“Mo ga mo mû peko ti mbi”

“Tongana mbeni zo aye ti ga na peko ti mbi, zia lo ke tere ti lo wani na lo yô keke ti pasi ti lo lâ naa lâ na lo mû peko ti mbi.”​—LUC 9:23.

1, 2. (a) Na nzoni bê, Jésus atisa azo ti sara nyen? (b) Mo sara ye tongana nyen na gbele tisango ndo so?

NA NGOI ti hunzingo ti kusala ti Jésus, lo yeke fa tënë na Pérée, mbeni kodoro so ayeke na mbage ti Ngu ti Jourdain so ayeke na banga-to ti Judée. Mbeni maseka-koli aga nduru na Jésus, na lo hunda ti hinga ye so a lingbi lo sara ti wara fini ti lakue lakue. Na pekoni so Jésus abâ so maseka-koli ni ayeke bata Ndia ti Moïse nzoni, lo tisa lo ti sara mbeni pendere kusala. Jésus atene: “Gue, mo kä aye ti mo, mo mû nginza ni na awayere, na fade mo yeke wara mosoro na yayu; na mo ga mo mû peko ti mbi.” (Marc 10:21). Gbu li kete: Jésus so ayeke oko Molenge ti Nzapa Ti Nduzu Ahon Kue atisa maseka-koli so ti mû peko ti lo.

² Maseka-koli so ake tisango ndo so, me ambeni zo ayeda na ni. Jésus atene kozoni awe na Philippe, lo tene: “Mû peko ti mbi.” (Jean 1:43). Philippe ayeda na pekoni lo ga bazengele. Jésus akiri atisa Matthieu, na lo nga kue lo yeda na ni (Mat. 9:9; 10:2-4). Biani, Jésus atisa azo kue so aye sarango ye ti mbilimbili tongana lo tene: “Tongana mbeni zo aye ti ga na peko ti mbi, zia lo ke tere ti lo wani na lo yô keke ti pasi ti lo lâ na lâ na lo mû peko ti mbi lakue lakue.” (Luc 9:23). Tongaso, zo kue alingbi ti ga disciple ti Jésus tongana zo ni aye biani. Mo yeke na nzara ti ga disciple ti Jésus? Mingi ti e ayeda awe na tisango ndo ti lo, so lo tisa e na nzoni bê; nga na ngoi so e yeke fa tënë na azo, e yeke tisa ala ti ga adisciple ti lo.

3. E lingbi ti sara nyen si e hon yongoro pëpe me e ngbâ ti mû peko ti Jésus?

³ Me ye ti mawa ni ayeke so ambeni zo so ayeda lani ti manda Bible azia lege ti mandango ni. Ala kiri na peko nga na nda ni ala “hon yongoro”, na ala mû peko ti Jésus mbeni pëpe (aHéb. 2:1). E lingbi ti sara nyen si e tï pëpe na yâ ti gbanda so? Tongana e hunda tere ti e na ahundango tënë so, a yeke mû maboko na e: ‘Ngbanga ti nyen mbi soro lani ti mû peko ti Jésus? Ti mû peko ti lo aye ti tene nyen?’ Ti bata na li ti e akiringo tënë ti ahundango tënë use so ayeke mû maboko na e ti ngbâ lakue ti sara ye alingbi na desizion so e mû ti mû peko ti Jésus. A yeke mû nga maboko na e ti wa ambeni zo ti mû peko ti Jésus.

Ngbanga ti nyen ti mû peko ti Jésus?

4, 5. Ngbanga ti nyen Jésus alingbi biani ti fa lege na e?

⁴ Prophète Jérémie atene: “O L’Éternel, mbi hinga lege ti zo ayeke na tïtî lo mveni pëpe; na a yeke na bê ti zo so atambela ti fa lege na gere ti lo nga pëpe.” (Jér. 10:23). Aye so asi ngbene ye giriri juska laso afa so tënë so Jérémie atene ayeke tâ tënë. A sigigi polele so azo so ayeke mbilimbili-kue pëpe alingbi pëpe ti komande tere ti ala wani na ti wara nzoni dä. E yeda ti mû peko ti Jésus ndali ti so e manda lani so lo la lo lingbi ti duti Mokonzi ti e, na mbeni zo ti lingbi na lo ayeke duti ande dä pëpe. Zia e bâ ambeni ye so afa so Jésus alingbi biani ti duti Mokonzi ti e.

