‘Sala hange na lege so mo yeke mä na tënë’

MANGO tënë ayeke kota ye na yâ mandango ye. A lingbi nga ti sala ye na ndo beku ti mbeni zo ti sö kuâ. Tongana Jéhovah ayeke leke lani tele ti zi azo ti lo na gbe ti ngbâa na Egypte, lo fa na Moïse aye so a lingbi a sala. Moïse atene na a-ancien ti Israël ye so a lingbi ala sala ti bata fini ti akozo molenge ti ala si ange so ayeke ga na kuâ afâ ala pëpe (Ex. 12:21-23). Na pekoni a-ancien ni afa tënë so na azo ti da oko oko. So kue gi na yanga. A lingbi azo ni amä ni nzoni. Ala sala ye tongana nyen? Bible atene: “Amolenge ti Israël kue asala legeoko tongana L’Eternel akomande Moïse na Aaron; ala sala tongaso biani.” (Ex. 12:28, 50, 51). Ye ti pekoni ayeke so a zi Israël na mbeni lege so adö bê mingi.

Laso, Jéhovah ayeke leke e ti zi e na mbeni lege so ayeke kota ahon ti so. Biani, a lingbi e bi bê ti e kue na ndo ye so lo yeke fa. A yeke fa mara ti ye tongaso na ngoi ti abungbi ti kongregation. Mo yeke wara ye ti nzoni kue so aga na lege ti mara ti abungbi tongaso? Ye ni aluti mingi na ndo lege so mo yeke mä na tënë.

Mo yeke bata angbongboro tënë so a fa na abungbi? Ti gi alege ti sala ye alingbi na awango so na yâ fini ti mo, wala ti kangbi ni na ambeni zo, a yeke ye so mo yeke sala ka lakue, yenga na yenga?

Leke bê ti mo

Ti wara nzoni mingi na lege ti aye so a yeke fa na abungbi ti aChrétien, a lingbi e leke bê ti e. Nene ti sala tongaso asigigi polele na yâ ye so asi na ngoi ti komandema ti Gbia Josaphat ti Juda. Josaphat aluti lani ngangu teti tâ vorongo. Lo “lungula ndo-nduzu na ayanda ti Astarté so ayeke na sese ti Juda” na lo mû yanga na amokonzi, aLévite nga na aprêtre ti fa Ndia ti Jéhovah na azo na yâ agbata kue ti Juda. Me a “lungula ndo-nduzu pëpe”. (2 Chron. 17:6-9; 20:33). Sambelango anzapa ti wataka nga mara ti vorongo Jéhovah so ayeke nde na so lo hunda, so a yeke sala na ando-nduzu ti azo so ahinga Jéhovah pëpe, ayeke lani dä. Gere ni alï sese ngangu si a lungula ni kue pëpe.

Ye so Josaphat aleke asala ngangu na ndo azo ni a ninga pëpe ngbanga ti nyen? Mbaï ni akiri atene: “Azo ni ade azia bê ti ala kue na Nzapa ti akotara ti ala nga pëpe.” Ala mä me ala sala ye alingbi na ni pëpe. Peut-être ala bâ so ti gue na temple na Jérusalem ti mû asandaga aga na ala kete kpale. Atâa nyen, mabe ayeke lani na gbe ti bê ti ala pëpe.

Ti kiri pëpe na asalango ye ti sese ti Satan, a lingbi e leke bê ti e ti wara awango so Jéhovah ayeke mû laso. Tongana nyen? Mbeni oko kota lege ni ayeke sambela. A lingbi e sambela ti tene e wara na bê ti kiri singila fango lege ti Nzapa (Ps. 27:4; 95:2). Fade ye so ayeke mû maboko na e ti yekia angangu so aita ti e, atâa so ala yeke mbilimbili-kue pëpe, ayeke sala ti tene Jéhovah amû ala ti fa ye na azo ti lo. A yeke pusu e ande ti kiri singila na Jéhovah teti afini ye so e yeke manda. Nga, a yeke pusu e ti kiri singila teti lege so e wara ti yekia ahon ti kozo atënë so e manda giriri. Teti e yeke na nzara ti sala ye kue so bê ti Nzapa aye, e sambela, e tene: “O L’Eternel, Mo fa na mbi lege ti Mo . . . Sala si mbi duti na bê oko ti kpe mbito ti iri ti Mo.”​—Ps. 86:11.

