“Tënë ti témoin na amara kue”

“Fade i ga atémoin ti Mbi . . . juska na nda ti sese kue.”​—KUSALA 1:8.

1. Lawa nga na ndo wa si adisciple amä ti kozoni prophétie so a sû na Matthieu 24:14?

AZO mingi na popo ti e ahinga nzoni mingi atënë ti Jésus so a sû na Matthieu 24:14, tongaso ala yeke diko ni na li ti ala. Na so biani mbeni kpengba prophétie kue! Tara ti bâ na li ti mo bibe ti adisciple ti Jésus tongana ala mä ni ti kozoni! A yeke lani na ngu 33. Adisciple ayeke na tere ti Jésus ngbene ye ngu ota tongaso, na fadeso ala na lo ayeke na Jérusalem. Ala bâ lani amiracle ti lo na ala mä aye so lo fa. Atâa so ala wara ngia na yâ akpengba tâ tënë so lo fa na ala, ala hinga nzoni so a yeke azo kue si akangbi ngia ti ala pëpe. Jésus ayeke lani na awato ti ngangu mingi.

2. Aye ti sioni na akpale wa Jésus atene fade adisciple ti lo ayeke tingbi na ni?

² Jésus na adisciple osio aduti lani na ndo Hoto ti Oliviers. Adisciple ni ayeke dengi mê ti ala nzoni ti mä Jésus tongana lo yeke sara tënë ti aye ti sioni na akpale so fade ala yeke tingbi na ni. Ngoi kete kozoni, lo tene na ala so fade a yeke fâ ni (Matthieu 16:21). Ti fadeso lo tene na ala polele so ala nga kue fade ye ti ngangu asi na ala. Lo tene: “Fade ala zia i na tïtî azo si ala sara ngangu na i, na ala fâ i; na fade amara kue ake i ngbanga ti iri ti Mbi.” Me a ngbâ gi ge pëpe. Fade aprophète ti wataka ahanda azo mingi. Fade ambeni zo azia lege ti mabe, ambeni akä amba ti ala, na ala ke tere na popo ti ala. Ti ambeni même, ti tâ tënë ni “azo mingi”, fade ndoye ti ala teti Nzapa na teti Tënë ti Lo ayeke ga dê.​—Matthieu 24:9-12.

3. Ngbanga ti nyen atënë ti Jésus na Matthieu 24:14 adö bê biani?

³ A yeke na peko ti so lo fa aye ti vundu so kue awe si Jésus atene mbeni tënë so adö bê ti adisciple ti lo. Lo tene: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” (Matthieu 24:14). Biani, fade kusala ti ‘sarango tënë ti témoin ti tene-biani’ so Jésus ato nda ni na Israël ayeke gue juska ti mû ndo lê sese kue (Jean 18:37). So tâ prophétie ti dongo bê kue! Ti kono yâ ti kusala so si ague juska na “amara kue” ayeke duti ande mbeni kota kua; ti sara ni na gbele ‘amara kue so ake ala’ ayeke duti ande ye ti kpene. Fade sarango kota kusala so ayeke fa gi kota yanga-ti-komande ti Jéhovah na ngangu ti lo pëpe, me nga ndoye ti lo, be-nzoni na be-nze-pepe ti lo. Nga, fade a yeke mû na awakua ti lo lege ti fa mabe na mungo tere ti ala kue na lo.

4. Na azo wa si a hunda na ala ti sara kua ti fango tënë ti témoin? Tënë ti dengo bê wa Jésus amû lani?

⁴ Jésus atene lani na adisciple ti lo polele so ala yeke na mbeni kota kusala na gbele ala ti sara. Kozo si lo gue na yayu, Jésus asi na ala na lo tene: “Fade i wara ngangu tongana Yingo Vulu aga na ndo i; na fade i ga atémoin ti Mbi na Jérusalem, na Judée kue, na Samarie, na juska na nda ti sese kue.” (Kusala 1:8). Tâ tënë, na yâ ti kete ngoi fade ambeni zo ayeke ga ti bungbi na ala. Ye oko, adisciple ni ayeke mingi pëpe. Bâ tongana nyen bê ti ala alingbi lani ti dê ti hinga so fade ngangu ti Nzapa so ayeke yingo vulu ti lo ayeke kpengba ala ti sara kusala ti Nzapa so!

