A yeke ‘Nzapa la asara si a maï’!

“Zo so alu ayeke ye pëpe, na zo so azia ngu dä ayeke ye nga pëpe; a yeke Nzapa so asara si a maï.”​—1 ACOR. 3:7.

1. Na lege wa e yeke “afon Nzapa na kusala”?

“E YEKE afon Nzapa na kusala.” So ayeke tënë so bazengele Paul atene ti fa kota pasa so e kue e lingbi ti wara ni. (Diko 1 aCorinthien 3:5-9.) Kua so Paul asara tënë ni ge ayeke kua ti sarango si azo aga adisciple. Lo haka ni na lungo le-kobe nga na ziango ngu na ndo ni. Tongana e ye ti sara kpengba kua so nzoni, a lingbi Jéhovah amû maboko na e. Paul adabe ti e so a yeke ‘Nzapa la asara si a yeke maï.’

2. Ngbanga ti nyen ti hinga so ‘Nzapa la asara si ye amaï’ ayeke mû maboko na e ti duti na nzoni bango ndo na ndo ti fango tënë?

² Ti hinga so Nzapa la ayeke sara si ye amaï amû lege na e ti duti na tâ be-ti-molenge, na a yeke mû maboko na e ti duti na nzoni bango ndo na ndo ti kua ti fango tënë. E lingbi ti sara kue ti fa tënë na ti fa ye nzoni, me na nda ni, tongana mbeni zo aga disciple, gonda ni kue ayeke ti Jéhovah. Ndali ti nyen? Ndali ti so atâa ngangu kue so e sara, e lingbi pëpe ti hinga polele lege so mbeni zo ayeke gue na li ni ti ga disciple, na tongaso e yeke na ngangu pëpe na ndo ni. Gbia Salomon afa so tënë so ayeke tâ tënë tongana lo tene: “Mo hinga kusala ti Nzapa pëpe, Lo so asara ye kue.”​—Zo-ti. 11:5.

3. Na lege wa tâ lungo le-kobe aye ti gue oko na kua ti sarango si azo aga adisciple?

³ Teti so e lingbi pëpe ti hinga polele lege so mbeni zo ayeke gue na li ni, a yeke sara si bê ti e aso? Ên-ën. A yeke sara si e yeke ku kungo ti bâ tongana nyen zo ni ayeke maï. Gbia Salomon atene: “Na ndapre mo lu le-kobe ti mo, na lakui mo duti senge pëpe, teti mo hinga pëpe fade ye so aga nzoni, tongana a yeke so ge wala so kâ, wala ala use kue aga nzoni.” (Zo-ti. 11:6). Biani, tongana a ndu tënë ti tâ lungo le-kobe, e hinga pëpe ndo so le-kobe ni ayeke sigigi dä; e hinga pëpe wala a yeke sigigi wala a yeke sigigi pëpe. Aye ayeke mingi so e yeke na ngangu na ndo ni pëpe. A yeke nga oko ye so e lingbi ti tene na ndo ti kua ti sarango si azo aga adisciple. Jésus agboto lê na ndo ti tënë so na yâ ti atoli use so Marc asû na yâ ti chapitre 4 ti Évangile ti lo. Zia e bâ aye so e lingbi ti manda na lege ti atoli use so.

Amara ti sese nde nde

4, 5. Fa na nduru tënë toli ti Jésus na ndo ti zo ti lungo le-kobe.

⁴ Tongana ti so Marc 4:1-9 afa, Jésus asara tënë ti mbeni zo so atuku ale-kobe na yâ ti yaka na ale-kobe ni atï na ndo ti amara ti sese nde nde. “I mä! Bâ, mbeni zo ti lu le-kobe ague ti lu. Tongana lo yeke lu lê ni, mbeni atï na tere ti lege, na andeke aga ate lê ni so. Mbeni atï na ndo ti tênë, na ndo so sese alï mingi pëpe, na ako fade fade teti sese alï mingi pëpe; na tongana lâ aga kota awe, a zö kobe so si a kpi teti gere ni ayeke pëpe. Mbeni atï na yâ kî, na kî aga kota, a kanga kobe ni si a lë pëpe. Mbeni atï na nzo sese, a ko na a ga kota, mbeni alë bale-ota, mbeni alë bale-omene, na mbeni alë ngbangbo oko.”