Dengi mê nzoni

Aye ayeke mingi so alingbi ti kanga lege na e ti mä tënë nzoni. E lingbi ti gi bê ti e mingi. Totongo ti aye nga hongo ti azo na yâ ti da ti bungbi ni, wala na gigi ni, alingbi ti gboto lê ti e yongoro. Tongana tele ti e anzere pëpe, a lingbi ti duti ngangu na e ti dengi mê nzoni. Mingi ni, ala so ayeke na akete molenge abâ so a yeke ngangu na ala ti dengi mê nzoni. Ye wa alingbi ti mû maboko na e ti ngbâ ti dengi mê na programme ni?

Ti dengi mê nzoni, lê ti e ayeke sala kota kusala mingi. Zia lê ti mo angbâ na ndo wamungo diskur ni ti tene mo dengi mê nzoni. Tongana lo fa mbeni versê, atâa mbeni so mo hinga ni nzoni mingi, gi ni na yâ Bible, nga mû peko ti lo na dikongo ni. Kpe ti bi lê lakue na mbage so aye atoto dä wala so azo ahon dä. Tongana lê ti mo asala si li ti mo asi singo na gbâ ti aye, fade mingi ti atënë so a yeke fa na ndo estrade ayeke hon mo.

Tongana “bibe ayeke mingi na bê” ti mo si a yeke ngangu na mo ti dengi mê kue na programme ni, sambela Jéhovah ti tene li ti mo nga na bê ti mo adë si mo dengi mê nzoni (Ps. 94:19; aPhil. 4:6, 7). Sambela ni fani mingi tongana a hunda tongaso (Mat. 7:7, 8). A yeke Jéhovah si aleke ti tene abungbi ti kongregation aduti dä. Mo lingbi ti hinga na bê kue so lo ye si mo wara nzoni dä.​—1 Jean 5:14, 15.

Mango adiskur

Peut-être mo lingbi ti dabe na atënë so anzere na mo mingi, so mo mä awe na yâ adiskur. Ye oko, mango mbeni diskur ahunda ye mingi ahon gi ti bungbi gbâ ti apendere tënë. Diskur ayeke tongana ti londo na mbeni ndo ti gue na mbeni nde. Atâa so apendere ye ayeke dä ti bâ na lege, kota ye ni ayeke ndo so zo ni ayeke gue dä, ye so lo zia na gbele lo ti si dä. Wamungo diskur ni ayeke gi peut-être ti gue na azo so amä lo ti yeda na mbeni tënë wala ti pusu ala ti sala mbeni ye.

Bâ diskur so Josué amû na mara ti Israël, so ayeke na Josué 24:1-15. Ye so lo yeke gi lani ayeke ti pusu azo ni ti luti ngangu teti tâ vorongo, na lege ti so ala zi tele ti ala biani yorongo na vorongo yanda ti amara so angoro ala. Ngbanga ti nyen a yeke lani kota ye tongaso? Vorongo ti wataka so amû ndo kue aye ti buba lani nzoni duti ti mara ni na lê ti Jéhovah. Azo ni akiri tënë so na hundango ye ti Josué, ala tene: “E leke na bê ti e oko pëpe ti zia L’Eternel ti sambela ambeni nzapa; . . . fade e sala na L’Eternel.” Na ala sala tongaso!​—Jos. 24:16, 18, 31.

Tongana mo yeke mä mbeni diskur, gi ti hinga ndo so diskur ni aye ti gue dä. Bâ tongana nyen atënë so wamungo diskur ni afa ayeke gue ti si na ndo ni so. Hunda na mo mveni ye so atënë ni aye mo sala.

Mango tënë na ngoi ti pikango patara

Mandango Tour ti Ba Ndo, Mandango Buku ti Kongregation nga ambeni mbage ti Bungbi ti Kusala ayeke tambela na lege ti ahundango tënë na akiringo tënë so ayeke na yâ ambeti so aluti na ndo Bible.

Mango tënë na ngoi ti mbeni pikango patara alingbi ti duti tongana mungo mbage na mbeni lisoro. Ti wara ye ti nzoni kue so ayeke dä, mä tënë nzoni. Bâ ndo so pikango patara ni ayeke gue dä. Bâ tongana nyen zo so amû li ni ayeke gboto lê na ndo kota tënë ni, nga angbongboro tënë ni. Kiri na atënë ti lo na li ti mo. Mä azo na ndembe so ala yeke fa nda ti tënë ni nga tongana nyen a lingbi ti sala kusala na ni. Ti bâ atënë ni tongana ti so ambeni zo nde abâ ayeke mû maboko na mo ti bâ mbeni tënë so mo hinga nzoni na mbeni lege so ayeke nde. Sala nga tënë ti mabe ti mo si azo ahinga nga bango ndo ti mo.​—aRom. 1:12.

