‘I lango pëpe’: l’heure ti fango ngbanga ni asi awe!

Atënë ti yâ ti article so aluti na ndo brochure I lango pëpe! so asigigi na ngoi ti akota bungbi ti district so a sala ni na ndo sese kue na ngu 2004 ti si na 2005.

“I bata [lango pëpe, NW ], teti i hinga lâ ti gango ti Seigneur ti i pëpe.”​—MATTHIEU 24:42.

YE NYEN mo yeke sala tongana mo mä so mbeni zo ti nzi ayeke tambela na vaka ti mo na lo yeke nzi azo? Ti bata fami ti mo na akungba ti mo, mo yeke sala hange; teti zo ti nzi ni ayeke tokua na mo mbeti ti fa na mo ngoi ti gango ti lo pëpe. Nde na so, lo yeke ga gi yeke tongaso, na ngoi so mo ku lo pëpe.

² Fani mingi, Jésus amû tapande ti asalango ye ti zo ti nzi ti fa na ye (Luc 10:​30; Jean 10:​10). Na ndo ti aye so ayeke si na lâ ti nda ni na so ayeke gue juska na gango ti lo ti fâ ngbanga, Jésus amû gbotongo mê so: “Tongaso i bata, teti i hinga lâ ti gango ti Seigneur ti i pëpe. Me a lingbi i hinga ye so, tongana mveni ti da ahinga l’heure ni so wanzi ayeke ga, ka lo bata da ti lo, lo zia wanzi age dû na da ti lo pëpe.” (Matthieu 24:​42, 43). Tongaso, Jésus ahaka gango ti lo na singo ti mbeni zo ti nzi, so zo aku tele ti lo na ni pëpe.

³ Tapande ni alingbi lani biani, teti azo ayeke hinga ande tâ lango ti gango ti Jésus pëpe. Kozoni, na yâ oko prophétie ni, Jésus atene: “Tënë ti lâ ni kâ na tënë ti l’heure ni kâ, zo oko ahinga pëpe, même a-ange ti yayu ahinga pëpe, na Molenge ni ahinga pëpe, gi Babâ ahinga.” (Matthieu 24:​36). Ni la, Jésus awa mingi awamango lo, lo tene: “I bata nga.” (Matthieu 24:​44). Ala so amä biani gbotongo mê ti Jésus fade ala leke tele ti ala ti ku, ala sala ye na lege ni, atâa ngoi wa lo yeke ga ti sala ye alingbi na ngbanga so Jéhovah afâ.

⁴ Ambeni kota hundango tënë alondo: Gbotongo mê ti Jésus abâ gi azo ti sese? wala a hunda nga na atâ Chrétien “ti bata” wala ti lango pëpe? Ngbanga ti nyen a yeke kota ye ti sala ni hio fadeso? Na ye nyen a hunda na zo ti sala?

A gboto mê ti zo wa?

⁵ A yeke tâ tënë so gango ti Seigneur ayeke tongana ti zo ti nzi teti azo ti sese so ake ti mä gbotongo mê ti futingo so ayeke ga na loro (2 Pierre 3:​3-7). Me, ti atâa Chrétien, a yeke nga legeoko? Bazengele Paul asû lani tënë so na amba ti lo awamabe: “I mveni i hinga tënë so biani, fade lâ ti Seigneur aga tongana wanzi na bï.” (1 aThessalonicien 5:2). Ti e, e hinga biani so ‘lâ ti Jéhovah’ ayeke ga. So aye ti tene fade e yeke zia ti bata lê ti e na zingo ni? Bâ so a yeke lani na adisciple ti lo si Jésus atene: ‘Na l’heure ni so i yeke ku pëpe, fade Molenge Ti Zo aga.’ (Matthieu 24:​44). Kozoni, na ngoi so lo yeke wa adisciple ti lo ti gi lakue Royaume, Jésus agboto mê ti ala, lo tene: ‘I bata nga, teti na l’heure ni so i yeke ku pëpe, fade Molenge Ti Zo aga.’ (Luc 12:​31, 40). A yeke polele pëpe so Jésus ayeke bi bê na ndo ti adisciple ti lo tongana lo wa ala, lo tene: “I bata” wala i lango pëpe?