5. Nyen la adisciple ahinga lani pëpe na ndo kusala ti fango tënë?

⁵ Adisciple ahinga lani so a lingbi ala fa nzo tënë na “amara kue si ala ga adisciple”. (Matthieu 28:19, 20). Me ala hinga pëpe tongana nyen fango tënë ni ayeke mû ndo, na ala hinga nga pëpe lawa si nda ni ayeke ga. E nga legeoko. Gi Jéhovah oko si alingbi ti bâ atënë so (Matthieu 24:36). Tongana Jéhovah abâ ande so fango tënë amû ndo alingbi na lê ti lo awe, fade lo yeke ga na futingo na ndo sioni sese so. A yeke gi na ngoi so si aChrétien ayeke hinga ande so kusala ti fango tënë ahunzi awe tongana ti so Jéhovah aye. Akozo disciple so alingbi lani ti hinga pëpe kota ti kusala so fade a yeke sara ni na ngoi ti nda ni so.

Tënë ti témoin so akozo Chrétien afa

6. Nyen la asi lani na lâ ti Pentecôte ti ngu 33 nga kete na pekoni?

⁶ Na ngoi ti akozo Chrétien, alengo ti peko ti kusala ti fango tënë ti Royaume na ti sarango adisciple adö bê. Na lâ ti Pentecôte ti ngu 33, adisciple 120 tongaso ayeke lani na yâ ti mbeni da-nduzu na Jérusalem. Yingo vulu ti Nzapa azu na ndo ti ala, na bazengele Pierre amû tënë ti fa nda ti ye ti kpene so, na azo 3 000 tongaso aga awamabe na ala kamata batême. So ayeke gi lani tongo nda ni. Atâa so amokonzi-nzapa aleke na bê ti ala ti kaï fango nzo tënë, Jéhovah “abungbi na [adisciple] lâ na lâ ala so awara salut.” Gi kete na pekoni, “wungo ti azo ni aga nduru na [saki] oku.” Na peko ti ye so, “azo so amä na bê na Seigneur awu mingi, akoli na awali nga.”​—Kusala 2:1-4, 8, 14, 41, 47; 4:4; 5:14.

7. Ngbanga ti nyen tënë ti Corneille so achangé bê ti lo aduti lani mbeni kpengba ye so asi?

⁷ Na ngu 36, mbeni kpengba ye asi: a yeke tënë ti Corneille, mbeni Gentil, so achangé bê ti lo na akamata batême. Tongana Jéhovah afa na Pierre ti gue na ndo ti Corneille so akpe mbeto ti Nzapa, lo fa so komandema ti Jésus ti sara si ‘amara kue aga adisciple’ andu gi aJuif so ayeke na akodoro nde nde pëpe (Kusala 10:44, 45). Ala so amû li ni asara ye lani tongana nyen? Tongana lani abazengele na a-ancien ti Judée abâ so a lingbi a fa nga nzo tënë na aGentil, wala ala so ayeke aJuif pëpe, ala mû gloire na Nzapa (Kusala 11:1, 18). Na oko ngoi ni, kusala ti fango tënë angbâ ti lë na popo ti aJuif. Angu mingi na pekoni tongaso, peut-être na ngu 58, na ndo ti aGentil so amä na bê lani, “azo [saki] mingi ayeke na popo ti aJuif so amä na bê awe.”​—Kusala 21:20.

8. Ye nyen nzo tënë ayeke sara na ndo fini ti zo?

⁸ Atâa so wungo ti adisciple ni adö bê, a yeke nzoni e girisa pëpe so a yeke biani azo oko oko kue si a fa na e wungo ti ala. Tokua ti Mbeti ti Nzapa so ala mä lani ayeke na ngangu mingi (aHébreu 4:12). Tënë ni agbian ngangu fini ti ala so ayeda na ni. Azo ni azia asioni sarango ye ti ala, ala ga afini zo na ala kiri alë songo na Nzapa (aEphésien 4:22, 23). Oko ye so ayeke si nga laso. Na ala kue so ayeda na nzo tënë ayeke na beku ti duti na fini ti lakue lakue.​—Jean 3:16.

