Mo bâ tele ti mo so mo yeke ye oko pëpe?

TETI angu mingi, Lena abâ tele ti lo so lo yeke ye oko pëpe. Lo tene: “Na ngoi so mbi de kete, a sala ngangu na mbi mingi ti lango na mbi. Ye so abuba gigi ti mbi mingi si mbi bâ tele ti mbi so mbi ne oko pëpe.” Simone nga kue agbu li ti lo na ndo ti aye so asi na lo na ngoi so lo de maseka na lo tene: “Tâ na yâ mbi, mbi bâ tele ti mbi so mbi yeke ye oko pëpe.” A bâ so kota vundu so aga na peko ti abibe tongaso amû ndo laso kue. Mbeni bungbi so ayeke mû wango na amaseka na ndo ti akpale ti ala atene so ndulu na ndambo ti amaseka so ayeke pika singa ti hunda mungo maboko ayeke tene so na bê ti ala, “ala ngbâ lakue ti bâ tele ti ala so ala lingbi pëpe.”

Ambeni wandara atene so abibe tongaso ayeke bâ gigi na yâ ambeni zo ngbanga ti so ambeni zo nde ayeke gue na ala ti bâ tele ti ala tongaso. Zo alingbi ti duti na abibe tongaso tongana a yeke suku na lo lakue, a yeke kasa lo ngangu wala a yeke sala ye na lo gi tongana mbeni senge ye ti kusala. Atâa nda ti tënë ni ayeke so wa, aye so aga na pekoni alingbi ti woko zo ni ngangu na même ti buba gigi ti lo kue. Mbeni gingo nda ti ye so ambeni docteur asala afa so azo so abâ tele ti ala so ala lingbi pëpe ayeke ndulu ti wara kite na ndo ti ala mveni nga na ndo ti ambeni zo. Ye so asala si tongana ti so gingo nda ti ye ni afa, “ala yeke sala si ye so ala yeke na mbito ni aga tâ ye”, so ti tene so ala lingbi pëpe ti wara atâ kamarade, atâa so a yeke pëpe ye so ala ye fade.

Mingi ni, azo so ayeke na amara ti bibe tongaso ayeke ala so ato nda ti wara na li ye so Bible ahiri ni “bibe” wala gingo bê “mingi”. (Psaume 94:19). Ala bâ ti ala so atâa ngangu so ala lingbi ti sala, ala yeke lakue ye oko pëpe. Tongana mbeni ye atambela nzoni pëpe, ala tene na bê ti ala so a yeke gi faute ti ala si a si tongaso. Atâa so azo alingbi ti gonda ala teti ambeni ye so ala sala, tâ na yâ ala mveni, ala bâ so ala lingbi pëpe, na nyen na nyen kue, nda ti ala ayeke sigigi ande. Tongana ala bi bê na ndo dutingo ti zo na tâ ngia, ala bâ so ala lingbi na ni pëpe. Tongaso, ala to nda ti sala ambeni ye so ayeke buba gi fini ti ala na ala bâ so ala yeke na ngangu oko pëpe ti leke ni si aga nzoni. Lena so a sala tënë ti lo na tongo nda ni ato nda ti wara kpale ti tengo ye nzoni teti so lo yeke bâ tele ti lo so lo ne oko pëpe. Lo tene: “Mbi bâ so mbi lingbi oko pëpe ti changé mbeni ye na yâ ye so ayeke si na mbi.”

A yeke na lege ni ti tene azo so ayeke tiri na mara ti ‘abibe mingi’ tongaso abâ tele ti ala so ala yeke ye oko pëpe teti tanga ti alâ ti fini ti ala kue? Mbeni ye ti sala ayeke dä ti tiri na amara ti bibe tongaso? Bible afa akpengba-ndia na lo mû ambeni wango alingbi na ni so amû maboko awe na azo mingi ti hon ndo ti abibe so. Ambeni kpengba-ndia ni ayeke so wa? Na tongana nyen awango so amû maboko na azo so ayeke na akpale tongaso ti wara ngia na yâ fini ti ala? Fade article ti peko ayeke kiri tënë na ahundango tënë so.