Zia beku ti mo na Jéhovah, na sara ye na mbeto pëpe

“Zia beku ti mo na L’Eternel! Mo gbu ngangu, zia bê ti mo akpengba dä. Biani, mo zia beku ti mo na L’Eternel!”​—PSAUME 27:14.

TÂ BEKU ayeke tongana lumière so aza ngangu. A mû lege na e ti bi lê pëpe na ndo akpale ti laso na ti bâ gigi ti e ti kekereke na mbeto pëpe nga na ngia. Gi Jéhovah oko si alingbi ti mû na e tâ beku, ye so lo sara ni na lege ti Mbeti ti lo (2 Timothée 3:16). Ti bâ ni nzoni, atënë “beku” na “bê so aku” asigigi fani mingi na yâ ti Bible na aye ti fa bê so aku ye na ngia nga so zo ni ahinga atene lo yeke wara ande ye ni biani; a ye ti fa nga ye so zo aku ti wara ni.a Mara beku tongaso ayeke kota ahon senge nzara so zo ayeke na ni ti wara mbeni ye so lege ti tene lo wara ni ayeke dä pëpe.

² Tongana Jésus ayeke lani na yâ tara nga na ye ti ngangu, lo bâ pëpe ye so lo yeke na yâ ni me lo zia beku ti lo na Jéhovah. ‘Lo hu pono ti keke ti [pono, NW] Lo bâ kamene ni tongana ye senge teti tâ ngia so A zia na gbele Lo, na Lo duti na koti ti trône ti Nzapa.’ (aHébreu 12:2). Teti ye so lo zia lê ti lo gi na ndo ni ayeke ti fa mbilimbili ti droit ti Jéhovah ti komande nga ti sara si iri ti Lo aga nzoni-kue, Jésus angbâ lakue ti mä yanga ti Nzapa, atâa ye so ahunda na mbage ti lo.

³ Gbia David afa kamba so ayeke na popo ti beku na sarango ye na mbeto pëpe, lo tene: “Zia beku ti mo na L’Eternel! Mo gbu ngangu, zia bê ti mo akpengba dä. Biani, mo zia beku ti mo na L’Eternel!” (Psaume 27:14). Tongana e ye ti tene bê ti e akpengba, a lingbi e bata beku ti e lakue polele na li ti e nga na bê ti e. Sarango tongaso ayeke mû maboko na e ti mû tapande ti Jésus ti sara ye na mbeto pëpe nga na wâ tongana e yeke sara kusala so lo hunda na adisciple ti lo ti sara (Matthieu 24:14; 28:19, 20). Biani, Bible azia beku na tere ti mabe nga na ndoye tongana mbeni kota sarango ye so a hinga na awakua ti Nzapa.​—1 aCorinthien 13:13.

Mo “wu na beku”?

⁴ Awakua ti Nzapa ayeke na mbeni pendere beku ti kekereke na gbele ala. A-Chrétien so a sa yingo na ndo ti ala ayeke ku kungo ti sara kua na tere ti Christ na yayu, me “ambeni ngasangbaga” ayeke ti ala na beku ti tene ‘A zi ala na yâ ye ti futi so asara ala na ngbâa, na A zia ala na yâ liberté ti gloire ti amolenge ti Nzapa.’ (Jean 10:16; aRomain 8:19-21; aPhilippien 3:20). “Liberté ti gloire” so andu nga tënë ti zingo ala na gbe ti siokpari nga na asioni ye kue so lo ga na ni. Biani, Jéhovah, Lo so amû “matabisi kue ti nzoni na matabisi kue so alingbi kue”, lo yeke mû gi matabisi ti nzoni mingi na ala so ayeke be-ta-zo na lo.​—Jacques 1:17; Esaïe 25:8.

