Na yâ ti ngoi kete sese ayeke ga ande paradis!
“Babâ ti e so ayeke na yayu, e ye iri ti Mo aga nzoni-kue. E ye royaume ti Mo aga. E ye ala sara na sese ye so bê ti Mo aye legeoko tongana ala sara na yayu.”—Matthieu 6:9, 10.
SAMBELA so, so Jésus afa lani na adisciple ti lo na so azo mingi ahinga ni, asara si azo aduti na beku. Na lege wa?
Tongana ti so sambela so afa, Royaume ti Nzapa ayeke sara ande si a sara ye so bê ti Nzapa aye na ndo ti sese tongana ti so a yeke sara ni biani fadeso na yayu. Ye so bê ti Nzapa aye ayeke ti sara si sese akiri aga Paradis (Apocalypse 21:1-5). Royaume ti Nzapa ayeke biani nyen? Na lege wa a yeke sara ande si sese akiri aga Paradis?
Mbeni tâ ngorogbia
Royaume ti Nzapa ayeke mbeni tâ ngorogbia. Ti tene mbeni ngorogbia asara kusala, a hunda ti tene azo amû li ni dä, andia aduti dä nga azo aduti na gbe ti ngorogbia ni. Royaume ti Nzapa ayeke na aye so? Bâ tongana nyen Bible akiri tënë na ahundango tënë ota so ayeke na gbe ni ge:
Azo wa la amû li ni na yâ ti Royaume ti Nzapa? (Esaïe 33:22) Jéhovah Nzapa azia Molenge ti lo Jésus Christ ti duti na li ti Royaume ni (Matthieu 28:18). Na gbe ti fango lege ti Jéhovah, Jésus asoro mbeni wungo ti azo na popo ti “akete mara kue, na ti yanga nde nde kue, na ti azo nde nde kue, na ti amara kue” na fade lo na ala ayeke “komande na ndo sese.”—Apocalypse 5:9, 10.
Andia wa Royaume ti Nzapa alu ni ti tene azo so ayeke duti na gbe ti ngorogbia ni asara ye alingbi na ni? Ambeni ndia ni ahunda na azo so ayeke na gbe ti ngorogbia ni ti sara anzoni ye. Jésus afa ndia so ayeke kota ahon atanga ti andia so kue, lo tene: “A lingbi mo ndoye Seigneur Nzapa ti mo na bê ti mo kue, na âme ti mo kue, na bibe ti mo kue. So ayeke kota komandema na komandema ti kozoni. Na komandema use ni so alingbi na kozo komandema ayeke so, Mo ndoye zo so ayeke nduru na mo legeoko tongana mo ndoye mo mveni.”—Matthieu 22:37-39.
Ambeni ndia ni ahunda ti tene azo so Royaume ti Nzapa akomande na ndo ti ala akpe ti sara ambeni ye. Na tapande, Bible atene polele atene: “I handa tere ti i pëpe; azo ti pitan, azo ti sambela ayanda, azo so asara lango-sioni, azo so asara ye ti kamene na tere ti ala na popo ti ala, akoli so asara lango-sioni na mbeni koli, awanzi, na azo so bê asara ala, angbâa ti samba, awazonga, na azo ti gbu ye na ngangu, fade azo tongaso aga ahéritier ti royaume ti Nzapa pëpe.”—1 aCorinthien 6:9, 10.
Azo wa la Royaume ti Nzapa akomande na ndo ti ala? Jésus ahaka azo so Royaume ti Nzapa akomande na ndo ti ala na angasangbaga. Lo tene: “Fade ala mä yanga ti Mbi; fade kundu ayeke oko, na Berger ayeke oko.” (Jean 10:16). Ti tene mbeni zo aduti na gbe ti Royaume ti Nzapa, a lingbi zo ni atene gi pëpe so lo yeke mû peko ti Nzo Berger, Jésus, me a lingbi lo sara nga ye so Jésus ahunda. Jésus atene: “Azo kue so atene na Mbi, Seigneur, Seigneur, fade ala kue asi na yâ royaume ti yayu pëpe, me gi ala so asara ye so Babâ ti Mbi so ayeke na yayu aye.”—Matthieu 7:21.
Ni la, azo so Royaume ti Nzapa akomande na ndo ti ala ayeke di iri ti Nzapa, Jéhovah, nga ala yeke ne ni mingi tongana ti so Jésus asara lani (Jean 17:26). Ala yeke sara ye alingbi na yanga so Jésus amû na adisciple ti lo ti fa ye na azo na ndo ti “Tene-nzoni so ti royaume”. (Matthieu 24:14; 28:19, 20). Na ndo ni, ala fa so ala ye amba ti ala na bê ti ala oko.—Jean 13:35.
‘Futingo azo so ayeke futi sese’
Aye so ayeke si na ndo ti sese laso afa so na yâ ti kete ngoi, Royaume ti Nzapa ayeke londo ti changé aye mingi na ndo ti sese. E hinga ni tongana nyen? A sara angu saki use tongaso awe so Jésus asara tënë na ndo ti aye nde nde so ayeke mû lege ti hinga so “royaume ti Nzapa ayeke nduru.” (Luc 21:31). Tongana ti so a fa ni na yâ ti article so ahon, aye so Jésus asara tënë ni, azo ayeke bâ ni polele na ndo ti sese kue.
