‘Ye ti bata mbi alondo na Jéhovah’

Azo mingi mingi aga ti voro Jéhovah

BIBLE afa kozoni so na ngoi ti e azo ti amara kue ayeke kungbi ti ga na yâ bungbi ti Jéhovah ti voro lo. Na tapande, na lege ti Prophète Aggée, Jéhovah atene: “Mbi yengi amara kue, na fade ala ga na ye ti nzoni mingi ti ala, na fade Mbi sala si da so a si na gloire.” (Aggée 2:7). Esaïe na Michée kue atene so na “lâ ti nda ni,” so ti tene na ngoi ti e, fade azo mingi mingi ti amara nde nde ayeke ga ti voro Jéhovah tongana ti so lo ye.​—Esaïe 2:2-4; Michée 4:1-4.

Laso, aprophétie so ayeke ga tâ tënë biani? Zia e bâ ambeni ye so afa ni. Gi na yâ ti angu bale-oko so ahon, na yâ ti akodoro ahon 230, wungo ti azo ahon 3 110 000 amû tele ti ala na Jéhovah. Tongana a mû aTémoin ti Jéhovah 10, ala 6 awara batême na yâ ti angu ni so. Ti ngu so ahon, a bâ so na yâ ti apenze-ngbonga use zo oko si awara batême.a

Tongana ti so a si lani na ngoi ti akozo Chrétien, laso “azo mingi amä na bê, na ala changé lege ti ala, ala ga na Seigneur.” Atâa so a yeke gi wungo ni mveni pëpe si afa atene Nzapa ahiri deba nzoni na ndo azo ti lo, a fa so ‘tïtî Jéhovah’ ayeke na ala (Kusala 11:21). Ye nyen agboto azo kutu mingi so ti ga ti voro Jéhovah? Na lege wa guengo na li ni so andu mo?

Jéhovah ayeke gboto azo ti nzoni bê

Jésus atene lani polele: “Zo oko alingbi ga na Mbi pëpe, gi tongana Babâ so ato Mbi ahiri lo.” (Jean 6:44). Tongaso, a yeke biani Jéhovah si ayeke gboto azo so ayeke na yâ dutingo so alingbi ti tene ala “wara fini ti lakue lakue”. (Kusala 13:48). Yingo ti Nzapa alingbi ti pusu azo ti hinga so ye ti yingo amanke ala (Matthieu 5:3). Ambeni zo so yingo-ti-hinga ti ala ayeke gi ala, ala so agi gbä ti wara nzoni ye na yâ gigi ti ala, wala ala so mbeni ngangu kpale si ahon ndo ti ala alingbi ti to nda ti gi Nzapa, na tongaso ala wara lege ti manda ye na ndo ye so lo leke teti azo.​—Marc 7:26-30; Luc 19:2-10.

Kongregation ti aChrétien ayeke na kapa ti fango ye na azo na ndo ti Bible. Kapa ni so amû maboko na azo ti wara akiringo tënë na ahundango ndo so ala gi li ti ala na ni gbä. Kapa ni so agboto azo mingi ti ga ti voro Jéhovah.

Davide so lo yeke mbeni zo ti kango mbangi na kodoro ti Italie agi lani bê ti lo mingi na ndo tënë so: “Tongana Nzapa ayeke dä, ngbanga ti nyen azo mingi angbâ ti bâ pasi ndali ti aye ti kirikiri?” Atâa so tënë ti Nzapa anzere na lo pëpe, lo yeke hunda ngangu tënë so ti gi na yanga ti azo na ti bâ ye so ala yeke tene na ndo ni. Lo tene: “Mbi pensé pëpe ti wara mbeni nzoni kiringo tënë so mbi lingbi fade ti yeda na ni. Me Témoin ti Jéhovah so asala lisoro na mbi ahinga lani ti kanga bê, nga atënë so kue lo yeke fa na mbi aluti gi na ndo aversê ti Bible. Lisoro ni so mbi na lo e sala lani asala ye mingi na ndo ti mbi.” Davide agbian asalango ye ti lo na fadeso lo yeke sala na Jéhovah.