⁶ Ngbanga ti nyen a lingbi e “bata” wala e leke tele ti e ti ku? Jésus afa nda ni: “Fade azo use ayeke na yaka; a lungula zo oko, a zia mbeni. Fade awali use ayeke ne fuku na moulin; a lungula wali oko, a zia mbeni.” (Matthieu 24:​40, 41). Na lâ ti futingo sioni sese so, fade ‘a lungula’ wala a sö azo so aleke tele ti ala awe. Fade a “zia” wala a futi ambeni teti na kion ala gi aye ti bê ti ala mveni. Na popo ti ala, peut-être a lingbi ti wara azo so kozoni ahinga tâ tënë me so angbâ ti bata lê ti ala na zingo ni pëpe.

⁷ E hinga tâ lango ti hunzingo ti aye ti sioni sese so pëpe. Ye so amû lege na e ti fa na gigi so e sala na Nzapa na nzoni bibe. Ngbanga ti nyen e tene tongaso? Ngbanga ti so ambeni zo abâ ti ala atene nda ni angbâ ti yo. Mawa ni ayeke so, ambeni Chrétien so abâ ye ni tongaso asala kusala ti Jéhovah na wâ mbeni pëpe. Ye oko, na mungo tele ti e na Jéhovah, e yeda ti mû tele ti e kue ti sala gi na lo oko. Ala so ahinga Jéhovah nzoni abâ so ti ku ngbii ti tene lango angbâ kete si ala sala ye na wâ teti lo, ayeke sala ngangu na ndo ti Nzapa oko pëpe. Jéhovah abâ ye so ayeke na yâ bê ti zo.​—1 Samuel 16:⁠7.

⁸ Ngbanga ti so e ye Jéhovah na bê ti e kue, e yeke na kota ngia ti sala ye so lo ye (Psaume 40:9; Matthieu 26:​39). Nga, e ye ti sala na Jéhovah teti lakue lakue. Atâa so a hunda na e ti ku kete ahon ti so e ku tele ti e na ni, a sala si kota beku so akiri na peko pëpe, me a ngbâ lakue ngangu. Kota ye ni ayeke so, e lango pëpe ngbanga ti so e yeke ku kungo ti bâ kpengba ye so lâ ti Jéhovah ayeke sala ande na yâ gango tâ tënë ti aye so lo leke ti sala. Kota nzara ti bê ti e ti nzere na lê ti Nzapa apusu e ti sala kusala na awango ti Tënë ti lo na ti zia na kozo ndo Royaume ti lo na yâ fini ti e (Matthieu 6:​33; 1 Jean 5:⁠3). Zia e bâ fadeso tongana nyen ti lango pëpe alingbi ti sala ngangu na ndo adesizion ti e nga na dutingo ti e ti lâ oko oko.

Fini ti mo ayeke gue na mo na ndo wa?

⁹ Laso, azo mingi ahinga so angangu kpale na aye ti songo bê ayeke si lâ na lâ, na peut-être bê ti ala anzere pëpe na lege so fini ti ala ayeke mû. Ye oko, ala hinga tâ nda ti aye so ayeke tambela na ndo sese so? Ala hinga so e yeke na yâ “nda ti ngoi so”? (Matthieu 24:⁠3). Ala hinga so kion, salango ngangu, même kengo tënë ti Nzapa afa so angoi so ayeke “lâ ti nda ni”? (2 Timothée 3:​1-⁠5). A lingbi ala zingo hio ti bâ nda ti aye kue so ayeke si na ti gbu li na ndo lege so fini ti ala ayeke gue na ala dä.

¹⁰ Ka ti e, tënë ni ayeke tongana nyen? Lâ oko oko, e yeke na gbele adesizion so andu gingo kua, seni ti e, sewa ti e na vorongo ti e. E hinga ye so Bible atene na e yeke sala ngangu ti mû pekoni. Tongaso, a yeke nzoni zo oko oko ahunda tele ti lo: ‘Mbi zia lege na atënë ti gingo bê ti lâ na lâ ti gue na mbi yongoro na aye ti yingo so mbi zia na gbele mbi? Mbi yeke zia lege na senda-ndara nga na bibe ti sese so ti fa na mbi aye so a lingbi mbi sala?’ (Luc 21:​34-​36; aColossien 2:8). E yeke na bezoin ti fa na gigi lakue so e zia bê ti e kue na Jéhovah, me na hingango ye ti e mveni pëpe (aProverbe 3:5). Na lege so, fade e ngbâ ti “gbu fini so ayeke tâ fini biani”: fini ti lakue lakue na yâ fini sese ti Nzapa.​—1 Timothée 6:​12, 19.

