Mo leke tere ti mo ndali ti lâ ti Jéhovah awe?

“Kota lâ ti [Jéhovah, MN ] aga nduru, na a yeke ga fade fade.”​—SOPHONIE 1:14.

1-3. (a) Ye wa Bible atene na ndo ti lâ ti Jéhovah? (b) ‘Lâ ti Jéhovah’ wa ayeke hara e?

KOTA lâ ti Jéhovah ayeke pëpe mbeni lango so a yeke wara angbonga 24 na yâ ni. A yeke mbeni ngoi so na yâ ni Nzapa ayeke fâ ngbanga na ndo ti azo ti sioni. A yeke na lege ni ti tene azo so ake Nzapa asara mbeto ti lango ti Jéhovah so, so ayeke mbeni lango ti bingo, ti kota ngonzo, ti vundu nga na ti futingo aye (Esaïe 13:9; Amos 5:18-20; Sophonie 1:15). Prophétie ti Joël atene: “Aï, teti lâ ni! teti lâ ti L’Eternel ayeke nduru, fade lâ ni aga tongana ye ti futi so alondo na Lo Ti Ngangu Ahon Kue.” (Joël 1:15). Ye oko, na kota lango so Nzapa ayeke sö ande azo so “bê ti ala ayeke mbilimbili.”​—Psaume 7:11.

² Tënë ‘lâ ti Jéhovah’ andu ngbanga so Nzapa afâ na ndo ti azo na angoi nde nde. Na tapande, Jéhovah asara kusala lani na azo ti Babylone ti fâ ngbanga na ndo ti azo ti Jérusalem na ngu 607 kozo ti Christ (Sophonie 1:4-7). Mara ti mbeni lâ ti fango ngbanga tongaso asi na ngu 70 tongana Nzapa asara kusala na aturugu ti Rome ti fâ lani ngbanga na ndo ti aJuif so ake Molenge ti lo (Daniel 9:24-27; Jean 19:15). Bible afa nga kozoni awe so mbeni ‘lâ ti Jéhovah’ ayeke si ande na ngoi so ‘fade lo sigigi ti tiri na amara kue’. (Zacharie 14:1-3). Nzapa afa na bazengele Paul so kamba ayeke na popo ti lâ ni so na singo ti Christ, so ato nda ni na ngoi so a zia Jésus tongana Gbia na yayu na ngu 1914 (2 aThessalonicien 2:1, 2). Teti so lâ ti Jéhovah ayeke hara azo, versê ti ngu 2007 ti aTémoin ti Jéhovah alingbi biani na ni. A wara versê so na Sophonie 1:14, so atene: ‘Kota lâ ti Jéhovah aga nduru.’

³ Teti so kota lâ ti Jéhovah aga nduru, so ayeke fadeso ngoi ti tene mo leke tere ti mo. Tongana nyen mo lingbi ti leke tere ti mo ndali ti lango ni so? Mo yeke na bezoin ti sara ambeni ye ti leke tere ti mo ndali ti kota lâ ti Jéhovah?

Leke tere ti mo

4. Jésus aleke tere ti lo lani ndali ti ngangu tara wa?

⁴ Na yâ ti prophétie so Jésus Christ atene na ndo ti hunzingo ti aye ti sese ti laso, lo tene na adisciple ti lo, lo tene: “Ala leke tere ti ala ti ku.” (Matthieu 24:44, Fini Mbuki 2001). Na ngoi so Jésus asara tënë so, lo leke tere ti lo lani awe ndali ti mbeni ngangu tara: mungo fini ti lo na sandaga ti zi e (Matthieu 20:28). Ye wa e lingbi ti manda na ndo ti lege so Jésus aleke tere ti lo lani?

5, 6. (a) Na lege wa ndoye ti e na mbage ti Nzapa nga na azo ayeke mû maboko na e ti leke tere ti e ndali ti lâ ti Jéhovah? (b) Tapande wa Jésus azia na ndo ti ndoyengo azo?

