Sarango kusala na yâ ti kongregation so asara bungbi na mbeni yanga ti kodoro nde
BAZENGELE Jean atene: “Mbi bâ mbeni ange ayeke huru na nduzu, lo yeke na Tene-nzoni ti lakue lakue ti fa na azo so asara kodoro na ndo sese, na ti fa na amara kue, akete mara kue, azo ti yanga nde nde kue, na azo nde nde kue.” (Apocalypse 14:6). Ti gue oko na gango tâ tënë ti prophétie so, a yeke fa nzo tënë ti Royaume na ndo lê sese mobimba na ayanga nde nde kue. Mingi ti ayanga ti kodoro ni so, azo so azia kodoro ti ala ti gue ti sara kodoro yongoro na mbeni kondoro-wande si ayeke tene ni. Azo tongaso nga kue ayeke mä nzo tënë so na lege ti ambeni Témoin ti Jéhovah so ayeke na wâ mingi na so amanda mbeni yanga ti kodoro nde.
Mo yeke na popo ti aTémoin so ayeke sara kusala na yâ ti mbeni kongregation so azo ti yâ ni asara bungbi na mbeni yanga ti kodoro nde? Wala peut-être mo pensé ti sara tongaso? Ti sara ni nzoni, a hunda ti tene nzoni bibe si apusu mo nga a hunda na mo ti duti na nzoni bango ndo. Teti so ye so mo zia na gbele mo ayeke ti mû maboko na azo ti hinga tâ tënë ti Bible, a ye ti fa so bibe so apusu mo ayeke tâ nzoni mingi; bibe ni ayeke ndoye ti mo na mbage ti Jéhovah nga na mbage ti amba ti mo (Matthieu 22:37-39; 1 aCorinthien 13:1). Gi senge nzara ti sarango kamarade na ambeni zo ti kodoro-wande, nzara ti kobe ti ala nga na ti hingango angobo ti sarango ye ti ala alingbi ti pusu mo ti manda yanga ti kodoro ti ala. Me nzara ti mû maboko na ala ti hinga Nzapa alingbi ti pusu mo ngangu mingi ti manda yanga ti kodoro ti ala. Mo bâ ti mo mandango mbeni fini yanga ti kodoro tongana mbeni ye so akpengba mingi? Tongana mo pensé tongaso, mo yeke bâ so ti duti na nzoni bango ndo ayeke mû ande maboko na mo. Jacques so amanda lani yanga ti Japonais atene: “Sara mbeto ti yanga ti kodoro ni pëpe.” Ti hinga so ambeni zo mingi kozoni na mo awara lege ti manda mbeni yanga ti kodoro alingbi ti mû maboko na mo ti ngbâ ti manda ni na ti bata mbeni nzoni bango ndo. Tongaso, tongana nyen mo lingbi ti manda mbeni fini yanga ti kodoro? Nyen la ayeke mû ande maboko na mo ti sara kusala na mbeni kongregation so ayeke sara bungbi na yanga ti kodoro ni so? A lingbi mo sara nyen ti ngbâ ti kpengba na lege ti yingo?
Sarango ngangu ti manda yanga ti kodoro ni
Alege ti mandango na mbeni yanga ti kodoro ayeke mingi. Awamandango yanga ti mbeni kodoro nga na awafango ni na ala ayeke na akode nde nde. Ye oko, mingi ti azo so ayeke manda yanga ti mbeni kodoro nde alingbi ti hinga ni hio tongana ala mû ambeni ngoi ti tene mbeni wafango ye so ahinga yanga ti kodoro ni nzoni si afa ni ala. Tongana mo yeke diko Bible nga na ambeti ti nzapa so a sû na yanga ti kodoro ni nga mo yeke mä ni na ndo ti akasete alingbi ti mû maboko na mo ti hinga ambeni fini tënë ti yanga ti kodoro ni, na ayeke mû nga lege na mo ti hinga ambeni tënë ni so ayeke tene ni gi na yâ ti bungbi ti Jéhovah. Anzoni kuasinga na radio nga na televizion alingbi nga ti fa na mo yanga ti kodoro ni nga na ngobo ti sarango ye ti azo ni nzoni. Âdu ti ngoi so mo yeke mû ti manda na yanga ti kodoro ni, a yeke duti nzoni mingi ti manda yanga ni kete kete lâ oko oko ahon ti mû gbâ ti ngoi ti manda na ni me ti sara ni lakue lakue pëpe.
