Tongana mbeni fami ti mo azia Jéhovah

MARC na Louise ayeke aTémoin ti Jéhovah.a Tongana ti so Bible ahunda na ababâ na mama, ala yeke fa lani tënë ti Nzapa na amolenge ti ala na ndoye nga nzoni (aProverbe 22:6; 2 Timothée 3:15). Mawa ni ayeke so tongana amolenge ni aga kota, a yeke ala kue pëpe si angbâ ti voro Jéhovah. Louise atene: “So amolenge ti mbi ake Jéhovah, bê ti mbi aso mingi. Mbi lingbi ti kanga ndo ti bê ti mbi so ayeke so mbi lakue lakue so tongana nyen? Tongana ambeni zo ayeke sara tënë ti amolenge ti ala, mbi mene ngu ti yanga ti mbi gbä na a lingbi mbi kanga bê ti mbi si ngu ti lê ti mbi ayuru pëpe.”

Biani, asewa so angbâ ti voro Jéhovah ayeke duti na vundu mingi tongana mbeni oko ti ala asoro ti zia Jéhovah nga lo ke nzoni lege ti tambela so Bible afa. Irene atene: “Mbi ye yaya ti mbi ti wali mingi. Mbi yeke nduru ti sara ye kue ti tene lo kiri na Jéhovah!” Maria, so ngambe ti lo ti koli ake Jéhovah ti gue ti sara ye ti pitan, atene: “A sara mbi vundu mingi ndali ti so na yâ ti aye mingi lo sara nzoni na mbi. Tongana fami ni kue abungbi oko ti sara ngia, teti lo yeke dä pëpe, a sara mbi nzoni pëpe.”

Ngbanga ti nyen a so mingi?

Ngbanga ti nyen tongana mbeni molenge ti mo wala mbeni fami ti mo ake Jéhovah a yeke so mo mingi? A yeke ngbanga ti so Bible amû zendo ti fini ti lakue lakue na yâ paradis na ndo sese gi na azo so angbâ be-ta-zo na Jéhovah (Psaume 37:29; 2 Pierre 3:13; Apocalypse 21:3-5). Zo aye ti wara aye ti nzoni so kue na tere ti wali wala koli ti lo, amolenge ti lo, na tere ti asewa ti lo, aita ti lo na atarä ti lo. A so mingi ti bâ so peut-être asewa ti mo so azia ti sara na Jéhovah ayeke wara aye ti nzoni so pëpe! Même laso, aChrétien ahinga so andia na akpengba-ndia ti Jéhovah ayeke teti nzoni ti ala. Tongaso, vundu ayeke sara aChrétien ti bâ mbeni fami ti ala asara mbeni ye so aga na lo kota kpale na pekoni.​—Esaïe 48:17, 18; aGalate 6:7, 8.

Ti mbeni zo so mara ti kpale tongaso ade ti si na lo pëpe, a yeke ngangu na lo ti hinga songo ni. A ndu même aye kue so mo yeke sara na yâ ti fini ti mo. Louise atene: “Na bungbi a yeke lakue ngangu na mbi ti kanga bê tongana mbi bâ ababâ na mama so ayeke sara lisoro nga ayeke he ngia na amolenge ti ala. Teti so ambeni molenge ti mbi ayeke dä pëpe, tere ti mbi ayeke nzere kue pëpe na ambeni ngoi ti ngia.” Mbeni ancien adabe ti lo na angu osio so molenge so wali ti lo adü kozo azia Jéhovah. Lo tene: “Fani mingi même angoi so alingbi fade ti duti anzoni ngoi amû vundu. Tongana mbi mû na wali ti mbi mbeni cadeau wala na nda-yenga mbi yeke gue na lo na mbeni nzoni ndo, lo yeke tï na toto teti so molenge ti lo ayeke na popo ti e pëpe.”

A-Chrétien so asara ye ahon ndo ni? Lakue a yeke tongaso pëpe. Biani, peut-être ala yeke fa na gigi asarango ye ti tere ti Jéhovah, lo so a sara zo na image ti lo (Genèse 1:26, 27). So aye ti tene nyen? Bibe ti Jéhovah ayeke lani tongana nyen na ngoi so azo ti Israël ake yanga ti lo? Psaume 78:38-41 afa na e so bê ti Jéhovah aso na vundu asara lo. Ye oko, na be-nze-pëpe lo wa ala na lo se ala, fani mingi lo pardone ala tongana ala gbian bê ti ala. A yeke polele so Jéhovah abi bê ti lo na azo so lo sara, so ayeke ‘kusala ti tïtî lo,’ na lo lingbi ti zia ala gi hio tongaso pëpe (Job 14:15; Jonas 4:10, 11). Lo zia na yâ ti azo ngangu ti duti na oko bibe so, tongaso si songo ti sewa alingbi ti kpengba mingi. Ni la, a yeke ye ti dongo bê pëpe tongana azo asara vundu mingi ndali ti so mbeni fami ti ala ake Jéhovah.