⁵ Jésus aye lani Jéhovah nga na akpengba-ndia ti lo na bê ti lo kue. Na ndo ti Jésus, aHébreu 1:9 atene: “Mo ndoye mbilimbili, na Mo ke siokpari; teti tënë so, Nzapa, Nzapa ti Mo, asa mafuta ti ngia na ndo Mo ahon afon Mo.” Teti so Jésus aye lani Babâ ti lo ti yayu mingi, lo ngbâ be-ta-zo na lo. Tongana e ye Nzapa tongana ti Jésus nga e sara ye alingbi na aye so lo hunda, lo yeke bata ande e (Psaume 31:24). Mara ti ndoye nga na mango yanga tongaso ayeke mû maboko na e ti leke tere ti e ndali ti kota lâ ti Jéhovah.

⁶ A hinga Jésus lani tongana mbeni zo so aye azo mingi. Biani, “Lo ye ti sara be-nzoni na ala, teti ye nde nde agi ala, na ala kangbi kirikiri tongana angasangbaga so ayeke na berger pëpe.” (Matthieu 9:36). Ni la, Jésus afa nzo tënë na azo, legeoko tongana ti so ndoye apusu e ti fa tënë ti Royaume na azo. Ndoye ti e na mbage ti Nzapa nga na mbage ti azo asara si e ngbâ lakue ti fa tënë; na tongaso ndoye ayeke mû maboko na e ti leke tere ti e ndali ti kota lâ ti Jéhovah.​—Matthieu 22:37-39.

7. Ngbanga ti nyen e lingbi ti duti na ngia na ngoi so e yeke ku lâ ti Jéhovah?

⁷ Jésus ayeke lani na ngia ti sara ye so bê ti Jéhovah aye (Psaume 40:9). Tongana e yeke na oko bibe so Jésus ayeke na ni, e yeke wara ngia na yâ ti kusala ti Nzapa so e yeke sara. Legeoko tongana ti Jésus, e yeke mû ye mingi, na ye so ayeke sara biani si e duti na ngia (Kusala 20:35). Biani, “tâ ngia ti L’Eternel ayeke ngangu ti [e].” Tâ ngia so ayeke mû maboko na e ti leke tere ti e nzoni ahon ti kozo ndali ti kota lâ ti Jéhovah.​—Néhémie 8:10.

8. Ngbanga ti nyen a yeke nzoni e ga nduru mingi na Jéhovah na lege ti sambela?

⁸ Sambela so Jésus asara lani mingi na Nzapa amû maboko na lo ti leke tere ti lo ndali ti aye so ayeke tara ande mabe ti lo. Lo yeke sambela lani tongana Jean abatize lo. Jésus asambela lani na bï ni kue na ngoi so lo ye ti soro abazengele ti lo (Luc 6:12-16). Biani, bê ti azo kue so adiko Bible ayeke pika na ndo ti atënë ti yâ ti asambela so Jésus asara na bê ti lo kue na ndangba bï ti lango ti fini ti lo na sese (Marc 14:32-42; Jean 17:1-26). Mo yeke bâ sambela na nene ni mingi tongana ti Jésus? Tongaso, sambela Jéhovah mingi, mû ngoi mingi ti sara tënë na lo nga hunda lo ti fa lege na mo na lege ti yingo vulu ti lo. Tongana mo bâ so lo ye ti fa lege na mo, gi hio ti sara ye alingbi na ni. Ti duti na kpengba songo na Babâ ti e ti yayu ayeke mbeni kota ye laso, ndali ti so kota lâ ti Nzapa ayeke pusu nduru mingi. Sara kue ti ga nduru mingi na Jéhovah ahon ti kozo na lege ti sambela.​—Jacques 4:8.

