I fa so i yeke duti ndulu teti lâ ti Jéhovah

“I fa so i yeke duti ndulu, teti na mbeni ngbonga so i ku pëpe, Molenge ti zo ayeke ga.”​—MATTHIEU 24:44, NW.

FADE lâ ti Jéhovah so amû mbito mingi ayeke duti ngoi ti bira na ti kota ngonzo, ti gingo bê na ti vundu, ti vukongo ndo na ti dutingo yangbato. ‘Kota lâ ti Jéhovah so amû mbito mingi’ ayeke ga biani na ndo aye ti sioni ti sese ti laso, tongana ti so Kota Moa amene sioni sese ti ngoi ti Noé. Lege ti kpe ni ayeke pëpe. Ye oko, “fade A sö zo so adi iri ti L’Eternel [“Jéhovah”, NW ]”. (Joël 2:30-32; Amos 5:18-20). Fade Nzapa ayeke futi awato ti lo na lo sö azo ti lo. Na bibe ti duti ndulu ti sala ye hio, prophète Sophonie atene: “Kota lâ ti L’Eternel aga ndulu, na a yeke ga fade fade.” (Sophonie 1:14). Me lawa si Nzapa ayeke fâ ngbanga ni?

² Jésus atene: “Tënë ti lâ ni kâ na tënë ti l’heure ni kâ, zo oko ahinga pëpe, même a-ange ti yayu ahinga pëpe, na Molenge ni ahinga pëpe, gi Babâ ahinga.” (Matthieu 24:36). Teti so e hinga tâ mbilimbili ngoi ni pëpe, a yeke kota ye ti tene e bâ na nene ni versê ti ngu 2004: “I lango pëpe. . . I fa so i yeke duti ndulu.”​—Matthieu 24:42, 44, NW.

³ Na fango tongana nyen a yeke bungbi ande hio azo so ayeke ndulu awe ti bata ala, na ngoi so a yeke dö ambeni ti zia, Jésus atene: “Fade azo use ayeke na yaka; a lungula zo oko, a zia mbeni. Fade awali use ayeke [pika] fuku na moulin; a lungula wali oko, a zia mbeni.” (Matthieu 24:40, 41). Na ngoi ti ngangu so, fade dutingo ti e mveni ayeke tongana nyen? E yeke duti ande ndulu awe, wala lâ ni ayeke nzi e nzingo? Ye ni andu mingi ye so e leke ti sala fadeso. Ti fa so e lingbi awe teti lâ ti Jéhovah, a lingbi e kpe mbeni bango ndo so amû ndo kue laso, e kpe ti tï na yâ mbeni sioni dutingo na lege ti yingo, na e kpe ambeni salango ye na yâ gigi ti e.

Kpe ti gi bê na ndo ye oko pëpe

⁴ Bâ ngoi ti Noé. Bible atene: “Na lege ti mabe, tongana Nzapa awa Noé tënë ti ye so zo ade abâ pëpe, mbito ti Nzapa asala lo, na lo leke arche ti sö azo ti da ti lo.” (aHébreu 11:7). Arche ayeke duti mbeni ye so ayeke nde mingi nga so ayeke dandara na lê ti azo. Nga, Noé ayeke “zo ti fa tënë ti mbilimbili”. (2 Pierre 2:5). Atâa ye so Noé aleke wala ye so lo fa, a pusu azo ti ngoi ti lo pëpe ti sala ye. Ngbanga ti nyen? Ngbanga ti so ala “te, ala nyon, akoli akamata wali, na awali akamata koli”. Azo so Noé afa tënë na ala abi tele ti ala mingi na yâ aye ti ala mveni nga na aye ti ngia si ala “hinga tënë ni pëpe juska moa aga akamata ala kue”.​—Matthieu 24:38, 39.

