Jéhovah azi zo so ayeke na yâ ti vundu

“Ye ti vundu ti zo ti mbilimbili ayeke mingi; me L’Eternel azi lo na yâ ye so kue.”​—PSAUME 34:20.

MBENI wali so iri ti lo ayeke Keikoa ayeke Témoin ti Jéhovah a hon ngu 20 awe. Teti mbeni ngoi, lo yeke pionnier permanent wala wafango tënë ti ngoi kue. Lo ye kusala ti lo ni mingi. Ye oko, a ninga pëpe Keiko abâ so lo yeke na beku ti mbeni ye ti nzoni pëpe nga lo yeke gi lo oko. Lo tene: “Lani, mbi yeke toto lakue.” Ti hon ndo ti sioni bibe so, Keiko ato nda ti mû ngoi mingi ti manda Mbeti ti Nzapa lo mveni. Lo kiri lo tene: “Atâa so kue, mbi wara lege pëpe ti zia sioni bibe so. Vundu ahon ndo ti mbi na mbi ye ti kui.”

² Mo nga kue mo yeke tiri na mara ti sioni bibe so? Teti so mo yeke Témoin ti Jéhovah, mo yeke na anda ti tënë mingi ti duti na ngia ndali ti so ala so aduti nduru na Nzapa ayeke na ‘zendo teti fini ti fadeso na teti fini so ayeke ga.’ (1 Timothée 4:8). Ti ndembe so, mo yeke na yâ ti paradis ti yingo. Ye oko, a ye ti tene so mbeni ye ti vundu oko tongaso alingbi ti si na mo pëpe? Ên-ën! Bible atene: “Ye ti vundu ti zo ti mbilimbili ayeke mingi.” (Psaume 34:20). A yeke ye ti dongo bê pëpe teti “sese so kue ayeke na tïtî wato-sioni”, Satan Zabolo (1 Jean 5:19). Aye nde nde so asi na e kue afa so tënë so ayeke tâ tënë.​—aEphésien 6:12.

Aye so vundu ayeke ga na ni

³ Vundu so asara e a ninga alingbi ti sara si e bâ aye kue na nzoni lê mbeni pëpe (aProverbe 15:15). Bâ tapande ti Job, zo ti mbilimbili. Na yâ ti kota tara so lo wara, lo tene: “Zo so wali adü lo ayeke na lâ mingi pëpe, na vundu ti lo asi singo.” (Job 14:1). Job agirisa lani ngia ti lo. Teti mbeni ngoi, lo tene même so Jéhovah azia lo awe (Job 29:1-5). Job ayeke pëpe gi oko wakua ti Nzapa so atï lani na yâ ti kota vundu. Bible atene na e so “âme ti Anne asui” ndali ti so lo yeke ngombo (1 Samuel 1:9-11). Mbeni ye so asi na yâ sewa ti Rebecca aso bê ti lo mingi na lo tene: “Nzara ti ngbâ na fini agbu mbi mbeni pëpe.” (Genèse 27:46). Tongana lo gbu li na ndo ti afaute ti lo, David atene: “Mbi yeke na vundu lakue.” (Psaume 38:7). Atapande so afa polele so akoli na awali so asara na Nzapa giriri ahon na yâ ti angoi ti kota vundu.

⁴ Ka ti aChrétien a yeke tongana nyen? Bazengele Paul abâ lani so a yeke kota ye ti wa aChrétien ti Thessalonique ti “lungula vundu ti ala so bê ti ala anze”. (1 aThessalonicien 5:14). Mbeni buku atene so tënë ti yanga ti Grec so a kiri pekoni na “ala so bê ti ala anze” aye nga ti sara tënë ti “ala so agingo bê ahon ndo ti ala teti mbeni ngoi.” Atënë ti Paul afa so ambeni Chrétien ti Thessalonique so a sa yingo na ndo ti ala ayeke lani na yâ ti kota vundu. Laso nga, na popo ti aChrétien a yeke wara ala so bê ti ala anze. Ngbanga ti nyen bê ti ala anze? Zia e bâ aye ota so ayeke lakue na gunda ni.