9. Ngbanga ti nyen a yeke kota ye mingi ti bi bê na ndo ti sarango si iri ti Jéhovah aga nzoni-kue?

⁹ Tënë ti sarango si iri ti Jéhovah aga nzoni-kue ayeke kota ye mingi na lê ti Jésus. A yeke mbeni ye so amû maboko lani na lo ti leke tere ti lo ndali ti atara so lo yeke wara. Biani, lo fa na adisciple ti lo so tongana ala yeke sambela Nzapa, a yeke nzoni ala zia tënë so dä, ala tene: “E ye iri ti Mo aga nzoni-kue.” (Matthieu 6:9). Tongana e ye mingi ti tene iri ti Jéhovah aga nzoni-kue, e yeke sara ngangu ti kpe aye kue so ayeke sara ande si iri ti lo abuba. Ye so ayeke sara si e leke tere ti e nzoni mingi ahon ti kozo ndali ti kota lâ ti Jéhovah.

A yeke nzoni mo changé ambeni ye?

10. Ngbanga ti nyen a yeke na lege ni ti gbu li ti e na ndo ti fini ti e?

¹⁰ Tongana lâ ti Jéhovah ayeke si kekereke, mo leke tere ti mo biani ndali ni awe? A yeke nzoni zo oko oko kue agbu li ti lo na ndo ti fini ti lo ti bâ wala a hunda ti changé ambeni ye so lo yeke sara wala bango ndo ti lo. Teti so fini ti zo laso aninga pëpe nga zo ahinga pëpe wala lo lingbi ti kui kekereke, a yeke nzoni zo oko oko kue agi lâ oko oko ti kpengba songo ti lo na Nzapa (Zo-ti-fa-tene 9:11, 12; Jacques 4:13-15). Tongaso, zia e bâ ambeni ye so a hunda peut-être ti tene e bâ lege ni na yâ ti fini ti e.

11. Na ndo ti tënë ti dikongo Bible, ye wa mo ye ti sara?

¹¹ Mbeni kota ye ni ayeke wango so “ngbâa be-ta-zo” ayeke mû na e ti diko Bible lâ oko oko (Matthieu 24:45, MN ). Mo lingbi ti leke na bê ti mo ti diko Bible kue a londo na Genèse ti si na Apocalypse ngu oko oko, nga ti gbu li na ndo ti atënë ni na ngoi so mo yeke diko ni. Tongana mo diko achapitre osio tongaso lâ oko oko, mo lingbi ti hunzi dikongo achapitre 1 189 ti Bible na yâ ti ngu oko. A hunda lani na agbia oko oko kue ti Israël ti diko Ndia ti Jéhovah ‘na lâ ti ala kue’. Kite ayeke dä pëpe so Josué asara lani nga tongaso (Deutéronome 17:14-20; Josué 1:7, 8). A yeke kota ye biani ti tene a-ancien adiko Mbeti ti Nzapa lâ oko oko, ndali ti ye so ayeke mû maboko na ala ti sara kusala na ‘nzoni tënë’ ti fa na ye.​—Tite 2:1.

12. Teti so lâ ti Jéhovah aga nduru, a yeke nzoni ye so apusu mo ti sara nyen?

¹² Teti so lâ ti Jéhovah aga nduru, a yeke nzoni ye so apusu mo ti ga lakue na abungbi nga ti mû mbage ti mo dä mingi (aHébreu 10:24, 25). Ti sara tongaso ayeke mû maboko na mo ti fa tënë ti Royaume nzoni ahon ti kozo, na ti duti zo so ayeke gi ti wara azo so ayeke nduru ti yeda na tënë ni si ala wara fini ti lakue lakue na ti mû maboko na ala (Kusala 13:48, MN ). Peut-être mo lingbi nga ti sara kusala mingi na yâ ti kongregation na ambeni lege nde; na tapande mo lingbi ti mû maboko na azo so aga mbakoro awe nga ti wa amaseka. Akusala so alingbi ti sara si mo duti na ngia mingi!