⁵ Na ngoi so a sû na Bible, mbeni zo ti lungo le-kobe ayeke zia ale-kobe ni na yâ ti bongo ti lo so lo leke ni tongana bozo, wala lo zia ale-kobe ni na yâ ti mbeni kungba. Na pekoni, lo yeke tuku ale-kobe ni tongana ti so a yeke bi ka na alê ti sindi. Tongaso na yâ ti tapande so, zo ti lungo le-kobe ni wani la aye fade ti tuku ale-kobe ni na ndo ti amara ti sese nde nde pëpe. Me a yeke ale-kobe ni la atï na ndo ti amara ti sese ni nde nde so.

6. Jésus afa nda ti toli ti zo ti lungo le-kobe so tongana nyen?

⁶ A yeke kota ye pëpe ti tene e gi bê ti e na ndo ti nda ti toli so. Na Marc 4:14-20, Jésus afa nda ni lo tene: “Zo ti lu le-kobe alu Tënë ni. Lê ni so ayeke na tere ti lege ayeke azo so ayeke na ndo ni so a lu Tënë ni dä; tongana ala mä, Satan aga fade fade, lo kamata tënë so a lu na bê ti ala awe. Lê ni so a lu na ndo ti tênë ayeke azo so amä Tënë, na ala kamata Tënë ni fade fade na tâ ngia; me gere ti ala mveni ayeke pëpe, na ala ngbâ lâ mingi pëpe; tongaso, tongana pono wala ye ti ngangu aga ngbanga ti Tënë ni, fade fade ala tï. Ambeni ayeke lê ni so a lu na yâ kî; ala yeke azo so amä Tënë ni, na kusala ti leke ye ti ala ti sese so, na handa ti mosoro, na nzara ti mbeni ye alï na yâ ni, na a kanga lege ti Tënë ni si a lë pëpe. Na lê ni so a lu na nzo sese ayeke azo so amä Tënë, na ala kamata Tënë ni, na ala lë, ambeni alë bale-ota, ambeni alë bale-omene, na ambeni alë ngbangbo oko.”

7. Le-kobe ni nga na amara ti sese nde nde aye ti sara tënë ti nyen?

⁷ Bâ so Jésus atene pëpe so ale-kobe so a lu ni ayeke nde nde. Me lo tene so gi mara ti oko le-kobe la atï na ndo ti amara ti sese nde nde, nga lege so le-kobe ni amaï na ndo ti sese oko oko ayeke nde nde. Kozo sese ni akpengba ndali ti so azo atambela na ndo ni mingi. Use sese ni alï mingi pëpe; akeke ti kî ahon ndo ti ota sese ni; osio sese ni ayeke pendere wala ayeke nzoni na alë le-kobe nzoni (Luc 8:8). Ka le-kobe ni ayeke nyen? A yeke tënë ti Royaume so ayeke na yâ ti Mbeti ti Nzapa (Mat. 13:19). Amara ti sese ni nde nde aye ti fa nyen? A ye ti fa azo, na ye so ayeke na bê ti azo ayeke nde nde.​—Diko Luc 8:12, 15.

8. (a) Zo ti lungo le-kobe ni aye ti sara tënë ti zo wa? (b) Ngbanga ti nyen aye ti peko ti akua ti e ti fango tënë ti Royaume ayeke nde nde?

⁸ Zo ti lungo le-kobe ni aye ti sara tënë ti zo wa? A ye ti sara tënë ti azo ti fango nzo tënë ti Royaume, so ayeke sara kua maboko na maboko na Nzapa. Tongana ti so Paul na Apollos asara, ala yeke lu le-kobe na ala yeke tuku ngu na ndo ni. Me atâa so ala yeke sara kua ngangu, ye ti peko ti akua ni ayeke nde nde. Ndali ti nyen? Ndali ti so ye so ayeke na bê ti azo so ayeke mä tënë so ala yeke fa ayeke nde nde. Na yâ ti toli ni, zo ti lungo le-kobe ni ayeke na mbeni ye oko pëpe ti sara na ndo ti maïngo ti le-kobe ni. Ye so ayeke ye ti dengo bê biani, mingi ni a yeke dë bê ti aita so teti angu mingi asara kua ngangu me ala yeke bâ ye ti pekoni mingi pëpe.a Ngbanga ti nyen a yeke ye ti dengo bê?