Afon Nzapa na yâ kusala

9. Akozo Chrétien ahinga so ala yeke na matabisi nga na kungba wa?

⁹ Akozo Chrétien atene pëpe so a yeke na ngangu ti ala si ala sara aye so kue. Ala hinga so ala yeke awakua so “ngangu ti Yingo ti Nzapa” amû maboko na ala (aRomain 15:13, 19). Jéhovah oko si ayeke na gunda ti guengo na li ni na lege ti yingo so. Na oko ngoi ni, aChrétien so ahinga lani so ala yeke na matabisi nga na kungba ti duti “afon Nzapa na kusala.” (1 aCorinthien 3:6-9). Tongaso, legeoko na wango ti Jésus, ala sara kusala so a mû na ala na ngangu ti ala kue.​—Luc 13:24.

10. Ngangu wa ambeni ti akozo Chrétien asara ti fa tënë ti témoin na amara kue?

¹⁰ Paul so ayeke “bazengele ti aGentil,” atambela akilomètre mingi na lê ti ngu nga na ando nde nde ti zia na sese afini kongregation mingi na yâ ti akodoro so ayeke na gbe ti Rome nga na kodoro ti Grèce (aRomain 11:13). Lani lo gue na Rome nga peut-être même na Espagne. Na yâ ti ngoi so, bazengele Pierre, so a mû na lo “Tene-nzoni teti azo ti ganza”, ague ti sara kusala na Babylone, ndo so kâ aJuif ayeke nga dä mingi (aGalate 2:7-9; 1 Pierre 5:13). Na popo ti azo mingi so lani asara kua ngangu na yâ Seigneur, mo wara Tryphène na Tryphose. Mbeni wali nde nga, so iri ti lo ayeke Perside, “asara kusala mingi na yâ Seigneur.”​—aRomain 16:12.

11. Tongana nyen Jéhovah airi deba nzoni na ndo ngangu kusala ti adisciple?

¹¹ Jéhovah airi lani deba nzoni na ndo ngangu kusala ti akpengba wakua so nga na ambeni nde. Bazengele Paul atene lani so a fa “Tene-nzoni so . . . na azo kue na gbe ti yayu;” na ye so asi ade ti sara ngu 30 pëpe na peko ti prophétie ti Jésus na ndo fango tënë na amara kue (aColossien 1:23). Nda ni asi na ngoi ni so? Na mbeni mbage e lingbi ti yeda. Nda ni so aga na ndo aye ti aJuif na ngu 70, na lâ ni so aturugu ti Rome afuti Jérusalem legeoko na temple. Ye oko, ândö Jéhovah aleke ti tene a fa tënë ti témoin mingi ahon ti kozo, kozoni si lo futi ande sioni sese ti Satan so.

Fango tënë laso

12. Tongana nyen akozo Wamandango Bible agbu nda ti komandema ti fa tënë?

¹² Angu kete kozoni si ngu 1900 alingbi, a kiri na tâ vorongo Nzapa na place ni na peko ti angu mingi ti kota berengo mabe. A-Wamandango Bible, iri so azo ahinga na aTémoin ti Jéhovah ândö kâ, agbu nda ti komandema so ayeke ti sara adisciple na ndo sese kue polele (Matthieu 28:19, 20). Na ngu 1914, gi ala 5 100 tongaso si amû mbage na fango tënë, na nzo tënë andu akodoro 68. Ye oko, akozo Wamandango Bible so ahinga nda ti versê ti Matthieu 24:14 kue pëpe. Kete si ngu 1900 alingbi, ada ti Mbeti ti Nzapa akiri peko ti Bible, so nzo tënë ayeke dä, na ayanga ti kodoro mingi, apete ni na ala kangbi ni na ndo sese mobimba. Tongaso, teti angu mingi, aWamandango Bible abâ ti ala atene a fa tënë ti témoin na amara awe.

13, 14. Ye wa azo ti Nzapa abâ ni polele na ndo ye so lo ye ti sara so a fa ni ândö na yâ mbeni Tour ti Ba Ndo ti ngu 1928?

¹³ Yeke yeke, Jéhovah amû lege na mara ti lo ti bâ polele ye so bê ti lo aye nga ye so lo ye ti sara (aProverbe 4:18). Tour ti Ba Ndo ti lango 1 ti décembre ngu 1928 (anglais) atene: “E lingbi ti tene so kangbingo Bible asara si prophétie ti fango nzo tënë ti royaume aga tâ tënë awe? Oko pëpe! Atâa so a kangbi Bible, a yeke kota ye ti tene kete bungbi ti atémoin so ayeke na ndo sese apete ambeti so afa nda ti ye so Nzapa aye ti sara, na ti gue ti bâ azo so a zia na ala aBible so kozo awe. Tongaso pëpe, fade azo ayeke hinga ye pëpe na ndo Royaume ti Messie so a zia gere ni awe na ngoi ti e.”

