Jésus ayeke Nzapa wala zo?

JÉSUS atene: “Mbi yeke Lumière ti sese so; zo so aga na peko ti Mbi, fade lo tambela na yâ bingo pëpe, me fade lo yeke na Lumière so amû fini.” (Jean 8:12). Mbeni wandara ti ngoi ti akozo Chrétien asala tënë so na ndo Jésus: “Lo so A honde mosoro kue ti ndara na hingango ye na yâ Lo.” (aColossien 2:3). Bible atene nga: “Na so ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.” (Jean 17:3). Ti wara tâ hingango ye na ndo Jésus ayeke biani kota ye so alingbi ti mû lege na e ti kaï nzara ti e na lege ti yingo.

Azo mingi na ndo sese so amä tënë na ndo ti Jésus. A lingbi ti dë kite oko pëpe na ndo kota ngangu so lo sala ni na yâ mbaï ti azo. Biani, acalendrier so azo mingi ayeke sala kusala na ni na yâ ti ambeni kodoro aluti na ndo ti ngu so a bâ a tene a dü Jésus na ni. Mbeni kota bakari atene so, ti azo mingi, tongana ala ye ti diko angu so ayeke kozo na Jésus, ala yeke tënë kozo ti Christ nga tongana ala ye ti diko angoi so aga na peko ti lo, ala yeke tene na peko ti Christ.

Azo ayeke na abibe so ague kirikiri na ndo ti Jésus. Ti ambeni zo Jésus ayeke lani gi mbeni senge zo so asala kota ye mingi na yâ mbaï. Ye oko, ambeni zo nde ayeke voro lo tongana Nzapa ti Ngangu Ahon Kue. Ti ambeni zo so asala nzapa ti aHindou, ala haka Jésus Christ na nzapa ti ala ti aHindou ni so a di iri ti lo Krishna. Mingi ti ala atene so Christ ayeke lani mbeni nzapa si agbian tele ti lo ti ga zo. Jésus ayeke lani gi mbeni senge zo? Lo lingbi ti tene a voro lo? Ti mbilimbili ni, Jésus ayeke lani zo wa? Lo londo lani na ndo wa si lo ga? Salango ye ti lo akpa lani ti zo wa? Ti fadeso lo yeke na ndo wa? Mbeni buku so ayeke na aye mingi ti fa na ndo Jésus ayeke mû na e atâ kiringo tënë na ahundango ndo so. A yeke ye so e yeke bâ ni na yâ ti use article ni so.