Ti manda mbeni yanga ti kodoro ayeke tongana mo yeke manda ti tï ngu. Mo lingbi pëpe ti hinga ti tï ngu gi tongana mo diko tënë ni na yâ ti mbeni mbeti. A hunda na mo ti tï na yâ ti ngu ni na ti pika ngu ni. Mandango yanga ti mbeni kodoro nde ayeke nga tongaso. A yeke duti ngangu na mo ti hinga ti tene yanga ti mbeni kodoro gi tongana mo manda ni na yâ ti mbeti. A lingbi mo tingbi na azo so ayeke tene yanga ti kodoro ni na mo mä tongana nyen ala tene ni nga mo gi alege kue ti sara lisoro na ala. Akusala ti Chrétien ayeke mû lege na mo ti sara tongaso. Mingi ni, kusala ti fango tënë alingbi ti mû lege na mo ti sara kusala hio na atënë ni so mo manda awe. Midori so ayeke manda yanga ti Chinois atene: “Ti zo so ayeke manda yanga ti Chinois peut-être gi na bango ni mbeto alingbi ti sara lo. Me azo so mo yeke fa tënë na ala alingbi ti bâ so aTémoin ti Jéhovah ayeke sara ngangu mingi ti tene yanga ti kodoro ni. Na ye so alingbi ti pika bê ti ala. E lingbi ti hunda gi ala na yanga ti kodoro ti ala, e tene, ‘Tongana nyen?’, lê ti ala alingbi ti fa na mo so ala yeke na ngia ti sara lisoro na mo!”
Abungbi ti kongregation nga ayeke mû maboko na zo mingi na mandango yanga ti mbeni kodoro. Na abungbi ni kue, sara ngangu ti kiri tënë kamême fani oko. Na tongo nda ni, atâa mbeto ni alingbi ti sara mo tongana nyen, gi bê ti mo pëpe. Na bê ti aita ti kongregation ni, ala aye ti tene mo sara ni nzoni. Monifa so ayeke manda yanga ti Coréen atene: “Mbi yeke girisa pëpe mbeni ita-wali so aduti lani nduru na tere ti mbi na ngoi ti abungbi na so lo yeke sû ambeni nda ti tënë ni na lê ti mbeti na mbi. Nzobe ti lo na mbage ti mbi nga so lo hinga ti kanga bê amû lani maboko na mbi biani.” Tongana mo hinga ambeni tënë ni mingi awe, mo lingbi ti to nda ti gbu li ti mo gi na yanga ti kodoro ni so, so ti tene tongana mo di iri ti mbeni ye na yanga ti kodoro ni, tara ti bâ gi ye ni so na yâ ti li ti mo kâ ahon ti tene mo gi ti hinga iri ti ye ni kozoni awe na yanga ti kodoro ti mo si fadeso mo kiri pekoni na yanga ni so mo yeke manda.
Kozo ye so mo zia na gbele mo tongana mo yeke manda mbeni yanga ti kodoro ayeke ti tene mo ‘tene atënë so lê ni avuru’. (1 aCorinthien 14:8-11, Fini Mbuki 2001 ). Atâa so azo alingbi ti sara kue ti bâ gi tënë so mo ye mbilimbili ti tene, a lingbi ti si so agirisango yanga ti mo wala atënë so mo tene ni na lege ni pëpe asara si ala dengi mê nzoni pëpe ti mä tënë so mo yeke fa na ala. Ni la gi na tongo nda ti mandango yanga ti kodoro ni, bi bê ti mo ti tene sarango tënë ti mo atoto na lege ni nga alingbi na andia ti tenengo yanga ti kodoro ni so; sarango tongaso ayeke kanga lege na mo si mo tï pëpe na yâ ti mbeni sioni kode ti tenengo yanga ti kodoro ni so ayeke duti ande ngangu na mo ti zia lege ni. Marc, so amanda lani yanga ti Swahili, afa kode so, lo tene: “Hunda na azo so ayeke mä mo ti fa na mo atënë so mo yeke tene ni na lege ni pëpe na tongana ala fa ni na mo, kiri singila na ala ndali ni.” Ti tâ tënë ni, bâ ngoi nga na ngangu ti azo so ayeke mû maboko na mo na lege so. Atâa so mo lingbi ti hunda mbeni zo ti mû maboko na mo ti leke yâ ti adevoir ti mo, tara ti sara kusala kozoni na ambeni tënë so mo hinga ni awe, ti leke na adiskur ti mo nga na atënë so mo ye ti kiri na ni na ngoi ti abungbi. Ye so alingbi ti mû maboko na mo hio ti manda yanga ti kodoro ni na ti tene ni na mbeto pëpe.
