Atënë so azo ahunda

Tënë “peut-être” so e wara na Sophonie 2:3 aye ti tene so awakua ti Nzapa ahinga pëpe wala ala yeke wara fini ti lakue lakue ande?

Versê ni atene: “I gi L’Eternel, i azo ti tâ be-ti-molenge so ayeke na ndo sese, i so i bata kpengba-tene ti Lo. I gi mbilimbili na i gi tâ be-ti-molenge; peut-être fade a honde i na lâ ti ngonzo ti L’Eternel.” Ngbanga ti nyen versê ni atene “peut-être”?

Ti hinga ye so Jéhovah ayeke sala ande na awakua be-ta-zo ti lo na Harmaguédon, a yeke nzoni e dabe ti e na ye so Bible atene na ndo ye so Nzapa ayeke sala ande na ala so ayeke kui kozoni si lâ ti fango ngbanga ti lo so asi. Ambeni ayeke wara pasa ti wara fini ti lakue lakue na yayu, me ambeni ayeke zingo na kuâ na beku ti wara fini ti lakue lakue na yâ Paradis (Jean 5:28, 29; 1 aCorinthien 15:53, 54). Teti so Jéhovah ayeke dabe ti lo ande na awakua ti lo so akui kozoni na Harmaguédon, e yeke tâ na beku so biani lo yeke futa nga ande awakua ti lo so angbâ na fini na lâ ti ngonzo ti lo.

Atënë so bazengele Pierre asû na mbeti ayeke nga ye ti kpengba zo. Lo sû na mbeti: ‘Nzapa abata sese ti giriri pëpe, me Lo bata Noé, zo ti fa tënë ti mbilimbili, legeoko na ambeni zo mbasambala, na lâ ni so Lo to moa na ndo sese ti azo so ake Nzapa; na tongana Lo fâ ngbanga ti futi na ndo Sodome na Gomorrhe, Lo sala si akodoro so aga mbi-wa . . . Lo zi Lot zo ti mbilimbili . . . Seigneur ahinga lege ti zi azo na yâ ye so atara ala, ala so akpe mbito ti Nzapa, na Lo hinga lege ti bata azo ti kirikiri na gbe ti ngbanga juska na lâ ti fango ngbanga.’ (2 Pierre 2:5-9). Atâa so Jéhovah afuti lani azo ti sioni na lâ ni kâ, lo bata Noé nga na Lot teti so ala sala na lo na be-biani. Fade Jéhovah ayeke bata nga na fini azo so akpe mbito ti lo na ngoi so lo yeke ga ti futi azo ti sioni na Harmaguédon. “Azo mingi so asi singo” ayeke sö fini ti ala ande.​—Apocalypse 7:9, 14.

Tongaso, na bango ni, a sala kusala pëpe na tënë “peut-être” na Sophonie 2:3 ti fa so e hinga pëpe wala Nzapa alingbi ande ti bata ala so asala na lo. Me a ye ti fa so tongana zo ni ato nda ti gi mbilimbili na tâ be-ti-molenge, peut-être a yeke honde lo na lâ ti ngonzo ti Jéhovah teti na nda ni, a yeke bata ande lo na fini gi tongana lo ngbâ ti gi tâ be-ti-molenge na mbilimbili.​—Sophonie 2:3.

[Foto na lembeti 31]

‘Jéhovah ahinga lege ti zi azo na yâ ye so atara ala’