⁵ Kozoni kue, Jéhovah lo wani la asoro Jésus ti duti Messie na Mokonzi. Nde na Wasarango e, zo wa ahinga biani zo so alingbi ti duti Mokonzi ti e? Use ni, Jésus ayeke na asarango ye so e lingbi ti gonda lo ndali ni nga ti mû peko ni. (Diko Esaïe 11:2, 3.) Lo yeke nzoni tapande so ahon atanga ni kue (1 Pi. 2:21). Ota ni, Jésus ayeke bi bê ti lo mingi na ndo ti azo so ayeke mû peko ti lo, tongana ti so lo fa ni na lege so lo mû fini ti lo ndali ti ala. (Diko Jean 10:14, 15.) Nga na ngoi so Jésus ayeke fa na e lege ti wara ngia laso nga ti wara fini ti lakue lakue kekereke, lo fa so lo yeke Berger so ayeke bi bê na angasangbaga ti lo (Jean 10:10, 11; Apoc. 7:16, 17). Ndali ti anda ti tënë so nga na ambeni nde, so e soro ti mû peko ti Jésus afa so e sara ye na ndara. Ye oko, ti mû peko ti Jésus aye ti tene nyen?

6. Ti mû peko ti Jésus andu nyen?

⁶ Ti mû peko ti Christ andu ye mingi ahon gi ti tene na yanga so e yeke aChrétien. Laso, azo ngbundangbu use tongaso atene so ala ayeke aChrétien, me aye so ala yeke sara afa so ala yeke “azo so akpe ndia pëpe.” (Diko Matthieu 7:21-23.) Tongana azo afa so ala yeke na nzara ti mû peko ti Jésus, e yeke fa na ala so atâ Chrétien ayeke sara ye ague oko na afango ye ti Jésus nga ala yeke mû tapande ti lo na yâ ti aye kue, na ala yeke sara ni na yâ ti lango oko oko kue ti fini ti ala. Ti fa nda ti tënë so polele, zia e bâ ambeni ye so e hinga na ndo ti Jésus.

Sara ye na ndara tongana ti Jésus

7, 8. (a) Ndara ayeke nyen? Ngbanga ti nyen Jésus ayeke na ndara mingi? (b) Na lege wa Jésus afa so lo yeke na ndara? E yeke mû tapande ti lo tongana nyen?

⁷ Jésus ayeke na anzoni sarango ye mingi, me e yeke luti ande na ndo ti ala osio: ndara ti lo, tâ be-ti-molenge so lo yeke na ni, sarango ye ti lo na bê kue nga na ndoye ti lo. Kozoni kue, zia e bâ ndara ti lo: ngangu so lo yeke na ni ti sara ye ague oko na ye so lo hinga nga na lege so lo gbu na nda ti mbeni ye si ye aga nzoni. Bazengele Paul atene: “A yeke na yâ ti [Jésus] si a honde ngangu amosoro kue ti ndara na ti hingango ye.” (aCol. 2:3). Jésus awara mara ti ndara so na ndo wa? Jésus lo wani atene: “Mbi yeke tene gi aye so Babâ afa na mbi.” (Jean 8:28). Ndara ti lo alondo na Jéhovah, ni la a yeke ye ti dongo bê pëpe so lo yeke bâ yâ ti aye nzoni mingi.

⁸ Na tapande, Jésus abâ yâ ti aye nzoni na ngoi so lo yeke soro lani ye so lo ye ti sara na yâ ti gigi ti lo. Lo soro ti duti na aye mingi pëpe, lê ti lo angbâ gi na ndo ti ye oko: sarango ye so bê ti Nzapa aye. Na ndara, lo mû ngoi ti lo nga na ngangu ti lo ti gi Royaume ti Nzapa kozoni. E yeke mû tapande ti Jésus na lege so e yeke sara kue ti tene ‘lê ti e abâ ye nzoni’ nga e kpe ti wara akungba so ayeke ne e gi senge senge, aye so ayeke mû ngangu ti e nga ayeke gboto lê ti e yongoro (Mat. 6:22). A-Chrétien mingi asara ambeni ye ti mû lege na ala ti duti na aye mingi pëpe si ala lingbi ti bi tere ti ala mingi na yâ ti kua ti fango tënë. Ambeni awara lege ti mû kua ti pionnier. Tongana mo yeke na popo ti aita so asara tongaso, mo lingbi tâ na gonda. ‘Ti gi royaume ti Nzapa kozoni’ ayeke ga na kota ngia na zo.​—Mat. 6:33.

