“Yeda na ni”
1 Mbeni lâ, na ngoi so lo yeke sala lisoro na adisciple ti lo na ndo mariage, Jésus asala tënë ti dutingo kumbamba tongana ‘mbeni matabisi’. Lo tene: “Zia lo so alingbi ti yeda na ni, ayeda na ni.” (Mat. 19:10-12, NW). Angu mingi na pekoni, bazengele Paul asû mbeti na ndo aye ti nzoni ti dutingo kumbamba, na lo wa ambeni zo ti mû peko ti tapande ti lo ti ngbâ kumbamba (1 aCor. 7:7, 38). Azo mingi laso “ayeda na” dutingo kumbamba, na ala wara aye ti nzoni dä. Ambeni ye ti nzoni ni ayeke so wa?
2 Salango kusala ‘na gingo bê na mbeni ye pëpe’: Paul ahinga lani so dutingo kumbamba ayeke mû na lo lege ti sala na Jéhovah ‘na gingo bê na mbeni ye pëpe’. Legeoko nga na ngoi ti e, mbeni ita-koli so ade ti sala mariage pëpe alingbi ti gi ti gue na Ekole ti Formation Ministérielle. Mingi ni, teti so lo yeke na liberté, lo lingbi ti ga pionnier, ti manda yanga ti mbeni kodoro nde, ti gue na ndo so a hunda awafango tënë dä mingi, ti sala kua na Béthel wala ti duti ndulu ti yeda na ambeni matabisi ti kusala so ayeke nde. Lo lingbi ti duti na ngoi mingi nga na alege mingi ti manda ye lo mveni nzoni ahon ti kozo, ti gbu li na ti sambela Jéhovah na bê ti lo kue. Mingi ni, zo so ade ti sala mariage pëpe ayeke na ngoi mingi ti mû tele ti lo mveni ti mû maboko na ambeni zo. Amara ti kusala tongaso ayeke ‘sala nzoni na zo ni mveni’.—1 aCor. 7:32-35; Kus. 20:35.
3 Mara ti kusala ti Nzapa tongaso, so gingo bê ayeke na yâ ni pëpe, ayeke ga na gbâ ti adeba nzoni. Na peko ti angu 27 na kodoro ti Kenya, mbeni ita-wali atene lani: “So tâ gbâ ti kamarade na gbâ ti kusala! E yeke sala lani ye legeoko [na] e yeke sala vizite na popo ti mba. . . . Mbi lingbi ti sala kusala na kota liberté nga na alege so dutingo kumbamba azi na mbi ti wara kua mingi ti sala na yâ fango tënë, na ye so amû na mbi kota ngia.” Lo kiri lo tene: “Tongana angu ayeke hon, songo ti mbi na Jéhovah akpengba ngangu.”
4 Yengo dä na ni: Jésus atene lani so ye so apusu zo ti kono matabisi ti dutingo kumbamba ayeke ti sala ni “teti royaume ti yayu.” (Mat. 19:12). Legeoko tongana tanga ti ambeni matabisi, a lingbi a sala kusala na dutingo kumbamba na lege ni si alingbi ti ga na ngia nga na aye ti nzoni. Na salango kusala na alege so dutingo kumbamba ayeke ga na ni, nga na ziango bê kue na Jéhovah ti wara ndara na ngangu, azo mingi so ade ti sala mariage pëpe aga ti gbu nda ti nene ti yengo dä na matabisi so.