Enfer ayeke nyen biani?

ATÂA bibe wa mo yeke na ni na ndo “enfer”, mingi ni azo abâ ni tongana mbeni ndo ti sengo zo ngbanga ti siokpari so lo sala. Na ndo siokpari nga na ye so aga na pekoni, Bible atene: “Siokpari aga na sese so na lege ti zo oko, na kui aga na lege ti siokpari, tongaso kui asi na azo kue, teti azo kue asala siokpari.” (aRomain 5:12). Mbeti ti Nzapa akiri atene: “Futa ti siokpari ayeke kui”. (aRomain 6:23). Teti so futa ti siokpari ayeke kui, ti hinga nda ti enfer nzoni a lingbi e kiri tënë na hundango tënë so: Tongana e kui, ye nyen asi na e?

Na peko ti kuâ, zo angbâ na fini na mbeni lege nde? Enfer ayeke nyen, na mara ti azo wa si ayeke gue dä? Ala so ayeke na yâ enfer, mbeni beku ayeke dä teti ala? Bible amû atâ kiringo tënë so adë bê na ahundango tënë so.

Fini ayeke na peko ti kuâ?

Mbeni ye na yâ e, tongana âme wala yingo, ayeke ngbâ na peko ti kuâ ti mitele? Bâ lege so kozo koli, Adam, aga na fini. Bible atene: “L’Eternel Nzapa asala zo na pupu-sese ti sese, Lo hu mbö ti fini na duhon ti lo; na zo aga âme ti fini.” (Genèse 2:7). Atâa so hungo pupu abata fini ti lo, so a zia “mbö ti fini” na duhon ti lo afa ye mingi ahon gi hulungo pupu na yâ afufu ti lo. A ye ti tene so Nzapa azia na yâ tele ti Adam, so ayeke na fini pëpe, ngangu ti fini wala ‘mbö ti fini’, so ayeke na yâ aye kue so ayeke na fini (Genèse 6:17; 7:22). Bible asala tënë ti ngangu ti fini so tongana “yingo”. (Jacques 2:26). A lingbi ti haka yingo so na kuran so a sala si mbeni masini ayeke sala kua. Legeoko tongana ti so kuran ayeke ga lâ oko pëpe masini so lo mû ngangu na ni, ngangu ti fini nga ayeke ga lâ oko pëpe zo wala nyama so lo yeke sala kua na yâ lo. Lo oko lo lingbi ti sala ye pëpe, lo lingbi ti gbu nga li pëpe.

Me tongana mbeni zo akui, ye nyen asi na yingo ni? Psaume 146:4 atene: “Tongana mbö [“yingo”, NW] ti lo ahon, lo kiri na sese. Na lâ ni mveni, ye so lo bi bê ti lo dä aga ye senge.” Tongana mbeni zo akui, yingo ti lo, so ayeke gi mbeni senge ngangu, angbâ na fini na mbeni ndo nde pëpe tongana mbeni zo ti yingo. Lo ‘kiri na Nzapa, Lo so amû lo.’ (Zo-ti-fa-tene 12:9). A ye ti tene so beku kue ti tene zo so akiri na fini ayeke fadeso gi na tïtî Nzapa.

Socrate na Platon, angbele wandara ti Grèce, atene so tongana zo akui, âme so ayeke na yâ zo ni angbâ na ayeke kui lâ oko pëpe. Me Bible afa ti lo nyen na ndo âme? Genèse 2:7 atene so Adam “aga âme ti fini.” Lo wara mbeni âme pëpe; lo yeke lani âme, zo ni na ngbongboro tele ti lo kue. Mbeti ti Nzapa atene so âme ayeke sala mawa, ayeke ke ti te kobe, ayeke sala nzara ti mbeni ye, a yeke he lo na ngia, nga na ambeni ye nde tongaso (Job 19:2; 33:20; Psaume 42:3; 123:4). Biani, zo ayeke lo mveni mbeni âme. Tongana zo akui, âme so akui.​—Ezéchiel 18:4.