Songo ti mo na azo

13. E lingbi ti hunda tere ti e na tënë wa na ndo ti yungo fini zo?

¹³ Teti so lâ ti Jéhovah aga nduru, a yeke nzoni mo sara ngangu mingi ti “yü fini zo ti yâ ni so a leke ni giriri na lege ti ye so bê ti Nzapa aye na yâ tâ mbilimbili nga na dutingo be-biani.” (aEphésien 4:20-24, MN ). Na ngoi so mo yeke sara ye tongana ti Nzapa, azo ayeke bâ so mo yeke “tambela na lege ti Yingo” nga mo yeke fa lengo ti yingo na yâ ti fini ti mo (aGalate 5:16, 22-25). Mo lingbi ti fa ambeni mbilimbili ye so mo na sewa ti mo ayeke sara ti fa so ala yü fini zo? (aColossien 3:9, 10). Na tapande, a hinga mo tongana mbeni zo so ayeke sara nzoni bê na amba ti lo aChrétien nga na tanga ti azo kue? (aGalate 6:10). Ti manda Bible lakue ayeke mû ande maboko na mo ti gi ti sara ye tongana ti Nzapa nga ayeke sara si mo leke tere ti mo ndali ti lâ ti Jéhovah.

14. Ngbanga ti nyen a yeke nzoni ti tene mbeni zo asambela ti wara yingo vulu na ngoi so lo yeke gi ti kanga bê?

¹⁴ Ka tongana mo yeke sara ka ngonzo hio mingi nga mo bâ so a yeke nzoni mo hinga ti kanga bê? Kangango bê ayeke mbeni sarango ye so yingo vulu ti Nzapa alingbi ti mû maboko na mo ti duti na ni. Tongaso, sambela Nzapa ti wara yingo vulu ti sara ye alingbi na tënë so Jésus atene: “I hunda, na fade a mû na i; i gi, na fade i wara; i golo yanga ti da, na fade a lungula na i. . . . Tongana i so i yeke sioni, i hinga lege ti mû matabisi ti nzoni na amolenge ti i, fade Babâ ti i na yayu aye mingi ahon pëpe ti mû Yingo Vulu na ala so ahunda Lo?”​—Luc 11:9-13.

15. Ye wa a yeke nzoni zo asara tongana lo mä tere pëpe na mbeni ita?

¹⁵ Ka tongana mo na mbeni ita amä tere pë- pe? Sara ngangu ti leke kpale ni, si a buba siriri nga na beoko ti kongregation pëpe (Psaume 133:1-3). Sara ye alingbi na wango so Jésus amû na Matthieu 5:23, 24 wala na Matthieu 18:15-17. Tongana mo yeke zia si lâ akui na ndo ti mo na ngonzo na bê ti mo, gi hio ti leke kpale ni. Fani mingi, kota ye so a hunda ti sara ayeke ti duti nduru ti mû pardon. Paul atene: “I sara nzobe na popo ti i, na be-ti-ndoye, i pardone ye na popo ti i, legeoko tongana Nzapa apardone i nga na yâ Christ.”​—aEphésien 4:25, 26, 32.

16. Na alege wa a hunda ti sara ye na nzoni bê na yâ ti mariage?

¹⁶ Na yâ ti mariage, a hunda ti tene koli na wali asara ye na nzoni bê mingi, nga ngoi na ngoi, ala mû pardon. Tongana a hunda ti tene mo fa ndoye na mo sara nzoni bê ahon ti so mo yeke sara ka, zia Nzapa nga na Mbeti ti lo amû maboko na mo ti sara aye so. A hunda ti tene mo sara mbeni ye ti fa so mo sara ye alingbi na wango ti 1 aCorinthien 7:1-5? Ti sara tongaso ayeke sara si ala yapu na ala duti be-ta-zo na mba. Biani, so ayeke mbeni ye so na yâ ni a hunda na mbeni koli wala mbeni wali ti sara ye na “be-ti-ndoye”.