Ngbâ ti gue na li ni
Monifa atene: “Mandango mbeni yanga ti kodoro nde ayeke mbeni ngangu kua so ahon atanga ni kue so mbi sara ni. Ambeni ngoi ayeke dä so mbi ye ti zia lege ni. Me mbi dabe ti mbi na kota nzara so awamandango Bible ayeke na ni ti hinga akpengba tâ tënë ti Bible so mbi yeke fa na ala na yanga ti Coréen ti mbi ni so akpengba pëpe so, nga ngia so aita ayeke fa ni ndali ti ngangu so mbi yeke sara atâa so ayeke mingi pëpe.” Ye ni ayeke pëpe ti dö lege ni hio ti zia. Ye so mo zia na gbele mo ayeke ti wara lege ti fa na azo tâ tënë ti Mbeti ti Nzapa so ayeke ga na ala salut (1 aCorinthien 2:10). Tongaso, ti manda ti fa tënë ti Nzapa na mbeni yanga ti kodoro nde, a hunda ti tene mo zia bê ti mo kue dä nga ayeke mû ngoi mingi. Tongana mo yeke maï na yâ ni, kpe ti haka tere ti mo na ambeni zo so ayeke tene ni nzoni ahon mo. Azo so amanda ambeni yanga ti kodoro nde ayeke maï na alege nde nde. Ye oko, a yeke nzoni ti bi bê ti mo gi na ndo ti maïngo ti mo mveni (aGalate 6:4). Joon so ayeke manda yanga ti Chinois atene: “Mandango mbeni yanga ti kodoro ayeke tongana ti so zo ayeke tambela na ndo ti escalier. Gi na ngoi so mo bâ so mo yeke gue na li ni pëpe, mo ti bâ so mo la mo yeke tene yanga ti kodoro ni pendere mingi so.”
Mandango mbeni yanga ti kodoro nde ayeke mbeni ye so zo ayeke sara ni na yâ ti fini ti lo kue. Tongaso, wara ngia na mandango ni na hunda ye na mo mveni ahon ndo ni pëpe (Psaume 100:2). Girisango yanga ayeke manke ti lo ka pëpe na ayeke nga mbeni lege ti mandango yanga ti kodoro ni la. Na ngoi so mbeni wafango tënë ato nda ti fa tënë lani na yanga ti Italien, lo hunda zo so lo yeke fa tënë ni na lo, lo tene: “Mo hinga balai ti fini ti e azo?” Lo ye fade ti tene: “Mo hinga ngbanga ti nyen e azo e yeke na fini?” Ti mbeni ita so amanda yanga ti Polonais fini fini, lo ye ti hunda na aita ti londo ti he bia me lo tene na ala ti londo ti he mbo. Gi ndali ti so lo gbian totongo ti go ti lo gi kete, mbeni ita so ayeke manda yanga ti Chinois aye ti wa azo so ayeke mä lo ti duti na mabe na yâ sandaga ti Jésus; ye oko, lo tene na ala ti mä bê na bibliothèque ti Jésus. Nzoni ti agirisango yanga ni ayeke so tongana a fa na mo tâ lege ti sarango tënë ni, a yeke ngangu ti tene mo girisa tâ lege ti tenengo tënë ni so.
Sara kusala na kongregation ni
A yeke pëpe gi ayanga ti kodoro si akangbi popo ti azo. Mingi ni, a yeke angobo ti sarango ye, atënë ti mara, nga na ti akodoro si ayeke kangbi yâ ti azo même mingi. Ye oko, zo alingbi ti hon ndo ti aye so. Mbeni wandara, so ayeke manda ye na ndo abungbi ti vorongo nzapa so ayeke sara abungbi ti ala na yanga ti Chinois na Poto, atene so na popo ti aTémoin ti Jéhovah “tënë ti mara ayeke ti lo ye oko pëpe, nga ayanga ti kodoro ayeke gi mbeni senge lege ti fa na azo ti hinga tënë ti Nzapa.” Biani, ti sara ye alingbi na akpengba-ndia ti Bible ayeke ye so amû maboko na atâ Chrétien ti hon ndo ti atënë ti mara. Ti azo so ‘ayü zo-ti-fini, Grec na Juif na zo ti ngonda ayeke pëpe.’—aColossien 3:10, 11.
Tongaso, a lingbi azo kue ti yâ ti kongregation ni asara kusala ti maï dutingo beoko ti ala. So a hunda ti tene zo kue azi bê ti lo ti duti nduru ti yeda na tënë ti bê, bango ndo, nga na aye so mba ti lo ayeke sara. Mo lingbi ti kanga lege na akete tënë ti ga na kangbi na yâ ti kongregation ni gi tongana mo bâ ndo mingi pëpe na ndo ti aye so bê ti mo aye (1 aCorinthien 1:10; 9:19-23). Gi ti bâ gi anzoni sarango ye so ayeke na yâ ti angobo kue ti sarango ye ti azo. Dabe ti mo so, ndoye so agi ye ti lo mveni pëpe ayeke kota ye so asara si zo ayeke duti na nzoni songo na amba ti lo nga ala duti beoko biani.
