Dengi mê ti mä amba ti mo na mbeni lege so afa so mo ye ala

“MERCI so mo dengi mê ti mä mbi.” A ninga pëpe awe so mbeni zo asala tënë so na mo? So nzoni tënë biani! Mingi ti azo aye tënë ti mbeni zo so adengi mê ti mä ala nzoni. Tongana e yeke ndulu ti dengi mê ti mä azo, ye so alingbi ti dë bê ti ala so anze wala ala so akpale ahon ndo ti ala. Ti duti ndulu ti dengi mê ti mä zo ayeke mû maboko na e ti wara ngia na tele ti amba ti e. Na yâ kongregation ti aChrétien, ti dengi mê ti mä amba ti e na mbeni lege so afa so e ye ala ayeke kota ye so afa na gigi so ‘e yeke bi bê ti e na ambeni zo na popo ti e ti wa ala si ala ye azo, na ala sala kusala nzoni’.​—aHébreu 10:24.

Ye oko, azo mingi ayeke dengi mê nzoni pëpe ti mä amba ti ala. Mingi ni ala ye ti mû gi wango na azo, wala ti fa peko ti aye so asi na ala mveni, ahon ti dengi mê ti mä aye so amba ti ala ayeke tene na ala. Ti dengi mê ti mä zo nzoni ayeke mbeni ye so ayeke sala ni na kode. Tongana nyen e lingbi ti manda ti dengi mê ti mä zo na mbeni lege so afa so e ye lo?

Mbeni kpengba ye ni

Jéhovah ayeke “Maître” ti e wala Kota wafango ye na e (Esaïe 30:20). Lo lingbi ti fa na e ye mingi na ndo kode ti dengingo mê nzoni ti mä amba ti e. Bâ tongana nyen Jéhovah amû maboko lani na prophète Elie. Sioni tënë ti Gbia-wali Jézabel azia mbito na bê ti lo na ye so asala si lo kpe na yando na lo tene ni ye ti kui. Kâ, ange ti Nzapa asala tënë na lo. Na ngoi so prophète Elie afa tënë ti mbito so ayeke na bê ti lo, Jéhovah adengi mê amä lo, na pekoni Lo fa na Elie kota ngangu ti Lo. Ye nyen asi na pekoni? Mbito asala Elie mbeni pëpe na lo kiri na kusala ti lo (1 aGbia 19:2-15). Ngbanga ti nyen Jéhovah ayeke mû ngoi ti dengi mê ti mä awakua ti lo tongana ala fa agingo bê ti ala na lo? A yeke ngbanga ti so lo yeke bata ala, so ti tene lo yeke bi bê ti lo na ala (1 Pierre 5:7). E bâ na ndo so mbeni kpengba ye so ayeke mû lege na mo ti dengi mê nzoni ti mä amba ti mo: ti bi bê ti mo na ala na ti mû tele ti mo kue na ala.

Tongana mbeni koli na Bolivie asala lani mbeni kota siokpari, a nzere na lo mingi so mbeni ita ti lo ti yingo amû tele ti lo kue na lo. Lo fa pekoni, lo tene: “Mbi wara lani mbeni vundu so mara ni ayeke use pëpe. Tongana ita so amû lani ngoi ti dengi mê ti mä mbi pëpe, ka mbi yeke ndulu ti zia bungbi ti Jéhovah. Lo sala lani tënë mingi pëpe, me so mbi hinga lo mû tele ti lo kue na mbi na so lo dengi mê ti mä mbi a sala si mbi wara ngangu. Mbi hunda lani pëpe ti tene lo fa na mbi ye so mbi lingbi ti sala ti leke na kpale ti mbi ndali ti so mbi mveni mbi hinga ye so a lingbi mbi sala ni. Me ye so mbi ye lani ayeke ti hinga so mbeni zo ahinga vundu so asala mbi. So lo dengi mê ti mä mbi a sala si vundu ni ahon ndo ti mbi pëpe.”

Zo so ayeke kota tapande ti dengingo mê ti mä zo na mbeni lege so afa so lo ye zo ayeke Jésus Christ. Kete na peko ti kuâ ti lo, adisciple ti lo use alondo na Jérusalem ti gue na mbeni kete kodoro so ayo kilomètre 11 tongaso. Biani bê ti ala anze lani mingi. Tongaso Jésus Christ so azingo na kuâ awe ato nda ti tambela na tele ti ala. Na lege ti ambeni tënë so lo leke ni nzoni, Jésus ahunda ala ti hinga tënë so ala yeke gi bê ti ala na ndo ni na adisciple ni afa tënë ti bê ti ala ni. Ala fa na gigi aye so ala ku kungo lani ti wara nga tongana nyen fadeso, na peko ti aye so asi, ala yeke na yâ ti vundu nga li ti ala aga kirikiri. Jésus abi bê ti lo na ala. So lo dengi mê ti mä ala na lege so afa na gigi so lo ye ala, a mû maboko na adisciple use so ti mä lo nga. Na pekoni Jésus ‘afa na ala nda ti tënë ni na ndo kue so Mbeti ti Nzapa asala tënë ti lo.’​—Luc 24:13-27.

