Aye ti ngangu so asi na azo afa so Nzapa ayeke sioni?

TËNË SO AMBENI ZO ATENE: “Nzapa la akomande dunia so, tongaso lo la lo sara si aye ti ngangu asi. Ni la, lo yeke sioni.”

YE SO BIBLE ATENE: “Dunia so kue ayeke na gbe ti Zo ti sioni.” (1 Jean 5:19). “Zo ti sioni” ni so ayeke zo wa? Bible afa so ayeke Satan (Matthieu 13:19; Marc 4:15). Mvene la? Bâ ye so si: Tongana Satan la akomande dunia so, andâ lo yeke pusu azo ti gi gi ye ti ala wani, ti sara ye na ti bâ ye ti pekoni ape, tâ gi tongana lo. Ye so afa ndani so zo ayeke bata sese ti lo nzoni ape. Ni la ape? Awandara mingi atene so batango sese ni nzoni ape ayeke na gunda ti aye ti ngangu so ayeke si laso. Ala tene zo la ayeke na gunda ti aye tongana yengingo ti sese, ti sukungo ti ngu, wala zo la asara si aye ni akiri aga tâ ngangu, wala asara si azo ayeke bâ pasi mingi ndali ni.

Tongaso, ngbanga ti nyen Nzapa azia si Satan ayeke na gbâ ti komandema tongaso? Ye ni akomanse na tongo nda ti mbaï ti azo, na ngoi so Adam na Ève ake ti tene Nzapa aduti Gbia ti ala. Mingi ti azo amû peko ti ala juska laso. So ala soro ti ke komandema ti Nzapa, dunia kue aga na gbe ti Satan, wato ti Nzapa. Ndani la si Jésus airi Satan, “mokonzi ti dunia so”. (Jean 14:30). Fade Satan ayeke komande kpu na kpu? Oko ape!

Apasi kue so Satan aga na ni na ndo ti e, Jéhovaha ayeke bâ gi ni tongaso na lê ti lo ape. Ti tâ tënë ni, mawa ti azo asara lo mingi. Na tapande, na ngoi so azo ti Israël ayeke bâ lani pasi, Bible atene tënë so na ndo ti Nzapa, a tene: “Na yâ pono kue ti ala, Lo wu pono nga.” (Ésaïe 63:9). Merci so Nzapa aleke ti tene a futi sioni komandema ti Satan so! Lo soro Molenge ti lo, Jésus Christ, ti duti Gbia so ayeke mbilimbili, na lo yeke komande lakue lakue.

TËNË NI ABÂ NGA MO: So komandema ti Satan alingbi pëpe ti kanga lege na aye ti ngangu ti si, komandema ti Jésus ayeke kanga ti lo lege na ni. Mbeni lâ, Jésus akanga lege na mbeni kota pupu so aye ti sara sioni na adisciple ti lo. Bible afa pekoni, a tene: “Lo suku na pupu ni na lo tene na kota ngu ni: ‘Kaï! Duti kpô!’ Na pupu ni akaï na ndo adë ngii.” Adisciple ti lo atene: “So zo wa la tongaso, so même pupu na kota ngu kue amä yanga ti lo so?” (Marc 4:37-41). Ye so asi so afa na e polele so na gbe ti komandema ti Jésus ande, lo yeke bata azo kue so amä yanga ti lo si aye ti ngangu tongaso asi na ala pëpe.​—Daniel 7:13, 14.