Ti tâ tënë ni, tënë ti mbeni zo so azia bungbi ayeke nga na popo ti angangu tara so alingbi ti si na atâ wakua ti Jéhovah (Kusala 14:22). Jésus atene lani so tënë ti lo ayeke ga na kangbi na popo ti ambeni fami (Matthieu 10:34-38). A yeke tënë ti Bible si ayeke kangbi popo ti afami pëpe. Nde na so, ambeni fami so aye tënë ni pëpe ayeke ga na kangbi na lege so ala yeke ke, ala yeke zia wala même ala yeke kanga lege na tënë ti Christ. Ye oko, e lingbi ti kiri singila na Jéhovah so ayeke mû ngangu na abe-ta-zo ti lo ti luti na gbele atara so asi na ala. Ti fadeso, tongana mo yeke na vundu ndali ti so mbeni fami ti mo azia Jéhovah, awango wa ti Bible alingbi ti mû maboko na mo ti hon ndo ti vundu ti mo na ti kiri ti wara ngia nga na dengo bê?

Ti hon ndo ti kpale ni

“I kpengba . . . , i bata tere ti i na yâ ndoye ti Nzapa.” (Jude 20, 21). A lingbi na ye so asi na mo, peut-être mbeni ye oko ti sara fadeso ndali ti mbeni fami so azia Jéhovah ayeke dä pëpe. Ye oko, mo lingbi, nga a yeke nzoni ti tene, mo mveni mo kpengba tere ti mo na mo kpengba nga tanga ti azo ti sewa ti mo so angbâ be-ta-zo. Véronique, so ayeke na amolenge-koli ota na so use azia Jéhovah, atene: “Mbi na koli ti mbi e wara pendere wango so tongana e ngbâ ti kpengba na lege ti yingo, e yeke wara ande lege nzoni ti yamba amolenge ti e na ngoi so li ti ala ayeke kiri dä. Molenge ti yâ ti parabole ti Jésus so abuba ye ti lo kue ayeke duti lani tongana nyen tongana babâ ti lo alingbi ti yamba lo pëpe?”

Ti ngbâ ti kpengba, mû tere ti mo mingi na kusala ti Jéhovah. So aye ti tene dutingo na mbeni nzoni kapa ti mandango Bible na ti guengo na abungbi. Duti nduru ti mû maboko na ambeni zo na yâ ti kongregation alingbi na ngangu ti mo. Biani, kozoni a lingbi ti duti ngangu kete ti sara aye so. Véronique atene: “Legeoko tongana mbeni nyama so awara kä ayeke honde tere ti lo, kozo ye so aga na li ti mbi ayeke ti gboto tere ti mbi yongoro. Me koli ti mbi ahunda mingi ti tene e ngbâ lakue ti bi tere ti e na yâ ti kusala ti Jéhovah. Lo sara kue si e gue na bungbi. Na ngoi ti mbeni kota bungbi, a lingbi mbi kanga bê mingi ti gue ti tingbi na azo. Me, ye so a fa na ngoi ti kota bungbi ni apusu e ti ga nduru mingi na Jéhovah. Kota bungbi ni akpengba mingi oko molenge ti e ti koli so angbâ be-ta-zo.”

Maria, so e sara tënë ti lo fade, abâ so a yeke biani nzoni ti fa tënë mingi na fadeso lo yeke mû maboko na azo osio so ayeke manda Bible. Laure atene legeoko nga: “Atâa so mbi manke ti toto pëpe nga sewa ti mbi aga nzoni pëpe tongana ti ambeni, mbi kiri singila na Jéhovah so mbi yeke na tokua ti Bible so ayeke mbilimbili na so alingbi ti mû maboko na asewa na lâ ti nda ni so.” Ken na Eleanor, so akota molenge ti ala azia bungbi, aleke tere ti ala na ala gue na mbeni ndo so a hunda awafango tënë dä mingi ti sara kusala ti ngoi kue. Sarango tongaso amû maboko na ala ti duti na nzoni bango ndo na ti kanga lege ti tene vundu ahon ndo ti ala pëpe.

Duti lakue na beku. Ndoye “aku ye kue”. (1 aCorinthien 13:7). Ken, so e sara tënë ti lo fade, atene: “Na ngoi so amolenge ti e azia bungbi, mbi tene ti mbi ala kui awe. Me na pekoni so ita ti mbi ti wali akui, mbi gbian bango ndo ti mbi. Mbi yeke na ngia so amolenge ti mbi akui biani pëpe na so Jéhovah angbâ ti zi lege na ala ti tene ala kiri na lo mbeni lâ.” Ti tâ tënë ni, aye so asi afa so mingi ti azo so azia Jéhovah akiri na lo na pekoni.​—Luc 15:11-24.