Tongaso, dutingo ti akuâ ayeke tongana nyen? Na lâ ni so Jéhovah adë ngbanga ti kuâ na li ti Adam, lo tene: “Fade mo kiri na pupu-sese, teti mo yeke pupu-sese.” (Genèse 3:19). Kozoni si Nzapa aleke lo na pupu-sese ti sese na Lo mû fini na lo, Adam ayeke lani na ndo wa? Lo yeke lani dä pëpe! Tongana lo kui, Adam akiri na dutingo so ayeke na fini oko pëpe. Zo-ti-fa-tene 9:5, 10 afa dutingo ti akuâ polele, lo tene: “Akinda ahinga ye oko pëpe . . . teti kusala, ye ti bibe, hingango ye, na ndara, ayeke na ndo-ti-awakinda pëpe, ndo so mo yeke gue dä.” Tongaso, ti Bible, kuâ ayeke dutingo so ayeke na fini oko pëpe. Akuâ ahinga ye oko pëpe, ala yeke na atënë ti bê wala abibe pëpe.

Enfer ayeke nyen: ndo ti pasi ti lakue lakue wala senge dû ti kuâ?

Teti so akuâ ahinga ye oko pëpe, enfer alingbi ti duti mbeni ndo ti wâ pëpe, ndo so a sala pasi na azo ti sioni na peko ti kuâ ti ala. Tongaso, enfer ayeke nyen? Fade bango ye so asi na Jésus na peko ti kuâ ti lo ayeke kiri tënë na ni. Luc, wasungo Bible, afa pekoni: “A zia [Jésus a] ngbâ na ndo-ti-awakinda [hadès, NW] pëpe, na mitele ti Lo angbâ pëpe na ndo so ye afuti dä.” (Kusala 2:31). Me, na yâ versê so ambeni Bible akiri peko ti tënë “hadès” na yanga ti Grec na “enfer”.a Enfer so Jésus ague dä ayeke lani na ndo wâ? Bazengele Paul asû atënë so: “Mbi fa na i . . . : Christ akui awe teti siokpari ti e legeoko tongana Mbeti ti Nzapa atene; na ala lu Lo, na A yä Lo na lâ ota ni legeoko tongana Mbeti ti Nzapa atene”. (1 aCorinthien 15:3, 4). Tongaso, Jésus ague lani na enfer, dû ti kuâ, me a zia lo ngbâ kâ pëpe, teti a yä lo, wala a zingo lo na kuâ.

Bâ nga tapande ti Job, zo ti mbilimbili, so abâ pasi mingi. Teti so lo ye ti kpe pasi ti lo, lo voro tele ti lo, lo tene: “A yeke nzoni Mo honde mbi na yâ ndo-ti-awakinda [shéol, NW], Mo honde mbi juska ngonzo ti Mo ahon awe”. (Job 14:13). Ambeni Bible na yanga ti Français akiri peko ti tënë “shéol” na yanga ti Hébreu na “a-enfer”.b Ti tene so Job aye lani ti gue na mbeni ndo ti wâ ti bata tele ti lo ayeke biani na lege ni oko pëpe! Ti Job, “enfer” ayeke gi dû ti kuâ, ndo so pasi ti lo ayeke hunzi dä. Tongaso, enfer so Bible asala tënë ni ayeke gi dû ti kuâ so azo kue ague dä, azo ti nzoni na azo ti sioni nga.

Enfer ti wâ: a yeke futi ye kue?

Wâ ti enfer ayeke peut-être fä ti ye so afuti biaku biaku? Ti fa kangbi so ayeke na popo ti wâ na hadès, wala enfer, Mbeti ti Nzapa atene: “A bi Kui na Ndo-ti-awakinda [hadès, NW] na lac ti wâ.” “Lac” so asala tënë ni ge ayeke na lege ti fä, teti kui na enfer (hadès) so a bi ala na yâ ni alingbi ti gbi biani pëpe. “[Lac ti wâ so] ayeke kui use ni”; kui so beku ti kiri ti duti na fini ayeke dä oko pëpe.​—Apocalypse 20:14.

