Bible alingbi ti mû maboko na mo ti wara ngia

ATÂA so Bible ayeke pëpe mbeni buku na ndo seni, lo fa kamême so tongana zo aduti na ngia, a yeke sala nzoni na ndo seni ti lo nga na li ti lo; me tongana lo yeke na vundu, a yeke sala lo nzoni pëpe. Lo tene: “Bê so ayeke na ngia ayeke yorö ti nzoni, me yingo so afâ awe asala si bio ahule.” Lo tene nga: “Tongana tele ti mo awoko na lâ ti ye ti ngangu, ngangu ti mo ayeke kete.” (aProverbe 17:22; 24:10). Tongana e bâ tele ti e lakue so e yeke ye oko pëpe, bibe tongaso alingbi ti woko e kue na ti sala si nzara ti gi ti gbian aye wala ti gi mungo maboko asigigi na yâ ti e.

Ti bâ tele ti e tongaso alingbi ti sala ngangu nga na ndo ti songo ti e na Nzapa. Fani mingi, azo so abâ tele ti ala so ala yeke ye oko pëpe apensé so ala lingbi lâ oko pëpe ti duti na mbeni nzoni songo na Nzapa na ti wara deba nzoni ti lo. Simone so e sala tënë ti lo na yâ article so ahon adekite so Nzapa alingbi ti ye mbeni mara ti zo tongana lo so. Ye oko, tongana e diko Tënë ti Nzapa, Bible, e yeke bâ so Nzapa ayeke bâ na nzoni lê ala so ayeke sala ngangu ti nzere na lo.

Nzapa ayeke bi bê na ndo mo biani

Bible atene na e so “L’Eternel ayeke ndulu na azo so bê ti ala afâ awe, na Lo sö ala so yingo ti ala ayeke na vundu.” Nzapa ake na bê ti lo pëpe “bê so afâ awe na ayeke na vundu”, me lo mû zendo “ti kiri ngangu na yingo ti zo so ayeke na tâ be-ti-molenge, na ti kiri ngangu na bê ti zo so yingo ti lo ayeke na vundu.”​—Psaume 34:19; 51:19; Esaïe 57:15.

Na mbeni ngoi, Molenge ti Nzapa Jésus abâ so a lingbi lo fa na adisciple ti lo ti hinga so Nzapa ayeke bâ anzoni ye so ayeke na yâ ti awakua ti Lo. Na lege ti mbeni tapande, lo fa so tongana mbeni nzêrë atï na sese, Nzapa ayeke bâ ni, atâa so mingi ti azo ayeke bi bê ti ala dä pëpe. Lo fa nga so Nzapa ahinga anzene nzene ye kue na ndo ti e juska même wungo ti akuä ti li ti e. Tongana lo hunzi ti mû tapande ni, Jésus atene: “Tongaso i zia mbito asala i pëpe; ngele ti i ayeke ngangu ahon ngele ti [anzêrë] mingi.” (Matthieu 10:29-31).a Jésus afa lani so atâa lege so zo oko oko alingbi ti bâ na tele ti lo mveni, zo so ayeke na mabe ayeke na ngele mingi na lê ti Nzapa. Bazengele Pierre adabe e so “Nzapa ayekia mbeni zo teti lê ti lo pëpe; me na yâ amara kue, zo so akpe mbito ti Nzapa, na lo sala ye ti mbilimbili, lo lingbi na lê ti Lo.”​—Kusala 10:34, 35.

Duti na nzoni bango ndo na ndo ti mo mveni

Mbeti ti Nzapa awa e ti duti na nzoni bango ndo na ndo ti e mveni. Yingo ti Nzapa apusu bazengele Paul ti sû tënë so na mbeti: “Na lege ti grâce so A mû na mbi, mbi tene na i oko oko kue, i bi bê ti i pëpe ti tene i yeke kota; me i bi bê ti i na lege ni, alingbi na mabe so Nzapa amû na azo oko oko kue.”​—aRomain 12:3.

