E duti na ngia na yâ ti beku ti e

“[E yeke na] beku ti fini ti lakue lakue so Nzapa, lo so alingbi ti tene mvene pëpe, amû zendo ni ngbene ye ândö giriri.”​—TITE 1:2.

MO YEKE KIRI TËNË TONGANA NYEN?

E hinga tongana nyen so ngia ayeke na yayu na ngoi so mbeni Chrétien so a soro lo ti gue na yayu angbâ be-ta-zo juska na kuâ?

Na lege wa gango tâ tënë ti beku ti ambeni ngasangbaga andu ti aChrétien so a soro ala ti gue na yayu?

Ti tene beku ti e aga tâ tënë, “sarango ye so ayeke nzoni-kue” so a lingbi e duti na ni ayeke so wa? ‘Akusala so afa so e gbu tënë ti Nzapa ngangu’ andu aye wa?

1. Tongana nyen la beku so Jéhovah amû na e alingbi ti mû maboko na e ti gbu ngangu?

BAZENGELE Paul atene so Jéhovah ayeke “Nzapa so ayeke mû beku na zo.” Lo kiri lo tene so Jéhovah alingbi ti ‘sara si e si na ngia nga na siriri kue na lege so e mä na bê, si e wu mingi na beku na ngangu ti yingo vulu.’ (aRom. 15:13). Tongana beku ti e ayeke polele na li ti e, e yeke wara lege ti gbu ngangu na yâ ti akpale kue so alingbi ti si, bê ti e ayeke si na ngia nga na siriri. Atâa a soro e ti gue na yayu wala e yeke ambeni ngasangbaga, beku ti e ayeke tongana “mbeni kale ti mangboko ndali ti âme ti e, a luti nzoni nga a luti ngangu”. (aHéb. 6:18, 19). Beku ti e ayeke mbeni ye so e lingbi ti gbu ni ngangu na ngoi ti akota pupu so ayeke ya na yâ ti fini ti e, a yeke mbeni ye so ayeke mû maboko na e si e duti na kite pëpe wala mabe ti e atï pëpe.​—Diko aHébreu 2:1; 6:11.

2. Abeku use wa aChrétien ayeke na ni laso? Ngbanga ti nyen “ambeni ngasangbaga” ayeke bi bê ti ala na ndo ti beku ti aChrétien so a soro ala ti gue na yayu?

² A-Chrétien so ayeke na ngoi ti nda ni so azia lê ti ala na ndo ti mbeni oko ti abeku use so. Tanga ti aChrétien so a soro ala ti gue na yayu so ayeke amembre ti “kete kundu” ayeke na beku ti wara fini so alingbi ti hinga kuâ pëpe na yayu, ti duti tongana agbia nga na aprêtre legeoko na Christ na yâ ti Royaume ti lo (Luc 12:32; Apoc. 5:9, 10). “Azo mingi mingi” so ayeke ti “ambeni ngasangbaga” ayeke na beku ti duti na fini lakue lakue na yâ ti paradis na ndo ti sese tongana azo ti gbe ti Royaume ti Messie (Apoc. 7:9, 10; Jean 10:16). A yeke nzoni ambeni ngasangbaga agirisa pëpe so ti tene a sö ala, a lingbi ala mû maboko na “aita” ti Christ so a soro ala na so angbâ na sese ge (Mat. 25:34-40). A-Chrétien so a soro ala ti gue na yayu ayeke wara ande futa ti ala, me kite ayeke pëpe so ambeni ngasangbaga ayeke wara nga ande futa ti ala. (Diko aHébreu 11:39, 40.) Kozoni, zia e bâ tënë na ndo ti beku so Nzapa amû na aChrétien so a soro ala ti gue na yayu.

ALA SO A SORO ALA TI GUE NA YAYU AYEKE NA “BEKU SO AYEKE NA FINI”

3, 4. Tongana nyen Jéhovah ‘akiri adü’ aChrétien so a soro ala “fini ti duti na beku so ayeke na fini”? Beku ni so ayeke beku wa?