Mingi ti akongregation so ayeke sara bungbi na mbeni yanga ti kodoro nde ato nda ni tongana akete groupe, na mingi ti azo so ayeke na yâ ni ayeke azo so ayeke manda yanga ti kodoro ni mandango; na tere ti ala a yeke wara nga ambeni zo so ato nda ti manda Bible aninga pëpe. Tongaso, gbungo nda ti ye na lege ni pëpe ayeke si ka mingi na yâ ti agroupe tongaso ahon ti so ayeke si na yâ ti mbeni kota kongregation so gere ni aluti nzoni. Ni la a lingbi aChrétien so ayeke biazo asara ngangu ti tene gere ti kongregation ni aluti nzoni. Fango ndoye nga na nzobe na lege ti tënë ti yanga nga na lege ti sarango ye ayeke sara si groupe ni aga mbeni nzoni ndo so afini zo alingbi ti maï dä na lege ti yingo.
A lingbi ala so ayeda na bê ti ala ti mû maboko na mbeni kongregation so asara bungbi na mbeni yanga ti kodoro nde aku ye ahon ndo ni pëpe na mbage ti amba ti ala. Rick, ancien na yâ ti mara kongregation ni so, atene: “Peut-être ambeni zo so ayeke na yâ ti kongregation ni aga aTémoin ti Jéhovah aninga pëpe, nga peut-être a fa na ala nzoni mingi pëpe akode ti lekengo yâ ti akua si atambela nzoni na yâ ti kongregation ni tongana ti ala so ayeke na yâ ti akongregation so asara bungbi na yanga ti kodoro ti ala mveni. Me atâa kode so atia ala ayeke tongana nyen, fani mingi ala wara lege ti kanga lê ni na sarango ye na ndoye nga na wâ. Na mingi ti azo so asara nzara ti tâ tënë ayeke ga na yâ ti bungbi.” Atâa mo ngbâ ti manda yanga ti kodoro ni mandango, tongana mo yeke gue lakue na bungbi nga na fango tënë na mo yeke sara kusala na ngangu ti mo kue, mo lingbi biani ti sara nzoni mingi na kongregation ni. Tongana azo kue asara kusala maboko na maboko, kongregation ni alingbi ti maï na lege ti yingo.
Ngbâ ti kpengba na lege ti yingo
Mbeni ita so aga lani fini fini na yâ ti mbeni kongregation so ayeke sara bungbi na mbeni yanga ti kodoro nde amä mbeni mama so ayeke mû maboko na molenge ti lo ti leke mbeni kiringo tënë na bungbi. Molenge ni ahunda mama ni lo tene: “Mama, a yeke nzoni kiringo tënë ti mbi ni aduti nduru pëpe? Mama ni akiri tene: “Ên-ën, molenge ti mbi. E zia nduru kiringo tënë ni na azo so angbâ ti manda yanga ti kodoro ni mandango.”
Ti mbeni kota zo, tongana teti anze mingi wala teti angu mingi lo lingbi pëpe ti tene yanga ti mbeni kodoro nzoni ti tene azo amä lo, a lingbi ti sara si bê ti lo anze na lo woko na lege ti yingo. Jannette, so ayeke tene yanga ti Espagnole fadeso nzoni mingi, atene: “Bê ti mbi anze lani hio mingi ndali ti so mbi hinga ti tene yanga ti Espagnole ni nzoni pëpe.” Hiroko so amanda lani yanga ti Anglais atene: “Même ambo na anyau kue amä yanga ti Anglais ni ahon mbi.” Na Kathie atene ti lo atene: “Mbi yeke lani na gbâ ti a-étude na avizite, me na ngoi so mbi gue na yâ ti mbeni kongregation so ayeke sara bungbi na Espagnole, mbi yeke na étude nga na vizite oko tongaso pëpe. Mbi bâ ti mbi so mbi sara kua oko pëpe.”