¹¹ Na yâ ti Bible, a wara atapande mingi so alingbi ti mû maboko na e ti lango pëpe. Bâ ye so asi na ngoi ti Noé. Nzapa abâ so a yeke nzoni ti gboto mê ti azo ngoi mingi kozoni. Me nde na Noé na sewa ti lo, azo adengi mê pëpe (2 Pierre 2:5). Na ndo tënë ni, Jésus atene: “Legeoko tongana azo asala na lâ ti Noé, fade azo asala tongaso na lâ ti singo ti Molenge Ti Zo nga. Teti na lâ ni kozoni si moa aga, ala te, ala nyon, akoli akamata wali, na awali akamata koli, juska lâ ni so Noé alï na yâ arche, na ala hinga tënë ni pëpe juska moa aga akamata ala kue; fade singo ti Molenge Ti Zo ayeke tongaso.” (Matthieu 24:​37-​39). E manda nyen na yâ ti tënë so? Tongana ambeni na popo ti e azi lege na aye ti lâ oko oko, même akusala so ayeke na lege ni, ti hon ndo ti aye ti yingo so Nzapa awa e ti zia na kozo ndo, a lingbi e gbu li nzoni na ndo dutingo ti e.​—aRomain 14:17.

¹² Zia e bâ nga ngoi ti Lot. Gbata ti Sodome so Lot na sewa ti lo aduti ândö dä ayeke na mosoro mingi, me asioni salango ye ayeke nga dä mingi. Jéhovah atokua a-ange ti lo ti futi kodoro ni. A-ange ni awa mingi Lot na sewa ti lo ti kpe Sodome na ti bâ ndo na peko pëpe. Legeoko na wango ti a-ange ni, ala kpe gbata ni. Ye oko, bê ti wali ti Lot ayeke lani gi na ndo akungba so lo zia na peko ti lo na Sodome. Na kengo yanga, lo bâ ndo na peko, na lo wara kuâ (Genèse 19:​15-​26). Jésus amû lani gbotongo mê so: “I dabe i na wali ti Lot.” E yeke sala ye alingbi na gbotongo mê so?​—Luc 17:⁠32.

¹³ Ala so giriri abata agbotongo mê so Nzapa amû asö kuâ. A yeke ye so asi lani na Noé na sewa ti lo, nga na Lot na amolenge ti lo ti wali (2 Pierre 2:⁠9). Na ngoi so e yeke bi bê na ndo agbotongo mê ti atapande so, bê ti e awara ngangu na lege ti tënë ti salut so ayeke dä teti ala so andoye mbilimbili. Ye so asala si bê ti e asi na beku ti bâ gango tâ tënë ti zendo ti Nzapa ti “ayayu ti fini na sese ti fini” so fade “mbilimbili aduti na yâ ni.”​—2 Pierre 3:⁠13.

‘L’heure ti fango ngbanga ni asi awe’!

¹⁴ Na ngoi so e yeke lango pëpe so, e lingbi ti ku nyen na pekoni? Mbeti ti Apocalypse afa aye so ayeke si na peko ti tele na yâ gango tâ tënë ti ye so Nzapa aleke ti sala. Tongana e ye ti fa so e leke tele ti e ti ku, a yeke kota ye ti sala ye alingbi na ye so a tene. Prophétie ni afa polele aye so fade asi “na lâ ti Seigneur”, lâ so ato nda ni na ngoi so a zia Christ na ndo ngende ti gbia na yayu na ngu 1914 (Apocalypse 1​10). Apocalypse agboto lê ti e na ndo mbeni ange so a mû na lo mbeni “Tene-nzoni ti lakue lakue ti fa na azo.” Lo tene na kongo: “I kpe mbito ti Nzapa, i mû gloire na Lo, teti l’heure ti Lo ti fâ ngbanga asi awe.” (Apocalypse 14:​6, 7). “L’heure” so ayeke mbeni kete ngoi; a ndu ngoi so fade Nzapa ayeke dë ngbanga ni, nga so fade a yeke sala ye alingbi na angbanga so a dë, so a fa tënë ni na yâ ti prophétie so. Laso, e yeke na yâ ti ngoi so.