¹⁴ Oko Tour ti Ba Ndo so akiri atene: “Na ngu 1920, . . . aWamandango Bible ahinga mbilimbili nda ti prophétie ti Seigneur ti e na Matthieu 24:14. Ala bâ so ‘tene-nzoni’ so a lingbi a fa ni na ndo sese kue teti tënë ti témoin na aGentil wala amara, ayeke lani pëpe tene-nzoni ti mbeni royaume so ayeke ga, me mbeni tene-nzoni so abâ mbilimbili lengo gbia ti Messie na ndo sese laso.”

15. Tongana nyen kusala ti fango tënë amû ndo ngbene ye na ngu 1920?

¹⁵ Ti londo na ngu 1920 ti si na ngu 1930, “kete bungbi ti atémoin” so angbâ lani gi kete pëpe. Na yâ ti angu mingi so aga na pekoni, a hinga na a komanse ti bungbi “azo mingi so asi singo” ti “ambeni ngasangbaga” (Apocalypse 7:9; Jean 10:16). Ti laso, a yeke awafango tënë 6 613 829 tongaso si ayeke fa nzo tënë na yâ ti akodoro 235 ti ndo lê sese. Bâ tongana nyen prophétie so aga tâ tënë pendere mingi! Lâ oko ade ti fa “Tene-nzoni” ti Royaume na ndo lê sese tongaso pëpe. Lâ oko ade a bâ awakua be-ta-zo ti Jéhovah mingi na ndo sese tongaso pëpe!

16. Fa kusala so a sara ni na ngu ti kusala so ahon. (Bâ molongo ti akodoro so ayeke na lembeti 27-30.)

¹⁶ Maboko na maboko, aTémoin mingi mingi so asara kua ngangu na ngu ti kusala 2005 so ahon. Ala fa nzo tënë ahon l’heure ngbundangbu oko na yâ ti akodoro 235. Ala sara avizite na a-étude kutu mingi mingi. A yeke aTémoin ti Jéhovah si asara kusala so. Na bê ti ala, ala mû ngoi na mosoro ti ala ti fa Tënë ti Nzapa na azo (Matthieu 10:8). Na lege ti yingo vulu ti lo, Jéhovah angbâ ti kpengba awakua ti lo ti sara ye so lo ye.​—Zacharie 4:6.

Ala sara kua ngangu ti fa tënë

17. Tongana nyen azo ti Jéhovah afa so ala yeda na tënë ti Jésus ti fa nzo tënë?

¹⁷ Atâa so a ga nduru ti sara ngu 2000 awe ngbene ye so Jésus asara ândö tënë ti nzo tënë so fade a yeke fa ni, wâ so azo ti Nzapa ayeke na ni teti kusala ni akiri na peko pëpe. E hinga so na lege ti gbungo ngangu ti e ti sara ye so ayeke nzoni, e yeke fa na gigi ndoye, be-nzoni na be-nze-pepe ti Jéhovah. Tongana Jéhovah, e ye si mbeni zo akui pëpe, me e ye si azo achangé bê ti ala na akiri alë songo na lo (2 aCorinthians 5:18-20;2 Pierre 3:9). Na wâ, aTémoin ti Jéhovah angbâ ti fa nzo tënë juska na nda ti sese kue ndali ti so yingo ti Nzapa akpengba ala (aRomain 12:11). Ye ti pekoni ayeke so, azo na ndo kue ayeke yeda na tâ tënë nga ala yeda ti sara ye so Jéhovah afa na ndoye. Zia e bâ ambeni tapande ni.

18, 19. Aye wa asi so mo lingbi ti fa ni na ndo ambeni zo so ayeda na nzo tënë?

