Amaseka, i soro ti sara na Jéhovah

“Laso i kamata lo so bê ti i aye ti sara na lo.”​—JOSUÉ 24:15.

“ZIA [amolenge] aga aChrétien na ngoi so ala kpengba awe ti hinga Christ.” A yeke Tertullien, mbeni wasungo mbeti, si asû atënë so nduru na ngu 200. Lo ke na ngangu tënë ti batême ti akete molenge, ye so aChrétien ti wataka ato nda ti zia gere ni na sese na ngoi ti lo. Augustin, mbeni Babâ ti Eglise, so ake tënë ti Tertullien na ti Bible, atene so batême ayeke zi sioye ti kozo siokpari na amolenge so akui san ti wara batême fade ala gue na enfer. Mabe na tënë so amaï tënë ti mungo batême na abébé hio na peko ti so a dü ala.

² Mingi ti akota Eglise so atene ala yeke ti Christ angbâ ti mû batême na abébé. Na ndo ni, mbaï afa so ândö agbia na amokonzi-nzapa ti amara so atene ala yeke aChrétien amû batême na ngangu na “apaïen” so ala mû kodoro ti ala. Batême ti abébé na gbungo akota zo na ngangu ti wara batême alondo na yâ ti Bible pëpe.

Laso zo amû tere ti lo na Nzapa na bê ti lo

³ Mbeti ti Nzapa afa so Nzapa abâ akete molenge nzoni-kue même gi tongana babâ wala mama ti ala ayeke Chrétien be-ta-zo (1 aCorinthien 7:14). So a sara si amolenge tongaso aga awakua so amû tere ti ala na Jéhovah awe? Oko pëpe. Me, amolenge so ababâ na mama so amû tere na Jéhovah awe abata ala awara fango ye so alingbi ti pusu amolenge ni ti mû tere ti ala na lo. Salomon, gbia ti ndara, atene: “Molenge ti mbi, mo bata komandema ti babâ ti mo, na mo zia lege ti wango tene ti mama ti mo pëpe. . . . Tongana mo tambela, fade tënë so afa lege na mo. Tongana mo lango, fade a sara sinziri na tere ti mo. Tongana mo zingo na lango, fade a sara tënë na mo. Teti komandema ni ayeke lampe, na wango tënë ni ayeke lumière, na wango tënë ti zingo na zo ayeke lege ti fini.”​—aProverbe 6:20-23.

⁴ Fango lege ti ababâ na mama so ayeke aChrétien alingbi ti bata amolenge tongana ala yeda na ni. Salomon atene nga: “Molenge ti ndara amû ngia na babâ ti lo, me molenge ti buba amû vundu na mama ti lo.” “Mo mä, molenge ti mbi, mo duti na ndara, na mo fa na bê ti mo nzo lege.” (aProverbe 10:1; 23:19). Ti wara nzoni na lege ti fango lege ti ababâ na mama, a lingbi i amolenge i duti nduru ti yeda na awango kue so ala mû na i. A dü i na ndara pëpe, me i lingbi ti “duti na ndara” na ti tambela na bê ti i mveni na “lege ti fini.”

Ti mû wango aye ti tene nyen?

⁵ Bazengele Paul atene: “Amolenge, i mä tënë ti ababâ na amama ti i na yâ Seigneur, teti so ayeke lege ni. A lingbi mo yekia babâ na mama ti mo, so ayeke kozo komandema so zendo ayeke dä, si mo lingbi duti nzoni, na lâ ti mo awu mingi na ndo sese. Na i, ababâ, i gi amolenge ti i na tënë pëpe, si ngonzo agbu ala; me i bata ala, i fa lege na ala na wango ti Seigneur.”​—aEphésien 6:1-4.