Ti tâ tënë ni, e ye pëpe ti bâ tele ti e kota mingi ahon tanga ti azo kue si baba alï e. Me na mbeni mbage nga, e ye pëpe ti bâ tele ti e so e yeke ye oko pëpe. A lingbi e gi ti duti na nzoni bango ndo na ndo ti e mveni na hingango ando so e kpengba dä nga na ando so e woko dä. Mbeni ita-wali Chrétien atene ni na mbeni lege nde, lo tene: “Mbi yeke mbeni zabolo pëpe. Nga, mbi yeke ange pëpe. Mbi hinga so ambeni salango ye ti mbi ayeke dä so ayeke nzoni na ambeni so ayeke sioni, me a yeke ye so zo kue ayeke na ni.”

Biani, ti tene ni ayeke ngangu pëpe. Kpale ni ayeke ti sala ye alingbi na ni. A lingbi ti hunda na mbage ti zo ti sala angangu mingi ti zi na yâ ti li ti lo asioni bibe so lo yeke na ni na ndo lo mveni na so amaï na yâ lo teti angu mingi awe. Me na lege ti mungo maboko ti Nzapa, e lingbi ti gbian asalango ye ti e nga na bango ndo so e yeke na ni na ndo fini, na a yeke ye so Mbeti ti Nzapa ahunda e ti sala la. E diko a tene: “I zia lege ti i ti giriri, zo-ti-giriri so ayeke futi na lege ti nzara so ahanda lo; i kiri i wara bibe ti fini na yâ yingo ti i, na i yü zo-ti-fini, lo so A créé lo na lege ti Nzapa na yâ mbilimbili na nzoni-kue ti tene-biani.”​—aEphésien 4:22-24.

Tongana e sala ngangu ti ‘wara bibe ti fini na yâ yingo ti e’ so ti tene ti changé ngangu so ayeke na yâ e so apusu e ti sala ye, e lingbi ti kiri ti wara nzoni bango ndo. Lena so asala tënë ti lo na article so ahon abâ na nda ni so a yeke gi tongana lo zi na yâ li ti lo bibe ti tenengo so zo oko alingbi ti ye lo pëpe si fade lo lingbi ti changé lege so lo yeke bâ na lo mveni. Awango wa ti Bible so alingbi na ni amû lani maboko na Lena, na Simone nga na ambeni zo nde ti gbian bango ndo ti ala tongaso?

Akpengba-ndia ti Bible so amaï ngia ti zo

“Mo zia kungba ti mo na ndo L’Eternel, na fade Lo bata mo. Fade Lo zia ye ayengi azo ti mbilimbili lâ oko pëpe.” (Psaume 55:23). Kozoni kue, sambela alingbi ti mû maboko na e ti wara tâ ngia. Simone atene: “Tongana bê ti mbi ato nda ti nze, hio mbi sambela Jéhovah ti hunda lo ti mû maboko na mbi. Na yâ ti angoi kue so mbi toto na lo, lo mû ngangu na mbi nga lo fa lege na mbi.” Tongana wasungo psaume awa e ti zia kungba ti e na ndo ti Jéhovah, ti tâ tënë ni lo yeke dabe ti e so Jéhovah ayeke bi bê ti lo mingi na e nga lo bâ e oko oko tongana azo so alingbi na mungo maboko ti lo. Na bï ti lango ti Pâque ti ngu 33, adisciple ti Jésus asala mawa mingi tongana Jésus afa na ala so lo yeke ndulu ti zia ala ti hon. Jésus awa ala ti sambela Babâ ti lo, na lo tene na pekoni: “I hunda, na fade i wara, si tâ ngia ti i alingbi si singo.”​—Jean 16:23, 24.