⁵ Ngoi ti Lot ayeke nga lani tongaso. Mbeti ti Nzapa atene: “Ala te, ala nyon, ala vo ye, ala kä ye, ala lu le-kobe, na ala sala da; me na lâ ni so Lot asigigi na Sodome, wâ na soufre ti yayu atï afâ ala kue.” (Luc 17:28, 29). Na pekoni so a-ange afa na Lot tënë ti futingo so aga ndulu, lo sala tënë na akogara ti lo ti koli na ndo ye so ayeke ga. Me na lê ti ala, “lo yeke tongana zo ti sala ngia senge.”​—Genèse 19:14.

⁶ Jésus atene so legeoko tongana ngoi ti Noé na ti Lot, “fade singo ti Molenge Ti Zo” ayeke tongaso nga (Matthieu 24:39; Luc 17:30). Biani, bango ndo ti azo mingi laso ayeke ti gi bê na ndo ye oko pëpe. A lingbi e sala hange si mara ti bango ndo tongaso asala ngangu na ndo ti e pëpe. Mbeni ye ti sioni ayeke oko pëpe na yâ tengo nzoni kobe nga nyongo sämba alingbi na ni. Legeoko nga, mariage ayeke ye so Nzapa la aleke. Ye oko, tongana mara ti aye tongaso aga atâ kota ye na yâ gigi ti e, na e zia aye ti yingo yamba, e mveni e yeke ndulu awe teti lâ ti Jéhovah so amû mbito mingi?

⁷ Bazengele Paul atene lani: “Lâ ade mingi pëpe; tongaso, ala so ayeke na wali, a lingbi ala duti tongana ala yeke na wali pëpe.” (1 aCorinthien 7:29-31). Gi kete ngoi si angbâ teti e ti hunzi kusala ti fango tënë ti Royaume so Nzapa amû na e (Matthieu 24:14). Paul agboto lani même mê ti azo so asala mariage awe ti bi bê pëpe gi na ndo koli wala wali ti ala si ala zia aye ti Royaume na use ndo na yâ fini ti ala. A yeke polele, bango ndo so Paul ahunda na ala ti wara ayeke nde mingi na ti gingo bê na ye oko pëpe. Jésus atene: “I gi royaume ti Nzapa na mbilimbili ti Lo kozoni.” (Matthieu 6:33). Tongana e yeke mû mbeni desizion wala kozoni si e londo ti sala mbeni ye, a lingbi e hunda kota tënë so: ‘Tongana nyen ye so ayeke ndu ande ziango aye ti Royaume na kozo ndo na yâ fini ti mbi?’

⁸ E yeke sala tongana nyen tongana e bâ so asenge ye ti lâ oko oko ahon ndo ti e awe si e pusu aye ti yingo yongoro? Kangbi ayeke gi kete na popo ti lege so e yeke duti na fini na ti azo so ayeke ndulu na e, ala so ahinga tâ tënë ti Mbeti ti Nzapa pëpe na so afa tënë ti Royaume pëpe? Tongana a yeke tongaso, a lingbi e zia ye so na yâ sambela. Jéhovah alingbi ti mû maboko na e ti duti na mbilimbili bango ndo (aRomain 15:5; aPhilippien 3:15). Lo lingbi ti mû maboko na e ti zia aye ti Royaume na kozo ndo, ti sala ye so ayeke mbilimbili, na ti sala kusala so lo hunda na e.​—aRomain 12:2; 2 aCorinthien 13:7.

Kpe ti tene lango asala mo na lege ti yingo

⁹ Oko prophétie so asala tënë ti gango ti “bira ti kota lâ ti Nzapa, Lo Ti Ngangu Ahon Kue” na Harmaguédon agboto mê ti azo so fade lê ti ambeni zo ayeke ngbâ pëpe na zingo ni. Seigneur Jésus Christ atene: “Bâ! Mbi yeke ga tongana wanzi! Ngia ayeke na zo so abata ndo tongana sinziri, lo bata bongo ti lo si lo tambela na tele senge pëpe, na azo abâ kamene ti lo pëpe.” (Apocalypse 16:14-16). Bongo so asala tënë ni ge andu ye so ayeke hinga na e tongana aChrétien Témoin ti Jéhovah. Ye so andu kusala ti e ti fango tënë ti Royaume nga tambela ti e ti Chrétien. Tongana e tï na yâ mbeni salango ye so akpa lango, a lingbi ti zi na tele ti e ye so afa so e yeke aChrétien. Ye so ayeke sioni na a yeke ye ti kamene. A lingbi e kpe ti tene lango asala e, wala ti woko na lege ti yingo. Tongana nyen?