⁶ Tongana ababâ na mama Chrétien afa na amolenge ti ala ‘lege na wango ti Jéhovah,’ fade a bâ ni tongana sarango ngangu ti sioni na ndo ti ala? So ayeke gbungo zo na ngangu ti yôro atënë na yâ ti li ti lo la? Oko pëpe. Zo wa alingbi ti kasa ababâ na mama teti ala fa na amolenge ti ala ye so ala bâ ayeke mbilimbili nga so ayeke sara si gigi ti ala atambela nzoni? Azo so atene Nzapa ayeke dä pëpe, a kasa ala pëpe teti so ala fa tënë so na amolenge ti ala. Ti aCatholique, ala bâ so a yeke kungba ti ala ti fa na amolenge ti ala atënë ti mabe ti Eglize ni, na a yeke ngangu ti tene zo akasa ala ndali ni. Legeoko tongaso, a lingbi a tene pëpe so aTémoin ti Jéhovah ayeke sara ngangu na ndo bibe ti amolenge ti ala tongana ala yeke fa na ala ti yeda na bibe ti Jéhovah na ndo akota tâ tënë na akpengba-ndia ti tambela ti zo.

⁷ Ti mbeni bakari (Theological Dictionary of the New Testament), tënë ti Grec so a kiri pekoni na “wango” na aEphésien 6:4 andu tënë ti “gi ti leke bibe, ti leke nzoni ye so ayeke sioni, ti sara si bango ndo na mbage ti Nzapa aga nzoni.” Ka tongana mbeni maseka ake fango lege ti babâ na mama ti lo ngbanga ti so amba ti lo asara ngangu na ndo ti lo na lo ye ti mû gi peko ti ala? Fade a tene zo wa si asara ngangu na ndo ti maseka ni: ababâ na mama ti lo wala amba ti lo? Tongana amba ti maseka ni ayeke pusu lo ti nyon ambangi, ti nyon sämba mingi wala ti sara pitan, fade a kasa babâ na mama ngbanga ti so ala gi ti wa molenge ti ala na ti mû maboko na lo ti bâ asioye ti peko ti sioni tambela tongaso?

⁸ Bazengele Paul asû tënë so na maseka-koli Timothée: “Mo ngbâ na lege ti ye so mo manda awe, na ye so mo hinga na bê ti mo, teti mo hinga azo so afa ye so na mo; na tongana mo de molenge mo hinga Mbeti ti nzoni-kue ti Nzapa, so alingbi mû na mo ndara ti wara salut, na lege ti mabe so ayeke na yâ Christ Jésus.” (2 Timothée 3:14, 15). Ngbene ye so Timothée angbâ kete, mama ti lo na tarä ti lo afa ye na lo na yâ ti Mbeti ti Nzapa ti tene mabe ti lo na Nzapa akpengba (Kusala 16:1; 2 Timothée 1:5). Na pekoni, tongana ala ga aChrétien awe, mama ti Timothée na tarä ti lo agbu lo na ngangu pëpe ti mä na bê, me a yeke na lege ti fango ye ti ala so aluti na ndo ti Tënë ti Nzapa si lo mä na bê.

Jéhovah airi mo ti soro ye

⁹ Jéhovah alingbi lani ti sara azo na a-ange tongana amasini so alingbi ti sara gi ye so lo ye, ye so lo zia na yâ li ti ala. Nde na so, lo ne ala na mungo na ala liberté ti soro ye. Nzapa ti e aye si azo amä yanga ti lo na bê ti ala. A nzere na lo ti bâ azo, akangba na amaseka, asara na lo na ndoye. Tapande so ahon atanga ni kue ti mango yanga ti Nzapa na ndoye ayeke ti Molenge ti lo ngengele oko, so Jéhovah atene na ndo ti lo: “So ayeke Molenge ti Mbi so Mbi ndoye Lo, Lo mû ngia na Mbi mingi.” (Matthieu 3:17). Kozo Molenge so atene na Babâ ti lo: “Mbi ye ti sara ye so bê ti Mo aye, O Nzapa ti mbi, Ndia ti Mo ayeke na yâ bê ti mbi.”​—Psaume 40:9; aHébreu 10:9, 10.