17. Aye wa a lingbi mbeni zo asara tongana lo sara mbeni kota siokpari?

¹⁷ Ka tongana mo sara mbeni kota siokpari? Gi ti sara ye hio ti leke kpale ni. Gi ti tene a-ancien amû maboko na mo. Asambela ti ala nga na awango ti ala ayeke mû maboko na mo ti leke songo ti mo na Jéhovah (Jacques 5:13-16). Sambela Jéhovah na fa so mo changé bê ti mo awe. Tongana mo sara tongaso pëpe, mo yeke bâ so mo sara mbeni ye na lege ni pëpe nga yingo-ti-hinga ti mo ayeke duti nzoni pëpe. A yeke ye so asi lani na David. Me bê ti David adë tongana lo fa ye so lo sara na Jéhovah. David atene: “Ngia ayeke na zo so kengo-ndia ti lo a pardone awe, na lo so siokpari ti lo a honde awe. Ngia ayeke na zo so L’Eternel adiko sioye na li ti lo pëpe, na handa ayeke na yingo ti lo pëpe!” (Psaume 32:1-5). Jéhovah ayeke pardone azo so asara siokpari me ala changé bê ti ala biani.​—Psaume 103:8-14; aProverbe 28:13.

Sara ye tongana ti azo ti sese so pëpe

18. A yeke nzoni mo bâ azo ti sese so tongana nyen?

¹⁸ Kite ayeke dä pëpe so mo yeke ku pendere fini sese so Babâ ti e ti yayu amû zendo ni. Tongaso, mo yeke bâ azo ti kirikiri so ague yongoro na Nzapa tongana nyen? Satan so ayeke “mokonzi ti sese so” ayeke lani na ngangu pëpe na ndo ti Jésus Christ (Jean 12:31; 14:30). Biani, mo ye pëpe ti tene Zabolo nga na azo so lo komande na ndo ti ala asara ngangu na ndo ti mo. Ni la, yeda na wango ti bazengele Jean so atene: “I ndoye sese so pëpe, wala ye so ayeke na sese so.” A yeke na lege ti ndara ti sara tongaso ndali ti so “sese so ayeke hon, na nzara ni kue, me zo so asara ye so Nzapa aye, lo duti lakue lakue.”​—1 Jean 2:15-17.

19. A yeke nzoni aChrétien so ade maseka azia na gbele ti ala ti sara nyen?

¹⁹ Mo yeke mû maboko na amolenge ti mo ti ‘bata tere ti ala mveni si ala ga sioni pëpe na lege ti ye ti sese so’? (Jacques 1:27). Satan aye ti gbu amolenge ti mo tongana ti so mbeni zo ayeke gbu asusu na yango. Abungbi nde nde so azo asigigi na ni ayeke ti sara si amaseka abâ so place ti ala ayeke na yâ ti sese ti Satan. Me awakua ti Jéhovah ayeke na yâ ti oko bungbi so azo ti yâ ni ayeke sö ande kuâ na ngoi so a yeke futi ande azo ti sioni. Tongaso, a yeke nzoni a wa amaseka so ayeke aChrétien ti “wu na kusala ti Seigneur”. (1 aCorinthien 15:58). A yeke nzoni ababâ na amama so ayeke awakua ti Nzapa amû maboko na amolenge ti ala ti zia na gbele ti ala ti sara aye so ayeke mû na amolenge ni ngia, na fini ti ala ayeke mû gonda na Nzapa nga ayeke mû maboko na ala ti leke tere ti ala ndali ti lâ ti Jéhovah.

Pensé na ndo ti fini na yâ ti Paradis

20. Ngbanga ti nyen a yeke nzoni e ngbâ lakue ti pensé na ndo ti fini ti lakue lakue?

²⁰ Tongana mo ngbâ lakue ti pensé na ndo ti fini ti lakue lakue, a yeke mû maboko na mo ti ngbâ ti ku lâ ti Jéhovah na bê so ayeke na siriri (Jude 20, 21). Mo yeke ku na ngia fini ti lakue lakue so e yeke wara na yâ ti Paradis, na tongaso mo yeke na beku ti kiri ti wara ngangu so mo yeke lani na ni na ngoi so mo de maseka. Nga, mo yeke duti ande na ngoi mingi mingi ti gi ti sara anzoni ye nga ti manda ye mingi na ndo ti Jéhovah. Mo lingbi ti manda ye na ndo ti Nzapa teti lakue lakue ndali ti so laso azo ahinga gi “kete yanga ti kusala ti Lo”. (Job 26:14). So atâ pendere ye si ayeke ku e!