¹⁰ Fani mingi Bible agboto lê na ndo nene ti lango pëpe na ti zi lê ti e. Na tapande, atondo ti aÉvangile adabe e: “I lango pëpe” (Matthieu 24:42, NW; 25:13; Marc 13:35, 37); “i fa so i yeke duti ndulu” (Matthieu 24:44, NW ); “i bata nzoni [wala, i ngbâ ti zi lê ti i]” (Marc 13:33); “i bata [wala, i duti ndulu]”. (Luc 12:40). Na pekoni so lo tene lâ ti Jéhovah aga ndulu ti tï na ndo ti azo ti sese so, na mbeni ngoi so ala ku ni pëpe, bazengele Paul atene na amba ti lo wamabe: “A lingbi e lango tongana atanga ni pëpe, me a lingbi e bata, e duti na donzi.” (1 aThessalonicien 5:6). Na yâ ndangba buku ti Bible, Christ Jésus so ayeke na yâ ti gloire, agboto lê na ndo singo ti lo hio tongaso: “Mbi yeke ga fade [fade].” (Apocalypse 3:11; 22:7, 12, 20). Mingi ti aprophète Hébreu afa na agboto mê na ndo kota lâ ti fango ngbanga ti Jéhovah (Esaïe 2:12, 17; Jérémie 30:7; Joël 2:11; Sophonie 3:8). Dikongo Tënë ti Nzapa, Bible, lâ oko oko nga gbungo li na ndo ni ayeke mbeni nzoni ye ti mû maboko ti tene lê ti e angbâ na zingo ni na lege ti yingo.

¹¹ Biani, so tâ mbeni ye ti mû lege na e ti lango na lege ti yingo pëpe si a yeke ti manda Bible lakue nga na ambeti so aluti na ndo ni, so “ngbâa be-ta-zo na ti ndara” ayeke mû ni! (Matthieu 24:45-47, NW ). Ye oko, ti tene mandango ye e mveni aga na aye ti nzoni, a lingbi e sala ni lakue nga a gue na li ni (aHébreu 5:14–6:3). A lingbi e te kpengba kobe ti yingo lakue. Ti wara ngoi laso ndali ni alingbi ti duti mbeni kpale (aEphésien 5:15, 16). Ye oko, dikongo Bible nga na ambeti so aluti na ndo ni, gi tongana ngoi ni alingbi na e si, alingbi kue pëpe. Mandango ye e mveni lakue ayeke kota ye tongana e ye ti tene “mabe ti [e] alingbi ga nzoni” na e lango pëpe.​—Tite 1:13.

¹² Abungbi nga na akota bungbi ti aChrétien amû nga maboko na e ti tiri na lango na lege ti yingo. Tongana nyen? Na lege ti aye so a yeke fa na e. Na ngoi ti abungbi so, a yeke dabe ti e lakue na ndo gango ndulu ti lâ ti Jéhovah. Ni la pëpe? Abungbi ti aChrétien ti yenga oko oko amû nga lege na e ti ‘wa mba si e ndoye azo, na e sala kusala nzoni’. Mara ti wango tongaso ayeke gue na zo ti lango pëpe na lege ti yingo. A yeke ye ti dongo bê pëpe so a hunda na e ti bungbi lakue na ngoi so e “bâ so lâ ni aga ndulu.”​—aHébreu 10:24, 25.