¹⁵ Ti ngoi so e yeke dä so, kozo si l’heure ti fango ngbanga so ahunzi, a wa e mingi: “I kpe mbito ti Nzapa, i mû gloire na Lo.” Ye so andu nyen? A lingbi tâ kpengo mbito ti Nzapa apusu e ti kpe sioye (aProverbe 8:​13). Tongana e kpe Nzapa, fade e yeke mä lo na kota yekiango ndo. Fade akusala nde nde ayeke kanga lege na e pëpe ti diko Tënë ti lo, Bible, lakue lakue. Fade e yeke bâ wango ti lo so ahunda ti ga na abungbi tongana senge ye pëpe (aHébreu 10:​24, 25). Fade e yeke yekia matabisi ti e ti fa na wâ nzo tënë ti Royaume ti Nzapa so Gbia Messie ayeke na ndo ni. Fade e yeke zia bê ti e na Jéhovah na ngoi kue nga na bê ti e kue (Psaume 62:⁠9). So e hinga e tene Jéhovah ayeke Gbia ti yayu na sese, e yekia lo na yengo dä na bê ti e kue ti duti lakue na gbe ti Komandema ti lo. Mo yeke kpe mbito ti Nzapa biani na mo yeke mû na lo gloire na alege so kue?

¹⁶ Apocalypse chapitre 14 afa nga na ndo ni ambeni ye so asi, so ayeke duti ande na ngoi ti fango ngbanga ni. A sala tënë ti Babylone ti Kota, so ayeke bungbi ti avorongo nzapa ti wataka kue ti sese; a tene: “Kota Babylone atï awe, a tï awe.” (Apocalypse 14:⁠8). Biani, na lê ti Nzapa, Babylone ti Kota atï awe. Na ngu 1919, awakua ti Jéhovah asigigi na gbe ti afango ye na asalango ye ti Babylone, so teti angu saki mingi, asala ngangu na ndo azo na amara (Apocalypse 17:​1, 15). Ti londo na ngoi ni so, ala lingbi fadeso ti maï tâ vorongo Nzapa. Fango nzo tënë ti Royaume ti Nzapa aduti na ndo sese kue ngbele ye na ngu ni so.​—Matthieu 24:⁠14.

¹⁷ Me ngbanga ti Nzapa na ndo Babylone ti Kota ade ti hunzi pëpe. Futingo ti lo ti biaku biaku ayeke si na yâ ti kete ngoi (Apocalypse18:​21). Na lege ni, Mbeti ti Nzapa awa mingi azo na ndo kue: “I sigigi na kodoro so [Kota Babylone] si i sala beoko na siokpari ti lo pëpe.” (Apocalypse 18:​4, 5). Tongana nyen ti sigigi na yâ Babylone ti Kota? Tënë ni andu gi pëpe ti fâ akamba kue na vorongo nzapa ti wataka. Ngangu ti Babylone ayeke na yâ gbâ ti amatanga nga na angobo ti salango ye ti azo, bango ndo ti sese so na ndo tënë ti pitan so azo ayeda na ni, guengo na li ni ti asalango ngia so andu aye ti ayingo sioni, na ambeni ye na ndo ni. Ti bata lê ti e na zingo ni, a lingbi salango ye ti e na anzara ti bê ti e afa na gigi so e kangbi biaku awe na Babylone ti Kota na yâ aye kue.

¹⁸ Apocalypse 14:​9, 10 afa nga mbeni ye na ndo ‘l’heure ti fângo ngbanga’ so a sala tënë ni. Mbeni ange atene: “Tongana mbeni zo asambela nyama ni na image ti lo, na lo wara marque ni na ndole ti lo wala na maboko ti lo, fade lo nyon vin ti ngonzo ti Nzapa.” Ngbanga ti nyen? Ngbanga ti so “nyama ni na image ti lo” ayeke afä ti komandema ti azo so ayeda pëpe na kota yanga-ti-komande ti Jéhovah. A-Chrétien so alango pëpe asala ye na hange ti tene bango ndo ti ala wala kusala ti ala aduti pëpe mbeni marque ti nyama ni, si ala ga pëpe angbâa ti ala so ayeda pëpe na kota yanga-ti-komande ti tâ Nzapa, Jéhovah, so ahon aye kue. A-Chrétien ahinga so a zia gere ti Royaume ti Nzapa na yayu awe, so fade a yeke futi ande ayanga-ti-komande ti azo kue, na fade lo yeke ngbâ teti lakue lakue.​—Daniel 2:⁠44.

Girisa pëpe ti sala ye hio!