Fâ ngbanga na ndo ti mo pëpe. Mingi ti ababâ na mama ayeke bâ ndo na ndo aye so ahon awe, na vundu asara ala ndali ti ambeni ye so ala sara lani pëpe ti leke na akpale ni. Ye oko, kota tënë so ayeke na Ezéchiel 18:20 afa so ti Jéhovah a yeke zo so asara siokpari si tënë ayeke na li ti lo, me na li ti babâ na mama ti lo pëpe. A yeke nzoni ti bâ so mbeti ti aProverbe asara tënë mingi na ndo kungba ti ababâ na mama ti fa ye na amolenge ti ala, me nga a hon fani osio mbeti ni ahunda na amolenge ti mä yanga ti ababâ na mama ti ala. Biani, amolenge ayeke na kungba ti yeda na fango lege ti Mbeti ti Nzapa so ababâ na mama ti ala so ayeke mbilimbili-kue pëpe ayeke fa ni na ala. Ândö mo sara ye kue so mo lingbi ti sara. Ye oko, même tongana mo bâ so mo girisa lege lani na yâ ti mbeni ye na a yeke biani faute ti mo, a ye ti tene lakue pëpe so a yeke nda ni la si fami ti mo azia Jéhovah. Atâa ye ni ayeke tongana nyen, ti tene ‘tongana mbi hinga ândö, ka . . . ’ ayeke ga na nzoni na mo oko pëpe. Manda ye na ndo ti afaute so mo sara lani, leke na bê ti mo ti kiri ti sara ni mbeni pëpe na sambela Jéhovah ti pardone mo (Psaume 103:8-14; Esaïe 55:7). Tongaso, ngbâ ti bâ ndo na peko pëpe, me bâ gi ndo na dawa.

Duti na be-nze-pëpe na azo. Tongana mara ti kpale so ade asi na mbeni zo pëpe, ala lingbi pëpe ti hinga mbilimbili lege ti kpengba mo wala ti dë bê ti mo. Nga, bango ndo ti azo ayeke nde nde na ndo ye so alingbi ti dë bê wala ti wa mbeni zo. Tongana ambeni zo asara mbeni tënë so aso bê ti mo, sara ye alingbi na wango ti bazengele Paul so ayeke na aColossien 3:13: “I zingo na ambeni zo na popo ti i fade pëpe, na tongana mbeni zo ayeke na tënë na popo ti lo na ita ti lo, i pardone ye na popo ti i.”

Bâ na nene ni ye so Jéhovah aleke ti se na zo. Tongana bungbi ase mbeni fami ti mo, dabe ti mo so a yeke ye so Jéhovah aleke nga a yeke nzoni teti azo kue, même teti lo so ake yanga ti lo (aHébreu 12:11). Tongaso, kpe ti kasa a-ancien so abâ tënë ni wala adesizion so ala mû. Girisa pëpe so ti sara aye so Jéhovah ahunda ayeke ga na ye ti nzoni mingi, me ti gue nde na ni ayeke ga gi na mbeni vundu na ndo ni.

Na peko ti so mara ti Israël asigigi lani na gbe ti ngbâa na Egypte, Moïse aduti tongana juge na ndo ti ala (Exode 18:13-16). Teti so na yâ ti fango ngbanga peut-être a yeke gi mbeni oko si ngbanga ni ayeke tï na ndo ti lo, a yeke ngangu pëpe ti bâ so bê ti ambeni zo ayeke so na tere ti Moïse ndali ti adesizion so lo mû. Gingo ti bâ afaute ti Moïse na yâ ti adesizion so lo mû asara si peut-être ambeni alondo ti ke ngangu ti komande ti lo. Ye oko, Jéhovah asara kusala na Moïse ti fa lege na azo ti lo. Lo se lani Moïse pëpe, me gi azo so asara kpengba-li na Moïse legeoko na afami so amû peko ti ala (Nombre 16:31-35). E lingbi ti manda ye na ndo ye so asi na sarango ngangu ti kpe mbeto ti ala so azia ala laso na li ti kongregation na ti yeda na adesizion so ala mû.

Na ndo tënë so, Delores adabe ti lo tongana nyen a yeke lani ngangu na lo ti bata mbeni nzoni bango ndo na ngoi so kongregation ase molenge ti lo ti wali. Lo tene: “Ye so amû lani maboko na mbi ayeke so mbi yeke diko fani mingi a-article so asara tënë na ndo nzobe ti Jéhovah na yâ aye kue so lo leke. Ni la mbi leke mbeni cahier so mbi yeke sû na yâ ni atënë ti yâ ti adiskur na ti a-article ti ambeti ti e so ayeke mû maboko na mbi ti kanga bê na ti ngbâ ti sara na Jéhovah.” E yeke bâ fadeso mbeni kota ye so amû lege na e ti hon ndo ti kpale ni.