Ambeni zo ayeke gi ti hinga nda ni so zo ayeke na fini. Na ye so asala si ala wara lege ti ga na yâ bungbi ti Jéhovah. Na tapande, na kodoro ti Croatie, mbeni docteur ayeke dä so lo yeke bâ lege ti akpale ti kobela ti li. Ye oko, lo mveni nga lo yeke gi mbeni yorö ndali ti kobela ti li ti lo. Lo gue ti bâ mbeni mba ti lo so iri ti lo awu mingi. Tongana ti so lo pensé na ni pëpe, mba ti lo ni amû na lo numéro ti singa ti Béthel ti Zagreb, nga na iri ti mbeni Témoin so lo hinga lo. Mba ti lo ni atene na lo: “Mbi pensé azo so alingbi ti mû maboko na mo. Tongana mbi tene mo gue na église, mo yeke wara gi astatue, zo oko ti sala tënë na mo ayeke pëpe nga mo yeke manda ye oko pëpe na ndo tënë ti Nzapa. Mbi bâ ti mbi so église ni alingbi ti mû maboko na mo oko pëpe. Mbi tene na ambeni zo ti kobela ni ti gue na aTémoin ti Jéhovah, na mbi bâ so a yeke nzoni mo nga kue mo gue kâ.” A-Témoin ague abâ lo na ala sala étude na lo. Ambeni yenga na pekoni, docteur so ayeke na kobela ti li ayeke na ngia mingi ti tene so hingango ye na ndo aye so Nzapa aleke ti sala asala si gigi ti ni anzere.​—Zo-ti-fa-tene 12:15.

Mingi ti azo so ayeke wara angangu kpale abâ so gi tâ tënë ti Bible alingbi ti mû na ala dengo bê biani. Na Grèce, mbeni molenge-koli ti ngu mbasambala alondo na li ti da ti ekole lo tï na sese lo kui. Gi nze kete na pekoni, aTémoin ti Jéhovah use atingbi na mama ti lo. Ti tara ti dë bê ti lo, aTémoin ni asala lisoro na lo na ndo beku ti londongo ti akuâ (Jean 5:28, 29). Na ndo tënë so wali ni atï na toto. Aita-wali ni ahunda lo, ala tënë: “Tongana mo ye ti hinga ye mingi na ndo Bible, e lingbi ti gue ti bâ mo, me lawa?” Wali ni atene: “Tâ gi fade fadeso.” Wali ni ague na ala na yanga-da ti lo na ala to nda ti mbeni étude ti Bible na lo. Laso, wali ni so na azo ti da ti lo kue ayeke sala na Jéhovah.

Mo yeke mû mbage ti mo dä?

Atapande so afa biani ye so ayeke si na ndo sese mobimba. Jéhovah ayeke bungbi azo mingi ti amara nde nde na lo yeke fa ye na ala, ala yeke atâ wavorongo lo. Bungbi ti azo ni so ayeke ku na ngia ti sö kuâ na ngoi ti futingo ti aye ti sioni sese ti laso, na ti wara fini na ndo mbeni fini sese so mbilimbili ayeke duti dä.​—2 Pierre 3:13.

Ye so deba nzoni ti Jéhovah aga ni ayeke so kusala ti bungbingo azo ni so, so mara ni ayeke use pëpe, ayeke tambela nzoni na ayeke gue guengo ti hunzi (Esaïe 55:10, 11; Matthieu 24:3, 14). Mo yeke fa tënë ti Royaume na wâ? Tongana mo yeke sala tongaso, mo lingbi ti duti na beku so Nzapa ayeke mû maboko na mo. Mo lingbi nga ti sala oko tënë ti wasungo psaume so lo tene: “Ye ti bata mbi alondo na l’Eternel.”​—Psaume 121:2.

[Kete tënë na gbe ni]

[Kete tënë na lembeti 9]

“Zo oko alingbi ga na Mbi pëpe, gi tongana Babâ so ato Mbi ahiri lo.”​—JEAN 6:44

[Encadré na lembeti 8]

ZO WA AYEKE SALA SI YE NI AGUE NA LI NI?

“Tongana l’Eternel asala da ni pëpe, kusala ti ala so asala da ni ayeke senge senge.” ​—Psaume 127:1.

“Nzapa asala si a ko na a maï. Tongaso zo so alu ayeke ye pëpe, na zo so azia ngu dä ayeke ye nga pëpe; a yeke Nzapa so asala si a maï.” ​—1 aCorinthien 3:6, 7.