Vundu teti so e yeke nduru ti sara siokpari

⁵ Nde na azo so lege ti ala abuba na so “kamene asara ala mbeni pëpe,” atâ Chrétien ayeke na vundu ndali ti so ala yeke awasiokpari (aEphésien 4:19). Ala lingbi ti duti na mara ti bibe ti Paul, so lo tene: “Zo-ti-ya-ni ti mbi awara ngia na yâ ndia ti Nzapa; me mbi bâ mbeni ndia na yâ amembre ti mbi so atiri na ndia ti bibe ti mbi, na a sara si mbi ga ngbâa ti ndia ti siokpari so ayeke na yâ amembre ti mbi.” Na pekoni Paul adema, lo tene: “Mbi yeke zo ti vundu mingi!”​—aRomain 7:22-24.

⁶ A si na mo mbeni lâ awe ti duti na mara ti bibe ti Paul so? A yeke sioni pëpe ti hinga so mo yeke na awokongo mingi, teti ye so alingbi ti sara si mo bâ so sarango siokpari ayeke tâ sioni ye na a lingbi ti kpengba mo ti ke aye ti sioni. Me a lingbi vundu asara mo lakue pëpe ndali ti awokongo ti mo. Na peko ti so Paul atene lo yeke zo ti vundu, lo kiri lo tene: “Mbi mû merci na Nzapa, na lege ti Jésus Christ Seigneur ti e!” (aRomain 7:25). Biani, Paul ahinga so mênë ti Jésus so atuku alingbi ti zi lo na yâ ti siokpari so a dü lo na ni.​—aRomain 5:18.

⁷ Tongana mo bâ so bibe ti sarango siokpari ahon ndo ti mo, zia atënë ti bazengele Jean so adë bê ti mo: “Tongana mbeni zo asara siokpari, e yeke na Avocat na tere ti Babâ, Jésus Christ, Zo Ti Mbilimbili. Na Lo yeke sacrifice-ti-futa teti siokpari ti e, me gi ti e pëpe, me ti azo kue nga.” (1 Jean 2:1, 2). Tongana vundu agbu mo mingi ndali ti so mo yeke tiri na bibe ti sarango siokpari, dabe ti mo lakue so Jésus akui teti awasiokpari, me pëpe teti azo so ayeke mbilimbili-kue. Biani, ‘azo kue asara siokpari awe, ala lingbi na gloire ti Nzapa pëpe’.​—aRomain 3:23.

⁸ Na tapande, bâ so peut-être giriri mo sara mbeni kota siokpari, na mo fa tënë ni na Jéhovah na yâ sambela fani mingi. A-ancien amû maboko na mo ndali ni (Jacques 5:14, 15). Mo gbian bê ti mo biani na mo ngbâ na yâ ti bungbi. Wala peut-être a bi mo na gigi teti mbeni kete ngoi, me na pekoni mo gbian bê ti mo na a kiri na mo na bungbi. Na yâ ti aye use so kue, ngoi na ngoi mo yeke dabe ti mo na siokpari so mo sara lani na a yeke mû na mo vundu. Tongana a yeke tongaso, girisa pëpe so azo so agbian bê ti ala biani, Jéhovah ayeke “pardone” siokpari ti ala ni kue (Esaïe 55:7). Nga, lo ye pëpe si mo bâ so a fâ ngbanga na ndo ti mo biani biani awe. A yeke Satan la aye si mo bi bê ti mo tongaso (2 aCorinthien 2:7, 10, 11). A yeke futi ande Zabolo, na a yeke ye so lo lingbi na ni, me lo ye si mo nga mo bâ so mo lingbi na futingo (Apocalypse 20:10). Zia lege na Satan pëpe ti futi mabe ti mo na lege ti mayele ti lo so (aEphésien 6:11). Nde na so, “ke lo” tongana ti so mo yeke sara ni na yâ ti ambeni ye.​—1 Pierre 5:9.

⁹ Na Apocalypse 12:10, a iri Satan “zo so aklame aita ti e”, so ti tene aChrétien so a sa yingo na ndo ti ala. Lo yeke ‘klame ala na gbele Nzapa lâ na bï.’ Ti gbu li na ndo ti versê so alingbi ti mû maboko na mo ti bâ so a yeke nzere na Satan, zo so abi tënë ti wataka na li ti e, tongana mo mveni mo yeke bi tënë nga mo yeke fâ ngbanga na li ti mo atâa so Jéhovah ayeke sara tongaso pëpe (1 Jean 3:19-22). Ndani nyen ti sara vundu ahon ndo ni ndali ti afaute ti mo juska a woko mo kue? Zia lege na Satan pëpe ti buba songo so mo yeke na ni na Nzapa. Zia lege lâ oko pëpe na Zabolo ti sara si mo girisa so Jéhovah ayeke Nzapa ti “be-nzoni na ti grâce, ngonzo ti Lo alondo fade pëpe, . . . na nzobe ti Lo ayeke kota mingi”.​—Exode 34:6.