¹⁹ Teti lâ ti nda ni aga ndulu ti hunzi, aye so ayeke sala ngangu na ndo ti zo nga na atara ayeke gue gi guengo na li ni. Dutingo ti e na yâ ti sese so nga teti so e yeke awasiokpari asala si aye mingi aga na e vundu. A yeke aye tongana seni so ayeke nzoni pëpe, gango mbakoro, kui ti mbeni zo so e ndoye lo, atënë ti songo bê, bê so anze tongana azo mingi ayeda pëpe na Tënë ti Nzapa so e fa, na ambeni ye mingi nga. Girisa lâ oko pëpe so Satan aye mbeni ye nde pëpe gi ti mû akpale so e tingbi na ni ti sala si e kiri na peko, ti tene e kaï fango nzo tënë wala e zia ti tambela alingbi na ye so Nzapa ahunda (aEphésien 6:​11-​13). Tongana e bâ ngoi so e yeke dä so, a yeke pëpe ngoi ti tene e girisa ti sala ye hio.

²⁰ Jésus ahinga lani so fade aye ti ngangu so aga na ndo ti e ayeke ti sala si e kiri na peko, ni la lo wa e, lo tene: “I bata, teti i hinga lâ ti gango ti Seigneur ti i pëpe.” (Matthieu 24:​42). Tongaso, zia e ngbâ ti zi lê ti e na ndo ngoi so e yeke dä laso. Zia e sala hange na amayele ti Satan so alingbi ti sala si e kiri na peko wala e zia tâ tënë. Zia e leke na bê ti e ti fa nzo tënë ti Royaume ti Nzapa na wâ nga na bê kue. Biani, zia e girisa ti sala ye hio pëpe tongana e mä gbotongo mê ti Jésus, so lo tene: “I bata” wala i lango pëpe. Na salango tongaso, fade e yeke ga na gonda na ndo ti Jéhovah na e yeke duti na popo ti ala so ayeke na beku ti wara ande adeba nzoni ti lo lakue lakue.

Fade mo kiri tënë tongana nyen?

• E hinga tongana nyen so gbotongo mê ti Jésus ti “bata” wala ti lango pëpe abâ atâ Chrétien?

• Atapande ti gbotongo mê wa na yâ ti Bible alingbi ti mû maboko na e ti “bata” wala ti lango pëpe?

• L’heure ti fango ngbanga ayeke nyen? Na a wa e mingi ti sala nyen kozoni si a hunzi?

[Ahundango tënë ti manda na ye]

1, 2. Jésus ahaka gango ti lo na tapande wa?

3, 4. (a) Ti mä gbotongo mê ti Jésus andu nyen? (b) Ahundango tënë wa alondo?

5. E hinga tongana nyen so gbotongo mê so atene ti “bata” abâ atâ Chrétien?

6. Ngbanga ti nyen a lingbi e ngbâ ti “bata”?

7. So e hinga tâ lango ti nda ni pëpe, a mû lege na e ti sala nyen?

8. Tongana nyen ndoye teti Jéhovah apusu e ti lango pëpe?

9. Ngbanga ti nyen a lingbi azo ti sese azingo hio ti bâ nda ti aye so ayeke si laso?

10. A lingbi e sala nyen ti hinga so e lango pëpe?

11-13. Ye wa e lingbi ti manda na lege ti aye so asi (a) na ngoi ti Noé? (b) na ngoi ti Lot?

14, 15. (a) “L’heure” ti fângo ngbanga andu nyen? (b) Ti ‘kpe mbito ti Nzapa na ti mû gloire na lo’ aye ti tene nyen?

16. Ngbanga ti nyen e lingbi ti tene so tënë ti ngbanga so ayeke na Apocalypse 14:8 na ndo Babylone ti Kota aga tâ tënë awe?

17. Ti sigigi na yâ Babylone ti Kota andu nyen?

18. Na bango ye so a tene na Apocalypse 14:​9, 10, ye wa aChrétien so alango pëpe asala hange ti kpe ni?

19, 20.  (a) Teti lâ ti nda ni aga ndulu ti hunzi, ye wa a lingbi e hinga so Satan ayeke tara ande ti sala ni? (b) Ye wa a lingbi e leke na bê ti e ti sala?

[Foto na lembeti 23]

Jésus ahaka lani gango ti lo na singo ti mbeni zo ti nzi

[Foto na lembeti 24]

Futingo ti Babylone ti Kota aga ndulu awe

[Afoto na lembeti 25]

Zia e leke na bê ti e ti fa tënë na wâ mingi nga na bê kue