Ti duti ndulu ti mä amba ti e kozoni ayeke mbeni nzoni lege so asala si ala yeke duti ndulu ti mä nga e. Mbeni wali ti kodoro ti Bolivie atene: “Babâ na mama ti mbi nga na akogara ti mbi akasa lege so mbi yeke bata na amolenge ti mbi. Tënë ti ala ni aso bê ti mbi me na mbage mbi bâ tele ti mbi so mbi yeke mbeni nzoni mama pëpe. Na ngoi ni so, mbeni Témoin ti Jéhovah aga ti bâ mbi. Lo fa na mbi tënë ti azendo so Nzapa amû. Me, kode so lo yeke na ni lani, ti hunda ti hinga bango ndo ti mbi na ndo ambeni ye, afa na mbi so wali so ayeke ndulu ti dengi mê ti mä mbi. Mbi tene na lo ti lï na da ti duti, na fade fade mbi fa na lo kpale ti mbi ni. Lo duti kpô ti mä mbi. Lo hunda mbi ti hinga ye so mbi ye teti kekereke ti amolenge ti mbi nga koli ti mbi abâ ti lo tënë ni tongana nyen. Bê ti mbi adë ti duti na tele ti mbeni zo so ayeke gi ti gbu nda ti tënë so mbi yeke tene. Tongana lo to nda ti fa na mbi ye so Mbeti ti Nzapa atene na ndo ti sewa, mbi hinga so mbi yeke sala tënë na mbeni zo so ayeke bi bê ti lo na ye so asi na mbi.”

Mbeti ti Nzapa atene: “Ndoye agi ye ti lo mveni pëpe.” (1 aCorinthien 13:4, 5). Tongana e yeke dengi mê ti mä zo na lege so afa na gigi so e ye lo, a hunda e ti zia yamba lege ti ambeni ye so e yeke sala. Tongana mbeni zo ayeke sala tënë na mo na ndo ti mbeni ye so agbu bê ti lo ngangu, peut-être a yeke nzoni ti kanga televizion, ti zia mbeti so mo yeke diko wala ti kanga téléphone ti mo ti maboko. Ti dengi mê ti mä zo na mbeni lege so afa na gigi so e ye lo aye ti tene ti mû tele ti e kue na zo ni tongaso si e hinga ye so ayeke na yâ bê ti lo. A hunda e ti gbanzi tele ti e ti fa ye so asi na e mveni na ti tene pëpe ambeni tënë tongana ti so: “Aï, ye so asi na mo ayeke gi ye so asi na mbi lani.” Tënë so alingbi ti duti nzoni na yâ ti mbeni senge lisoro, me tongana mbeni zo ayeke fa na e tâ kota kpale so asi na lo, a yeke nzoni ti sala tënë ti aye so asi na e mveni pëpe. Bâ mbeni use lege ni ti fa so e yeke mû tele ti e kue na amba ti e.

Dengi mê nzoni ti hinga ye so agbu bê ti zo

Akamarade ti Job amä lani adiskur ti lo bale-oko tongaso. Ye oko, Job atene: “Aï, tongana zo oko ayeke ti mä tënë ti mbi!” (Job 31:35). Ngbanga ti nyen lo tene tongaso? A yeke ngbanga ti so ala mä lo me ala dë bê ti lo oko pëpe. Ala bi bê ti ala na Job pëpe nga ala dengi mê nzoni pëpe ti hinga ye so agbu bê ti lo. Biani, na ngoi so ala yeke mä lo, ala fa pëpe so ala yeke azo so ayeke zia tele ti ala na place ti amba ti ala. Me bazengele Pierre amû wango so: “I bi bê ti i na tënë oko, i sala be-nzoni na popo ti i, i ndoye tele ti i tongana aita, i duti na be-ti-ndoye na be-kota pëpe.” (1 Pierre 3:8). Tongana nyen ti fa so e zia tele ti e na place ti mba ti e? Mbeni oko lege ni ayeke ti mû tele ti e kue ti dengi mê ti mä lo si e hinga ye so agbu bê ti lo na e tara ti zia tele ti e na place ti lo. Ti tene na lo ambeni nzoni tënë tongana ti so: “tënë ni aso mbi mingi” wala “mbi bâ so ala mä yâ ti tënë ti mo ni pëpe”, ayeke fa so tënë ti lo agbu bê ti e. Mbeni lege ti fa na lo so e gbu nda ti tënë ti lo nzoni ayeke ti kiri ti fa peko ti tënë ni e mveni. Ti dengi mê ti mä zo na lege so afa na gigi so e ye lo aye ti tene ti mä gi pëpe atënë ti yanga ti lo, me nga ti gi ti hinga ye so ayeke na yâ bê ti lo me so lo fa ni polele na gigi pëpe.