Vundu teti so ngangu ti e alingbi pëpe

¹⁰ Bê ti ambeni Chrétien anze ndali ti so ngangu ti ala so alingbi pëpe akanga lege na ala ti sara na Nzapa tâ tongana ti so bê ti ala aye. Ti mo a yeke tongaso? Peut-être mbeni ngangu kobela, gango mbakoro wala ambeni ye so asi akanga lege na mo ti mû ngoi mingi ti fa tënë tongana ti so mo sara kozo. Tâ tënë, a wa aChrétien ti vo ngoi teti kusala ti Nzapa (aEphésien 5:15, 16). Me, ka tongana ambeni ye akanga lege na mo biani ti fa tënë mingi na ye so asara si bê ti mo anze?

¹¹ Bible awa e ti duti azo ti goigoi pëpe me ti “sara legeoko tongana ala so aga ahéritier ti zendo na lege ti mabe na be-nze-pepe.” (aHébreu 6:12). E lingbi ti mû peko ti ala gi tongana e bâ nzoni tapande ti ala na e gi ti duti na mara ti mabe ti ala. Ye oko, tongana e haka tere ti e na ambeni zo na e tene so ye kue so e sara alingbi pëpe ayeke sara nzoni na e pëpe. Ni la, a yeke nzoni e mä wango ti Paul so: “A lingbi zo atara kusala ti lo mveni ti bâ tongana a lingbi, tongaso fade lo lingbi yä iri ti lo teti kusala ti lo mveni, na teti kusala ti mbeni zo pëpe.”​—aGalate 6:4.

¹² A-Chrétien ayeke na nda ti tënë ti duti na ngia mingi atâa tongana ngangu kpale ti seni akanga lege na ala. Bible adë bê ti e, atene: “Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo.” (aHébreu 6:10). Peut-être ambeni ye so asi ahon ngangu ti mo na asara si a yeke ngangu na mo ti sara kusala ti Jéhovah tongana ti so mo yeke sara kozo. Ye oko, Jéhovah alingbi ti mû maboko na mo si mo wara lege ti bi tere ti mo kue na yâ ti ambeni mbage ti kusala ti fango tënë. Na tapande, fango tënë na téléphone nga na lege ti alettre. Hinga biani so Jéhovah Nzapa ayeke iri deba nzoni na ndo ti mo teti kusala so mo sara na âme ti mo kue nga teti ndoye so mo fa na mbage ti lo nga na amba ti mo.​—Matthieu 22:36-40.

Vundu teti so e yeke na “lâ ti ye ti ngangu”

¹³ Atâa so e yeke ku na ngia fini sese ti mbilimbili ti Nzapa, laso e yeke na “lâ ti ye ti ngangu”. (2 Timothée 3:1). Ti hinga so aye ti vundu so ayeke si laso afa so a ga nduru ti zi e awe alingbi ti dë bê ti e. Ye oko, aye so ayeke si ayeke sara ngangu na ndo ti e. Na tapande, bâ so mo yeke na kua pëpe. Warango kua alingbi ti duti ngangu, na tongana anze ayeke hon, peut-être mo yeke hunda tere ti mo wala Jéhovah ayeke bâ dutingo ti mo wala lo yeke mä sambela ti mo. Wala peut-être azo ake mo ndali ti mbeni ye wala a sara ambeni ye ti kirikiri na mo. Même na bango akota tënë ti yâ ti ambeti-sango, mo lingbi ti duti na oko bibe ti Lot zo ti mbilimbili “so bê ti lo aso mingi” teti sioni tambela ti azo ti ngoi ti lo.​—2 Pierre 2:7.

