Nzapa abi bê na ambakoro

BÊ TI e adö pëpe ti bâ so na ndo sese kue laso a sara sioni na ambakoro. Giriri, Mbeti ti Nzapa afa so na ngoi ti “lâ ti nda ni” ti sese so ake Nzapa, fade azo “ayeke azo ti ndoye tere ti ala mveni, . . . azo so andoye asongo ti ala pëpe”. (2 Timothée 3:​1-3). Tënë ti Grec so a kiri pekoni na “andoye asongo” alingbi ti ndu nga ndoye so mingi ni ayeke na popo ti azo ti yâ ti sewa. A lingbi na prophétie ti Bible, a yeke ngangu ti bâ mara ti ndoye tongaso laso.

Nde mingi na azo so asara sioni na ambakoro, Jéhovah Nzapa abâ na nene ni mingi ala so ngu ti ala ahon mingi awe na lo bi bê na ala. Zia e gbu li na ndo ye so Bible atene na ndo ni.

“Juge ti awomua”

Mbage ti Bible so a sû na yanga ti Hébreu afa polele so Jéhovah Nzapa abi bê na ambakoro. Na tapande, na Psaume 68:6, David airi Nzapa “Juge ti awomua”, so mingi ni ayeke ambakoro.a Na yâ ti ambeni Bible, a kiri peko ti tënë “Juge” na “wagbungo koko”, “wabatango zo”, na “walombe”. Biani, Jéhovah abi bê ti lo na awomua. Bible atene même so tongana a sara sioni na ala, ngonzo ti lo alondo tongana wâ (Exode 22:22-24). Nzapa na awakua ti lo nga amû na nene ni mingi awomua na ambakoro kue so aduti be-ta-zo. A-Proverbe 16:31 afa na gigi bango ndo ti Jéhovah Nzapa na ti azo ti lo tongana a tene: “Kuali so avuru ayeke couronne ti gloire, zo awara so na lege ti mbilimbili.”

A yeke senge pëpe si kpengo ambakoro ayeke mbeni kpengba mbage ti Ndia so Jéhovah amû lani na Israël. A mû yanga so na azo ti Israël: “A lingbi mo londo, mo luti na gbele zo so kuali ti lo avuru, na mo yekia lê ti mbakoro zo, na mo kpe mbeto ti Nzapa ti mo​—Mbi yeke L’Eternel!” (Lévitique 19:32). Tongaso, kpengo mbakoro na Israël ague tâ oko na songo ti zo na Jéhovah Nzapa. Mbeni zo alingbi ti tene pëpe so ni ndoye Nzapa tongana lo sara sioni na ambakoro.

A-Chrétien ayeke na gbe ti Ndia ti Moïse pëpe. Ye oko, ala yeke na gbe ti “ndia ti Christ”, ye so andu ngangu mingi tambela na bango ndo ti ala, nga na fango na gigi ndoye nga na bingo bê na ababâ na mama na ambakoro (aGalate 6:2; aEphésien 6:1-3; 1 Timothée 5:1-3). Na aChrétien afa ndoye gi pëpe ngbanga ti so a hunda na ala ti sara tongaso, me ngbanga ti so a yeke bê ti ala si apusu ala ti sara ni. Bazengele Pierre amû wango so: “I ndoye ambeni zo na popo ti i na be-biani.”​—1 Pierre 1:⁠22.

Disciple Jacques afa nga mbeni tënë so apusu e ti bi bê na ambakoro. Lo tene: “Tâ lege ti sara na Nzapa, lege so ayeke na siokpari oko pëpe na lê ti Nzapa Babâ ayeke so: ti gue ti bâ amolenge so babâ ti ala ayeke pëpe na awomua na yâ vundu ti ala, na ti bata tere ti lo mveni si lo ga sioni pëpe na lege ti ye ti sese so.” (Jacques 1:27). Jacques asigigi na mbeni tënë so agbu bê. Tënë ni agboto lê na ndo nene ti aita ti e so aga mbakoro awe na lê ti Jéhovah.

