Atënë so azo ahunda
Nzapa ayeke se azo na lege ti akpale tongana kota pupu so ayeke buba aye?
Nzapa ayeke se azo pëpe na lege ti akpale tongana kota pupu, yengingo ti sese nga na ngu so apika mingi si abuba aye. Lo de ti sara lâ oko tongaso pëpe, na lo yeke sara ande ni pëpe. Ngbanga ti nyen? Ngbanga ti so Bible afa na 1 Jean 4:8 so “Nzapa ayeke Ndoye.”
Ndoye ayeke na gunda ti aye kue so Nzapa ayeke sara. Ndoye ayeke sara si zo awara sioni pëpe, ndali ti so Bible atene so “ndoye asara sioni pëpe na zo so ayeke nduru na lo”. (aRomain 13:10). Bible atene na Job 34:12 atene: “Biani, fade Nzapa asara sioni pëpe.”
A yeke tâ tënë so Bible afa kozoni awe tënë ti akpale so ayeke si na ngoi ti e laso, akpale tongana ‘sese so ayengi mingi’. (Luc 21:11). Na tapande, mbeni zo ti météo ayeke fa kozoni awe tënë ti mbeni kota pupu ti ngu so ayeke ga. Me tongana kota pupu so aga na abuba aye, a yeke faute ti zo ti météo ni? Legeoko nga, Jéhovah ayeke pëpe na gunda ti bubango ti aye so ayeke bâ gigi na peko ti akpale tongaso. Me tongana Nzapa la ayeke pëpe na peko ti apasi so akpale so aga na ni, nyen la ayeke na gunda ni nyen?
Bible afa polele so “sese so kue ayeke na tïtî wato-sioni”, Satan Zabolo (1 Jean 5:19). Lo yeke zo ti fango zo ngbene ye na ngoi so azo ake yanga na yaka ti Eden juska laso (Jean 8:44). Satan abâ fini ti azo tongana mbeni mbumbuse ye. Satan ayeke sara ye na lege ti kion, ni la a yeke ye ti dongo bê pëpe so lo sigigi na mbeni lege ti sarango ye so ayeke pusu mingi ti azo ti sara ye na kion. Mingi ti azo laso abâ so a yeke sioni pëpe ti tene azo awara go na ndo ti amba ti ala; ye so asara même si azo so mbeni ye ti bata ala ayeke dä pëpe ayeke lango na ando so akpale tongana yengingo ti sese ayeke si ka dä (aEphésien 2:2; 1 Jean 2:16). Tongaso, azo so ayeke sara ye na kion ayeke biani na gunda ti ambeni kpale so ayeke si na azo (Zo-ti-fa-tene 8:9). Na lege wa?
Azo ayeke na gunda ti mingi ti akpale so ayeke si na azo. Na tapande, bâ angangu kpale so azo ti gbata ti Nouvelle-Orléans so ayeke na Amerika awara na peko ti kota pupu ti ngu so asi lani. Wala bâ akota kpale so asi na azo ti Venezuela so ngu-nzapa apika dä mingi, asara si tere ti ahoto awoko akungbi na ndo ti azo nga na aye. Na yâ ti akota kpale so nga na ambeni tongaso, aye tongana pupu na ngu-nzapa aga na angangu kpale na azo. Mingi ni a yeke ndali ti so azo ayeke bi bê ti ala pëpe na bubango ti aye so angoro ala, ala yeke leke ada nzoni pëpe nga ala yeke leke ye nzoni pëpe ti mû maboko na azo ti sigigi na yâ ti akpale. Na ndo ni, azo ayeke sara ye pëpe alingbi na agbotongo mê so a mû na ala nga azo ti komande ayeke leke aye nzoni pëpe ti bâ lege ti azo.
Bâ mbeni kpale so asi ândö na ngoi ti sungo Bible. Na ngoi ti Jésus, gi hio tongaso, mbeni tour akungbi na afâ azo 18 (Luc 13:4). Peut-être a yeke azo la ayeke na gunda ti kpale so asi wala “lâ na pasa asi na ala”, wala a yeke ni use kue; me biani a yeke Nzapa pëpe si ayeke na gunda ti kpale so.—Zo-ti-fa-tene 9:11.
Nzapa asara lâ oko pëpe si mbeni kpale tongaso asi? Lo sara tongaso awe. Me ti Jéhovah, na ngoi so lo sara ni, lo yeke futi gi azo ti sioni, lo sara ni ndali ti mbeni raison na a yeke si ka mingi pëpe. Ambeni tapande ni use ayeke ti Kota Moa so asi na ngoi ti Noé nga na futingo ti gbata ti Sodome na ti Gomorrhe na ngoi ti Lot (Genèse 6:7-9, 13; 18:20-32; 19:24). Na yâ ti angoi ti fango ngbanga ti Nzapa so, lo futi gi azo ti sioni so ake ti changé bê ti ala me lo bata azo so asara ye so ayeke mbilimbili na lê ti lo.
Biani, Jéhovah Nzapa ayeke na kode, lo yeke na ngangu nga lo yeke na nzara ti sara si apasi kue ahunzi na ti zi aye ti sioni kue so azo ayeke wara na peko ti akpale tongana yengingo ti sese. Psaume 72:12 afa kozoni awe na ndo ti Jésus Christ so Nzapa asoro lo ti duti Gbia, atene: “Fade Lo sö zo so ye amanke lo mingi tongana lo toto na Lo, na Lo sö zo ti vundu so ayeke na zo oko pëpe ti sara na lo.”