Na ndo tene so nga, dutingo na nzoni bango ndo ayeke kota ye mingi. Na ngoi so bê ti lo anze kue, Hiroko atene: “Mbi tene, tongana ambeni zo alingbi ti manda ambeni yanga ti kodoro nde, mbi kue mbi lingbi ti manda ni.” Kathie atene: “Mbi pensé lani na koli ti mbi so ayeke gue na li ni pendere mingi na so lo yeke na aye mingi ti sara na yâ ti kongregation ni. Ye so apusu mbi ti hon ndo ti ambeni kpale ni na tongaso ti gue na li ni. A hunda lakue ti sara ngangu mingi, me yeke na yeke mbi yeke wara kode ti fa tënë na ti fa ye na zo, ye so amû na mbi ngia mingi.” Koli ti lo Jeff atene: “A yeke ye ti songo bê tongana mo yeke gbu pëpe nda ti akete tënë kue so a fa ni na ngoi ti atokua so a yeke sara na abungbi nga na ngoi ti abungbi ti a-ancien. A lingbi mbi sara ye na lege ni na mbi mveni na mbi duti na tâ be-ti-molenge, ni la mbi yeke hunda na ambeni ita ti fa na mbi anzene nzene tënë ti akete tënë ni, na aita ni ayeke na ngia ti fa ni na mbi.”
Ti kpe si mo woko pëpe na lege ti yingo na ngoi so mo yeke sara kusala na yâ ti mbeni kongregation so ayeke sara bungbi na mbeni yanga ti kodoro nde, a lingbi mo zia na kozo ndo tënë ti seni ti mo na lege ti yingo (Matthieu 5:3). Kazuyuki, so aninga angu mingi awe na yâ ti mbeni territoire so azo ni ayeke tene yanga ti Portugais, atene: “A yeke kota ye mingi ti tene e te kobe ti yingo mingi. Nda ni la e yeke manda ye na sewa nga e yeke leke abungbi ti kongregation na yanga ti kodoro ti e nga na yanga ti Portugais.” Ngoi na ngoi ambeni zo ayeke gue na abungbi so a yeke sara ni na yanga ti kodoro ti ala. Na ndo ni, ti hu tere nzoni ayeke kota ye.—Marc 6:31.
Diko ngere ni
Tongana mo pensé ti gue ti sara kusala na yâ ti mbeni kongregation so ayeke sara abungbi na mbeni yanga ti kodoro nde, a lingbi mo diko ngere ni si (Luc 14:28). Na ndo tënë so, kota ye so alingbi mo bâ ayeke dutingo ti mo na lege ti yingo nga na songo ti mo na Jéhovah. Sambela Jéhovah na ndo tënë ni. Bâ na nene ni wali wala koli ti mo nga na amolenge ti mo. Hunda tere ti mo mveni: ‘Dutingo ti mbi alingbi? Mbi kpengba na lege ti yingo na mbi hinga ti kanga bê ti sara mara ti kota pialo tongaso so ayeke mû ngoi mingi?’ Ti sara mbeni ye so ayeke ga na nzoni mingi na lege ti yingo na mo nga na sewa ti mo ayeke lege ti ndara. Ndo kue so mo yeke dä tongana mo yeke wafango tënë ye ti sarango ni ayeke mingi, na alingbi ti ga na mo ngia mingi nga.
Ti ala so awara lege ti sara kusala na yâ ti mbeni kongregation so ayeke sara bungbi na mbeni yanga ti kodoro nde, ala yeke wara aye ti nzoni mingi. Barbara, so lo na koli ti lo ague lani ti sara kusala na yâ ti mbeni kongregation so ayeke sara bungbi na yanga ti Espagnole, atene: “A yeke mbeni nzoni ye ahon tanga ti aye kue so mbi sara na yâ fini ti mbi. A yeke tongana mbi kiri mbi manda Bible ti kozoni. Teti so e lingbi pëpe ti sara kusala ti missionnaire na yâ ti mbeni kodoro wande, a nzere na mbi mingi so e sara tongaso.”
Na ndo sese kue, azo ti akodoro nde nde ahon saki use tongaso ayeke hon ndo ti kpale ti mandango mbeni yanga ti kodoro nde ti tene ala fa nzo tënë ti Royaume. Tongana mo yeke na popo ti ala, ngbâ ti bata nzoni bibe so apusu mo ti sara ni nga na nzoni bango ndo ti mo. Na ndo ni kue, zia bê ti mo kue na Jéhovah ti iri deba nzoni na ndo ti angangu so mo yeke sara.—2 aCorinthien 4:7.
[Foto na lembeti 18]
Mo lingbi ti hinga yanga ti kodoro ni hio tongana mo mû ambeni ngoi ti tene mbeni wafango ye so ahinga yanga ti kodoro ni nzoni si afa ni na mo
[Foto na lembeti 20]
Na oko ngoi so mo yeke manda mbeni yanga ti kodoro nde, a lingbi mo sara ngia na dutingo ti mo na lege yingo pëpe