A bâ ala lingbi na Royaume ti Nzapa

“Ye so ayeke fä ti fango ngbanga mbilimbili ti Nzapa, so asara si i lingbi na royaume ti Nzapa.”​—2 ATHESSALONICIEN 1:5.

1, 2. Ye wa Nzapa aleke na bê ti lo na ndo ti tënë ti fango ngbanga? Zo wa la ayeke fâ ande ngbanga ni?

NA NGU 50 tongaso, bazengele Paul ayeke lani na kodoro ti Athènes. Teti so bê ti lo aso ndali ti vorongo yanda so amû ndo kue na yâ ti kodoro ni, ye so apusu lo ti mû mbeni kpengba diskur na kode. Na hunzingo ti diskur ni, lo sara mbeni tënë so agbu bê ti azo so ayeke mä lo, so ayeke apaïen. Lo tene: “Fadeso [Nzapa akomande] azo kue na ndo kue ti changé bê ti ala; teti Lo diko lâ ni so fade Lo fâ ngbanga ti sese so mbilimbili na lege ti Zo so Lo iri Lo na gigi; Lo sara si azo kue alingbi hinga tënë so ayeke biani teti Lo yä Lo na popo ti awakinda.”​—Kusala 17:30, 31.

² A yeke kota ye mingi ti gbu li na ndo ti tënë so atene Nzapa aleke mbeni lango so fade lo yeke fâ ande ngbanga na ndo ti azo. Na yâ ti diskur so Paul asara na kodoro ti Athènes, lo fa pëpe iri ti zo so ayeke fâ ande ngbanga ni; me e hinga so zo ni ayeke Jésus Christ so a zingo lo na kuâ. Ngbanga so Jésus ayeke fâ ande ayeke sara si zo angbâ na fini wala lo kui.

3. Ngbanga ti nyen Jéhovah ate lani mbele na Abraham? Azo wa la ayeke sara kota kusala na yâ ti gango tâ tënë ti mbele so?

³ Lango ti fango ngbanga so ayeke ninga ande ngu 1 000. Jésus so ayeke gbia ti Royaume ti Nzapa ayeke mû ande li ni ti fâ ngbanga na iri ti Jéhovah, me lo yeke sara ande ni gi lo oko pëpe. Jéhovah asoro ambeni zo na popo ti azo ti sese ti komande legeoko na Jésus nga ti fâ ngbanga na yâ ti ngu saki oko so. (Bâ Luc 22:29, 30.) A sara angu 4 000 tongaso awe so Jéhovah afa tënë ti mbeni ye so andu lango ti fango ngbanga na ngoi so lo te lani mbele na wakua ti lo Abraham so ayeke be-ta-zo. (Diko Genèse 2:17, 18.) A yeke polele so a to nda ti sara kusala na mbele so na ngu 1943 kozo ti Christ. Ti tâ tënë ni, Abraham ahinga lani kue pëpe ye so mbele so ayeke sara ande ndali ti azo. Ye oko, ti e laso e bâ so na lege ti atënë ti yâ ti mbele so Nzapa ate na Abraham, azo so ayeke ahale ti Abraham ayeke sara kota kusala mingi na yâ ti gango tâ tënë ti ye so Nzapa aleke na bê ti lo na ndo ti tënë ti fango ngbanga.

4, 5. (a) Kozo mbage ti hale ti Abraham ayeke zo wa? Ye wa lo tene na ndo ti tënë ti Royaume? (b) Lawa la a zi lege na azo ti duti na beku ti komande na yâ ti Royaume?

⁴ Kozo mbage ti hale ti Abraham ayeke Jésus, so a sa yingo vulu na ndo ti lo na ngu 29, na tongaso lo ga Messie ti Zendo ni, wala Christ (aGalate 3:16). Na peko ti ye so, Jésus amû ngu ota na ndambo ti fa nzo tënë ti Royaume ti Nzapa na aJuif. Na pekoni so a gbu Jean Baptiste, Jésus afa so ambeni zo ayeke na beku ti komande legeoko na lo na yâ ti Royaume so tongana lo tene: “A komanse na lâ ti Jean-Baptiste juska fadeso, azo agbu royaume ti yayu na ngangu, na azo ti ngangu aye ti lï dä na ngangu.”​—Matthieu 11:12.