¹⁰ Jéhovah aku ti tene azo so ayeke sara na lo na gbe ti Molenge ti lo afa oko nzara ti mango yanga ti lo tongaso. Wasungo psaume ahe bia ti prophétie so: “Azo ti Mo amû ala mveni na nzobe, na lâ ti bira ti Mo, ala yü ye ti pendere ti nzoni-kue; apendere ti Mo ayeke tongana mamio ti ndapre.” (Psaume 110:3). Bungbi ti Jéhovah kue, ti yayu na ti sese, atambela na ndo mango yanga ti Nzapa ngbanga ti ndoye.

¹¹ Tongaso a lingbi i amaseka i hinga so ababâ na mama wala a-ancien ti kongregation ayeke gbu i na ngangu pëpe ti wara batême. A lingbi nzara ti sara na Jéhovah alondo na bê ti i mveni. Josué atene lani na azo ti Israël: “I sara na [Jéhovah] na be-biani na tene-biani; . . . laso i kamata lo so bê ti i aye ti sara na lo.” (Josué 24:14-22). Legeoko nga, a lingbi bê ti i mveni si apusu i ti mû tere ti i na Jéhovah na ti mû fini ti i ti sara ye so bê ti lo aye.

Yeda ti yô kungba ti mo

¹² I amaseka, ngoi ayeke ga ande so mabe ti ababâ na mama ti i ayeke bata i mbeni pëpe (1 aCorinthien 7:14). Disciple Jacques asû na mbeti: “Zo so ahinga lege ti sara nzoni na lo sara pëpe, zo so asara siokpari.” (Jacques 4:17). Ababâ na mama alingbi ti sara na Nzapa ndali ti amolenge ti ala pëpe, na amolenge nga alingbi ti sara na Nzapa ndali ti ababâ na mama ti ala pëpe (Ezéchiel 18:20). Mo manda ye awe na ndo Jéhovah nga na ye so lo leke awe ti sara? Mo yeke na ngangu ti gbu nda ti ye so mo manda na ti leke mbeni songo na lo? A yeke na lege ni ti tene so na lê ti Nzapa mo lingbi awe ti soro ti sara na lo pëpe?

¹³ Mo yeke mbeni maseka so ade ti wara batême pëpe so babâ na mama ti mo ayeke aChrétien? Mo yeke gue na abungbi? Mo yeke mû même mbage na fango nzo tënë ti Royaume? Tongana a yeke tongaso, hunda tere ti mo nzoni si: ‘Ngbanga ti nyen mbi yeke sara ni? Mbi yeke gue na bungbi nga na fango tënë ndali ti babâ na mama wala ngbanga ti so mbi ye ti nzere na Jéhovah?’ Mo mveni mo hinga awe ‘ye so alingbi na lê ti Nzapa, na ye so alingbi kue’?​—aRomain 12:2.

Ngbanga ti nyen mo ku senge ti wara batême?

¹⁴ “Ye nyen akanga lege na mbi ti wara batême?” Zo ti Ethiopie so ahunda tënë so na Philippe, wafango nzo tënë, gi na peko ti so lo londo ti manda so Jésus ayeke Messie ni. Me zo ti Ethiopie ni ahinga kozoni Mbeti ti Nzapa nzoni, ni la a mû lege na lo ti bâ so a lingbi lo ku pëpe ti fa polele so lo yeke voro Jéhovah fadeso na yâ kongregation ti aChrétien, na ye so amû na lo ngia mingi (Kusala 8:26-39). Legeoko nga, Nzapa alungula bê ti mbeni wali so iri ti lo ayeke Lydie “ti mä tënë so Paul ayeke tene,” na fade fade “a batize lo” na azo ti da ti lo nga (Kusala 16:14, 15). Legeoko tongaso, capitaine ti da ti kanga na Philippes amä tënë ti Paul na Silas tongana ala ‘fa tënë ti Jéhovah na lo,’ na “fade fade lo kamata batême, lo na azo ti da ti lo.” (Kusala 16:25-34). Ni la, tongana mo hinga ambeni kota ye na ndo Jéhovah nga na aye so lo leke awe ti sara, mo yeke na tâ nzara ti sara ye so lo ye, na aita asara nzoni tënë ti mo na lakue mo yeke gue na bungbi nga na fango nzo tënë ti Royaume, ngbanga ti nyen mo yeke ku senge ti wara batême?​—Matthieu 28:19, 20.

