Ngbâ ti tambela tongana ti so Jésus Christ atambela giriri

“Zo so atene lo duti na yâ [Nzapa], a yeke ngbanga ti zo so ti tambela legeoko tongana [Jésus atambela] giriri.”​—1 JEAN 2:6.

BAZENGELE Paul atene so a lingbi e kpe loro so ayeke na “gbele e na bê so azia pëpe, lê ti e angbâ na Jésus, Walombe ti mabe ti e na Zo ti sala si mabe ni alingbi kue”. (aHébreu 12:1, 2). Ti duti be-ta-zo a hunda na e ti zia si lê ti e angbâ na ndo Jésus Christ.

² Tënë ti yanga ti Grec so a kiri pekoni ge na ‘lê angbâ na’, nda ni ayeke mingi. A ye ti tene “ti bâ gi mbeni ye sân ti bâ ndo kirikiri”, “ti zi lê ti mo na ndo mbeni ye na ti bâ mbeni nde” nga “ti ngbâ ti bâ gi mbeni ye oko.” Mbeni buku atene: “Mbeni zo ti Grèce so ayeke kpe loro ti mandako, bibe ti lo kue ayeke gi na ndo ti mandako ni nga na ndo matabisi ni. Me gi kete ngoi so lo yeke mû ti bâ azo so aga ayeke sala si loro ti lo ayeke kiri na peko. A yeke gi mara ti ye so si ayeke si na mbeni Chrétien.” Aye so ayeke gboto lê ti zo kirikiri alingbi ti kanga lege na e ti gue na li ni na lege ti yingo. A lingbi e ngbâ ti bâ gi Jésus. Me, e yeke gi ti bâ nyen na mbage ti lo? Tënë ti yanga ti Grec so a kiri pekoni na “walombe” aye ti tene “kota wafango lege, lo so ayeke mû li ni na yâ ti aye kue, so ti tene a yeke lo si ayeke zia tapande ni.” Ni la, ti ngbâ ti bâ Jésus aye ti tene e mû tapande ti lo.

³ Bible atene: “Zo so atene lo duti na yâ [Nzapa], a yeke ngbanga ti zo so ti tambela legeoko tongana [Jésus atambela] giriri.” (1 Jean 2:6). Ti ngbâ ti duti na yâ Nzapa, a lingbi e bata lakue akomandema ti Jésus legeoko tongana ti so Jésus abata lani akomande ti Babâ ti lo.​—Jean 15:10.

⁴ Ni la, ti tambela tongana ti so Jésus Christ atambela giriri a hunda na e ti bâ lo nzoni tongana Kota Wafango lege na ti mû tâ gi peko ti lo. Akpengba tënë so a lingbi e bâ ayeke so: Tongana nyen Christ ayeke fa lege na e laso? Tongana e mû tapande ti lo, a lingbi ti sala nyen na ndo ti e? Aye ti nzoni wa e yeke wara dä?

Aye so Christ amû ti fa lege na adisciple ti lo

⁵ Kozoni si lo kiri na yayu, Jésus Christ, so azingo lani na kuâ awe, asi na adisciple ti lo na lo mû na ala mbeni kpengba kusala. Lo tene: “I gue, i fa tënë na amara kue si ala ga adisciple.” Gi na oko ngoi ni so Kota Wafango lege na ala amû zendo so ni yeke duti na ala na yâ ti kua ni so; ni la lo tene: “Bâ, Mbi yeke na i lakue, même juska na nda ti ngoi so.” (Matthieu 28:19, 20). Na lege wa si Jésus ayeke duti na adisciple juska na nda ti aye ti ngoi so?

