Ti duti be-ta-zo aga na aye ti nzoni biani?

KARL ayeke sala kua na yâ ti mbeni ndokua so tongana mo futa nginza dä si na pekoni mo wara mbeni kpale, a lingbi ti kiri na mo nginza ni wala ti leke ye ti mo so abuba.a Fadeso, bâ lisoro so akporo lani na popo ti lo na Jens.

Karl atene na Jens: “Nginza so mo yeke futa ni na ndokua so kâ ndali ti seni ti mo ayeke mingi. Tongana mo zia ndokua so kâ si mo ga na ti mbi ge, nze oko oko, nginza so mo lingbi ti bata ayeke si 9 840.”

Jens atene na lo: “Tënë ti mo ni ayeke na lege ni. Me a ninga awe so mbi yeke futa nginza gi na ndokua so ndali ti seni ti mbi. Azo ti ndokua so amû maboko na mbi mingi, ni la mbi ye ti ngbâ be-ta-zo na ala.”

Karl akiri atene: “Dutingo be-ta-zo ayeke nzoni mingi. Me mo ngbâ gi ti duti be-ta-zo ni, gbâ ti nginza la ayeke hon so.”

Tënë ti Karl ayeke na lege ni. Mingi ni, ti duti be-ta-zo na mbeni zo a hunda na zo ti duti ndulu ti yeda ti mû nginza, ngoi nga na ngangu ti lo. A hunda nga ti tene lo yeda ti mû bê ti lo kue na zo ni. Me dutingo be-ta-zo alingbi na aye so biani?

Azo mingi agonda dutingo be-ta-zo ni gi na yanga

Na gbata ti Allensbach, na Zamani, mbeni ndokua ayeke dä so kua ti lo ayeke ti hunda azo ti fa tënë ti bê ti ala na ndo ti ambeni ye. Ndokua so atara ti hunda azo ti fa tënë ti bê ti ala na ndo dutingo be-ta-zo. Na popo ti azo so lo hunda ala, tongana a mû azo 100, azo 96 atene so, ti ala, dutingo be-ta-zo ayeke mbeni pendere ye. Na pekoni, ndokua so akiri ahunda ndo na amaseka so ngu ti ala ayeke na popo ti ngu 18 ti si na 24. Tongana a mû amaseka 3, amaseka 2 atene so dutingo be-ta-zo ayeke ye so mingi ti ala abâ ni tongana nzoni ye.

Biani, azo mingi agonda dutingo be-ta-zo ni. Me ti tene ala wani aduti be-ta-zo aga ti lo mbeni tënë nde. Na tapande, na yâ ti akodoro mingi ti Poto, akoli na awali so amû tele wala azo ti yâ ti sewa oko ayeke be-ta-zo na mba kue pëpe. A yeke si mingi so akamarade ayeke be-ta-zo na popo ti ala pëpe. Nga, ngoi na ngoi, a yeke bâ so apatron na azo ti kua ti ala wala awadengo buze na aclient ti ala ayeke be-ta-zo na mba pëpe. Ndani ayeke nyen?

Dutingo be-ta-zo ahunda ngoi nga na bê. Me na mbeni tango, teti so azo ayeke na akua mingi, a sala si ala yeke na ngoi mingi pëpe ti bata yanga so ala mû ti duti be-ta-zo na mbeni zo. Ti ambeni, kozo ala wara vundu na yâ songo ti ala na amba ti ala. Ye so asala si fadeso ala yeke na mbito ti mû bê ti ala kue na mbeni zo. Ti ambeni nga, ala ye ti duti be-ta-zo pëpe ngbanga ti so ala hinga ye so ayeke si kekereke pëpe.

Atâa nda ti tënë ni ayeke nyen, azo mingi agonda dutingo be-ta-zo ni gi na yanga. Teti so ye ni ayeke tongaso, zia e bâ ahundango tënë so: Ti duti be-ta-zo aga na aye ti nzoni biani? Tongana a ga na aye ti nzoni, a lingbi e duti be-ta-zo na zo wa, nga tongana nyen? Ambeni ye ti nzoni ni ayeke nyen?

[Kete tënë na gbe ni]

Kete tënë na lembeti 3]

Azo mingi agonda dutingo be-ta-zo ni gi na yanga