¹⁵ Peut-être mo yeke ku ti hon kota kapa so ngbanga ti so mo tene na bê ti mo so fade mo yeke kiri tënë mbeni lâ tongana mo tï na yâ siokpari? Tongana mo yeda, gbu li ti mo na ndo tënë so: Mo yeke ke ti sara permis ti kpengo na kutukutu ngbanga ti so mo yeke na mbeto ti sara ndao mbeni lâ? Oko pëpe! A lingbi mo ku nga pëpe ti wara batême tongana mo lingbi na ni. Ti tâ tënë ni, tongana mo mû tere ti mo na Jéhovah na mo yeda ti sara ye so bê ti lo aye, a yeke kpengba mo ti sara kue ti tï na yâ sioye pëpe (aPhilippien 4:13). Amaseka, pardon, i tene pëpe so na pusungo batême na dawa i yeke kpe tënë. Tongana mo lingbi awe ti mû desizion, atâa mo wara batême awe wala pëpe, mo yeke kiri tënë na Jéhovah teti ye so mo sara.​—aRomain 14:11, 12.

¹⁶ Na ndo sese kue, aTémoin mingi abâ so desizion ti ala ti mû batême na lâ ti maseka ti ala amû maboko na ala mingi. Zia e bâ tapande ti mbeni Témoin ti Jéhovah so ayeke na ngu 23 na Poto ti Do. Lo dabe ti lo so warango batême lâ ni so lo yeke na ngu 13 akpengba lo ti tï pëpe na yâ “nzara nde nde so asara apendere”. (2 Timothée 2:22). Lâ ni so lo ngbâ maseka, lo zia na gbele lo ti sara kua ti ngoi kue. Laso, lo yeke na ngia ti sara kua na mbeni biröo ti aTémoin ti Jéhovah. Adeba nzoni mingi ayeke ku amaseka so asoro ti sara na Jéhovah, na mo kue mo yeke na popo ti ala.

¹⁷ Mungo tere na Nzapa na batême ayeke tongo nda ti mbeni fini so na yâ ni e yeke bi bê lakue gi na ye so bê ti Jéhovah aye na yâ ti aye kue so e yeke sara. Ti sara ye alingbi na mungo tere ti e a hunda na e ti ‘zia l’heure ti e ahon senge pëpe’. Tongana nyen e yeke sara ni? Na mungo ngoi so e lingbi fade ti buba ni ndali ti ambeni senge ye ti manda Bible ngangu, ti gue na bungbi lakue, na ti fa “nzo tënë ti royaume” mingi (aEphésien 5:15, 16; Matthieu 24:14). Mungo tere ti e na Jéhovah na nzara ti e ti sara ye so lo ye ayeke sara ande nzoni na yâ fini ti e kue: angia ti e, ye so e yeke te na e yeke nyon lakue, nga na mozoko so e yeke mä. Ngbanga ti nyen ti soro pëpe angia so mo lingbi ti sara teti lakue lakue? Mingi ti amaseka Témoin ti Jéhovah so ayeke na ngia alingbi ti tene ande na mo so anzoni ngia ti sara ayeke mingi so ague nde pëpe na ‘ye so Jéhovah aye’.​—aEphésien 5:17-19.

“Fade e gue na mo”

¹⁸ Ti londo na ngu 1513 kozo ti Christ ti si na Pentecôte ti ngu 33, Jéhovah ayeke na mbeni bungbi ti azo so lo soro ti voro lo na ti duti atémoin ti lo na sese (Esaïe 43:12). A dü amolenge ti azo ti Israël na yâ ti mara so. Ngbene ye na Pentecôte, Jéhovah ayeke na mbeni fini “mara” na ndo sese, Israël ti yingo, ‘azo teti iri ti lo.’ (1 Pierre 2:9, 10; Kusala 15:14; aGalate 6:16). Bazengele Paul atene so Christ asukula “azo teti lo mveni si ala ga azo ti Lo, azo so ayeke na nzara ti sara nzo kusala.” (Tite 2:14). I, amaseka, a yeke ti i ti gi ti hinga ndo so azo so ayeke dä. Laso, azo wa ayeke “mara ti mbilimbili so abata mabe”, so tambela ti ala ague oko na akpengba-ndia ti Bible, so ayeke aTémoin be-ta-zo ti Jéhovah, na so ayeke fa Royaume ti lo tongana oko beku teti azo kue? (Esaïe 26:2-4). I bâ na yâ ti aEglize so atene ani mû peko ti Christ nga na yâ ti ambeni nzapa nde, na i haka tambela ti ala na ye so Bible ahunda na atâ wavorongo Nzapa.