³ Bazengele Pierre asû alettre use na aChrétien so a soro ala ti gue na yayu, na yâ ni lo tene ala yeke “ala so a soro ala awe.” (1 Pi. 1:1). Lo fa anzene nzene tënë na ndo ti pendere beku so Nzapa amû na kete kundu. Na yâ ti kozo lettre ti Pierre, lo tene: “Zia a gonda Nzapa na Babâ ti Seigneur ti e Jésus Christ, ndali ti so, na lege ti kota nzoni bê so lo sara, lo kiri lo dü e fini ti duti na beku so ayeke na fini na lege ti zingongo so Jésus Christ azingo na kuâ, ti wara ye ti héritier so alingbi ti buba pëpe, so alingbi ti ga sioni pëpe nga so pendere ni alingbi ti hon pëpe. A bata ni na ala na yayu, ala so a yeke bata ala na ngangu ti Nzapa na lege ti mabe ndali ti salut so a ga nduru ti fa ni awe na ngoi ti nda ni. Ndani la, ala yeke na ngia mingi.”​—1 Pi. 1:3-6.

⁴ Kete wungo ti aChrétien so Jéhovah asoro ala ti duti legeoko na Christ na yâ ti Royaume ti yayu, a ‘kiri adü ala fini’ tongana amolenge ti Nzapa na lege ti yingo. Jéhovah asoro ala na lege ti yingo vulu ti ga agbia na aprêtre legeoko na Christ (Apoc. 20:6). Pierre atene dungo so a ‘kiri a dü ala fini’ so azi lege na ala ti duti “na beku so ayeke na fini”, so lo tene a yeke “ye ti héritier so alingbi ti buba pëpe, so alingbi ti ga sioni pëpe nga so pendere ni alingbi ti hon pëpe” so a bata ni na ala “na yayu”. Pendere beku so amû na aChrétien so a soro ala ti gue na yayu nzoni raison ti duti na ngia. Me beku ti ala ni ayeke ga tâ tënë gi tongana ala ngbâ be-ta-zo.

5, 6. Ngbanga ti nyen a lingbi aChrétien so a soro ala ti gue na yayu angbâ be-ta-zo?

⁵ Na yâ ti use lettre ti Pierre, lo wa aChrétien so a soro ala ti gue na yayu ti “sara ngangu kue ti sara si iringo so a iri na ala nga sorongo so a soro na ala aduti tâ ye biani”. (2 Pi. 1:10). A lingbi ala sara kue ti duti aChrétien so ayeke na mabe, agbu tënë ti Nzapa ngangu, aye tere tongana aita nga ayeke na ndoye. Pierre atene: “Tongana aye so ayeke na ala na ayeke mingi mingi, fade a yeke kanga lege na ala ti duti gi senge senge nga a yeke mû lege na ala ti lë lengo.”​—Diko 2 Pierre 1:5-8.

⁶ Christ atene na a-ancien so a soro ala ti gue na yayu so ayeke na congrégation ti Philadelphie na Asie Mineure, lo tene: “So mo bata tënë ti gbungo ngangu so mbi gbu, fade mbi nga mbi yeke bata mo na yâ ti ngbonga ti tara so ayeke ga na ndo ti sese kue so azo ayeke dä, ti tara azo so asara kodoro na ndo ti sese. Mbi yeke ga fade fadeso. Ngbâ ti gbu ye so mo yeke na ni so ngangu, si mbeni zo amû couronne ti mo pëpe.” (Apoc. 3:10, 11). Tongana mbeni Chrétien so a soro lo ti gue na yayu angbâ be-ta-zo mbeni pëpe, lo yeke wara pëpe “couronne ti gloire so pendere ni ayeke hon pëpe” so a mû zendo ti mû na ala so a soro ala na so angbâ be-ta-zo juska na kuâ.​—1 Pi. 5:4; Apoc. 2:10.