⁵ Kota kusala wa beku so e yeke na ni ayeke sara na yâ fini ti e? Na mbeti ti aRomain 15:13, e diko: ‘Fadeso, Nzapa ti beku asara si i si na tâ ngia na siriri kue na lege ti mä na bê, si i lingbi wu na beku na lege ti ngangu ti Yingo Vulu.’ Biani, beku ayeke pëpe tongana mbeni wâ ti bougie na yâ bingo, me a yeke tongana lâ ti ndapre so asara si zo aduti na siriri, na ngia, na ye ti sarango ni na lo wara ngangu. Bâ so e yeke “wu na beku” tongana e mä na bê na Tënë ti Nzapa na tongana e wara yingo vulu ti lo. Ni la, aRomain 15:4 atene: “Tënë kue so a sara na Mbeti ti Nzapa giriri, a sara na mbeti si e manda ye, si na lege ti bê so azia pëpe, na ti tënë ti Mbeti ti Nzapa so alungula vundu, e lingbi duti na beku.” Tongaso hunda tere ti mo: ‘Mbi ngbâ lakue ti duti na beku na lege so mbi yeke manda Mbeti ti Nzapa nzoni na mbi yeke diko ni lâ na lâ? Mbi yeke sambela Nzapa mingi ti wara yingo ti lo?’​—Luc 11:13.

⁶ Jésus, Tapande ti e, awara ngangu na lege ti Tënë ti Nzapa. Tongana e bâ tapande ti lo nzoni, fade e yeke zia si ‘ngangu ti e awe pëpe, na bê ti e anze pëpe.’ (aHébreu 12:3). A yeke na lege ni so tongana beku so Nzapa amû na e ayeke polele pëpe na li ti e nga na bê ti e wala tongana ambeni ye agboto lê ti e, fade e yeke wara ngangu mbeni pëpe ti sara ye so bê ti Nzapa aye. Aye so alingbi ti gboto lê ti e ayeke aye tongana akungba ti sese so wala aye so e ye ti sara na yâ gigi ti e. Tongana a yeke ye so asi na e la, e lingbi même ti ‘futi mabe ti e legeoko tongana ngö so afuti na yâ ngu.’ (1 Timothée 1:19). Me, tâ beku akpengba mabe ti e.

Beku, kota ye teti mabe

⁷ Mbeti ti aHébreu 11:1 atene: “Mabe ayeke ye so asara si e hinga biani fade e wara ye so e yeke ku, a yeke ye so afa na e ye so e bâ pëpe ayeke tâ ye.” Tongaso, beku ayeke pëpe gi mbeni ye so a zia na tere ti mabe; a yeke mbeni kota mbage ti mabe. Bâ tapande ti Abraham. Na lê ti zo, ngu ti lo na wali ti lo Sara ti dungo molenge ahon awe na ngoi so Jéhovah amû zendo ti mû na ala mbeni molenge tongana héritier (Genèse 17:15-17). Abraham asara ye tongana nyen? Bible atene: ‘Kamême Abraham ayeke na ye ti zia bê ti lo dä pëpe, lo ku na mabe si lo lingbi ga babâ ti amara mingi.’ (aRomain 4:18). Beku so Nzapa amû na lo asara si gunda ti mabe ti lo na yâ zendo so Nzapa amû na lo aluti nzoni. Nga, mabe ti lo asara si beku ti lo akiri akpengba. Mabe ti Abraham na Sara amû na ala ngangu ti zia kodoro ti ala na afami ti ala na ti gue ti lango na yâ ti atente na mbeni kodoro wande teti tanga ti fini ti ala kue.