⁶ Jésus atene: “Me Consolateur, Yingo Vulu, Lo so fade Babâ ato Lo na iri ti Mbi, fade Lo fa na i ye kue, na Lo dabe i na tënë kue so Mbi tene na i.” (Jean 14:26). Yingo vulu so Nzapa atokua ni na iri ti Jésus ayeke fa lege na ayeke mû ngangu na e laso. A yeke yingo vulu si ayeke zi lê ti e na lege ti yingo nga ayeke mû maboko na e ti hinga “tâ nda ti ye ti Nzapa mveni.” (1 aCorinthien 2:10). Nga, asalango ye so Nzapa ayeke na ni tongana “ndoye, tâ ngia, siriri, be-nze-pepe, nzobe, bê ti sala nzoye, be-biani, tâ be-ti-molenge, na ngangu ti kanga nzara ti tele”, aye so kue so ayeke “lengo ti Yingo” ni (aGalate 5:22, 23). Tongana yingo vulu amû maboko na e, e lingbi ti maï asalango ye so.

⁷ Tongana e yeke manda Mbeti ti Nzapa na e yeke sala kue ti sala ye alingbi na ye so e manda ni, yingo ti Jéhovah ayeke mû maboko na e ti wara ndara, hingango nda ti ye, hingango ye, nga na ngangu ti hinga nda ti ye (aProverbe 2:1-11). Yingo vulu ayeke mû nga maboko na e ti kanga bê na gbele ahanda nga na atara (1 aCorinthien 10:13; 2 aCorinthien 4:7; aPhilippien 4:13). A wa aChrétien ti ‘sukula ala mveni ti lungula sioni kue ti mitele na ti yingo na ti ga azo ti be-vulu biani.’ (2 aCorinthien 7:1). Gi yingo vulu si alingbi ti mû maboko na e ti duti na sioni oko pëpe tongana ti so Nzapa ahunda na e. Biani, mbeni oko ti aye so Jésus ayeke sala na kua ti fa lege na e laso ayeke yingo vulu so Jéhovah si amû yanga na Molenge ti lo ti sala kua na ni.​—Matthieu 28:18.

⁸ Zia e bâ mbeni ye ni so Jésus ayeke sala kusala na ni ti fa lege na kongregation ti aChrétien laso. Na salango tënë ti singo ti lo nga na ti hunzingo ti aye ti ngoi ti laso, Jésus atene: “Zo nyen ayeke boi ti nzoni na ti ndara [wala “ngbâa be-ta-zo na ti ndara”, NW ]? so mveni ti lo azia lo na ndo azo ti da ti lo ti kangbi kobe na ala na l’heure ni so alingbi. Ngia ayeke na boi so, tongana mveni ti lo asi, lo bâ lo yeke sala tongaso. Biani, Mbi tene na i, fade lo zia lo na ndo ye ti lo kue.”​—Matthieu 24:3, 45-47.

⁹ “Mveni” ni ayeke Jésus Christ. “Ngbâa” ni ayeke bungbi ti aChrétien so a sa yingo na ndo ti ala so ayeke na ndo sese. A mû lani na bungbi ti ngbâa ni so kungba ti bâ ndo na ndo aye ti Jésus so ayeke na ndo sese ge na ti kangbi kobe ti yingo na ngoi so alingbi. A soro na popo ti bungbi ti “ngbâa be-ta-zo na ti ndara” so, mbeni kete wungo ti a-ancien so ayeke abiazo. A bungbi a-ancien ni so na ala ga ye so a hiri ni Wabatango Bungbi. Wabatango Bungbi ni ayeke sala kua na iri ti “ngbâa be-ta-zo na ti ndara”. Wabatango Bungbi ni ayeke bâ lege ti kusala ti fango tënë ti Royaume na ndo lê sese kue na lo yeke kangbi kobe ti yingo na ngoi so alingbi. A yeke tongaso si Christ ayeke sala kusala na aChrétien so a sa yingo na ndo ti ala, so ti tene “ngbâa be-ta-zo na ti ndara” nga na Wabatango Bungbi ti fa lege na kongregation.