⁵ Bâ so ngoi kete kozoni ti tene Jésus asara tënë ti azo so ayeke ‘gbu’ Royaume ti yayu “na ngangu”, lo tene: “Biani, Mbi tene na i, na popo ti ala so awali adü ala, mbeni zo so ayeke kota ahon Jean-Baptiste ayeke pëpe; me zo so ayeke kete kete na royaume ti yayu ayeke kota ahon lo.” (Matthieu 11:11). Ngbanga ti nyen Jésus atene tënë so? Ngbanga ti so kozoni ti tene a sa yingo na ndo ti azo na Pentecôte ti ngu 33, ade a zi lege pëpe na azo so ayeke be-ta-zo ti duti na beku ti komande na yâ ti Royaume ti Nzapa. Ti si na ngoi ni so, andâ Jean Baptiste akui ti lo awe.​—Kusala 2:1-4.

A diko azo so ayeke hale ti Abraham azo ti mbilimbili

6, 7. (a) Na lege wa hale ti Abraham ayeke ga “tongana atongoro ti yayu”? (b) Ye ti nzoni wa Abraham awara lani? Legeoko tongana ti Abraham, hale ti lo awara ye ti nzoni wa?

⁶ A tene na Abraham so fade hale ti lo ayeke ga mingi mingi “tongana atongoro ti yayu” nga tongana mbutu so ayeke na tere ti kota ngu ti ingo (Genèse 13:16; 22:17). Ye so aye ti tene so na ngoi ti Abraham, zo oko alingbi pëpe ti hinga wungo ti azo so ayeke ga ande hale ni. Ye oko, na pekoni, a fa tâ wungo ti azo so ayeke hale ti Abraham na lege ti yingo. Na tere ti Jésus, a yeke wara nga azo 144 000.​—Apocalypse 7:4; 14:1.

⁷ Mbeti ti Nzapa asara tënë ti mabe ti Abraham, atene: “[Abraham amä] na bê na L’Eternel, na Lo diko so na lo tongana mbilimbili.” (Genèse 15:5, 6). Ti tâ tënë ni, mbeni zo ti sara ye kue tâ gi mbilimbili ayeke dä pëpe (Jacques 3:2). Ye oko, teti so Abraham ayeke na mbeni kpengba mabe, Jéhovah asara ye na mbage ti lo mo bâ mo tene lo yeke zo ti mbilimbili, na Nzapa atene même so Abraham ayeke kamarade ti lo (Esaïe 41:8). A diko nga azo so ayeke komande ande na tere ti Jésus azo ti mbilimbili. Ala na Jésus kue ayeke hale ti Abraham. Ye so asara si ala wara aye ti nzoni mingi ahon ti so Abraham awara lani.

8. Lege azi na hale ti Abraham ti wara aye ti nzoni wa?

⁸ A diko aChrétien so a sa yingo na ndo ti ala azo ti mbilimbili ndali ti so ala yeke na mabe na fini ti Jésus so lo mû na sandaga ti zi e (aRomain 3:24, 28). Na lê ti Jéhovah, a zi ngbanga ti siokpari na li ti ala awe na tongaso a lingbi ti sa yingo vulu na ndo ti ala ti tene ala ga amolenge ti Nzapa na lege ti yingo, so ti tene aita ti Jésus Christ (Jean 1:12, 13). Ala lï na yâ ti fini mbele na ala ga mbeni fini mara, “Israël ti Nzapa”. (aGalate 6:16; Luc 22:20). Ye so aye ti fa so a ne ala mingi. Ye ti peko ti ye so Nzapa asara ndali ti aChrétien so a sa yingo na ndo ti ala ayeke so aChrétien so ayeke na beku pëpe ti wara fini ti lakue lakue na sese. Kota ngia so ala yeke na ni ti fâ ngbanga legeoko na Jésus na lango ti fango ngbanga nga ti komande legeoko na lo na yayu asara si ala yeda ti zia lege ti duti na beku ti wara fini ti lakue lakue na sese ge.​—Diko aRomain 8:17.

9, 10. (a) Lawa si a to nda ti sa yingo vulu na ndo ti aChrétien? Ye wa ayeke ku ala? (b) A mû maboko na aChrétien so a sa yingo na ndo ti ala na lege wa?