⁸ Abraham asara si beku ti lo angbâ tâ ye na lê ti lo na lege so lo mä yanga ti Jéhovah na yâ ye kue, même tongana sarango tongaso ayeke ngangu na lo (Genèse 22:2, 12). Legeoko nga, tongana e mä yanga ti Jéhovah na e zia si bê ti e awoko pëpe na yâ kusala ti lo, e hinga biani so e yeke wara ande futa ti e. Paul atënë so “bê so azia pëpe asara si e hinga” so Nzapa ayeda na e, na ye so amû na e beku, “na beku amû kamene pëpe”. (aRomain 5:4, 5). A yeke ndani la si Paul asû tënë so nga: ‘E ye azo oko oko kue na popo ti i ti fa na gigi nzara ti sara kusala so si i hinga tënë kue ti beku ti i juska na nda ni.’ (aHébreu 6:11). Nzoni bango ndo tongaso, so aluti na ndo nzoni songo na Jéhovah, alingbi ti mû maboko na e ti wara ngangu ti luti na gbele aye ti ngangu kue, même na ngia.

“Duti na ngia na yâ beku”

⁹ Beku so Nzapa amû na e ayeke kota mingi ahon ye kue so sese so alingbi ti mû na e. Psaume 37:34 atene: “Ku L’Eternel, na mo ngbâ na lege ti Lo, na fade Lo yä iri ti mo si sese ni aga ye ti mo; fade mo bâ lâ ti lungulango azo ti sioni.” Biani, e yeke na nda ti tënë kue ti “duti na ngia na yâ beku”. (aRomain 12:12). Ye oko, ti sara tongaso, a lingbi e bata lê ti e lakue na ndo beku ti e. Mo yeke bi bê lakue na ndo beku so Nzapa amû na mo? Mo lingbi ti bâ tere ti mo na yâ Paradis na nzoni seni, na gingo bê pëpe, na azo so mo ndoye ala na tere ti mo nga na pendere kua ti sarango ni? Mo yeke gbu li na ndo afoto ti Paradis so ayeke na yâ ti ambeti ti e? A lingbi ti haka mara ti gbungo li so na mbeni fenêtre so a sukula tatara ni nzoni ti mû lege na zo ti bâ ndo na gigi pendere. Tongana e sukula tatara ni pëpe, na yâ ngoi kete, saleté ayeke ga dä na ayeke sara si e bâ ndo na gigi nzoni pëpe. Ambeni ye alingbi ti gboto lê ti e. Zia mara ti ye so asi na e lâ oko pëpe!

¹⁰ Tâ kota ye so apusu e ti sara na Jéhovah ayeke ndoye so e yeke na ni teti lo (Marc 12:30). Ye oko, a yeke nzoni e ku futa ti e na ngia. Ti tâ tënë ni, Jéhovah aku ti tene e sara tongaso. Mbeti ti aHébreu 11:6 atene: “Tongana mabe ayeke pëpe, zo alingbi ga nzoni na lê ti Nzapa pëpe; teti zo so aga na Nzapa, a yeke ngbanga ti lo ti mä na bê so Nzapa ayeke, na Lo yeke Zo ti futa ye na ala so agi Lo.” Ngbanga ti nyen Jéhovah aye si e bâ lo tongana Zo ti futa ye? A yeke ngbanga ti so tongana e bâ lo tongaso, e fa so e hinga Baba ti e so ayeke na yayu nzoni. Lo mû ye mingi nga lo ndoye amolenge ti lo. Tara ti bâ vundu so e yeke duti fade na ni nga tongana nyen bê ti e ayeke nze hio tongana “beku teti lâ ti nda ni”, wala teti kekereke ayeke fade dä pëpe.​—Jérémie 29:11.

¹¹ Mbeni kpengba tapande ti mbeni zo so abata lani lê ti lo na ndo beku so Nzapa amû na lo ayeke Moïse. Teti so lo yeke “molenge ti molenge ti Pharaon ti wali”, Moïse ayeke na ngangu ti komande, kota ndo nga na mosoro kue ti Egypte so lo ye. Lo soro ti mû peko ti aye so wala ti sara na Jéhovah? Na mbeto pëpe, Moïse asoro ti sara na Jéhovah. Ngbanga ti nyen? Ngbanga ti so lo ‘zia bê ti lo na futa so ayeke ga.’ (aHébreu 11:24-26). Biani, Moïse abâ pëpe beku so Jéhovah amû na lo tongana ye senge.