¹⁰ Christ ayeke sala kusala nga na a-ancien wala asurveillant tongana “matabisi” ti fa lege na e. A mû ala tongana matabisi “ti sala si azo ti be-vulu alingbi na kusala ti fa tënë, si Tele ti Christ akpengba”. (aEphésien 4:8, 11, 12). A-Hébreu 13:7 asala tënë so na ndo ti ala, atene: “I dabe i na ala so afa lege na i, ala so afa tënë ti Nzapa na i giriri; i bi bê ti i na nda ti lege ti ala, na i sala tongana ala sala na lege ti mabe.” A yeke a-ancien si ayeke mû li ni na yâ ti kongregation. Teti so ala yeke sala ye tongana ti Christ Jésus, a yeke nzoni e mû tapande ti mabe ti ala (1 aCorinthien 11:1). E lingbi ti fa bê ti kiri singila ngbanga ti a-ancien so a mû ala tongana “matabisi” na lege so e yeke duti ndulu ti mä yanga ti ala.​—aHébreu 13:17.

¹¹ Biani, Jésus Christ ayeke sala kusala laso na yingo vulu, na “ngbâa be-ta-zo na ti ndara” nga na a-ancien ti kongregation ti fa lege na adisciple ti lo. Ti tene e tambela tongana ti so Christ atambela giriri aye ti tene nga e hinga ye so lo mû ni ti fa lege na e na e yeda na ni. A hunda nga na e ti mû tapande lo. Bazengele Pierre atene: “A hiri i teti ye so, teti Christ ahu pono teti i nga, na Lo mû tapande na i si i lingbi tambela na senda ti Lo.” (1 Pierre 2:21). Ti mû peko ti pendere tapande ti Christ a lingbi ti sala ye na ndo ti e tongana nyen?

Mû li ni na lege ti nzobe

¹² Atâa so Babâ ti Jésus amû lani na lo ngangu ti komande so mara ni ayeke use pëpe, Jésus asala kusala na ni na lege ti nzobe. A lingbi azo kue so ayeke na yâ ti kongregation, mbilimbili a-ancien asala si “azo kue ahinga nzobe ti [ala].” (aPhilippien 4:5; 1 Timothée 3:2, 3). A-ancien ayeke na mbeni ngangu ti komande na yâ ti kongregation, ndani la, tongana ala yeke sala kua na ngangu ti komande so ala yeke na ni, a yeke kota ye ti tene ala mû tapande ti Christ.

¹³ Jésus asala ye lani alingbi na ngangu ti adisciple ti lo. Lo hunda na ala pëpe aye so ahon ndo ti ngangu ti ala (Jean 16:12). Sân ti pusu ala na ngangu, Jésus awa adisciple ti lo ti “gi lege ngangu” ti sala ye so bê ti Nzapa aye (Luc 13:24). Lo sala ni lani na lege so lo mû li ni nga na lege so lo gi ti ndu bê ti ala si a pusu ala ti sala ye. Legeoko nga, laso a-ancien ayeke gi pëpe ti zia mbito na yâ ti aita ti ala, si kamene apusu ala ti sala na Nzapa. Nde na so, a-ancien ayeke wa aita ti ala ti zia si ndoye so aita ni ayeke na ni na mbage ti Jéhovah na Jésus nga na azo si apusu ala ti sala na Jéhovah.​—Matthieu 22:37-39.

¹⁴ Jésus asala ye ahon ndo ni pëpe na ngangu ti komande so a mû na lo ti gi ti komande fini ti azo. Lo hunda na azo lâ oko pëpe ambeni ye so ahon ngangu ti ala wala lo zia pëpe na sese gbâ ti andia ti tene azo abata ni. Nde na so, lo sala ye na kode ti ndu bê ti azo tongaso si a pusu ala ti sala kusala na akpengba-ndia so ayeke na yâ ti andia so Nzapa amû na lege ti Moïse (Matthieu 5:27, 28). Na tapande ti Jésus, a-ancien ayeke gbanzi tele ti ala ti zia na sese andia ti bê ti ala wala ala yeke luti ngangu pëpe na ndo ti abango ndo ti ala mveni. Na ndo tënë ti yungo bongo na ti salango pendere ti tele wala asalango ngia, a-ancien ayeke sala kusala na akpengba-ndia ti Nzapa ti ndu bê ti aita ti ala. A yeke akpengba-ndia tongana ti so a yeke wara na Michée 6:8; 1 aCorinthien 10:31-33; nga na 1 Timothée 2:9, 10.