¹⁴ E lingbi ti girisa pëpe mbeni oko ti aye so ayeke si na lâ ti nda ni so. Bible afa kozoni so azo mingi ayeke ‘ndoye asongo ti ala pëpe’. (2 Timothée 3:3). Ndoye ayeke oko pëpe na yâ ti mingi ti asewa. Mbeni buku (Family Violence) atene: “Aye so asi afa so mingi ni a yeke mbeni wande pëpe me azo ti sewa si ayeke akozo zo ti fâ azo ti sewa ti ala, ti pika ala, ti zia kä na bê ti ala nga ti bungbi na ala koli na wali na ngangu.” Buku ni akiri atene: “Ti ambeni kota zo nga na amolenge, sewa, so ayeke ndo so zo aku ti tene a ye lo nga lo duti dä nzoni aga fadeso ndo so ayeke sioni mingi.” Ambeni zo so akono na yâ ti ambeni sewa so ayeke nzoni pëpe alingbi ti tiri na gingo bê nga na vundu angu mingi na pekoni. Ka tongana ti mo a yeke tongaso?

¹⁵ David, wasungo psaume, atene: “Tongana babâ na mama ti mbi azia mbi, fade L’Eternel akamata mbi.” (Psaume 27:10). So tâ ye ti dengo bê ti hinga so Jéhovah andoye e mingi ahon babâ wala mama ti e! Atâa so a sara mo vundu mingi tongana babâ wala mama ti mo ake mo, asara ngangu na mo wala adö mo azia, a yeke sara ye oko pëpe na ndo lege so Jéhovah ayeke bata na mo (aRomain 8:38, 39). Girisa pëpe so Nzapa ayeke gboto azo so lo ndoye ala ti ga na ala na mbage ti lo (Jean 3:16; 6:44). Atâa azo asara nyen na mo, Babâ ti mo na yayu andoye mo mingi.

Aye ti sara ti hon ndo ti bê so anze

¹⁶ Mo lingbi ti sara ambeni ye ti hon ndo ti bê so anze. Na tapande, leke mbeni pendere kapa ti kusala ti aChrétien na mo sara ye alingbi na ni. Gbu li na ndo Tënë ti Nzapa, mbilimbili na ngoi so mo bâ so bê ti mo anze ahon ndo ni. Wasungo psaume atene: “Tongana mbi tene, Gere ti mbi azene, nzobe ti Mo, O L’Eternel, agbu mbi na nduzu. Tongana bibe ayeke mingi na bê ti mbi, tënë ti Mo so alungula vundu amû ngia na âme ti mbi.” (Psaume 94:18, 19). Dikongo Bible lakue ayeke mû maboko na mo ti sara si yâ ti li ti mo asi na anzoni tënë ti dengo bê so ayeke kpengba mo.

¹⁷ Sambela ayeke nga kota ye. Atâa so mo lingbi pëpe ti fa na gigi atënë ti gbe ti bê ti mo kue, Jéhovah ahinga ye so mo yeke tara ti fa na lo (aRomain 8:26, 27). Wasungo psaume amû dengo bê so: “Mo zia kungba ti mo na ndo L’Eternel, na fade Lo bata mo. Fade Lo zia ye ayengi azo ti mbilimbili lâ oko pëpe.”​—Psaume 55:23.

¹⁸ Ambeni zo ayeke dä so ala yeke na mbeni kobela ti li so asara si na mbeni ngoi bê ti ala anze mingi nga na mbeni ngoi ala duti nzoni.b Tongana a yeke kpale ti mo la, tara ti zia lê ti mo na ndo fini sese ti Nzapa nga na ngoi so “fade wakodoro atene pëpe, Mbi yeke na kobela.” (Esaïe 33:24). Ye oko, tongana bê ti mo anze a ninga mingi, a yeke nzoni mo gi mungo maboko ti mbeni wanganga so ayeke bâ lege ti mara ti akpale tongaso (Matthieu 9:12). A yeke nga kota ye ti tene mo bâ lege ti seni ti mo nzoni. Ti te nzoni kobe na ti tara tere alingbi ti sara nzoni na mo. Mû ngoi ti wu tere ti mo na ti lango nzoni. Bâ télé juska l’heure ahon pëpe nga kpe ambeni ngia so ayeke sara si mo nze kue. Na ahon kue, ngbâ lakue ti sara akusala so anzere na Nzapa. Atâa so ngoi so Jéhovah ayeke “mbô ngule kue” na lê ti azo ade ti si pëpe, lo yeke mû maboko na mo ti kanga bê na yâ ti kpale so.​—Apocalypse 21:4; 1 aCorinthien 10:13.