¹³ E yeke wara nga mungo maboko ti ngbâ na zingo lê na ngoi so e yeke mû mbage ti e na bê kue na kusala ti fango tënë. Lege so ayeke nzoni ahon atanga ni kue ti bata lakue na li afä ti lâ ti nda ni, nga nda ti afä so, ayeke ti sala tënë ni na azo. Nga tongana e bâ azo so e yeke manda Bible na ala ayeke gue na li ni nga ato nda ti sala ye alingbi na ye so ala yeke manda, a sala si e duti ndulu ti sala ye hio mingi ahon ti kozo. Bazengele Pierre atene: “I kpengba na lege ti bibe ti i, i duti na donzi.” (1 Pierre 1:13). Ti “wu na kusala ti Seigneur lakue” ayeke mbeni nzoni yorö ti lango pëpe na lege ti yingo.​—1 aCorinthien 15:58.

Kpe asalango ye so abuba zo na lege ti yingo

¹⁴ Na yâ kota prophétie ti lo na ndo fä ti singo ti lo, Jésus amû mbeni gbotongo mê. Lo tene: “I bata nzoni, wala peut-être tengo kobe na nyongo sämba mingi, na kusala ti leke ye ti fini so ane bê ti i, na lâ ni so aga na ndo i tongana son; teti fade lâ ni so aga tongana son na ndo ala kue so aduti na lê ti sese kue. Me i bata na ngoi ni kue, i sambela, si i lingbi wara ngangu ti kpe ye kue so fade asi, na ti luti na gbele Molenge Ti Zo.” (Luc 21:34-36). Jésus afa tâ na lege ni asalango ye so mingi ti azo ayeke tomba pekoni: tengo kobe na nyongo sämba ahon ndo ni, nga ambeni ye so aga na gingo bê.

¹⁵ Tengo kobe na nyongo sämba ahon ndo ni ayeke tâ nde mingi na akpengba-ndia ti Bible nga a lingbi e kpe ni. Bible atene: “Mo duti pëpe na popo ti azo so anyon vin mingi, wala na popo ti azo so ate nyama ahon ndo ni.” (aProverbe 23:20). Ye oko, a hunda pëpe na mbeni zo ti tï na yâ tengo kobe nga na nyongo sämba ahon ndo ni si aye ti sioni alingbi ti si na lo na lege ti yingo. Lê ti mbeni zo alingbi ti ne na lango nga lo lingbi ti duti zo ti goigoi kozoni ti si na aye so. Mbeni mato ti Bible atene: “Âme ti zo ti goigoi ayeke na nzara ti wara ye, me lo wara ye ni pëpe.” (aProverbe 13:4). Mara ti zo tongaso aye peut-être ti sala ye so bê ti Nzapa aye, me lo sala ni pëpe ngbanga ti so lo bâ aye na nene ni pëpe.

¹⁶ Agingo bê ti gigi so Jésus agboto mê na ndo ni ayeke nyen? A lingbi ti ndu agingo bê na ndo zo mveni, mungo ye teti sewa ti lo, nga na ambeni ye tongaso. So tâ lege ti ndara pëpe ti zia si aye so ane e ngangu! Jésus ahunda: “Me zo nyen na popo ti i, tongana lo gi bê ti lo, alingbi sala si [fini] ti lo ayo ahon ti kozoni?” Lo wa azo so amä lo: “I gi bê ti i pëpe, na i tene pëpe, Fade e te nyen? wala, Fade e nyon nyen? wala, Fade e yü bongo ti nyen? Teti aGentil agi ye so kue; Babâ ti i na yayu ahinga i ye ye so kue.” Ziango aye ti Royaume na kozo ndo na yâ fini ti e, nga ziango bê kue na Jéhovah so fade lo yeke mû aye so atia e, ayeke sala si agingo bê adë na a mû maboko si lê ti e angbâ na zingo ni.​—Matthieu 6:25-34.

