“A yeke ngbanga ti e ti mä Nzapa ahon ti mä azo”

‘Jéhovah aga Salut ti mbi’

AZO ti Jéhovah ayeke lani na gbele mbeni desizion ti mû. A yeke nzoni ala sara ye alingbi na ye so sioni gbia ti Egypte ti giriri ahunda ni na ala? Wala a yeke nzoni ti tene ala mä yanga ti Jéhovah Nzapa, na ti zia sese ti Egypte ti gue na Sese ti Zendo?

Ndali ti so Pharaon zo ti kpengba-li ake lani ti zia lege na azo ti Jéhovah ti gue, Nzapa ato aye ti vundu bale-oko na ndo ti kodoro ti Egypte. Biani ye so afa tâ kota ngangu so Nzapa ayeke na ni! Anzapa ti Egypte akpa pëpe lani ti sara mbeni ye ti kanga lege na aye ti vundu so Nzapa atokua ni.

Na ngoi so a tene na Pharaon ti zia azo ti Nzapa ti gue, Pharaon ahe Nzapa na ngia lo tene: “L’Eternel [ Jéhovah, NW ] ayeke Zo nyen, si mbi mä yanga ti Lo ti zia Israël ague? Mbi hinga L’Eternel pëpe, na a hon so, fade mbi zia Israël ague pëpe.” (Exode 5:2). Na pekoni, azo ti Egypte abâ pasi na aye ti vundu: (1) Ngu agbian lani aga mênë, (2) abianga amû ndo kue, (3) asiri, (4) avuma, (5) kobela ti fâ anyama asi, (6) kä ti sanzo na tere ti azo, na tere ti anyama, (7) gandangombe so ane mingi atï na sese; (8) akih asi na sese na ala te tanga ti kobe kue na yaka; (9) bingo so avuko pitipiti ayeke na sese kue ti Egypte lâ ota, (10) na a fâ akozo molenge ti azo ti Egypte so molenge ti Pharaon kue ayeke na popo ni. Na nda ni, Pharaon azia lege na amolenge ti Israël ti gue. Pharaon ahunda même na ala ti hon hio!​—Exode 12:31, 32.

Azo kutu ota tongaso, akoli, awali na akete molenge ti Israël legeoko na gbâ ti ambeni zo ti amara nde nde alondo kodoro gi hio tongaso (Exode 12:37, 38). Ye oko, kete na pekoni, Pharaon nga na kpengba bungbi ti aturugu ti lo atomba peko ti amolenge ti Israël. Na bango ni, amolenge ti Israël atï na yâ ti mbeni gbanda awe, ala yeke na popo ti Ngu Bengba, ti mbeni sioni yando nga na aturugu ti Pharaon. Ye oko, Moïse atene na azo ti Israël, atene: “I sara mbeto pëpe. I luti ngangu na i bâ salut ti L’Eternel”.​—Exode 14:8-14.

Na lege ti ye ti kpene, Jéhovah asara si yâ ti Ngu Bengba azi na amolenge ti Israël awara lege ti kpe. Azo ti Egypte atomba peko ti amolenge ti Israël me Nzapa asara si ngu ni akanga na ndo ti ala. “Lo [Jéhovah abi] na yâ ngu-ingo apuse ti mbarata ti Pharaon na aturugu ti lo”. (Exode 14:26-28; 15:4). Ndali ti so lo ke ti mû gonda na Jéhovah, ye so ague na Pharaon zo ti baba ti wara kota kpale na nda ni.