21, 22. Aye wa azo so a zingo ala na kuâ alingbi ti fa na mo? Ye wa mo nga mo lingbi ti fa na ala?

²¹ Na yâ ti Paradis, azo so a yeke zingo ala na kuâ ayeke fa ande na e aye so asi ândö na so e hinga ye na ndo ni kue pëpe. Hénoc ayeke duti ande dä ti fa na e tongana nyen lo wara ngangu lani ti tene peko ti tokua ti Jéhovah na azo so ake Nzapa (Jude 14, 15). Biani, Noé ayeke fa ande na e tongana nyen kusala ti lekengo arche atambela lani. Abraham na Sara ayeke fa ande na e bibe ti ala na ndo ziango kodoro ti Ur so ala duti nzoni dä ti gue ti lango na yâ ti atente. Pensé na ndo ti anzene nzene tënë so Esther alingbi ti fa ande na ndo ti ye so lo sara ndali ti azo ti lo nga tongana nyen lo kanga lege na sioni ye so Haman aleke ti sara na ala (Esther 7:1-6). Pensé na ndo ti Jonas so ayeke sara ande na e tënë na ndo ti alango ota so lo sara na yâ ti kota susu wala pensé na ndo ti Jean Baptiste so ayeke fa ande na e tënë ti bê ti lo na ngoi so lo yeke batize Jésus (Luc 3:21, 22; 7:28). So atâ pendere ye si e yeke mä ande tënë ni!

²² Na ngoi ti Ngu Saki Oko ti Komandema ti Christ, mo lingbi ande ti wara lege ti mû maboko na azo so a zingo ala na kuâ ti “hinga Nzapa.” (aProverbe 2:1-6). Laso, e yeke na ngia mingi ti bâ azo so ayeke manda ye na ndo ti Jéhovah Nzapa na ayeke sara ye alingbi na ni. Me, pensé na ngia so mo yeke wara ande na ngoi so Jéhovah ayeke iri tënë nzoni na ndo ti ngangu so mo yeke sara ti fa ye na azo so ayeke na fini ândö na so a zingo ala na kuâ. Pensé nga na ndo ti ngia so mo yeke wara tongana ala sara ye alingbi na ni.

23. Ye wa a lingbi e leke na bê ti e ti sara?

²³ E awakua ti Jéhovah e yeke wara aye ti nzoni mingi laso me e lingbi ti fa ni kue pëpe ndali ti so e yeke azo (Psaume 40:6). E kiri singila na Nzapa mbilimbili ndali ti aye ti yingo so lo mû na e (Esaïe 48:17, 18). Atâa dutingo ti e ayeke tongana nyen, zia e sara kusala ti Nzapa na bê ti e kue na ngoi so e yeke ku kota lâ ti Jéhovah.

Mo yeke kiri tënë tongana nyen?

• ‘Lâ ti Jéhovah’ ayeke nyen?

• Tongana nyen mo lingbi ti leke tere ti mo ndali ti lâ ti Jéhovah?

• Teti so kota lâ ti Nzapa aga nduru, aye wa a hunda peut-être na e ti changé?

• Aye wa mo ku ti sara ande na yâ ti Paradis?

[Foto na lembeti 14]

Jésus aleke tere ti lo lani ndali ti atara so asi na lo

[Foto na lembeti 17]

So tâ pendere kusala si e yeke sara ande ti mû maboko na azo so a zingo ala ti hinga Jéhovah!