¹⁷ Tombango peko ti aye ti mitele alingbi nga ti ga na gingo bê. Na tapande, ambeni zo asala si gigi ti ala aga ngangu na dutingo na fini ahon ye so ala yeke na ni. Ti ambeni, akode ti wara nginza hio, nga ziango nginza teti adengo buze so gere ni ayeke nzoni pëpe, agboto ala. Ti ambeni nde, mandango mbeti ti sese so tongana mbeni ye so amû lege na ala ti wara nginza mingi aga mbeni gbanda. Tâ tënë, ti manda mbeti ayo kete alingbi ti mû maboko ti wara kua ti nginza. Ye oko, tâ tene ni ayeke so, na gingo ti manda mbeti ayo mingi, ye so ayeke mû ngoi mingi, ambeni asala sioni na tele ti ala mveni na lege ti yingo. So tâ mbeni sioni dutingo na ngoi so lâ ti Jéhovah aga ndulu awe! Bible agboto mê: “Ala so aye ti wara mosoro, ala tï na yâ ye ti handa, na son, na nzara nde nde ti buba ye na ti ye so amû vundu, ye so abi ala na yâ ye so afuti ala.”​—1 Timothée 6:9.

¹⁸ Ye so ayeke kota ye ti tene tombango peko ti aye ti mitele amene zo pëpe ayeke ti gi ti lë ngangu ti hinga popo ti nzoni na sioni na ngoi ti mungo adesizion. A yeke maï ngangu so na lege ti tengo ‘kpengba kobe so ayeke teti abiazo’ nga ti duti na ‘angangu ti gbu nda ti ye na salango kusala na ni lakue’. (aHébreu 5:13, 14, NW ). Ti “hinga ye so ayeke nzoni ahon” ambeni ye na ngoi so e yeke zia aye na kozo ndo, ayeke bata nga e ande ti soro asioni ye pëpe.​—aPhilippien 1:10.

¹⁹ Tombango peko ti aye ti mitele alingbi ti vuko lê ti e, na ziango kete ngoi wala ngoi oko pëpe teti aye ti yingo. Tongana nyen e lingbi ti bâ tele ti e mveni na e kpe ti tene mara ti salango ye tongaso agbu e na gbanda? A lingbi e bâ na yâ sambela tongana nyen nga juska na ndo wa e lingbi ti sala si fini ti e aduti na aye mingi pëpe. Gbia Salomon ti Israël ti giriri atene: “Zo ti kusala alango nzoni tongana lo te kobe kete wala lo te mingi; me ye mingi ti zo ti mosoro agbanzi lango na lê ti lo.” (Zo-ti-fa-tene 5:11). Bango lege ti asenge ye ti mitele so e yeke na ni amû ngoi nga na ngangu ti e mingi? Tongana e yeke na akungba mingi, akusala so andu bango lege ni nga na batango ni si sioni awara ni pëpe aga nga kota. A lingbi ti duti ande nzoni teti e ti sala si fini ti e aduti na aye mingi pëpe tongana e lungula ambeni ye so e yeke na ni?

Na yâ aye kue, i fa so i yeke ndulu

²⁰ Ngoi ahunzi lani teti sese ti ngoi ti Noé, na a yeke hunzi ande nga teti aye ti sese ti laso. Bazengele Pierre adë bê ti e: “Fade lâ ti Seigneur aga tongana wanzi; na lâ ni so, fade ayayu ahon na toto ti ngangu mingi, fade asungoye afuti ngbanga ti wâ so ayeke ngangu mingi, na fade wâ agbi sese na kusala ni kue so ayeke na yâ ni.” Ayayu na lege ti fä (asioni ngorogbia), wala sese na lege ti fä (azo so ague yongoro na Nzapa), ayeke sö ande kuâ pëpe na yâ wâ ti ngonzo ti Nzapa. Na fango tongana nyen e lingbi ti fa so e yeke ndulu teti lâ ni so, Pierre atene na kongo: “Teti fade ye so kue a futi tongaso, a lingbi i ga azo so ayeke nzoni-kue, na azo so abata tënë ti Nzapa! I ku singo ti lâ ti Nzapa.”​—2 Pierre 3:10-12.