Na Ngu Bengba, Jéhovah afa lani so lo yeke “Zo Ti Bira.” (Exode 15:3). Mbaï ti Bible ni atene: “Amolenge ti Israël abâ kota kusala so L’Eternel asara na ndo azo ti Egypte, na azo ni akpe mbeto ti L’Eternel, na ala mä na bê na L’Eternel.” (Exode 14:31; Psaume 136:10-15). Ala fa na gigi tâ singila ti bê ti ala na Nzapa: tongaso akoli abungbi yanga ti ala oko na Moïse ti he mbeni bia ti songo benda na Nzapa, na Miriam amû ti lo li ni na yâ dodo ti awali.a

Jéhovah angbâ lakue zo so ayeke sö awakua ti lo

Na lege ti kusala ti ngangu so Nzapa asara lani ti sö na azo ti lo, awakua ti Jéhovah ti laso alingbi ti manda mbeni ye so ayeke kpengba mabe ti ala. Mbeni ye so ala lingbi ti manda dä ayeke so ngangu ti Jéhovah ayeke hunzi pëpe na lo lingbi ti mû maboko kue na azo ti lo. Na yâ ti bia ti songo benda so ala he ni, Moïse na azo ti Israël ahe bia so atene: “Koti ti Mo, O L’Eternel, ayeke na gloire na ayeke na ngangu, koti ti Mo, O L’Eternel, a fâ wato nduru nduru.”​—Exode 15:6.

Mbeni ye ti manda ni ayeke so Lo Ti Ngangu Ahon Kue ayeke tâ na kota nzara ti bata azo ti lo. Azo ti Israël ahe bia lani atene: “L’Eternel ayeke ngangu ti mbi na Gbia ti mbi, na Lo ga Salut ti mbi; Lo so ayeke Nzapa ti mbi, na fade mbi sepela Lo”. Nga, mbeni ye ni nde so e lingbi manda dä ayeke so zo oko pëpe alingbi ti kanga lege na ye so bê ti Jéhovah Nzapa aye. Na yâ ti bia so ala he lani, azo ti Nzapa so lo zi ala na ngbâa awe atene: “Zo nyen alingbi na Mo, O L’Eternel, na popo ti anzapa? Zo nyen ayeke na gloire na ayeke nzoni-kue tongana Mo? Zo asepela Mo na mbeto, Mo sara ye ti dongo bê.”​—Exode 15:2, 11.

Legeoko tongana Pharaon ti Egypte ti giriri, laso agbia ti sese so ayeke sara ngangu na azo ti Jéhovah. Agbia so ayeke azo ti baba alingbi peut-être ti “sara tënë ti ke Lo Ti Nduzu Ahon Kue na [ti] sara si ngangu ti azo ti be-vulu ti Lo Ti Nduzu Ahon Kue awe.” (Daniel 7:25; 11:36). Me Jéhovah adë bê ti azo ti lo, lo tene: “Ye ti bira so azo asara ti ke mo na ni alingbi sara ye na mo pëpe; na fade mo fâ ngbanga na ndo menga ti azo kue so alondo na ngbanga ti ke mo. So ayeke ye ti héritier ti aboi ti L’Eternel, na so ayeke mbilimbili ti ala so Mbi mû na ala.”​—Esaïe 54:17.

Awato ti Nzapa ayeke bi ande na ngu, gi legeoko tongana ti Pharaon nga na aturugu ti lo lani. Akusala ti ngangu so Jéhovah asara, na tapande, zingo amolenge Israël na Egypte, a fa na gigi so a yeke biani na lege ni ti mû peko ti kpengba-ndia so abazengele ti Jésus afa ni lani: “A yeke ngbanga ti e ti mä Nzapa ahon ti mä azo.”​—Kusala 5:29.

[Kete tënë na gbe ni]

[Encadré/Foto na lembeti 9]

MO HINGA AYE SO?

• Jéhovah ato pupu ti ngangu so aya na bï so kue ti kangbi Kota Ngu Bengba ni si kuru sese asigigi ti mû lege na amolenge ti Israël ti fâ ngu ni.​—Exode 14:21, 22.

• A hunda lani mbeni lege so lê ni akono kilomètre oko na ndambo tongaso wala ahon ni ti mû lege na amolenge ti Israël kutu mingi ti fâ Ngu Bengba ni gi na yâ ti kete ngoi.

[Afoto na lembeti 9]

Anzapa ti wataka ti Egypte akpa lani pëpe ti kanga lege na aye ti vundu bale-oko so Jéhovah atokua

[Lingu ti foto]

Astatue: foto ti the British Museum