9. Tënë ti dengo bê wa bazengele Paul na Jésus agboto lê na ndo ni?

⁹ A yeke pëpe ye so zo ti lungo le-kobe ayeke wara na peko ti kua ti lo la ayeke fa so lo yeke be-ta-zo. A yeke ye so Paul aye lani ti fa tongana lo tene so fade zo oko oko ‘awara futa ti lo alingbi na kusala ti lo.’ (1 aCor. 3:8). Zo ayeke wara futa ti lo alingbi na ngangu kua so lo sara, me pëpe alingbi na ye ti peko ti kua ni. Legeoko nga, Jésus agboto lê na ndo ti tënë so na ngoi so adisciple ti lo akiri na pekoni so ala fa tënë na yâ ti akodoro nde nde. Adisciple ni ayeke na ngia mingi ngbanga ti so adémon amä yanga ti ala ndali ti so ala sara kua na iri ti Jésus. Atâa so ye so azia ngia mingi na bê ti ala, Jésus atene na ala lo tene: “I sara ngia pëpe teti ayingo sioni amä yanga ti i; me i sara ngia teti a sara iri ti i na mbeti na yayu.” (Luc 10:17-20). Atâa tongana mbeni wafango tënë abâ so lo mû maboko na azo mingi pëpe ti ga adisciple, ye so aye biani pëpe ti fa so lo yeke sara kua ngangu pëpe wala amba ti lo awafango tënë ayeke be-ta-zo ahon lo. Ye ti peko ti kua ti lo aluti mingi ni na ndo ti ye so ayeke na bê ti zo so amä tënë so lo yeke fa. Me na nda ni, a yeke Nzapa la ayeke sara si zo ni amaï.

Ye so a ku na mbage ti azo so amä tënë ni

10. Nyen la amû lege ti hinga wala mbeni zo so amä tënë ni ayeke duti ande mbeni nzoni sese wala mbeni sioni sese?

¹⁰ Ka ti azo so amä tënë ni, a yeke tongana nyen? Mbeni ye afa kozoni awe so ala yeke yeda ande na tënë ni wala ala yeke ke ni? Mbeni ye afa ni pëpe. Ti hinga wala azo ni ayeke duti ande tongana mbeni nzoni sese wala mbeni nzoni sese pëpe, a yeke desizion ti azo ni wani. Ti tâ tënë ni, ye so ayeke na bê ti mbeni zo alingbi ti changé si lo ga tongana mbeni nzoni sese wala mbeni sioni sese (aRom. 6:17). Na yâ ti toli ti Jésus, lo tene so na pekoni so “ala mä” tënë ni, Satan aga “fade fade” na lo mû tënë ni na bê ti ala lo hon na ni. Me a lingbi mara ti ye tongaso asi pëpe. Jacques 4:7 awa aChrétien ti “ke zabolo” na fade lo yeke kpe yongoro na tere ti ala. Jésus asara tënë ti ambeni zo so na tongo nda ni, ala yeda na tënë ni na ngia na bê. Me na pekoni, ala tï ndali ti so “gere ti ala mveni ayeke pëpe”. Me a mû wango na awakua ti Jéhovah ti “ga tongana keke so gere ni alï na sese, na [ti] kpengba dä” ti mû lege na ala ti gbu nda ti “ye so ayeke kota ti lê ni, yongo ni, yongo ni na nduzu, na yongo ni na gbe ti sese, na [ala] lingbi hinga ndoye ti Christ so ahon hingango ye kue”.​—aEph. 3:17-19; aCol. 2:6, 7.

11. Nyen la alingbi ti mû maboko na mbeni zo ti kpe ti tene agingo bê nga na mosoro akanga lege na tënë ni?

¹¹ Jésus asara tënë ti ambeni zo so amä tënë ni lo tene so “kusala ti leke ye ti ala ti sese so, na handa ti mosoro” amû ndo na yâ ti bê ti ala na akanga lege na tënë ni (1 Tim. 6:9, 10). Nyen la alingbi ti mû maboko na ala ti kpe mara ti ye tongaso? Bazengele Paul akiri tënë, lo tene: “I zia ndoye ti nginza asara i pëpe, a lingbi bê ti i aduti nzoni na ye so ayeke na i, teti Nzapa atene, Fade Mbi zia ti sara na mo pëpe, na Mbi zia mo lâ oko pëpe.”​—aHéb. 13:5.