⁹ Na Pentecôte ti ngu 33, lege azi na mbeni bungbi ti azo so ayeke be-ta-zo ti duti na popo ti azo so ayeke komande legeoko na Jésus na ngoi ti lango ti fango ngbanga. Adisciple ti Jésus 120 tongaso awara lani batême ti yingo vulu na ala ga akozo Chrétien so a sa yingo na ndo ti ala. Ye oko, so ayeke gi kozo ti aye so ayeke mû lege na aChrétien so ti wara fini na yayu. Ngbene ye na ngoi ni so, a lingbi ala fa so ala duti be-ta-zo na Jéhovah atâa atara kue so Satan ayeke ga na ni na ndo ti ala. A lingbi ala duti be-ta-zo juska na kuâ tongana ala ye ti wara couronne ti fini na yayu.​—Apocalypse 2:10.

¹⁰ Tongaso, na lege ti Bible nga na lege ti kongregation ti aChrétien, Jéhovah ayeke mû na aChrétien so a sa yingo na ndo ti ala wango so ala yeke na bezoin ni nga lo yeke kpengba ala. Na tapande, bazengele Paul atene na aChrétien ti Thessalonique so a sa yingo na ndo ti ala, lo tene: “Legeoko tongana babâ asara na amolenge ti lo mveni, e wa i, e lungula vundu ti i, e sara tënë ti témoin na i, tongaso i lingbi tambela na lege so alingbi na Nzapa, Lo so airi i na yâ royaume na gloire ti Lo mveni.”​—1 aThessalonicien 2:11, 12.

11. Mbeti wa Jéhovah asara si a sû ni ndali ti “Israël ti Nzapa”?

¹¹ Ngu 60 tongaso na pekoni so a soro akozo membre ti kongregation ti aChrétien so a sa yingo na ndo ti ala, Jéhovah abâ so a yeke nzoni a sû na mbeti tënë ti kusala so Jésus asara na sese. Lo bâ nga so a yeke nzoni ti sû na mbeti lege so Jésus asara ye na mbage ti aChrétien so a sa yingo na ndo ti ala nga na wango so lo mû na ala. Ni la Jéhovah azia mbage ti Mbeti ti Nzapa so aChrétien asû na yanga ti Grec na ndo ti mbage so a sû kozoni awe na yanga ti Hébreu. A sigigi na mbage ti Mbeti ti Nzapa so a sû na yanga ti Hébreu kozoni kue ndali ti mara ti Israël na lege ti mitele, na ngoi so gi ala oko si ayeke na mbeni nzoni songo na Nzapa. A sigigi na mbage ti Mbeti ti Nzapa so aChrétien asû na yanga ti Grec kozoni kue ndali ti “Israël ti Nzapa”, so ti tene aita ti Christ so a sa yingo na ndo ti ala na so ayeke amolenge ti Nzapa na lege ti yingo. Ye so aye pëpe ti tene so gi aJuif la alingbi ti wara aye ti nzoni mingi na lege ti mandango mbage ti Mbeti ti Nzapa so a sû na yanga ti Hébreu. Legeoko nga, aChrétien so a sa yingo na ndo ti ala pëpe ayeke wara aye ti nzoni mingi na lege ti mandango mbage ti Mbeti ti Nzapa so aChrétien asû na yanga ti Grec nga na lege ti sarango ye alingbi na awango so ayeke na yâ ni.​—Diko 2 Timothée 3:15-17.

12. Paul adabe ti aChrétien so a sa yingo na ndo ti ala na ndo ti nyen?

¹² A diko akozo Chrétien azo ti mbilimbili nga a sa yingo na ndo ti ala ti mû lege na ala ti wara fini ti lakue lakue na yayu. Ye so aye pëpe ti tene so ambeni Chrétien so a sa yingo na ndo ti ala ato nda ti komande na ndo ti amba ti ala so a sa yingo na ndo ti ala na ngoi so ala kue angbâ na sese ge. A yeke polele so ambeni ti akozo Chrétien agirisa tënë so, na ala to nda ti gi ti wara kota ndo na popo ti aita ti ala na yâ ti kongregation. Ye so apusu Paul ti tene na ala, lo tene: ‘Fadeso i wara ye alingbi na i awe! fadeso i wara mosoro awe! I [ga agbia awe si e ngbâ ti e asenge zo?, Fini Mbuki, 2001] Na mbi ye i komande biani, tongaso e lingbi komande legeoko na i nga.’(1 aCorinthien 4:8). Tongaso, Paul adabe ti aChrétien ti ngoi ti lo so a sa yingo na ndo ti ala, lo tene: “E komande mabe ti i pëpe, . . . me e yeke azo so asara na tere ti i si i wara ngia.”​—2 aCorinthien 1:24.