Sala ye na be-nzoni na mû pardon

¹⁵ Christ azia na e mbeni tapande na yâ lege so lo yeke sala ye lani na gbele awokongo ti adisciple ti lo. Bâ tapande ti aye use so asi lani na ngoi ti ndangba bï ti lo na ndo sese tongana zo ti mitele. Tongana ala si lani na yaka ti Gethsémané, “Jésus akamata Pierre, na Jacques, na Jean ti gue na lo,” na lo tene na ala ti “lango pëpe.” Na pekoni “Lo hon kete, Lo tï na sese Lo hunda Nzapa” wala lo sambela. Tongana lo kiri, “lo bâ ala na lango”. Jésus asala ye tongana nyen? Lo tene : “Yingo aye biani, me mitele ayeke na ngangu pëpe.” (Marc 14:32-38). Ahon ti tene lo suku ngangu na Pierre, Jacques nga na Jean, Jésus asala lani ye na ala na be-nzoni. Gi na oko bï ni so, Pierre abele Jésus fani ota (Marc 14:66-72). Na pekoni Jésus asala ye tongana nyen na mbage ti Pierre? “Seigneur alondo awe biani, na Lo si na Simon [Pierre]!” (Luc 24:34). Bible atene: “Lo si na Céphas, na nda ni, Lo si na ala bale-oko na ndo ni use.” (1 aCorinthien 15:5). Ahon ti tene lo bata Pierre na bê, Jésus apardone lo ndali ti so Pierre agbian bê ti lo nga Jésus amû na lo ngangu. Na pekoni, Jésus amû na Pierre gbâ ti akusala.​—Kusala 2:14; 8:14-17; 10:44, 45.

¹⁶ Ndali ti so e yeke awasiokpari, tongana aita ti e Chrétien aso bê ti e na yâ ti mbeni ye, a lingbi e nga kue e sala ye na be-nzoni e mû pardon na ala tongana ti so Jésus asala lani, ni la pëpe? Pierre awa afon lo, lo tene: “I bi bê ti i na tënë oko, i sala be-nzoni na popo ti i, i ndoye tele ti i tongana aita, i duti na be-ti-ndoye na be-kota pëpe; i kiri sioni teti sioni pëpe, na i kiri sio tënë teti sio tënë pëpe, me i hiri tënë nzoni na ndo azo, teti A hiri i ti sala tongaso, si i lingbi wara nzoye ti héritier ti i.” (1 Pierre 3:8, 9). Ye ni ayeke duti tongana nyen tongana mbeni ita asala ye na e pëpe tongana ti so Jésus asala lani? Tongana ita ni ake ti sala be-nzoni na e wala lo ke ti pardone e? Ge nga a hunda na e ti sala ngangu ti mû tapande ti Jésus na ti sala ye tongana ti so Jésus asala lani.​—1 Jean 3:16.

Zia aye ti Royaume na kozo ndo

¹⁷ Ambeni ye ayeke dä so e yeke na bezoin ti mû tapande ti Jésus na yâ ni. Fango tënë ti Royaume ti Nzapa amû lani kozo ndo na yâ gigi ti Jésus. Na peko ti so lo fa tënë na wali ti Samarie ndulu na gbata ti Sychar, Jésus atene lani na adisciple ti lo: “Kobe ti Mbi ayeke ti sala ye so Lo so ato Mbi aye, na ti sala kusala ti Lo kue.” (Jean 4:34). Salango ye so bê ti Babâ ti lo aye amû lani ngangu na Jésus. A kpengba lo, a nzere na lo tongana kobe. Tongana e mû tapande ti Jésus na e sala gi ye so bê ti Nzapa aye, a yeke sala si e duti tâ na ngia biani.