“Ngia ayeke na zo so amû ye, ahon ngia ti lo so akamata ye.” (Kusala 20:35). Jésus asala lani tënë ti tâ ngia so aga na lege ti mungo ye. Tongana e sala ye alingbi na tënë ti Bible so na yâ fini ti e, fade a yeke mû maboko na e ti zia lê ti e mingi na ndo aye so amba ti e ayeke na bezoin ni, ahon ti bâ gi awokongo ti e mveni. Tongana e mû maboko na ambeni zo na si e bâ so ala kiri merci na e ngbanga ni, tele ti e anzere mingi na pekoni. Lena abâ tongana nyen fango nzo tënë ti Bible lakue na ambeni zo amû maboko na lo, na lo fa aye use lo tene: “Kozoni kue, salango tongaso amû lege na mbi ti hinga mara ti ngia na nzerengo tele so Jésus asala tënë ni. Na use ni, tongana mbi bâ azo mingi so ayeda na ngia na ye so mbi yeke fa na ala, ye so amû ngia na mbi mingi.” Tongana e yeke ndulu ti sala na amba ti e, fade e yeke bâ gango tâ tënë ti aProverbe 11:25 na ndo ti e: “Zo so amû ngu teti ambeni zo, fade ala mû ngu teti lo nga.”

“Lâ ti azo ti vundu ayeke sioni lakue, me zo so ayeke na bê ti ngia, lo duti na yâ pumba lakue.” (aProverbe 15:15). A yeke na e oko oko ti soro bango ndo so e ye ti duti na ni na ndo e mveni nga na aye so ayeke si na e. E lingbi ti soro ti duti na nzoni bango ndo pëpe na ndo ye kue, na ye so ayeke sala si e duti nzoni pëpe. Wala e lingbi ti soro ti duti na nzoni bango ndo na ndo ti aye, ti duti na “bê ti ngia” mo bâ mo tene e yeke sala pumba. Simone atene: “Mbi tara ti duti lakue na nzoni bango ndo. Mbi mû ngoi ti mbi mingi na mandango aye ti yingo nga na fango tënë, na mbi yeke sambela mingi. Mbi yeke tara nga ti tambela gi na azo so ayeke bâ aye lakue na nzoni lê na ti mû maboko na ambeni zo tongana ala ye.” Mara ti bango ndo tongaso amû lege na zo ti wara tâ ngia, teti Bible atene tënë so na e: “I duti na ngia na yâ L’Eternel, i sala ngia, i azo ti mbilimbili; i dekongo na ngia, i kue so i yeke na bê ti mbilimbili.”​—Psaume 32:11.

“Tâ ndeko andoye lakue; na lâ ti ye ti vundu, lo yeke tongana tâ ita.” (aProverbe 17:17). Tongana e zi bê ti e na mbeni zo so e ye lo mingi wala mbeni zo nde so e hinga lo tongana zo so ayeke mû anzoni wango, ye so alingbi ti tomba na yâ li ti e asioni bibe kozoni si ala hon ndo ti e. Tongana e sala tënë na ambeni zo, a lingbi ti mû maboko na e ti wara nzoni bango ndo na ndo ti e mveni. Simone atene: “Tongana mo sigigi na atënë ti bê ti mo na gigi, a yeke sala nzoni mingi na mo. A yeke ti mo ti fa ye so ayeke tâ na bê ti mo si zo ni ahinga. Mingi ni, gi ti sala tongaso asala mo nzoni mingi.” Salango tongaso ayeke mû ande maboko na mo ti bâ gango tâ tënë ti versê ti Bible so atene: “Vundu na yâ bê ti zo asala si lo ba bango, me nzo tënë amû ngia na bê ti zo.”​—aProverbe 12:25.

Ye so mo lingbi ti sala

Akpengba-ndia so e bâ ni ge ayeke gi a-oko oko na popo ti gbâ ti apendere kpengba-ndia so Bible afa na so alingbi ti mû maboko na e ti hon ndo ti asioni bibe ti e si e wara tâ ngia. Tongana mo yeke na popo ti azo so ayeke bâ tele ti ala so ala yeke ye oko pëpe, e wa mo ti kiri ti diko Bible mingi. Manda ti duti na nzoni bango ndo na ndo ti mo mveni nga na ndo dutingo ti mo na gbele Jéhovah. E ye mingi ti tene na lege ti Mbeti ti Nzapa, mo wara lege ti hinga tâ ngia na yâ ye kue so mo sala.

[Kete tënë na gbe ni]

[Foto na lembeti 7]

Batango andia ti Bible amaï ngia ti zo