Sarango si wungo ti ala alingbi kue

13. Sorongo aChrétien so a sa yingo na ndo ti ala angbâ ti tambela tongana nyen ngbene ye na ngu 33?

¹³ A soro aChrétien 144 000 kue so a sa yingo na ndo ti ala gi na ngoi ti akozo Chrétien pëpe. A ngbâ ti soro ala na yâ ti ngoi kue so abazengele ayeke na fini; me na yâ ti angu mingi mingi so aga na pekoni, a soro azo gi oko oko. Ye oko, a ngbâ ti soro ala juska laso (Matthieu 28:20). Na pekoni so Jésus ato nda ti komande na ngu 1914, sorongo aChrétien so ague na li ni mingi.

14, 15. Ye wa asi na ngoi ti e na ndo ti tënë ti sorongo aChrétien so a sa yingo na ndo ti ala?

¹⁴ Kozoni kue, Jésus azi aye kue so ayeke gi ti kanga lege na komandema ti Nzapa na yayu (Diko Apocalypse 12:10, 12.) Na pekoni, lo to nda ti bâ lege ti bungbingo tanga ti aChrétien so ayeke na beku ti komande ande na yâ ti Royaume ni ti sara si wungo ti azo 144 000 kue alingbi. Na ngu 1935 tongaso, sorongo aChrétien so aga nduru ti hunzi, na mingi ti azo so aga aChrétien na ngoi ni so ayeke pëpe na nzara ti gue na yayu. Yingo ti Nzapa atene na ala pëpe so ala yeke amolenge ti Nzapa. (Bâ aRomain 8:16.) Me, ala hinga so ala yeke ti “ambeni ngasangbaga”, so ayeke na beku ti wara fini ti lakue lakue na yâ ti paradis na ndo ti sese (Jean 10:16). Ni la, na peko ti ngu 1935, kusala ti fango tënë so a yeke sara ni ayeke ti bungbi “azo mingi so asi singo,” so bazengele Jean abâ ala na yâ ti ye so lo bâ tongana suma. Na ala yeke sö ande kuâ na ngoi ti “kota ye ti vundu”.​—Apocalypse 7:9, 10, 14.

¹⁵ Ye oko, ngbene ye na ngu 1935 tongaso ti ga na ni, a yeke soro ambeni zo oko oko ti duti na beku ti gue na yayu. Ndali ti nyen? Ndali ti so a lingbi ti si so ambeni Chrétien so a soro ala kozoni lani ti gue na yayu aduti be-ta-zo mbeni pëpe. (Bâ Apocalypse 3:16.) Paul même asara tënë ti ambeni Chrétien so lo hinga ala, so azia lege ti tâ tënë (aPhilippien 3:17-19). Azo wa la Jéhovah ayeke soro ala ti mû place ti aChrétien so? Biani, so ayeke desizion ti Jéhovah. Ye oko, na ngoi so Jésus azia gere ti kozo Matanga ti Dango Bê na kuâ ti lo, lo mû zendo ti komande legeoko na lo na yayu na adisciple ti lo so afa kozoni awe so ala yeke be-ta-zo. Legeoko nga, a lingbi ti tene so Jéhovah ayeke soro gi azo so afa kozoni awe so ala yeke be-ta-zo, me lo yeke soro pëpe azo so aga aChrétien fini fini.a​—Luc 22:28.