Roberta ayeke mbeni Témoin ti Jéhovah so aninga na yâ ti kusala ti ngoi kue. Lo tene: “A si na mbeni ngoi kusala ti fango tënë asala si bê ti mbi anze. Tongaso mbi hunda ti sala lisoro na mbeni surveillant so ague na ndo nde nde. Lo mä mbi lani nzoni mingi na lo gi ti hinga tënë so ayeke na bê ti mbi. Lo hinga nga so mbi sala mbito so lo yeke suku na mbi ndali ti bango ndo ti mbi. Ita ni adë bê ti mbi na lo tene so a yeke ye so ayeke si na zo, teti aye tongaso asi na lo mveni kozo. Tënë so amû maboko na mbi mingi ti kiri na peko pëpe.”

Ti mä mbeni zo aye ti tene ti yeda lakue na tënë so lo yeke tene? Ên-ën. E lingbi ti kiri singila na mbeni zo ndali ti so lo fa na e tënë ti bê ti lo? Biani, e lingbi ti kiri singila na lo. Mo lingbi ti sala nyen, na tapande, tongana mo mä so molenge ti mo ti koli atiri na ekole? wala molenge ti mo ti wali atene na mo so lo sala nzara ti mbeni koli? A yeke nzoni ti tene babâ wala mama aduti ti mä lo na ti gi ti hinga ye so ayeke na yâ li ti molenge ni kozo ti fa na lo ye so ayeke nzoni wala nzoni pëpe.

Mbeti ti aProverbe 20:5 atene: “Tënë ti wango na bê ti zo ayeke tongana ngu so alï, me zo so ahinga nda ti ye, fade lo tö ngu ni so.” Tongana mbeni zo ti ndara ayeke ndulu pëpe ti londo lo mveni ti mû wango, peut-être a hunda na e ti gue na lo yeke yeke ti pusu lo ti sigigi na ni. Ye ni ayeke legeoko nga tongana e yeke mä mbeni zo na lege so afa na gigi so e ye lo. A hunda e ti hinga nda ti ye tongaso si e sigigi na tënë so ayeke na bê ti lo. A yeke nzoni ti hunda tënë, me a lingbi e sala hange si e hunda pëpe atënë so abâ gi lo mveni. Peut-être a yeke nzoni ti hunda na lo ti sala tënë kozoni na ndo ti aye so a yeke ngangu na lo pëpe ti fa pekoni hio. Na tapande, mbeni wali so aye ti sala tënë ti akpale so ayeke na yâ ti mariage ti lo alingbi ti bâ so a yeke ngangu na lo pëpe ti to nda ti tënë ni na fango tongana nyen lo na koli ti lo awara tele lani ti kozoni na ala mû tele. Mbeni zo so azia ti fa tënë a ninga awe, a lingbi ti bâ so a yeke ngangu na lo pëpe ti to nda ti tënë ni na fango tongana nyen lo manda lani tâ tënë.

A yeke kete ye pëpe ti dengi mê ti mä zo na fango so e ye lo

A lingbi ti duti mbeni kpale ti dengi mê ti mä mbeni zo so bê ti lo aso na mbage ti e, teti mingi ni e ye ti fa so a yeke faute ti e pëpe. E lingbi ti hon ndo ti kpale so tongana nyen? Mbeti ti aProverbe 15:1 atene: “Zo so akiri tënë doucement, lo sala si ngonzo adë.” Mbeni lege ti kiri tënë yeke ayeke ti hunda lo na nzobe ti fa tënë ti ye so aso lo na e duti kpô ti mä lo.

Mingi ni, apapa so ayeke ga wâ ayeke apapa so na yâ ni zo oko oko ayeke fa gi peko ti tënë ti lo mveni lege mingi. Ala oko oko kue ayeke tene mba ti ni si amä ni pëpe. Papa ni ayeke dë tongana mbeni oko akanga yanga ti lo ti mä mba ti lo nzoni! Tâ tënë, a yeke kota ye ti kanga nzara ti tele na ti fa tënë ti bê ti e na mbeni lege so afa ndara na ndoye. Mbeti ti Nzapa atene na e: “Zo so abata yanga ti lo, lo yeke na ndara.”​—aProverbe 10:19.

A dü zo pëpe na kode ti mä mba ti lo na lege so afa na gigi so lo ye lo. Ye oko, zo alingbi ti wara kode so gi tongana lo kanga nzara ti tele ti lo na lo sala ngangu ti sala ye alingbi na ni. A yeke mbeni kode so a yeke nzoni e sala ngangu kue ti wara ni. Ti dengi mê nzoni ti mä amba ti e tongana ala yeke sala tënë na e ayeke mbeni ye so afa na gigi so e ye ala mingi. A sala nga si e mveni e duti na ngia. Tongaso, a yeke tâ lege ti ndara ti sala kue ti duti na kode ti dengi mê ti mä amba ti e na lege so afa na gigi so e ye ala.

[Kete tënë na gbe ni]

[Foto na lembeti 11]

Tongana e yeke dengi mê ti mä zo, a hunda e ti zia yamba ambeni ye so e yeke sala

[Foto na lembeti 12]

A yeke kete ye pëpe ti dengi mê ti mä mbeni zo so bê ti lo aso