¹⁸ Tongana ababâ na mama ayeke wa amolenge ti ala ti sala kusala ti ngoi kue na yâ bungbi ti Jéhovah, ala na amolenge ti ala ayeke wara gbâ ti adeba nzoni. Na ngoi so ala ngbâ kete, babâ ti ambeni molenge-koli so ayeke angbo awa amolenge ni ti zia na gbele ti ala ti sala kua ti pionnier. Na peko ti so ala hunzi mandango mbeti ti ala awe, amolenge ni aga apionnier. Tongana lo yeke pensé na ngia so lo wara na pekoni, babâ ni atene: “Amolenge ti e azia kamene na lê ti e pëpe. Na bê ti kiri singila e lingbi ti tene so ‘amolenge ayeke ye ti héritier so Jéhovah amû na zo.’ ” (Psaume 127:3). Tongana nyen amolenge alingbi ti bâ nzoni na lege ti salango kua ti pionnier? Mbeni mama ti amolenge oku atene: “Kusala ti pionnier amû maboko na amolenge ti mbi kue ti lë mbeni pendere songo na Jéhovah. A sala si mandango ye ti ala mveni aga nzoni ahon ti kozo. Kusala ni amû maboko na ala ti sala ye na ngoi ti ala na lege ti ndara nga afa na ala ti zia aye ti yingo na kozo ndo na yâ gigi ti ala. Atâa so a hunda na ala kue ti gbian ambeni ye mingi na yâ asalango ye ti ala, zo oko na popo ti ala adema tele ti lo pëpe tënë ni.”

¹⁹ Amaseka, nyen la i leke ti sala ande na yâ gigi ti i? I yeke gi ti wara mbeni kota kua ti nginza? Wala i yeke leke aye ti tene i sala kusala ti ngoi kue na yâ bungbi ti Jéhovah? Paul amû wango so: “I bata nzoni si i tambela na lege ni, i tambela tongana awabuba pëpe, me tongana awandara; i zia l’heure ti i ahon senge pëpe, teti ngoi so ayeke sioni.” Na lo kiri lo tene: “I duti tongana awabuba pëpe, me a lingbi i hinga nda ti ye so Seigneur aye.”​—aEphésien 5:15-17.

Duti be-ta-zo

²⁰ Ti tene e tambela tongana ti so Jésus atambela giriri a hunda na e ti mû tapande ti lo so lo duti be-ta-zo. Na ndo Jésus so aduti be-ta-zo, Bible atene: “Lo yeke legeoko na Nzapa giriri, me na lê ti Lo, ti lingbi na Nzapa ayeke ye ti gbu na ngangu pëpe, me Lo zia gloire ti Lo, Lo kamata tele ti ngbâa, Lo ga tongana zo; na teti Lo yeke na yâ tele ti zo, Lo sala Lo mveni kete, Lo mä Babâ ti Lo juska na kui, même kui ti keke ti [pasi, NW ].” Jésus angbâ be-ta-zo na lo mû mbage ti yanga-ti-komande ti Jéhovah, lo yeda na ye kue so bê ti Nzapa aye na mbage ti lo. Lo mä yanga juska na kui na ndo keke ti pasi. A lingbi e ‘bi bê ti e legeoko tongana Christ abi bê ti Lo giriri’ na e ngbâ lakue ti yeda na ye so bê ti Nzapa aye.​—aPhilippien 2:5-8.

²¹ Jésus aduti nga be-ta-zo na adisciple ti lo. Atâa so ala yeke lani na awokongo, Jésus andoye ala “juska na nda ni.” (Jean 13:1). Legeoko nga, a lingbi e zia lege pëpe na awokongo ti aita ti e ti pusu e ti ga zo ti kasango ndo.