²¹ Guengo lakue na abungbi ti aChrétien nga na fango nzo tënë ti e ayeke na popo ti akusala ti azo so abata tënë ti Nzapa. Zia e sala ni na mungo tele ti e na bê kue na Nzapa na ngoi so e yeke ku kungo kota lâ ti Jéhovah. Zia e “sala na bê ti [e] kue si Lo lingbi wara [e] na yâ siriri, me na sioye wala ye ti kirikiri pëpe.”​—2 Pierre 3:14.

Mo dabe mo na ni?

• Ngbanga ti nyen a lingbi e fa so e yeke ndulu teti lâ ti Jéhovah?

• Tongana asenge kusala ti lâ oko oko aga awe ye so amû ngoi ti e kue, a lingbi e sala nyen?

• Ye nyen ayeke mû ande maboko na e ti tene lango asala e pëpe na lege ti yingo?

• A lingbi e kpe asalango ye wa so alingbi ti buba nzoni ti e, na tongana nyen?

[Ahundango tënë ti manda na ye]

1. Ngbanga ti nyen a lingbi e bi lê na ndo lâ ti Jéhovah?

2, 3. Ngbanga ti nyen a yeke kota ye ti tene e leke tele ti e teti lâ ti Jéhovah?

4. Bango ndo wa azo ti ngoi ti Noé ayeke lani na ni?

5. Bango ndo wa azo ti Sodome ayeke lani na ni?

6. A lingbi e kpe bango ndo wa?

7. A lingbi e hunda kota tënë wa kozoni ti londo ti sala mbeni ye, na ngbanga ti nyen?

8. Tongana asenge ye ti lâ oko oko aga awe akota ye so agbu bê ti e, a lingbi e sala nyen?

9. A lingbi na tënë ti Apocalypse 16:14-16, ngbanga ti nyen a yeke kota ye ti kpe ti lango na lege ti yingo?

10. Ngbanga ti nyen dikongo Bible lâ oko oko amû maboko ti tene lê ti e angbâ na zingo ni na lege ti yingo?

11. Ngbanga ti nyen mandango Bible e mveni ayeke kota ye ti tene zo alango pëpe na lege ti yingo?

12. Tongana nyen abungbi na akota bungbi ti aChrétien amû maboko na e ti tiri na lango na lege ti yingo?

13. Tongana nyen kusala ti Chrétien amû maboko na e ti lango pëpe na lege ti yingo?

14. Tongana ti so a fa pekoni na Luc 21:34-36, asalango ye wa Jésus agboto mê na ndo ni?

15. Ngbanga ti nyen a lingbi e kpe tengo kobe na nyongo sämba ahon ndo ni?

16. Tongana nyen e lingbi ti kpe ti tene agingo bê na ndo sewa ti e ane e ngangu?

17. Tongana nyen tombango peko ti aye ti mitele alingbi ti ga na gingo bê?

18. Ti kpe ti tene tombango peko ti aye ti mitele amene e, a lingbi e gi ti lë ngangu wa?

19. Tongana e bâ so e yeke na ngoi mingi pëpe teti aye ti yingo, a lingbi e sala nyen?

20, 21. (a) Dengo bê wa bazengele Pierre amû na e na ndo lâ ti Jéhovah? (b) Akusala wa a lingbi e ngbâ ti sala na ngoi so e yeke fa so e yeke ndulu teti lâ ti Jéhovah?

[Afoto na lembeti 20, 21]

Azo ti ngoi ti Noé abâ pëpe ngbanga so aga ndulu lani, mo nga?

[Foto na lembeti 23]

Mo lingbi ti zi ambeni ye na yâ fini ti mo ti wara ngoi mingi teti aye ti yingo?