ALA LÏ NA YÂ TI ROYAUME

7. Pendere beku wa Jude asara tënë ni na yâ ti lettre ti lo?

⁷ Na ngu 65, Jude so mama ti lo na Jésus ayeke oko asû lettre na aChrétien so a soro ala ti gue na yayu, lo tene ala yeke “ala so Nzapa airi ala”. (Jude 1; bâ aHébreu 3:1.) Lo ye lani ti tokua na ala mbeni lettre na ndo ti pendere beku ti salut so aChrétien kue so a iri ala ti duti na yâ ti Royaume ti Nzapa ‘ayeke na ni.’ (Jude 3). Atâa so ambeni kota tënë ayeke lani dä so lo lingbi ti sara tënë na ndo ni, na yâ ti andangba tënë ti nduru lettre ti lo, lo kiri lo sara tënë ti pendere beku so aChrétien so a soro ala ti gue na yayu ayeke na ni, lo tene: “Nzapa alingbi ti bata ala si ala tï pëpe, na ti zia ala na gbele gloire ti lo na yâ ti kota ngia na sioni oko na tere ti ala pëpe. Zia a mû na oko Nzapa, Sauveur ti e na lege ti Jésus Christ Seigneur ti e, gloire, kota ndo ti gbia, ngangu na komandema na angoi kue so ahon kozo, fadeso nga lakue lakue.”​—Jude 24, 25.

8. Ti gue oko na Jude 24, nyen la afa so ngia ayeke na yayu na ngoi so mbeni Chrétien so a soro lo ti gue na yayu angbâ be-ta-zo juska na kuâ?

⁸ Biani, aChrétien so a soro ala ti gue na yayu na so ayeke be-ta-zo aye si Nzapa abata ala oko oko kue si ala tï pëpe na yâ ti mbeni ye so ayeke gue na ala na futingo. Beku ti ala so aluti na ndo ti Bible ayeke so Jésus Christ ayeke zingo ande ala na kuâ, ti mû lege na ala ti wara mbeni tere ti yingo so alingbi kue ti si na gbele Nzapa na kota ngia. Tongana mbeni Chrétien so a soro lo ti gue na yayu akui be-ta-zo, kite ayeke dä pëpe so ‘a yeke zingo lo na tere so ayeke ti yingo’, “so alingbi ti buba pëpe . . . , na yâ ti gloire.” (1 aCor. 15:42-44). Tongana ‘ngia ayeke mingi na yayu ndali ti wasiokpari oko so achangé bê ti lo’, tara ti bâ ngia so ayeke na yayu na ngoi so mbeni ita ti Christ so a soro lo ti gue na yayu angbâ be-ta-zo juska na kuâ (Luc 15:7). Jéhovah na acréature ti yingo so ayeke be-ta-zo ayeke duti ande na ngia legeoko na mbeni Chrétien so a soro lo ti gue na yayu so awara futa ti lo na kota “ngia”.​—Diko 1 Jean 3:2.

9. Na lege wa ‘a mû lege nzoni’ na aChrétien so a soro ala ti gue na yayu ti lï na yâ ti Royaume? Tongana nyen la beku so asara ngangu na ndo ti ala na ngoi so ala ngbâ na sese ge?

⁹ Ti gue oko na tënë ti Jude so, Pierre atene na aChrétien so a soro ala ti gue na yayu so tongana ala ngbâ be-ta-zo juska na kuâ, “a yeke mû lege na ala nzoni ti lï na yâ ti royaume ti Seigneur na Sauveur ti e Jésus Christ, royaume so ayeke ngbâ lakue lakue.” (2 Pi. 1:10, 11). Tongana Pierre atene so “a yeke mû lege na ala nzoni” ti lï na yâ ti Royaume, lo ye lani ti fa so ala yeke lï na yayu na yâ ti kota gloire. Lo ye nga ti sara tënë ti gbâ ti aye ti nzoni so ala yeke wara na yayu. Bê ti aChrétien so a soro ala ti gue na yayu ayeke si na ngia nga na singila tongana ala pensé na ndo ti dutingo be-ta-zo ti ala lani. Beku so amû ngangu na aChrétien so a soro ala ti gue na yayu ti ngbâ be-ta-zo na ngoi so ala yeke na sese.​—1 Pi. 1:13.

BEKU TI AMBENI NGASANGBAGA

10, 11. (a) Beku wa ambeni ngasangbaga ayeke na ni? (b) Tongana nyen la gango tâ tënë ti beku so andu Christ nga andu “ngoi so amolenge ti Nzapa ayeke fa tere ti ala na gigi.”?