12. Ngbanga ti nyen azo so ayeke tongana nzoni sese alë nde nde?

¹² Na nda ni, Jésus atene so ale-kobe so a lu na ndo ti nzoni sese “alë bale-ota, ambeni alë bale-omene, na ambeni alë ngbangbo oko.” Atâa so ye so ayeke na bê ti ambeni zo so ayeda na tënë ni ayeke nzoni na ala maï, ye so ala lingbi ti sara na fango nzo tënë ayeke nde nde alingbi na dutingo ti ala. Na tapande, tongana ngu ti mbeni zo ague na li ni mingi wala lo yeke na mbeni kobela so asara si lo yeke na ngangu mingi pëpe, a lingbi ti sara si lo fa tënë mingi pëpe. (Bâ Marc 12:43, 44.) Ge nga kue, wafango tënë ni ayeke na ngangu pëpe ti sara ye mingi na ndo ti maïngo ti zo ni, me lo yeke duti na ngia tongana lo bâ so Jéhovah asara si zo ni amaï.​—Diko Psaume 126:5, 6.

Zo ti lungo le-kobe so alango

13, 14. (a) Fa na nduru tënë toli ti Jésus na ndo ti koli so abi le-kobe na sese. (b) Zo ti lungo le-kobe ni aye ti sara tënë ti zo wa? Le-kobe ni ayeke nyen?

¹³ Na Marc 4:26-29, e wara mbeni toli ni so andu mbeni zo ti lungo le-kobe. Toli ni atene: “Royaume ti Nzapa ayeke tongana zo so aki le-kobe na sese; lo lango na bï na lo londo na [ndapre]; na lê ni ako na amaï, na lo hinga nda ti ye so pëpe. Sese alë kobe na bê ti lo mveni, kugbe asigigi kozoni, na pekoni keke ni asigigi, na nda ni le-kobe asi na tere ti keke ni. Me tongana le-kobe ni akpengba awe, fade fade lo to azo na zembe, teti ngoi ti fango le-kobe asi awe.”

¹⁴ Zo ti lungo le-kobe so ayeke zo wa? Ambeni Chrétien ti wataka atene so zo ni so ayeke Jésus. Me a yeke na lege ni ti tene so Jésus alango na lo hinga pëpe tongana nyen le-kobe ni ayeke maï? Kite ayeke dä pëpe so Jésus ahinga lege so le-kobe ni ayeke maï. Me zo ti lungo le-kobe so, legeoko tongana ti zo ti lungo le-kobe so e sara tënë ti lo fade awe, aye ti sara tënë ti wafango tënë ti Royaume oko oko, ala so ayeke fa tënë na bê ti ala kue. Le-kobe ni so a bi ni na sese ayeke tënë so ala yeke fa.b

15, 16. Na yâ ti toli ti Jésus, lo fa mbeni tâ tënë na ndo ti maïngo ti tâ le-kobe nga na maïngo ti zo na lege ti yingo. A yeke tâ tënë wa?

¹⁵ Jésus atene so zo ti lungo le-kobe ni ‘alango na bï na lo londo na ndapre’. Ye so aye pëpe ti tene so zo ti lungo le-kobe ni agirisa ti bâ lege ti ye so lo lu. A ye gi ti sara tënë ti ye so mingi ti azo ayeke sara ka. Atënë ti versê so ge aye ti sara tënë ti aye so azo ayeke sara lakue lakue: ala sara kua na kota lâ nga na bï ala lango. Jésus agboto lê na ndo ti ye so asi na angoi so zo ni alango awe. Jésus atene so “lê ni ako na amaï”. Na pekoni, lo kiri lo tene: “Lo hinga nda ti ye so pëpe.” Ye so Jésus agboto lê na ndo ni ayeke so le-kobe ni amaï “na bê ti lo mveni”.c

¹⁶ Jésus aye ti gboto lê na ndo ti nyen ge? Bâ so lo ye ti gboto lê na ndo ti sigingo ti le-kobe ni nga na lege so le-kobe ni ayeke maï yeke na yeke. ‘Sese alë kobe na bê ti lo mveni, kugbe ni asigigi kozoni, na pekoni keke ni asigigi, na nda ni le-kobe asi na tere ti keke ni.’ (Marc 4:28). Aye so kue amaï gi yeke na yeke nga na angoi ni. Zo alingbi pëpe ti forcé maïngo ni wala ti sara si a kono hio. A yeke oko ye so andu maïngo ti zo na lege ti yingo. Mbeni zo so ayeke na nzara ti voro tâ Nzapa ayeke gue na li ni yeke na yeke na ngoi so Jéhovah azia si tâ tënë ayeke maï na yâ ti bê ti lo.​—aHéb. 6:1.