Fa na gigi ye so ayeke na bê ti mo. Mo lingbi ti bâ so a yeke nzoni ti fa tënë ti bê ti mo na ambeni kamarade ti mo oko wala use so mo lingbi ti zia bê ti mo na ala. Ti sara tongaso, soro gi akamarade so alingbi ande ti mû maboko na mo ti ngbâ ti duti na nzoni bango ndo. A yeke biani nzoni mingi ti ‘fa tënë ti bê ti mo na gigi’ na Jéhovah na yâ sambela (Psaume 62:8, 9).b Ngbanga ti nyen? Ngbanga ti so lo la lo hinga tâ ye so ayeke na bê ti mo. Na tapande, mo lingbi ti bâ so a yeke na lege ni pëpe so mo wara mara ti kota vundu tongaso. Ti tâ tënë ni, a yeke mo la mo zia Jéhovah pëpe. Na yâ ti sambela fa tënë ti bê ti mo na Jéhovah, na hunda na lo ti mû maboko na mo ti bâ tënë ni na mbeni lege so aso mingi pëpe.​—Psaume 37:5.

Tongana ngoi ayeke hon, mo lingbi peut-être ti hon ndo ti vundu ti mo ande. Ti ku na ngoi ni so, ngbâ lakue ti sara ngangu ti mû ngia na Babâ ti mo ti yayu, na tene lâ oko pëpe so angangu so mo sara ayeke ngbâ senge (aGalate 6:9). Girisa pëpe so tongana e zia Jéhovah e yeke ngbâ lakue na yâ ti akpale. Na mbage, tongana e ngbâ be-ta-zo na lo, lo yeke mû maboko na e ti luti na gbele atara so e yeke na yâ ni. Tongaso, hinga so Jéhovah ayeke bâ biani kota kpale so mo yeke na yâ ni na fade lo yeke mû na mo ngangu so alingbi na tâ ngoi ni.​—2 aCorinthien 4:7; aPhilippien 4:13; aHébreu 4:16.

[Akete tënë na gbe ni]

[Encadré na lembeti 19]

Lege ti hon ndo ti vundu ni

◆ “I kpengba . . . , i bata tere ti i na yâ ndoye ti Nzapa.”​—Jude 20, 21.

◆ Duti lakue na beku. ​—1 aCorinthien 13:7.

◆ Fâ ngbanga na ndo ti mo pëpe. ​—Ezéchiel 18:20.

◆ Duti na be-nze-pëpe na azo. ​—aColossien 3:13.

◆ Bâ na nene ni ye so Jéhovah aleke ti se na zo.​—aHébreu 12:11.

◆ Fa na gigi ye so ayeke na bê ti mo.​—Psaume 62:8, 9.

[Encadré/Foto na lembeti 21]

Mo yeke zo so azia Jéhovah?

Tongana a yeke tongaso, atâa nda ni ayeke nyen, hinga so songo ti mo na Jéhovah na fini ti mo ti lakue lakue ayeke na yâ ti kpale. Peut-être mo tene mo yeke kiri mbeni lâ na Jéhovah? Mo yeke sara biani ngangu ti kiri fade fadeso? Wala mo ngbâ gi ti pusu lango ni na peko? Girisa pëpe so kota pupu ti Harmaguédon ayeke ga na loro. Nga, gigi ti zo laso ayô pëpe na ye so zo aku tere ti lo na ni pëpe ayeke si lakue. Mo lingbi ti hinga pëpe wala kekereke mo yeke kui (Psaume 102:3; Jacques 4:13, 14). Mbeni ita-koli so awara mbeni ngangu kobela so ague na lo ti kui, atene: “Mbi wara kobela ni na ngoi so mbi yeke sara na Jéhovah na ngoi kue, nga mbeni ye ti sara kamene na mbi ndali ni ayeke dä pëpe. Bê ti mbi adë so mbi yeke na nzoni songo na Jéhovah na ndembe so.” Ye oko, tara ti bâ tongana fade lo wara kobela ni na ngoi so lo yeke tene: “Mbeni lâ, fade mbi kiri na Jéhovah!” Tongaso, tongana mo zia Jéhovah awe, laso ayeke tâ ngoi ni ti kiri na lo.

[Afoto na lembeti 18]

Mungo tere ti mo mingi na kusala ti Jéhovah ayeke mû maboko na mo ti duti na nzoni bango ndo