¹⁹ Azo kutu mingi na ndo lê sese, so na popo ni gbâ ti amaseka, aga ti hinga na bê ti ala so tanga ti ala so a sa yingo na ndo ti ala ti aTémoin ti Jéhovah ayeke “mara ti mbilimbili” so. Ala tene na azo ti Israël ti yingo so: “Fade e gue na mo, teti e mä so Nzapa ayeke na i.” (Zacharie 8:23). E ye biani na e sambela ti tene i amaseka i mû desizion ti duti na popo ti azo ti Nzapa na tongaso ti “kamata fini”, fini ti lakue lakue na yâ fini sese ti Jéhovah.​—Deutéronome 30:15-20; 2 Pierre 3:11-13.

Dango bê

• Ti bata mbeni zo na yâ wango ti Jéhovah andu nyen?

• Mara ti kusala wa Jéhovah aye?

• Ye ti soro wa azia na gbele amaseka so akono na yâ sewa so babâ na mama ni ayeke aChrétien?

• Ngbanga ti nyen a yeke nzoni ti ku senge pëpe ti wara batême?

[Ahundango tënë ti manda na ye]

1, 2. Amara ti batême wa so ayeke na lege ni pëpe amû na azo na yâ ti aEglize so atene ala yeke ti Christ?

3, 4. Ye nyen alingbi ti mû maboko na amolenge ti ababâ na mama Chrétien ti tene ala mveni amû tere ti ala na Nzapa?

5. Wango wa Paul amû na amolenge nga na ababâ?

6, 7. Batango amolenge ‘na yâ wango ti Jéhovah’ andu nyen? Ngbanga ti nyen sarango ngangu tongaso na ndo ti ala ayeke sioni pëpe?

8. Ye nyen asara si Timothée amä na bê?

9. (a) Tongana nyen Jéhovah ane azo na a-ange, na ngbanga ti nyen? (b) Molenge ti Nzapa ngengele oko asara nyen na liberté ti lo ti soro ye?

10. Ye nyen ayeke na gunda ti kusala so Jéhovah ayeda na ni?

11. Ye ti soro wa azia na gbele amaseka so akono na yâ sewa so babâ na mama ni ayeke aChrétien?

12. (a) Atâa so ababâ na mama alingbi ti fa lege na amolenge ti ala, ye nyen ala lingbi pëpe ti sara ndali ti ala? (b) Na ngoi wa mbeni maseka alingbi awe na lê ti Jéhovah ti yô kungba ti aye so lo soro?

13. Atënë wa amaseka so ade ti wara batême pëpe a lingbi ala hunda na tere ti ala?

14. Atapande ti Bible wa afa so a yeke nzoni zo aku senge pëpe ti wara batême?

15, 16. (a) Tënë wa so ayeke na lege ni pëpe alingbi ti kanga lege na ambeni maseka ti wara batême? (b) Na lege wa mungo tere na Nzapa nga na batême alingbi ti bata amaseka?

17. Na yâ ti aye wa a lingbi e hinga nda ti ‘ye so Jéhovah aye’?

18. A lingbi amaseka ahunda tënë wa na tere ti ala?

19. Na ndo sese kue, azo kutu mingi ahinga nyen na bê ti ala?

[Afoto na lembeti 26]

Fade mo yeke mä zo wa?

[Foto na lembeti 28]

Na lege wa mungo tere na Nzapa na batême alingbi ti bata mo?

[Foto na lembeti 29]

Ye nyen akanga lege na mo ti wara batême?