Atënë so azo ahunda

Tongana mbeni Chrétien ayeke sala angia ti vidéo so aye ti ngangu tongana tiri, bira na sango mênë ayeke na yâ ni, ye so alingbi ti buba songo ti lo na Jéhovah?

David so ayeke lani gbia ti Israël atene: “L’Eternel atara azo ti mbilimbili; me Lo ke zo ti sioni na zo so andoye sioye ti ngangu.” (Psaume 11:5). Na yanga ti Hébreu tënë “ke” nda ni aye ti tene “ti ga wato ti mbeni zo.” Tongaso, zo kue so andoye ye ti ngangu lo yeke sala si lo wani lo ga wato ti Nzapa. Ye oko, tënë so e yeke na bezoin ti bâ ni mbilimbili ayeke so: Tongana mbeni Chrétien ayeke sala ambeni ngia ti vidéo, angia ni so ayeke pusu lo ti ndoye ye ti ngangu?

Angia ti vidéo so aye ti ngangu ayeke na yâ ni ayeke gonda salango kusala na aye ti bira. Fani mingi azo so aye tënë ni ayeke manda akode ti tiringo bira. Mbeni mbeti-sango (The Economist) atene: “Aturugu ti Amerika ayeke sala kusala mingi na angia ti vidéo so aye ti ngangu ayeke na yâ ni ti manda na kode ti salango bira. Na popo ti angia ti vidéo so, a yeke wara ambeni so azo ayeke kä ni na gala.”

Ti tâ tënë ni, azo so ayeke sala angia ni so ayeke fâ atâ zo pëpe. Me mara ti angia ni so ayeke sala nyen na bê ti azo so ayeke sala ni? (Matthieu 5:21, 22; Luc 6:45). Tongana mbeni zo atene na mo so a nzere na lo ti bâ so lo yeke kpo azo so ayeke atâ zo pëpe na zeme, lo pika ala na ngombe, lo dë mbeni mbage ti tele ti ala wala lo fâ ala, mo yeke bâ lo tongana nyen? Ka tongana zo ni ayeke mû ngoi mingi na yâ ti yenga oko oko ti sala mara ti aye ni so na lege ti angia ti vidéo, na a ga mbeni ye so lo ye gi ti sala ni lakue lakue? Gbä, mo yeke tene so na bê ti lo kâ lo ndoye ye ti ngangu mingi, legeoko tongana zo so ayeke bâ porno ayeke sala nga nzara ti ye ti pitan.​—Matthieu 5:27-29.

Mo hinga tongana nyen Jéhovah ake zo so andoye aye ti ngangu? David atene so Jéhovah ‘ake’ zo tongaso, so ti tene Jéhovah ake lo na bê oko. Na ngoi ti Noé, Jéhovah afa lani tongana nyen lo ke tâ na bê oko azo so andoye ye ti ngangu. Jéhovah atene na Noé: “Nda ti mi kue aga na gbele Mbi, teti sese asi na sioye ti ngangu na lege ti ala. Bâ, fade Mbi futi ala legeoko na sese.” (Genèse 6:13). Tâ Nzapa afuti lani sese ni ndali ti so azo ni asala aye ti ngangu. Me lo bata Noé na sewa ti lo, gi azo miombe so aye lani tënë ti aye ti ngangu so pëpe.​—2 Pierre 2:5.

A lingbi azo so aye ti duti kamarade ti Nzapa apika ‘épée ti ala si a ga soc, na likongo ti ala si a ga zeme ti fâ tikeke’. Ahon ti tene ala ndoye ye ti ngangu, ala “manda lege ti sala bira mbeni pëpe.” (Esaïe 2:4). Ti ngbâ ti duti kamarade ti Nzapa ahon ti ga wato ti lo, a hunda na e ti ‘zia sioye, na e sala nzoni’. A lingbi nga e ‘gi lege ti siriri, na e tambela dä.’​—1 Pierre 3:11.

Tongana e bi tele ti e awe na yâ salango angia ti vidéo so aye ti ngangu ayeke na yâ ni, ye ni ayeke duti tongana nyen? Tongana a yeke tongaso, a lingbi e leke tâ na bê ti e kue ti nzere na Jéhovah. Ni la, e yeke zia lege ti ye so lo ke tënë ni. Biani, a lingbi e sambela ti wara mungo maboko ti Yingo Vulu ti Nzapa. Tongana e sala tongaso, a yeke mû lege na e ti zia salango ye so ayeke buba dutingo ti e na lege ti yingo. Tongana e zia lege na siriri, nzobe nga na ngangu ti kanga nzara ti tele ti sala si tambela ti e ague oko na andia ti Nzapa, e lingbi ti dö lege ti sioni ye so ti zia.​—Luc 11:13; aGalate 5:22, 23.