¹² Bazengele Paul ahaka beku na mbeni casque wala kpoto ti wen so ayeke bata li ti e, na a mû lege na e ti mû anzoni desizion, ti zia anzoni ye na kozo ndo na ti bata be-biani ti e (1 aThessalonicien 5:8). Mo yeke yü kpoto ti wen ti yingo so na ngoi kue? Tongana a yeke ni la, andâ tongana ti Paul na Moïse, fade mo yeke “zia bê ti [mo] pëpe na mosoro so fade awe, me na Nzapa, Lo so amû na e ye mingi, ye kue ti mû ngia na e.” Tâ tënë, a hunda ti tene zo aduti na ngangu ti ke ti gi aye so azo mingi ayeke gi, me tongana mo sara tongaso, mo yeke wara nzoni dä. Tongaso, ke ti yeda na ye so ayeke tâ fini pëpe, me yeda gi na fini so ayeke ku ala so azia beku ti ala na Jéhovah nga andoye lo.​—1 Timothée 6:17, 19.

“Fade mbi zia ti sara na mo pëpe”

¹³ Azo so azia beku ti ala na ndo ti aye ti ngoi ti laso ayeke gi bê na ndo asioni ye so angbâ ti ga na ngoi so sese so ayeke na yâ ti pasi so ayeke tongana “gua” wala songo yâ ti wali so aye ti dü (Matthieu 24:8). Me azo so azia beku ti ala na Jéhovah ayeke na mbeto so pëpe. Ala yeke ngbâ ande lakue ti “duti na siriri, na bê ti [ala] aduti nzoni, na mbeto ti sioye asara [ala] pëpe.” (aProverbe 1:33). Ndali ti so beku ti ala ayeke na yâ sese so pëpe, na ngia na bê ala sara ye alingbi na wango ti Paul, so atene: “Zia ndoye ti nginza asara i pëpe, a lingbi bê ti i aduti nzoni na ye so ayeke na i, teti Nzapa atene, Fade Mbi zia ti sara na mo pëpe, na Mbi zia mo lâ oko pëpe.”​—aHébreu 13:5.

¹⁴ Tënë ti zendo so ayeke na yâ ti versê so afa biani so Nzapa ayeke ngbâ lakue ti bata e. Jésus nga adë bê ti e so Nzapa andoye e tongana lo tene: “I gi royaume ti Nzapa na mbilimbili ti Lo kozoni, na fade A mû ye so kue [aye so e yeke na bezoin ni] na i nga. Tongaso i gi bê ti i tënë ti kekereke pëpe, teti fade kekereke agi ye ti lo mveni.” (Matthieu 6:33, 34). Jéhovah ahinga so a yeke ngangu ti fa tënë ti Royaume na wâ nga na oko ngoi ni ti bâ lege ti abezoin ti e. Tongaso, zia e zia bê ti e kue na yâ ngangu ti Nzapa nga na nzara ti lo ti bâ lege ti e.​—Matthieu 6:25-32; 11:28-30.

¹⁵ E fa so e zia bê ti e na Jéhovah tongana e bata ‘lê ti e nzoni’. (Matthieu 6:22, 23). Zo so lê ti lo ayeke nzoni ayeke na nzoni bê, sioni ayeke na yâ ti ye so apusu lo pëpe, lo yeke na kota bê pëpe na lo gi gi ye teti nzoni ti lo wani pëpe. Ti duti na lê so ayeke nzoni aye ti tene pëpe ti duti na yâ ti kota yere wala ti sara ye oko pëpe ti bâ lege ti aye so amanke e. Nde na so, a ye ti tene ti sara ye na “ndara” na ngoi so e ngbâ ti zia kusala ti Jéhovah na kozo ndo.​—2 Timothée 1:7.