¹⁰ Bazengele Paul asara tënë ti beku ti gloire ti “amolenge ti Nzapa” so a soro ala na lege ti yingo vulu tongana “ahéritier legeoko” na Christ. Na pekoni lo sara tënë ti pendere beku so Jéhovah amû na ambeni ngasangbaga so zo alingbi ti diko wungo ti ala pëpe, lo tene: “Lê ti création [azo] ayeke gi na lege ti ku ngoi so amolenge ti Nzapa [ala so a soro ala ti gue na yayu] ayeke fa tere ti ala na gigi. Teti a zia création na gbe ti buba ye, na a yeke ti bê ti création wani pëpe, me a yeke ti bê ti lo so azia création ni na gbe ti buba ye, ndali ti beku so fade a yeke zi création nga na gbe ti ngbâa ti ye so abuba, na lo yeke wara liberté ti gloire ti amolenge ti Nzapa.”​—aRom. 8:14-21.

¹¹ Jéhovah amû lani na azo beku na ngoi so lo mû zendo ti zi “ngbo ti giriri,” Satan Zabolo, na lege ti “hale”, wala ngongoa so lo mû zendo ti lo (Apoc. 12:9; Gen. 3:15). Jésus Christ la ayeke kozo zo ti yâ ti “ngongoa” ni (aGal. 3:16). Na lege ti kuâ ti Jésus nga na zingongo ti lo na kuâ, lo sara si lege azi na azo ti wara beku ti tene a zi ala na gbe ti ngbâa ti siokpari na ti kuâ. Kamba ayeke na popo ti gango tâ tënë ti beku so na “ngoi so amolenge ti Nzapa ayeke fa tere ti ala na gigi.” A-Chrétien so a soro ala ti gue na yayu ayeke tanga ti azo ti yâ ti “ngongoa” ni. Ala yeke “fa tere ti ala na gigi” na ngoi so ala yeke mû maboko na Christ ti futi sioni dunia ti Satan (Apoc. 2:26, 27). Ye so ayeke ga na salut na ambeni ngasangbaga so ayeke sö kuâ na yâ ti kota ye ti vundu.​—Apoc. 7:9, 10, 14.

12. Aye ti nzoni wa azo ayeke wara na ngoi so aChrétien so a soro ala ti gue na yayu ayeke fa tere ti ala na gigi?

¹² So dengo bê si azo, wala “création” ayeke wara na ngoi ti Komandema ti Ngu Saki Oko ti Christ! Na ngoi ni so “amolenge ti Nzapa” so awara gloire ayeke kiri ti “fa tere ti ala na gigi” na mbeni lege nde. Ala yeke sara kusala tongana aprêtre legeoko na Christ ti mû maboko na azo ti wara ye ti nzoni na lege ti sandaga ti Christ. A yeke to nda ti zi création wala azo so ayeke na gbe ti Royaume ti yayu na gbe ti aye so aga na peko ti siokpari nga na kuâ. Yeke na yeke a yeke zi azo so amä yanga “na gbe ti ngbâa ti ye so abuba”. Tongana ala ngbâ be-ta-zo na yâ ti ngu saki oko ni so kue nga na yâ ti ndangba tara so ayeke ga na hunzingo ti komandema ni so, a yeke sû iri ti ala biani biani na yâ ti “mbeti ti fini.” Ala yeke wara “liberté ti gloire ti amolenge ti Nzapa.” (Apoc. 20:7, 8, 11, 12). Ye so ayeke biani mbeni pendere beku!

ZIA SI BEKU TI MO ADUTI POLELE NA LI TI MO

13. Beku ti e aluti na ndo ti nyen? Lawa la Christ ayeke fa tere ti lo na gigi?

¹³ Na yâ ti alettre use so Pierre asû aye mingi ayeke dä so alingbi ti mû maboko na aChrétien so a soro ala ti gue na yayu nga na ambeni ngasangbaga ti bata nzoni na li ti ala beku ti ala. Lo fa so a yeke pëpe akusala ti ala la asara si ala wara beku so, me a yeke grâce na kota nzobe ti Jéhovah. Lo tene: “Ala zia tâ li ti ala kpô; ala zia beku ti ala na ndo ti kota nzobe so a yeke sara ande na ala na ngoi so Jésus Christ ayeke fa tere ti lo na gigi.” (1 Pi. 1:13). Christ ayeke fa ande tere ti lo na gigi na ngoi so lo yeke futa adisciple be-ta-zo ti lo nga lo yeke futi sioni dunia so.​—Diko 2 aThessalonicien 1:6-10.