Ngbâ “na gbe ti tïtî ngangu ti Nzapa”

¹⁹ Atâa so aye ti vundu ti zo ti mbilimbili ayeke mingi, Bible adë bê ti e so Jéhovah “azi lo na yâ ye so kue.” (Psaume 34:20). Nzapa ayeke zi lo tongana nyen? Tongana bazengele Paul asambela lani fani mingi ti tene Nzapa azi mbeni “kî na tere” ti lo, Jéhovah atene na lo: “Na ndo so ngangu ayeke pëpe, ngangu ti Mbi alingbi kue.” (2 aCorinthien 12:7-9). Zendo wa Jéhovah amû lani na Paul, na zendo wa lo mû na mo? Jéhovah azê pëpe ti kaï kpale ni na lê ni lê ni, me lo zê ti mû na mo ngangu ti kanga bê.

²⁰ Bazengele Pierre asû tënë so: “I sara i mveni kete na gbe ti tïtî ngangu ti Nzapa, tongaso Lo lingbi yä iri ti i na ngoi so alingbi; na ye kue so i gi bê ti i dä, i zia na tïtî Lo, teti Lo yeke bata i.” (1 Pierre 5:6, 7). Teti so Jéhovah ayeke bata mo, lo yeke zia mo ande pëpe. Lo yeke mû maboko na mo atâa atara so mo yeke wara. Girisa pëpe so aChrétien be-ta-zo ayeke na “gbe ti tïtî ngangu ti Nzapa”. Na ngoi kue so e yeke sara na Jéhovah, lo yeke mû na e ngangu ti kanga bê. Tongana e yeke be-ta-zo na lo, mbeni ye ti sara sioni na e lakue lakue na lege ti yingo ayeke dä pëpe. Tongaso, zia e ngbâ be-ta-zo na Jéhovah si e lingbi ti wara fini ti lakue lakue na ndo fini sese so lo mû zendo ni na e yeke bâ lâ ni so lo yeke zi zo ti vundu na yâ pasi teti lakue lakue!

[Akete tënë na gbe ni]

Mo dabe mo na ni?

• Ngbanga ti nyen ye ti vundu ayeke si même na awakua ti Jéhovah?

• Ambeni ye wa alingbi ti sara si bê ti awakua ti Nzapa anze?

• Maboko wa Jéhovah ayeke mû na e ti hon ndo ti agingo bê?

• Na lege wa e yeke “na gbe ti tïtî ngangu ti Nzapa”?

[Ahundango tënë ti manda na ye]

1, 2. Kpale wa mbeni Chrétien be-ta-zo awara lani? Ngbanga ti nyen a lingbi ti si so e wara oko mara ti kpale so?

3. Fa tapande ti ambeni wakua ti Nzapa so ahon na yâ angoi ti kota vundu.

4. Ngbanga ti nyen bê ti e adö pëpe so a wara na popo ti aChrétien laso “ala so bê ti ala anze”?

5, 6. Atënë ti dengo bê wa e lingbi ti wara na aRomain 7:22-25?

7. Ye nyen alingbi ti mû maboko na mbeni zo ti tene vundu asara lo pëpe teti so lo yeke na bibe ti sarango siokpari?

8, 9. Ngbanga ti nyen a lingbi e ke abibe so asara si e fâ ngbanga na li ti e mveni?

10. Na lege wa ngangu ti e so alingbi pëpe alingbi ti sara si e nze?

11. Tongana nyen wango ti Paul na aGalate 6:4 alingbi ti sara nzoni na e?

12. Ngbanga ti nyen e lingbi ti wara ngia mingi na yâ kusala ti e na Jéhovah?

13, 14. (a) Na lege wa “lâ ti ye ti ngangu” so alingbi ti mû vundu na e? (b) Tongana nyen e hinga so ndoye ayeke dä laso pëpe?

15. Na lege wa ndoye ti Jéhovah ayeke kota mingi ahon ndoye so zo ti mitele ayeke na ni?

16, 17. Na ngoi so bê ti zo anze, lo lingbi ti sara nyen ti bata ngangu ti lo na lege ti yingo?

18. Aye wa mbeni zo so bê ti lo anze alingbi ti sara ti hon ndo ti kpale ni?

19. Zendo wa Jéhovah amû na ala so ayeke na yâ ti vundu?

20. Atâa atara so e wara, 1 Pierre 5:6, 7 adë bê ti e tongana nyen?

[Afoto na lembeti 25]

Atâa atara, awakua ti Jéhovah ayeke na anda ti tënë ti duti na ngia

[Foto na lembeti 28]

Fango tënë na téléphone ayeke mbeni lege ti sara na Jéhovah na bê kue