Nyen la asi biani na zo na peko ti kuâ ti lo?
“Âme ti zo oko akui pëpe, même ti azo so ayeke sioni . . . Teti so a yeke se ala lakue lakue na yâ ti wâ so ayeke mingo pëpe na ala yeke kui pëpe, pono ti ala alingbi ti [hunzi] ande lâ oko pëpe.”—Clément ti Alexandrie, wasungo mbeti na popo ti ngu 100 ti si na 200.
AZO so ayeke fa so enfer ayeke mbeni ndo ti wungo pono na so atene so âme ti zo ayeke kui pëpe ayeke na oko bibe ti Clément. Bible atene so âme ti zo akui pëpe? Bâ akiringo tënë so Mbeti ti Nzapa amû na ahundango tënë so ayeke na gbe ni ge.
Kozo koli, Adam ayeke lani na mbeni âme so akui pëpe? Mbeni Bible ti aProtestant atene tënë so na ndo ti crééngo Adam: “L’Eternel Nzapa asara zo na pupu-sese ti sese, Lo wu mbö ti fini na duhon ti lo; na zo aga âme ti fini.” (Genèse 2:7). Bâ so versê so atene pëpe so a mû âme na Adam.
Nyen la asi na Adam na pekoni so lo sara siokpari? Ngbanga so Nzapa afâ na ndo ti Adam ayeke pëpe ti tene lo wu pono teti lakue lakue na yâ ti enfer. Ni la, Tene ti Nzapa, Kozo Mbouki so aCatholique asigigi na ni atene tënë so na ndo ti ngbanga so Nzapa afâ: ‘Fade mo te kobe ti mo gi na gbiki ti lê ti mo, ngbii a si na lâ ni so mo kiri na sese. Tënë ti so mo yeke sese, fade mo kiri na sese.’ (Genèse 3:18, 19). Ngbanga so Nzapa afâ na ndo ti Adam afa kete pëpe so mbeni ye ti tere ti Adam ayeke ngbâ ande na fini na peko ti kuâ ti lo. Na ngoi so Adam akui, Adam so ayeke âme ni akui.
Azo kue ayeke na âme so akui pëpe? Nzapa atene na prophète Ezéchiel: “Âme so asara siokpari, fade a kui.” (Ezéchiel 18:4). Bazengele Paul atene: “Siokpari aga na sese so na lege ti zo oko [Adam], na kui aga na lege ti siokpari, tongaso kui asi na azo kue, teti azo kue asara siokpari.” (aRomain 5:12). Teti so azo kue ayeke awasiokpari, a-âme kue ayeke kui.
Âme so akui awe alingbi ti hinga mbeni ye? Kozo Mbouki atene: ‘Azo so ade na ndo ti sese ahinga atene fade ala kui; azo akui awe, ala hinga ye oko pëpe.’ (Zo-ti-fa-tene 9:5). Na ndo ti ye so asi na zo na lâ ti kuâ ti lo, Bible atene: “Lo kiri na sese. Na lâ ni mveni, ye so lo bi bê ti lo dä aga ye senge.” (Psaume 146:4). Tongana azo so akui awe ‘ahinga ye oko pëpe’ nga ‘ye so ala bi bê ti ala dä aga ye senge’, ala lingbi ti wu pono na yâ ti enfer ti wâ tongana nyen?
Jésus Christ ahaka kuâ, pëpe na mbeni ngoi so zo alingbi ti hinga ye, me na lango (Jean 11:11-14). Ye oko, ambeni zo alingbi ti ke ala tene so Jésus afa so enfer ayeke ndo ti wâ so a yeke bi azo ti sioni dä. Zia e bâ ye so Jésus atene biani na ndo ti enfer.