¹⁸ Charles ayeke ândö wafango yaka na do ti kodoro ti Kenya. Na ngu 1998, lo kä manga ti yaka ti lo ahon kilo 8 000 na tongaso a mû na lo mbeti ti Kota wafango yaka ti manga. Na ngoi ni so, lo to nda ti manda Bible. A ninga pëpe, lo ga ti bâ so zo so amû mbage na yâ akusala ti manga adoro ndia ti Jésus so ahunda ti ndoye zo so ayeke nduru na mo (Matthieu 22:39). Tongana lo mveni lo bâ so ‘kota wafango yaka ti manga’ ayeke biani mbeni ‘kota wafango zo’, Charles atuku sioni yorö na ndo yaka ti manga ti lo ni ti buba ni kue. Lo gue na li ni, lo mû tere ti lo na Nzapa na lo kamata batême; lo yeke fadeso wafango tënë ti ngoi kue nga serviteur ti mungo maboko.

¹⁹ Kite ayeke pëpe so Jéhovah ayeke yengi amara laso na lege ti fango tënë so a yeke sara na ndo sese kue, na aye ti nzoni mingi, so ti tene azo, ayeke ga (Aggée 2:7). Pedro, so ayeke na kodoro ti Portugal, alï lani na ekole ti gango bua tongana lo yeke na ngu 13. Lo ye lani ti ga missionnaire ti fa na azo Mbeti ti Nzapa. Ye oko, kete na pekoni, lo zia ekole ni ngbanga ti so a fa ye mingi na ndo Bible na klase ti lo pëpe. Ngu omene na pekoni, lo gue na senda-gi ti gbata ti Lisbonne (Portugal) ti manda ye na ndo senda-bibe wala sarango ye ti zo. Lo lango lani da oko na mama-kete ti lo, so ayeke Témoin ti Jéhovah, na lo wa Pedro ti manda Bible. Na ngoi ni so, Pedro adë kite so Nzapa ayeke da; na lo hinga pëpe wala lo ye ti manda Bible. Lo sara lisoro na wafango mbeti ti lo na ndo tënë ti mungo desizion so akara azo. Wafango mbeti ni atene na lo so senda-bibe afa so azo so ahinga ti mû desizion pëpe ayeke nduru ti sara sioni na tere ti ala. Na mango tënë so, Pedro amû desizion ti manda Bible. Lo wara batême ade ti ninga pëpe, na fadeso lo mveni lo yeke manda Bible na ambeni zo.

20. Ngbanga ti nyen e yeke na ngia teti kota fango tënë ti témoin so a fa laso?

²⁰ Laso, e hinga pëpe tongana nyen fango tënë ayeke mû ndo, wala e hinga nga pëpe lawa nga na ngoi wa si nda ni ayeke ga. Ye so e hinga ayeke so nda ni ayeke nduru mingi. E yeke na ngia so kota fango nzo tënë tongaso ayeke gi mbeni oko ti aye so afa atene ngoi aga nduru awe ti tene Royaume ti Nzapa amû place ti angorogbia ti azo (Daniel 2:44). Ngu oko oko so ayeke hon, azo kutu mingi awara pasa ti yeda na nzo tënë, na ye so amû gonda na Nzapa ti e, Jéhovah. Zia si ye so apusu e biani ti ngbâ be-ta-zo nga legeoko na aita ti e ti ndo lê sese kue ti ngbâ ti sara kua ngangu na yâ fango tënë ti témoin so na amara kue. Na sarango tongaso, fade e

Mo dabe mo na ni?

• Ngbanga ti nyen Matthieu 24:14 ayeke mbeni kpengba prophétie?

• Ngangu wa akozo Chrétien asara ti fa tënë? Aye wa asi na pekoni?

• Tongana nyen aWamandango Bible aga ti hinga nene ti fa tënë na amara kue?

• Na bango kusala ti aTémoin ti Jéhovah na ngu ti kusala so ahon, ye nyen apika bê ti mo?

sö fini ti e mveni nga na ti azo so amä e.​—1 Timothée 4:16.

[Atënë na lembeti 27-30]

TONDO TI ATÉMOIN DE JÉHOVAH TI NDO SESE KUE TETI NGU TI KUSALA 2006

(Ti bâ ni mbilimbili, bâ buku ni.)

[Carte/Afoto na lembeti 25]

Paul atambela akilomètre mingi na lê ti ngu nga na ando nde nde ti fa nzo tënë

[Foto na lembeti 24]

Jéhovah afa na Pierre ti gue ti fa tënë ti témoin na Corneille nga na sewa ti lo