14, 15. (a) A lingbi e sara nyen ti ngbâ ti bata beku ti e nzoni na li? (b) Wango wa Pierre amû?

¹⁴ Ti tene beku ti e angbâ polele na li ti e, a lingbi e dabe ti e lakue so “lâ ti Jéhovah” aga nduru ti si awe. A lingbi bibe ni so asara ngangu na ndo ti fini ti e kue. Jéhovah ayeke futi “ayayu”, wala komandema ti azo laso, nga na “sese”, wala bungbi ti azo ti sioni nga na “aye” ti lo. Pierre atene: “A yeke nzoni ala bâ wala dutingo ti ala ayeke tongana nyen . . . , ala ku na ala bata na li ti ala ngoi so lâ ti Jéhovah ayeke si na ayeke duti dä, so na yâ ni ayayu so wâ amû ni ayeke ga tongana ngu si a girisa na aye ni so amû wâ ngangu mingi ayeke ga tongana ngu.”​—2 Pi. 3:10-12.

¹⁵ “Afini yayu [Royaume ti Christ] na fini sese [fini bungbi ti azo]” ayeke mû place ti “ayayu” nga na “sese” ti laso (2 Pi. 3:13). Pierre afa na e polele ye so a lingbi e sara ti ngbâ ti “ku,” wala ti bata polele na li ti e, beku ti fini dunia so a mû zendo ni. Lo tene: “Tongaso, aita so mbi ndoye ala mingi, so ala yeke ku aye so, ala sara ngangu kue ti tene na nda ni lo wara ala na saleté na tere ti ala pëpe, na sioni ye na tere ti ala pëpe nga na yâ ti siriri.”​—2 Pi. 3:14.

FA SO BEKU TI MO AYEKE POLELE NA LI TI MO

16, 17. (a) “Sarango ye so ayeke nzoni-kue” so a lingbi e duti na ni ayeke so wa? ‘Akusala so afa so e gbu tënë ti Nzapa ngangu’ andu aye wa? (b) Na lege wa beku ti e ayeke ga tâ tënë?

¹⁶ A yeke nzoni e bata beku ti e me nga a yeke nzoni e sara ye alingbi na ni. A yeke nzoni e gi ti bâ wala dutingo ti e ayeke tongana nyen na lege ti yingo. “Sarango ye so ayeke nzoni-kue” ahunda ti tene e “duti na nzoni sarango ye na popo ti azo ti amara” na sarango ye so ayeke na lege ni na lê ti Nzapa (2 Pi. 3:11; 1 Pi. 2:12). A lingbi e duti na ‘ndoye na popo ti e.’ Ye so ahunda ti tene e sara ye kue so e lingbi ti sara ti bata beoko ti e ti aita ti ndo ti sese kue, même na yâ ti congrégation so e yeke dä (Jean 13:35). ‘Akusala so afa so e gbu tënë ti Nzapa ngangu’ ayeke aye so e yeke sara so afa biani so e yeke na nzoni songo na Jéhovah. Ye so andu aye so e yeke sara tënë ni na yâ ti asambela ti e, dikongo Bible lâ oko oko, mandango ye e wani nzoni, vorongo Nzapa na yâ ti sewa nga na fango lakue “nzoni tënë ti royaume”.​—Mat. 24:14.

¹⁷ E oko oko kue e ye ti duti azo so anzere na lê ti Jéhovah nga so ayeke sö ande kuâ na ngoi so aye ti sioni dunia so “ayeke ga tongana ngu.” E yeke bâ ande gango tâ tënë ti beku ti e, “beku ti fini ti lakue lakue so Nzapa, lo so alingbi ti tene mvene pëpe, amû zendo ni ngbene ye ândö giriri”.​—Tite 1:2.

[Foto na lembeti 22]

‘A kiri adü’ aChrétien so a soro ala “fini ti duti na beku so ayeke na fini”

[Foto na lembeti 24]

Bata beku ti mo nzoni na li na yâ ti sewa