¹⁶ Ti ngbâ lakue ti bata lê so ayeke nzoni ahunda ti duti na mabe na ti sara ye na mbeto pëpe. Na tapande, tongana patron ti mo ahunda ti tene mo sara kua lakue na l’heure ti abungbi, na mbeto pëpe mo yeke zia ye so Nzapa aye na kozo ndo? Tongana mbeni zo atene so Jéhovah ayeke bata awakua ti lo pëpe tongana ti so lo mû zendo ni, Satan ayeke na bezoin ti ngbâ ti sara gi ngangu na ndo ti lo, na zo tongaso alingbi ti zia ti gue na abungbi. Tongana e yeke na mabe pëpe, Satan alingbi ti sara ngangu na ndo ti e, na tongaso a yeke lo si ayeke fa na e akota ye ti sara, me Jéhovah pëpe. Tongana ye tongaso asi, a yeke duti ande ye ti mawa mingi!​—2 aCorinthien 13:5.

‘Ku Jéhovah’

¹⁷ Fani mingi Mbeti ti Nzapa afa so ala so azia beku ti ala na bê ti ala na Jéhovah awara vundu na pekoni pëpe (aProverbe 3:5, 6; Jérémie 17:7). Tâ tënë, ngoi na ngoi a hunda peut-être ti tene ala duti na aye mingi pëpe, me ala bâ ni tongana kete sacrifice tongana a haka ni na adeba nzoni so ayeke ku ala. Tongaso ala fa so ala ‘ku Jéhovah’ na ala hinga so na nda ni fade lo mû na abe-ta-zo ti lo aye so bê ti ala aye, aye so ayeke na lege ni (Psaume 37:4, 34). Ni la, ala yeke na ngia biani, même laso. “Beku ti azo ti mbilimbili amû ngia, me fade beku ti azo ti sioni akui.”​—aProverbe 10:28.

¹⁸ Tongana mbeni babâ agbu maboko ti molenge ti lo, molenge ni ayeke bâ so sioni alingbi ti wara lo pëpe. A yeke nga legeoko na e tongana e yeke tambela na Babâ ti e ti yayu. Jéhovah atene na azo ti Israël: “Zia mbeto asara mo pëpe teti Mbi yeke na mo; . . . biani, fade Mbi sara na mo; . . . Teti Mbi, L’Eternel Nzapa ti mo, Mbi gbu maboko ti mo ti koti. Mbi tene na mo, Zia mbeto; fade Mbi sara na mo.”​—Esaïe 41:10, 13.

¹⁹ Tënë ti Jéhovah so agbu maboko ti mbeni zo afa ndoye ti lo na mbage ti azo ti lo. David asû lani tënë so: “Mbi bâ L’Eternel na gbele mbi lakue; teti Lo yeke na koti ti mbi, ye alingbi yengi mbi pëpe.” (Psaume 16:8). Tongana nyen e yeke sara si Jéhovah angbâ na “koti” ti e? E yeke sara ni na alege use. Kozoni e yeke zia Tënë ti lo ti fa lege na e na yâ fini ti e kue; na use ni e yeke zia lê ti e gi na ndo kota matabisi so Jéhovah azia na gbele e. Wasungo psaume Asaph atene na yâ bia: “Mbi ngbâ na Mo lakue; Mo gbu maboko ti mbi ti koti. Fade Mo fa lege na mbi na tënë ti wango ti Mo, na nda ni, fade Mo kamata mbi na yâ gloire.” (Psaume 73:23, 24). Na mara tënë ti dengo bê so, e lingbi biani ti bâ gigi ti kekereke na beku.