Ti manda tënë ni kozo ayeke mû ande maboko na mo ti bi tele na yâ pikango patara ni, nga ti mä yâ ti atënë so ambeni zo ayeke tene. Tongana lege ayeke na mo pëpe ti manda ye ni mbilimbili, mû kete ngoi ti gi ti hinga kamême ambeni tënë na ndo ni kozo na bungbi ni. Tongana mo sala tongaso, mo yeke wara lege ti manda ye mingi na yâ pikango patara ni.

Mango tënë na akota bungbi

Na ngoi ti akota bungbi, aye ti gbotongo lê ti zo yongoro ayeke peut-être dä mingi ahon abungbi ti kongregation. Ni la, mango tënë alingbi ti ga mbeni kota kpale. Ye wa alingbi ti mû maboko na e?

Mbeni kota ye ni ayeke ti hu tele nzoni na bï. Kozoni si kota bungbi ni ato nda ni lâ oko oko, bata kota li ti tënë ni na li ti mo ngangu. Bâ li ti diskur oko na oko, na gi ti hinga kozoni ye so a yeke tene ande. Sala kusala nzoni na Bible ti mo. Azo mingi abâ so ti sû angbongboro tënë ndulu na mbeti ayeke mû maboko na ala ti dengi mê na programme ni. Sû na mbeti wango so mo ye ti sala na kua na yâ fini ti mo wala na yâ fango tënë ti mo. Lâ oko oko, tongana mo yeke gue na mo yeke kiri na kota bungbi ni, sala lisoro na ndo ambeni tënë ni. Ye so ayeke mû ande maboko na mo ti bata atënë so.

Fango lege na amolenge ti mä tënë

Ababâ na mama so ayeke aChrétien alingbi ti mû maboko na amolenge ti ala, atâa ala de kete mingi, ti duti na “ndara ti wara salut”. Ala yeke sala tongaso na lege so ala gue na ala na abungbi ti kongregation nga na akota bungbi (2 Tim. 3:15). Amolenge ayeke nde nde, na ngangu ti ala ti dengi mê a ninga ayeke oko pëpe. Tongaso, a hunda ti bâ nda ti tënë mbilimbili ti mû maboko na ala ti mä tënë nzoni. Peut-être awango so ge ayeke mû maboko na mo.

Na da, leke mbeni ngoi teti akete molenge ti mo ti duti kpô na ti diko ambeti ti e, wala ti bâ afoto ti yâ ni. Na abungbi, mû na ala aye ti ngia pëpe ti tene ala duti kpô. Tongana ti so a yeke tâ tënë lani na Israël ti giriri, laso nga amolenge aga na abungbi “si ala mä tënë so, ala manda” ye (Deut. 31:12). Na ndo so a lingbi ti sala tongaso, ambeni babâ na mama amû même na akete molenge ti ala ambeti so a yeke manda ni. Tongana amolenge ni ayeke ga kota, mû maboko na ala ti leke tele ti ala ti mû mbage na abungbi so a hunda ti kiri tënë dä.

Mbeti ti Nzapa afa so kota kamba ayeke na popo ti mango tënë ti Jéhovah nga na mango yanga ti lo. Ye so asigigi polele na yâ atënë ti Moïse na mara ti Israël. Lo tene: ‘Laso mbi hiri yayu na sese ti ga atémoin ti ke i, mbi zia na gbele mo fini na kui, nzoye na zonga; tongaso mo kamata fini, . . . mo ndoye L’Eternel Nzapa ti mo, mo mä yanga ti Lo, na mo zia bê ti mo na Lo.’ (Deut. 30:19, 20). Laso, mango wango so Jéhovah amû, nga salango ye alingbi na ni na yâ fini ti e, ayeke kota ye ti tene Nzapa ayeda na e, nga ti wara deba nzoni ti fini ti lakue lakue. Tongaso, a yeke kota ye biani ti bata gbotongo mê ti Jésus so: “Bata nzoni [‘sala hange’, Fini Mbuki, 2001] na lege so i mä ye”!​—Luc 8:18.