17. Azo wa ayeke na ngia tongana tâ tënë amaï na yâ ti bê ti zo?

¹⁷ Na lege wa zo ti lungo le-kobe ayeke mû maboko ti ko le-kobe ni “fade fade” tongana “ngoi ti fango le-kobe asi awe”? Na ngoi so Jéhovah asara si tâ tënë ti Royaume amaï na yâ ti bê ti azo so aga adisciple, ndoye ti azo ni na mbage ti Nzapa ayeke pusu ala ti tene na nda ni ala mû tere ti ala na lo. Ala yeke fa ni na lege ti warango batême. Yeke na yeke, aita-koli so angbâ ti gue na li ni alingbi ti wara lege ti sara akua mingi na yâ ti kongregation. Kozo zo ti warango ye ti nzoni na lege ti maïngo ti disciple so ayeke wafango tënë so amanda Bible na lo. Me ambeni wafango tënë so ayeke pëpe na popo ti aita so amû maboko na zo ni ti ga disciple ayeke wara nga aye ti nzoni na pekoni. (Diko Jean 4:36-38.) Biani, ‘zo so alu le-kobe na zo so afâ ni alingbi ti duti na ngia legeoko.’

A fa nyen na e laso?

18, 19. (a) Aye so e manda na yâ ti atoli so Jésus afa akpengba mo tongana nyen? (b) E yeke bâ ande nyen na yâ ti article ti peko?

¹⁸ Ye wa e manda na yâ ti atoli use so a sû na yâ ti chapitre 4 ti Évangile ti Marc? E bâ polele so e yeke na mbeni kua ti sarango ni: kua ti lungo le-kobe. A yeke nzoni e gi lâ oko pëpe ti wara ambeni raison ti ke ti sara kua so; nga, a yeke nzoni e zia pëpe si akpale so e lingbi ti wara akanga lege na e ti sara ni (Zo-ti. 11:4). Ye oko, na oko ngoi ni, e hinga so e yeke na kota pasa ti duti na popo ti azo so ayeke sara kua maboko na maboko na Nzapa. Jéhovah ayeke zo so ayeke sara si mbeni zo ague na li ni na lege ti yingo, na lo yeke iri tënë nzoni na ndo ti angangu so e yeke sara nga na ndo ti ngangu so azo so ayeda na tënë ni ayeke sara. E hinga so e lingbi pëpe ti forcé mbeni zo ti gue na li ni na lege ti yingo. Legeoko nga, a lingbi bê ti e awoko pëpe tongana mbeni zo ague na li ni gi yeke yeke wala lo gue na li ni pëpe. A yeke ye ti dengo bê ti hinga so ye so afa so e sara kua ti e nzoni ayeke so e yeke be-ta-zo na Jéhovah nga na kota pasa so lo mû na e ti fa ‘tene-nzoni ti royaume teti tënë ti témoin na amara kue’.​—Mat. 24:14.

¹⁹ Mbeni ye nde wa Jésus afa na e na ndo ti guengo na li ni ti azo so aga adisciple nga na ndo ti kua ti fango tënë ti Royaume? E yeke wara kiringo tënë ni na yâ ti atoli so a sû na yâ ti aÉvangile. E yeke bâ ambeni toli ni na yâ ti article ti peko.

[Akete tënë na gbe ni]

Mo dabe ti mo na ni?

• Na alege wa tâ lungo le-kobe aye ti gue oko na fango tënë ti Royaume?

• Na lê ti Jéhovah, nyen la afa so mbeni wafango tënë ti Royaume ayeke be-ta-zo?

• Jésus agboto lê na ndo ti mbeni ye so asara si maïngo ti tâ le-kobe aye ti gue oko na guengo na li ni na lege ti yingo. Ye ni so ayeke nyen?

• Na lege wa ‘zo so alu le-kobe na zo so afâ ni ayeke duti na ngia legeoko’?

[Afoto na lembeti 21]

Ngbanga ti nyen Jésus ahaka wafango tënë ti Royaume na mbeni zo ti lungo le-kobe?

[Afoto na lembeti 23]

Azo so ayeke tongana nzoni sese ayeke fa tënë ti Royaume na bê ti ala kue alingbi na dutingo ti ala

[Afoto na lembeti 24]

A yeke Nzapa la ayeke sara si a maï