Ni la, gi ti ke ti sara sioni na ambakoro alingbi pëpe. Me, a lingbi e bi bê na ala na sarango nzoni kusala ndali ti ala. (Bâ encadré “Akusala ti ndoye”, na lembeti 6-7). Jacques asû na mbeti: “Mabe so ayeke na kusala ni pëpe ayeke na fini pëpe.”​—Jacques 2:26.

Dengo bê “na yâ vundu ti ala”

Mbeni ye ti manda ayeke na yâ tënë ti Jacques. Bâ so Jacques atene na aChrétien ti bâ awomua “na yâ vundu ti ala”. Tënë ti Grec so a kiri pekoni na “ye ti vundu” aye mbilimbili ti tene gingo bê, pasi wala pono so asi ndali ti akpale ti gigi. Kite ayeke pëpe so mingi ti ambakoro ahinga mara ti avundu so. Ambeni ayeke gi ala oko. Ti ambeni bê ti ala awoko ngbanga ti akpale ti lâ ti mbakoro. Même vundu alingbi ti sara ala so angbâ ti sara ye mingi na yâ kusala ti Nzapa. Bâ Jean,b mbeni be-ta-zo so afa tënë ti Royaume ti Nzapa a hon ngu bale-osio awe, so na yâ ni lo sara andangba ngu bale-ota ni na yâ mbeni mara ti kusala ti ngoi kue so ayeke nde. Fadeso ngu ti Jean ahon 80 awe, na lo tene so ngoi na ngoi ni yeke na vundu. Lo tene: “Mbi yeke pensé mingi na gigi ti mbi ti giriri na mbi dabe mbi na afaute so mbi sara, afaute ni ahon ndo ni. Lakue mbi yeke tene so mbi lingbi lani ti sara nzoni ahon so.”

Azo tongaso alingbi ti dë bê ti ala na tënë so: atâa so Jéhovah ayeke mbilimbili-kue, lo ku pëpe ti tene e sara ye mbilimbili-kue. Atâa so lo hinga afaute ti e, Bible atene na ndo ti lo: “O L’Eternel, tongana Mo bata tënë ti sioye, O Seigneur, ka zo nyen alingbi ti ngbâ?” (Psaume 130:3). Biani, Jéhovah aluti gi na ndo afaute ti e pëpe me lo bâ nga ye so ayeke na bê ti e. E hinga ni tongana nyen?

Yingo ti Nzapa apusu Gbia David, so asara siokpari na ayeke mbilimbili-kue pëpe, ti sara tënë so e wara na Psaume 139:1-3: “O L’Eternel, Mo tara mbi awe, na Mo hinga mbi. Mo hinga lege ti dutingo ti mbi na londongo ti mbi, yongoro kâ, Mo hinga bibe ti mbi. Mo bâ lege so mbi tambela na lege so mbi lango, na Mo hinga lege ti mbi kue.” Ge, tënë “bâ lege” aye ti tene ti “yengere”, tâ gi tongana ti so mbeni wafango yaka ayeke pe le-kobe ti tene saleté ni ahon. Na gbe ti yingo ti Nzapa, David amû na e zendo so Jéhovah ahinga tongana nyen ti zi afaute ti e na ti dabe na anzoni ye so e sara.

Babâ ti e ti be-nzoni ti yayu ayeke dabe ti lo, nga lo yeke yekia, anzo kusala ti e na ngoi kue so e ngbâ be-ta-zo na lo. Biani, Mbeti ti Nzapa atene so a yeke duti ande ye ti kirikiri na lê ti Nzapa ti girisa kusala ti e na ndoye so e fa teti iri ti lo.​—aHébreu 6:10.

“Kozo ye ni ahon awe”

Bible afa so akpale ti dutingo mbakoro ayeke pëpe aye so Nzapa aleke giriri teti azo. A yeke gi na peko ti so akozo babâ ti e, kozo koli na kozo wali, ake yanga ti Wasarango ala si sioye ti gango mbakoro aga fadeso ye so asi na azo (Genèse 3:17-19; aRomain 5:12). Fade ye so angbâ lakue lakue pëpe.