16. Na ndo ti aChrétien so a sa yingo na ndo ti ala, e yeke na ngia ndali ti ye wa? Aye wa e hinga na bê ti e kue?

¹⁶ Ye oko, a lingbi ti tene so a yeke pëpe aChrétien kue so a soro ala ti duti na beku ti gue na yayu ngbene ye na ngu 1935 tongaso la ayeke mû place ti aChrétien so angbâ be-ta-zo pëpe. Jéhovah asara kue si aChrétien so a sa yingo na ndo ti ala aduti na popo ti e na lâ ti nda ni so juska a futi “Kota Babylone”.b (Apocalypse 17:5). Nga, e hinga na bê ti e kue so wungo ti azo 144 000 kue ayeke lingbi na ngoi so Jéhovah adiko. E hinga nga na bê ti e kue so na pekoni ala kue ayeke komande na yâ ti Royaume ni. E hinga biani so tënë ti prophétie so afa so fade bungbi ti azo mingi so asi singo, so wungo ti ala angbâ lakue ti gue na li ni, ayeke ngbâ ti fa so ala yeke be-ta-zo na Nzapa. Na yâ ti kete ngoi, fade bungbi ti azo so ayeke ‘sigigi na yâ ti kota ye ti vundu’ so ayeke tï ande na ndo ti azo ti sioni so amû peko ti Satan, nga na ngia, ala yeke duti na yâ ti fini sese ti Nzapa.

Wungo ti agbia ti yayu aga nduru ti lingbi kâ awe!

17. Ti gue oko na 1 aThessalonicien 4:15-17 nga na Apocalypse 6:9-11, ye wa asi na aChrétien so a sa yingo na ndo ti ala, so aduti be-ta-zo juska na kuâ?

¹⁷ Ngbene ye na ngu 33, aChrétien saki mingi mingi so a sa yingo na ndo ti ala afa so ala yeke na kpengba mabe nga ala gbu ngangu juska na kuâ. A bâ so aChrétien so alingbi ti wara Royaume ti Nzapa; na a yeke polele so ala gue na yayu awe ngbene ye na ngoi so Christ asi lani ade ti ninga pëpe.​—Diko 1 aThessalonicien 4:15-17; Apocalypse 6:9-11.

18. (a) A-Chrétien so a sa yingo na ndo ti ala so angbâ na sese ahinga nyen na bê ti ala kue? (b) Ambeni ngasangbaga ayeke bâ aChrétien so a sa yingo na ndo ti ala tongana nyen?

¹⁸ A-Chrétien so a sa yingo na ndo ti ala so angbâ na sese ahinga na bê ti ala kue so tongana ala ngbâ be-ta-zo, a yeke futa ande ala na yâ ti kete ngoi. Na ngoi so azo kutu mingi ti ambeni ngasangbaga ayeke bâ ye so aChrétien so a sa yingo na ndo ti ala ayeke sara ti fa so ala yeke na mabe, ala yeke yeda na tënë so bazengele Paul atene na ndo ti aita ti lo so a sa yingo na ndo ti ala na kodoro ti Thessalonique. Bazengele Paul atene: “E mveni ayä iri ti i na popo ti a-eglize ti Nzapa teti bê ti i so azia pëpe na teti mabe ti i na yâ ye ti ngangu ti i kue na yâ pono so ayeke sara i; ye so ayeke fä ti fango ngbanga mbilimbili ti Nzapa, so asara si i lingbi na royaume ti Nzapa, so i wu pono ngbanga ni.” (2 aThessalonicien 1:3-5). Na ngoi so ndangba Chrétien so a sa yingo na ndo ti lo ayeke kui, atâa na ngoi wa la lo yeke kui ande, wungo ti agbia so ayeke duti na yâ ti ngorogbia ti yayu ayeke lingbi ande kue. Ye so ayeke ga ande na kota ngia mingi, na yayu nga na sese!

[Akete tënë na gbe ni]

Mo lingbi ti fa nda ni?

• Ye wa so Nzapa afa tënë ni na Abraham andu lango ti fango ngbanga?

• Ngbanga ti nyen a diko Abraham zo ti mbilimbili?

• Teti so a diko azo so ayeke hale ti Abraham azo ti mbilimbili ayeke sara si ala wara nyen?

• A-Chrétien kue ahinga nyen na bê ti ala kue?

[Foto na lembeti 24]

Jésus awa adisciple ti lo ti sara ngangu ti lï na yâ ti Royaume

[Foto na lembeti 25]

Na Pentecôte ti ngu 33, Jéhovah ato nda ti soro azo so ayeke use mbage ti hale ti Abraham

[Foto na lembeti 26]

Ambeni ngasangbaga ayeke kiri singila ndali ti so aChrétien so a sa yingo na ndo ti ala ayeke na popo ti ala na lâ ti nda ni so