“Lâ ti ton i aga nduru”

²⁰ Na bango lâ oko oko so ayeke hon, a yeke fadeso ngoi ti tene e zia si Jéhovah angbâ na koti ti e. Na yâ kete ngoi, fade a yeke futi avorongo nzapa ti wataka, nga na pekoni fade sese ti Satan ayeke bâ kota ye ti vundu so lâ oko lo de ti bâ pëpe (Matthieu 24:21). Fade mbeto ayeke gbu azo ti sese kue so ayeke na mabe pëpe. Ye oko, na yâ ti ngoi so aye aga kirikiri, fade awakua ti Jéhovah so asara ye na mbeto pëpe ayeke wara ngia mingi na yâ beku! Jésus atene: “Tongana ye so akomanse ti si, i yä lê ti i na li ti i na nduzu, teti lâ ti ton i aga nduru.”​—Luc 21:28.

²¹ Tongaso, zia e duti na ngia na yâ beku so Nzapa amû na e, na zia si amayele ti Satan ahanda e pëpe wala agboto lê ti e pëpe. Na oko ngoi ni, zia e sara ngangu ti lë mabe, ndoye na kpengo mbeto ti Nzapa. Na sarango tongaso, fade e wara ngangu ti mä yanga ti Jéhovah na yâ ye kue na ti ke Zabolo (Jacques 4:7, 8). Biani, “gbu ngangu, zia bê ti i akpengba dä, i kue so beku ti i ayeke na L’Eternel.”​—Psaume 31:25.

[Kete tënë na gbe ni]

Mo lingbi ti kiri tënë?

• Na lege wa beku so Jésus ayeke na ni amû lani na lo ngangu?

• Kamba wa ayeke na popo ti mabe na beku?

• Na lege wa beku na mabe alingbi ti mû na mbeni Chrétien ngangu ti zia anzoni ye sna kozo ndo?

• Ngbanga ti nyen ala so ayeke ‘ku Jéhovah’ alingbi ti bâ kekereke na beku?

[Ahundango tënë ti manda na ye]

1. Beku ayeke kota ye biani? Nda ti tënë ni na yâ ti Bible ayeke nyen?

2. Fa ye so beku asara na ndo ti Jésus.

3. Beku asara nyen na yâ fini ti awakua ti Nzapa?

4. Ye wa aChrétien so a sa yingo na ndo ti ala nga na amba ti ala “ambeni ngasangbaga” ayeke ku ni kungo?

5. Na lege wa e yeke “wu na beku”?

6. A lingbi e sara hange na nyen ti tene e ngbâ lakue ti duti na beku?

7. Na lege wa beku ayeke kota ye teti mabe?

8. Tongana nyen ti ngbâ ti duti na bê so azia pëpe ayeke kpengba beku ti e?

9. Ye nyen e lingbi ti sara lakue ti tene e “duti na ngia na yâ beku”?

10. Ngbanga ti nyen ti bata lê ti e na ndo futa ti e ayeke sara nzoni na ndo songo ti e na Jéhovah?

11. Tongana nyen beku so Nzapa amû na Moïse amû maboko na lo ti soro ye nzoni?

12. Ngbanga ti nyen a haka beku ti e na mbeni kpoto ti wen?

13. Tongana nyen Jéhovah adë bê ti awakua ti lo be-ta-zo?

14. Ngbanga ti nyen a lingbi aChrétien agi bê ti ala ahon ndo ni pëpe na ndo abezoin ti ala?

15. Tongana nyen aChrétien ayeke bata ‘lê ti ala nzoni’?

16. Ngbanga ti nyen a hunda ti duti na mabe na ti sara ye na mbeto pëpe ti bata lê so ayeke nzoni?

17. Tongana nyen ala so azia bê ti ala na Jéhovah awara adeba nzoni même laso?

18, 19. (a) Dengo bê ti ndoye wa Jéhovah amû na e? (b) Tongana nyen e yeke sara si Jéhovah angbâ na “koti” ti e?

20, 21. Gigi ti kekereke wa ayeke ku ala so azia beku ti ala na Jéhovah?

[Foto na lembeti 30]

Wala mo yeke maseka wala mbakoro, mo lingbi ti bâ tere ti mo na yâ Paradis?