéhovah, Nzapa ti e, mingi.”

Mara ti ngia so ague oko na tënë ti Bible na ndo dutingo kumbamba. Tongana lo yeke sala tënë na ndo mariage, bazengele Paul amû wango ti ndara so: “Mbi tene na ala so ade asala mariage pëpe, na mbi tene na awomua, A yeke nzoni ala duti legeoko tongana mbi.” Paul ayeke lani kumbamba. Ngbanga ti nyen lo wa azo ti duti kumbamba? Lo tene so zo so asala mariage, bê ti lo ayeke na ndo ti aye mingi, me zo so ayeke kumbamba lo “zia bê ti lo na ye ti Seigneur”. (1 aCorinthien 7:8, 32-34). Kota ye so asala si mbeni kumbamba ayeke na ngia mingi ayeke salango na Jéhovah.

Kumbamba ndali ti mbeni pendere ye

Na ando so azo aluti mingi na ndo tënë ti mungo koli wala wali nga na dungo molenge, azo alingbi ti gi li ti ala gbä na wango ti Paul so. Ye oko, Jésus Christ (so lo yeke lani kumbamba nga lo yeke na ngia) afa mbeni pendere ye na aChrétien so ayeke kumbamba. Lo tene: “Ambeni eunuque ayeke so ala sala ala mveni ti ga eunuque teti royaume ti yayu. Zo so alingbi hinga nda ti tënë so, zia lo hinga.”​—Matthieu 19:12.

Ti gue oko na tënë so, azo mingi abâ so dutingo kumbamba amû lege na ala ti sala na Nzapa sân ti tene atënë so andu mariage agboto lê ti ala (1 aCorinthien 7:35). A-Chrétien mingi ayeke voro Jéhovah na ngia atâa so ala mû koli wala wali pëpe, na ala yeke wara ngia na mungo maboko mingi na azo.a

A-Chrétien mingi so ayeke akumbamba ahinga so ngia ayeke pëpe gi ti ala so asala mariage nga vundu gi pëpe ndali ti akumbamba. Ngoi na ngoi, ala kue alingbi ti duti na ngia wala ti wara vundu. Biani, tongana ti so aye ni asi, Bible afa so mariage ayeke ga na “ye ti ngangu na yâ mitele”.​—1 aCorinthien 7:28.

Ambeni ye so asala si ala duti kumbamba

A yeke senge pëpe si azo mingi ayeke kumbamba. Tâ tënë, ala ye ti wara mbeni zo na tele ti ala, ti duti nzoni nga ti tene zo ni aye ala tongana ti so a yeke bâ ni na popo ti azo so asala mariage. Ye oko, kpale ti nginza wala ambeni ye si akanga lege na ala ti sala mariage na ndembe so. Ti ambeni Chrétien, so mingi ti ala ayeke aita-wali, ala ngbâ kumbamba ngbanga ti so ala ye biani ti bata wango ti Bible so ahunda ti sala mariage “gi na yâ Seigneur.” (1 aCorinthien 7:39). Ala ngbâ lakue ti gi zo ti mariage ni gi na popo ti awakua ti Jéhovah so awara batême awe.

Na ambeni ngoi, ambeni kumbamba abâ so ala yeke gi ala oko. Na peko ti so lo yeda so mara ti ye tongaso aga na li ti lo awe, mbeni ita-wali kumbamba atene: “E hinga ndia ti Jéhovah nga e ye ti nzere na lê ti lo na yâ ye kue. E ye ti wara mbeni koli na tele ti e. Nga lege mingi azo atara ti gi mbeni zo ndali ti e, me e ke na kuru go. E ye même oko pëpe ti sala kamarade na azo so ayeke awamabe pëpe.” A-Chrétien tongaso alingbi na gonda ndali ti so ala bata wango ti Bible nga ala ngbâ lakue ti sala ye so anzere na lê ti Jéhovah atâa vundu ti bê so ala yeke wara.

Jéhovah amû maboko mingi

Ala so aduti be-ta-zo na Jéhovah si ala ke ti sala mariage na azo so avoro lo pëpe, Jéhovah ayeke duti nga be-ta-zo na ala. Ndali ti aye so lo bâ na gigi ti lo, Gbia David atene so ‘Jéhovah asala nzobe na zo ti nzobe’, so ti tene lo yeke be-ta-zo na ala so ayeke be-ta-zo na lo (Psaume 18:26). Nzapa amû zendo so na ala so angbâ lakue ti mä yanga ti lo: “Fade Mbi zia ti sala na mo pëpe, na Mbi zia mo lâ oko pëpe.” (aHébreu 13:5). Tongana ti so Jéhovah asala, e nga e ye ti gonda mingi akumbamba kue so angbâ lakue ti bata Tënë ti Nzapa. E yeke sambela nga ti tene Jéhovah akpengba ala si ala hon ndo ti akpale ti ala.​—aJuge 11:30-40.

A-Chrétien mingi so ayeke kumbamba abâ so mungo tele ti ala kue na yâ kua ti fango tënë ti Bible na azo asala si gigi ti ala anzere. Na tapande, Patricia, mbeni kumbamba so ayeke na ngu bale-ota na ndo ni nga lo yeke pionnier, atene: “Atâa so dutingo kumbamba ayeke ga na atara mingi, a mû lege na mbi ti ga pionnier. So mbi yeke kumbamba, a sala si mbi lingbi ti leke programme ti mbi alingbi na aye so mbi ye, na mbi wara ngoi mingi ti manda ye. Mbi manda nga ti zia bê ti mbi mingi na Jéhovah, mbilimbili na yâ ti angoi ti ngangu.”

Atënë so aluti na ndo pendere zendo ti Bible so amû beku na zo. Zendo ni atene: “Zia lege ti mo na tïtî L’Eternel; zia bê ti mo na Lo, na fade Lo sala ye.” (Psaume 37:5). Biani, awakua be-ta-zo kue ti Jéhovah, ala so asala mariage wala akumbamba, alingbi ti wara dengo bê nga na ngangu na yâ tënë so: “Ye ti bata mbi alondo na L’Eternel [“Jéhovah”, NW ].”​—Psaume 121:2.

[Kete tënë na gbe ni]

[Kete tënë na lembeti 9]

“Zo so ayeke na wali pëpe, lo zia bê ti lo na ye ti Seigneur ti mû ngia na Seigneur.”​—1 ACORINTHIEN 7:32

[Encadré na lembeti 8]

YE SO AKUMBAMBA ALINGBI TI SALA TI WARA NGIA

Jésus, so lo mû wali lâ oko pëpe, atene: “Kobe ti Mbi ayeke ti sala ye so Lo so ato Mbi aye, na ti sala kusala ti Lo kue.”​—Jean 4:34.

Amolenge-wali osio ti Philippe so ayeke akumbamba amû ngoi ti ala lani mingi ti “fa tënë”.​—Kusala 21:8, 9.

Aita-wali kumbamba so ayeke fa tënë ti Royaume ayeke na popo ti ‘azo mingi so ayeke fa tënë nzoni’.​—Psaume 68:⁠12.