Tongana ti so e bâ kozo awe, mingi ti asioye so e hinga laso, so na popo ni mo wara sarango sioni na ambakoro, ayeke fä ti “lâ ti nda ni” ti aye ti sese so e yeke dä (2 Timothée 3:⁠1). Ye so Nzapa aye ti sara ayeke ti lungula sioye so siokpari aga na ni, so na popo ni mo wara nga kpale ti dutingo mbakoro na kui. Mbeti ti Nzapa atene: “Fade [Nzapa ambô] ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.”​—Apocalypse 21:4.

Na yâ fini sese ti Nzapa, fade songo tere na sana ti lâ ti mbakoro ayeke ga angbene ye. Legeoko nga na sarango sioni na ambakoro (Michée 4:4). Même ala so akui awe si Nzapa angbâ ti dabe lo na ala, fade ala kiri na fini, tongaso ala kue awara ande pasa ti duti na fini ti lakue lakue na yâ paradis na ndo sese (Jean 5:28, 29). Na lâ ni kâ, fade a yeke bâ ande polele ahon ti kozo so Jéhovah Nzapa ayeke bi bê gi pëpe na ambakoro me na azo kue so amä yanga ti lo.

[Akete tënë na gbe ni]

[Encadré/Foto na lembeti 6]

Akusala ti ndoye

Na aTémoin ti Jéhovah, a yeke a-ancien si amû li ni na bango lege ti ambakoro. Ala mû na nene ni wango so ti bazengele Pierre: “I bata kundu ti Nzapa so ayeke na popo ti i.” (1 Pierre 5:⁠2). Ti bata ambakoro ayeke mbeni mbage ti batango kundu ti Nzapa. Me a ye ti tene nyen mbilimbili?

A hunda ti duti na be-nze-pepe na peut-être ti gue lege mingi ti bâ mbeni zo so ayeke mbakoro na ti sara lisoro na lo ti hinga mbilimbili aye so atia lo. Peut-être a lingbi ti mû maboko na ala na vongo ye na gara, na sukulango yâ ti da, na yongo ala ti gue na bungbi, na dikongo Mbeti ti Nzapa na ambeni mbeti na ala nga na ambeni ye nde nde mingi. Tongana lege ayeke dä, a lingbi ti leke ye mbilimbili ti tene akusala ni atambela nzoni nga a bâ pekoni.c

Me, ye nyen e yeke sara tongana mbeni ita mbakoro ti kongregation ayeke na yâ ti kota kpale, so peut-être ahunda nginza? Kozoni, a yeke nzoni ti gi ti bâ wala zo ni ayeke na amolenge wala ambeni sewa so alingbi ti mû maboko na lo. Tënë so ague oko na ye so a tene na 1 Timothée 5:4: “Me tongana mbeni womua ayeke na amolenge, wala na molenge ti amolenge ti lo, zia ala manda ti fa lege ti bata tënë ti Nzapa na afamille ti ala mveni kozoni, na ti kiri futa teti nzo ye so ala wara na tïtî babâ na mama ti ala giriri; teti so ayeke nzoni na lê ti Nzapa.”

A lingbi ti duti so mbakoro ni ayeke na bezoin ti tene a mû maboko na lo ti bâ wala mbeni mungo maboko na mbage ti letäa ayeke dä teti lo. Peut-être ambeni zo na yâ ti kongregation alingbi ti mû maboko dä. Tongana mbeni ye oko ti sara na popo ti aye so ayeke dä pëpe, a-ancien ayeke bâ wala ita ni alingbi na mbeni mungo maboko na mbage ti kongregation. Ti ambeni zo lani, a hunda ti sara tongaso na yâ kongregation ti akozo Chrétien, teti bazengele Paul asû mbeti na fon lo wakua Timothée: “Zia iri ti mbeni womua na yâ mbeti ti awomua pëpe, gi tongana ngu ti lo alingbi na bale-omene na lo yeke wali ti koli oko giriri, na tongana azo asara tënë ti témoin ti nzo kusala ti lo, so atene: lo bata amolenge ti lo nzoni, lo sara songo na agene, lo sukula gere ti azo ti be-vulu, lo sara nzoni na azo so ayeke na yâ vundu, na lo sara nzo kusala nde nde kue.”​—1 Timothée 5:9, 10.

[Akete tënë na gbe ni]

[Foto na lembeti 5]

Dorcas amû maboko na awomua so ye atia ala.​—Kusala 9:36-39