Ngbâ ti mû tapande so Jésus azia

²² Biani, teti so e yeke awasiokpari, e lingbi pëpe ti tambela mbilimbili-kue gi tongana ti Jésus so ayeke tapande ti e so ayeke mbilimbili-kue. Ye oko, e lingbi ti sala ngangu ti mû tâ gi peko ti gere ti lo. Ti sala tongaso, a hunda na e ti hinga aye so Jésus ayeke mû ni ti fa lege na e, e yeda na ni nga e mû tâ gi peko ti tapande so lo zia ni.

²³ Ti ga azo so ayeke mû tapande ti Christ ayeke ga na e aye ti nzoni mingi. Ndali ti so e leke na bê ti e ti sala gi ye so bê ti Nzapa aye, me pëpe ye so bê ti e wani aye, gigi ti e ayeke duti nzoni na e yeke wara ngia (Jean 5:30; 6:38). E yeke duti na mbeni nzoni yingo-ti-hinga nga e yeke duti mbeni nzoni tapande. Jésus atisa lani azo kue so ayeke na akungba so ane ti ga na mbage ti lo ti wara dengo bê nga ti hu âme ti ala (Matthieu 11:28-30). Tongana e mû tapande ti Jésus, e nga kue e yeke dë bê ti aita ti e aChrétien. Zia e ngbâ ti tambela tongana ti so Christ atambela giriri.

Mo dabe mo na ni?

• Tongana nyen Christ ayeke fa lege na adisciple ti lo laso?

• Teti so Nzapa amû na ala ngangu ti komande, tongana nyen a-ancien alingbi ti mû li ni tongana ti Christ?

• Na gbele wokongo ti aita ti e, tongana nyen e lingbi ti mû tapande ti Christ?

• Na lege wa amaseka alingbi ti zia aye ti Royaume na kozo ndo?

[Ahundango tënë ti manda na ye]

1, 2. Ti ngbâ ti bâ Jésus aye ti tene nyen?

3, 4. (a) Ti tambela tongana ti so Jésus atambela giriri a hunda na e nyen? (b) Atënë wa a hunda ti tene e bâ ni nzoni?

5. Kozoni si lo kiri na yayu, zendo wa Jésus amû na adisciple ti lo?

6, 7. Tongana nyen Jésus ayeke sala kua na yingo vulu ti fa lege na e laso?

8, 9. Tongana nyen Christ ayeke sala kusala na “ngbâa be-ta-zo na ti ndara” ti fa lege na kongregation?

10. A lingbi e bâ a-ancien tongana nyen, na ngbanga nyen?

11. Laso Christ ayeke mû aye wa ti fa lege na adisciple ti lo? Na ti tambela tongana ti so Jésus atambela giriri aye ti tene nyen?

12. Na yâ tapande ti Jésus, ye wa a-ancien agi ti bâ ni mbilimbili ti mû pekoni?

13, 14. Tongana ala yeke wa aita ti ala ti sala na Nzapa, tongana nyen a-ancien alingbi ti mû tapande ti Christ?

15. Tongana nyen Jésus asala ye lani na gbele awokongo ti adisciple ti lo?

16. Na ngoi so aita ti e aso bê ti e, tongana nyen e lingbi ti mû tapande ti Jésus?

17. Nyen la afa so Jésus azia lani salango ye so bê ti Nzapa aye na kozo ndo na yâ gigi ti lo?

18. Tongana a wa amolenge ti mû kusala ti pionnier, ye ti nzoni wa ayeke ga na pekoni?

19. Ye wa a lingbi amaseka abâ ni mbilimbili ti sala na yâ gigi ti ala?

20, 21. Na lege wa Jésus ayeke lani be-ta-zo? Na tongana nyen e lingbi ti mû tapande ti lo?

22, 23. Aye ti nzoni wa e yeke wara tongana e mû gi tapande ti Jésus?

[Foto na lembeti 23]

A-ancien ayeke mû maboko na e ti yeda na fango lege ti Christ

[Afoto na lembeti 24, 25]

Amaseka, i yeke leke ti sala nyen ti wara ngia na yâ fini ti i ti Chrétien?