Nyen la ayeke si ande na pekoni? Jésus akiri tënë, lo tene: “Na lâ ni kâ, fade kota ye ti vundu aga, ye ti vundu tongaso ayeke giriri pëpe, na lâ ti komansema ti sese juska fadeso; biani, fade ye tongaso alingbi si mbeni lâ oko pëpe.” (Matthieu 24:21). Azo la ayeke ga ande na ye ti vundu so pëpe. Me a yeke Nzapa la ayeke ga ande na ni ti “futi ala so afuti sese.” (Apocalypse 11:18). Ti azo ti sioni, so sarango ye ti ala na lege ti kion a sara si sese aga nduru ti buba kue, “fade a lungula ala na sese so”. Me ti azo ti mbilimbili, so ayeke sara ye so bê ti Nzapa aye, “fade ala ngbâ dä.”—aProverbe 2:21, 22.
A yeke na lege ni ti tene Jéhovah Nzapa asara ngangu ye tongaso. Ndali ti nyen? Bâ tapande so: Tara ti bâ so mo yeke na mbeni da ti mo so mo kangbi yâ ni nde nde ti tene azo aloué ni. Ambeni zo so aloué mbeni mbage ti da ni ayeke sara ye na lege ni nga ala ne aye ti mo; ala yeke futa da ti ala na lege ni nga ala yeke bata ni nzoni. Ye oko, ambeni zo so aloué mbeni mbage ti da ni ayeke sara ye nzoni pëpe nga ala yeke sara ye na kion; ala ke ti futa da ni na ala buba aye ti tere ti da ni ngangu mingi. Atâa so mo suku na ala fani mingi ti sara tongaso pëpe, ala ngbâ ti sara ni. Mo yeke sara ande nyen? Teti so mo yeke wa ti da ni, kite ayeke dä pëpe so mo yeke tomba asioni zo so na yâ ti da ti mo.
Legeoko nga, Jéhovah Nzapa so acréé sese na aye kue so ayeke na ndo ni ayeke na droit ti soro azo so lo ye ti tene ala duti na ndo ti sese ni (Apocalypse 4:11). Jéhovah atene so lo yeke zi azo ti sioni so ake ti sara ye so bê ti lo aye nga so ake ti bâ droit ti amba ti ala na nene ni.—Psaume 37:9-11.
Paradis so a kiri a leke ni
Na yâ ti kete ngoi, Royaume ti Nzapa so Jésus ayeke na ndo ni ayeke komande ande na ndo ti sese. Jésus atene so fini tongo nda ti ye so ayeke “lâ ti kiri ti sara ye kue fini”. (Matthieu 19:28). Aye ayeke duti ande tongana nyen na yâ ti Paradis so? Bâ azendo so Bible amû:
Psaume 46:10. “Lo sara si bira awe juska na nda ti sese.”
Esaïe 35:1. “Fade yando na kuru sese ayeke na ngia; fade désert ayeke na tâ ngia na ambumba tongana rose.”
Esaïe 65:21–23. “Fade ala wara ngia na kusala ti maboko ti ala teti lâ mingi. Fade ala sara kusala senge pepe, na ala dü amolenge ti wara vundu pepe.”
Jean 5:28. “L’heure ayeke ga so azo kue so ayeke na du-kua, fade ala mä yanga ti [Jésus], na ala sigigi.”
Apocalypse 21:4. “Fade [Nzapa ambô] ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe.”
Anda ti tënë ti zia bê na azendo so
Mo zia bê ti mo na ndo ti azendo so Bible amû? Bible afa kozoni awe so fade azo mingi ayeke sara tongaso pëpe. Bible atene: “Na lâ ti nda ni, fade azo ti hengo zo aga . . . fade ala tambela na lege ti nzara nde nde ti tere ti ala mveni, na ala tene, Zendo ti singo ti Lo ayeke na ndo wa? teti, a komanse na lâ ni so akotara alango awe, ye kue angbâ legeoko tongana a yeke giriri, a komanse na lâ ni so A créé ye kue.” (2 Pierre 3:3, 4). Me azo ti hengo ndo so afâ kamba ngangu. Bâ gi ambeni nda ti atënë osio so alingbi ti pusu mo ti zia bê na aye so Bible atene:
(1) Giriri, Nzapa afuti azo ti sioni. Kota ngu-nzapa so apika na ngoi ti Noé ayeke mbeni kota tapande ni.—2 Pierre 3:5-7.
(2) Bible afa kozoni tâ na lege ni aye so ayeke si laso na ndo ti sese kue.
(3) So a tene ‘ye kue angbâ legeoko tongana ti giriri’ ayeke tâ tënë pëpe. Laso azo ayeke mä tere pëpe, ala yeke sara ye kirikiri nga aye so angoro zo abuba mingi, na mara ti aye tongaso ade ti si lâ oko pëpe.
(4) Laso, a yeke fa “Tene-nzoni so ti royaume” na ndo ti sese kue, na ye so afa so “nda ni aga” nduru mingi awe.—Matthieu 24:14.
A-Témoin ti Jéhovah atisa mo ti yeda ti tene ala manda Mbeti ti Nzapa, Bible, na mo ti mû lege na mo ti manda ye mingi na ndo ti beku ti fini ti lakue lakue so azo ayeke wara ande na gbe ti komandema ti Royaume ti Nzapa (Jean 17:3). Biani, mbeni pendere gigi ti kekereke ayeke ku azo. Mbeni nzoni gigi so ahon atanga ni kue aga nduru ti si awe. Mo yeke duti ande na fini na ngoi ni so?
[Kete tën̈e na lembeti 7]
Azo so atene so aye ayeke ngbâ ande gi tongana ti kozo afâ kamba ngangu
[Foto na lembeti 8]
Mo yeke duti ande na fini na ngoi ni so?