Nda ti lac ti wâ ayeke oko na ti “ndo ti wâ” wala géhenne so Jésus asala tënë ni (Matthieu 5:22; Marc 9:47, 48). Na yâ Mbeti ti Nzapa so aChrétien asû na yanga ti Grec, tënë “ndo ti wâ” wala géhenne asigigi fani 12, na a sala tënë ti popo-hoto ti Hinnom, so ayeke na gigi ti gbagba ti Jérusalem. Na ngoi so Jésus ade na ndo ti sese, popo-hoto so ayeke lani ndo ti bingo asaleté dä, “ndo so a bi kuâ ti azo ti fango zo, ti anyama, nga na mara ti asaleté nde nde kue dä.” (Bakari ti Bible ti Smith [Angl.]). A yeke zia soufre dä ti tene wâ ni agbi lakue asaleté ni. Jésus asala tënë ti popo-hoto so tongana mbilimbili fä ti futingo ti lakue lakue.

Legeoko tongana ndo ti wâ wala Géhenne, lac ti wâ ayeke fä ti futingo ti lakue lakue. “A bi” Kui na Ndo-ti-awakinda na yâ ni na lege so a yeke futi ala biaku biaku na ngoi so a yeke zi azo na gbe ti siokpari nga na ngbanga ti kuâ. Awasiokpari so aye ti changé bê ti ala pëpe ayeke wara ande “ye” ti ala na yâ lac so (Apocalypse 21:8). Fade a yeke futi ala nga kue teti lakue lakue. Na mbeni mbage nde, azo so Nzapa adabe lo na ala, so ayeke na yâ ti enfer, wala dû ti kuâ so azo kue ague dä, ayeke wara mbeni pendere kekereke.

A zi ye kue so ayeke na yâ enfer!

Apocalypse 20:13 atene: “Kota ngu ti ingo azia na gigi awakinda so ayeke na yâ ni; na Kui na Ndo-ti-awakinda azia na gigi awakinda so ayeke na yâ ala.” Biani, a yeke zi ande ye kue so ayeke na yâ enfer so Bible asala tënë ni. Tongana ti so Jésus atene kozoni, “l’heure ayeke ga so azo kue so ayeke na dukua, fade ala mä yanga ti [Jésus], na ala sigigi.” (Jean 5:28, 29). Atâa so ala yeke na fini mbeni pëpe laso, azo kutu mingi so Jéhovah Nzapa adabe lo na ala, fade a yeke zingo ala na kuâ, wala a yeke kiri ala na fini, na ndo sese so akiri aga paradis.​—Luc 23:43; Kusala 24:15.

Na yâ fini sese ti Nzapa, azo so azingo na kuâ na so abata ambilimbili ndia ti lo, ayeke kiri ti kui mbeni pëpe (Esaïe 25:8). Fade Jéhovah ‘ambô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe.’ Biani, “kozo ye ni ahon awe.” (Apocalypse 21:4). So tâ pendere ye si aku azo so ayeke na yâ enfer wala “dukua”! Biani, pendere ye so ayeke nda ti tënë so apusu e ti hinga Jéhovah Nzapa na Molenge ti lo, Jésus Christ, nzoni mingi ahon ti kozoni.​—Jean 17:3.

[Akete Tene na Gbe Ni]

[Foto na lembeti 5]

Job asambela ti tene a bata lo na yâ enfer

[Foto na lembeti 6]

Ndo ti wâ wala géhenne ayeke fä ti futingo ti lakue lakue

[Foto na lembeti 7]

‘Azo kue so ayeke na yâ dukua ayeke sigigi ande’