Duti na tâ be-ti-molenge tongana ti Jésus

9, 10. Na lege wa Jésus afa so lo yeke na tâ be-ti-molenge?

⁹ Mbeni use sarango ye ti Jésus so e yeke bâ fadeso ayeke tâ be-ti-molenge. Tongana a mû ngangu ti komande na azo so ayeke mbilimbili-kue pëpe, fani mingi ala bâ tere ti ala so ala yeke kota mingi. Me Jésus ayeke ti lo nde mingi! Atâa kota kua so Jésus ayeke sara na yâ ti ye so Jéhovah aleke ti sara, baba asara lo kete pëpe. Nga a wa e ti mû tapande ti lo so. Bazengele Paul atene: “Ala bata na li ti ala bango ndo so, so lani Christ Jésus nga ayeke na ni, lo so, atâa lani lo yeke na yâ ti tere so ayeke tongana ti Nzapa, lo bi bê ti lo ti gbugburu ndo pëpe, so ti tene ti lingbi tere na Nzapa. Lo sara tongaso pëpe, me lo dö aye ti lo kue lo zia, lo mû tere ti ngbâa na lo ga tongana zo.” (aPhil. 2:5-7). Ye so andu nyen?

¹⁰ Jésus ayeke lani na gloire na tere ti Babâ ti lo na yayu, me na bê ti lo kue, lo “dö aye ti lo kue lo zia”. A zia fini ti lo na yâ ti Marie, mbeni masia so ayeke Juif; kâ, lo maï teti nze gumbaya na pekoni a dü lo tongana mbeni senge kete bébé na yâ ti da ti mbeni senge sarapande. Na yâ ti da ti Joseph, Jésus ato nda ti manda tambela, na yeke yeke lo kono na lo ga mbeni maseka. Lo yeke na sioni kete pëpe. Ye oko, na lâ ti maseka ti lo, lo mä yanga ti babâ na mama ti lo so ayeke mbilimbili-kue pëpe (Luc 2:51, 52). So tâ pendere sarango ye na tâ be-ti-molenge!

11. Na alege wa e lingbi ti mû tapande ti tâ be-ti-molenge so Jésus ayeke na ni?

¹¹ E yeke sara ye na tâ be-ti-molenge tongana ti Jésus tongana e yeda na bê ti e kue ti sara akua so azo abâ ni tongana ambumbuse kua. Na tapande, bâ kusala so a mû na e ti fa nzoni tënë. Azo alingbi ti bâ fango tënë tongana mbeni mbumbuse kua, mingi ni tongana ala sara nzara ti tënë ni pëpe, ala he e wala ala son na ndo ti e. Ye oko, tongana e ngbâ lakue ti fa tënë, e yeke mû maboko na azo ti yeda ti mû peko ti Jésus. Na sarango tongaso, e yeke mû maboko na ala ti sö fini ti ala. (Diko 2 Timothée 4:1-5.) Mbeni tapande ni andu lekengo yâ ti Da ti Royaume ti e. Ye so alingbi ti ndu aye tongana zingo azende, balengo yâ ti da nga na sukulango kabine, akua so azo ayeke bâ ni tongana abuba kua. Ye oko, e hinga so batango Da ti Royaume ti e, ndo so e yeke voro Jéhovah dä, ayeke mbage ti vorongo ti e. Tongana e yeda na bê ti e kue ti sara akua so azo abâ tongana abuba kua, e yeke fa so e yeke na tâ be-ti-molenge, na tongaso e yeke mû peko ti Christ.

Sara kua na bê kue tongana ti Jésus

12, 13. (a) Na lege wa Jésus afa so lo sara kusala na bê ti lo kue? Nyen la apusu lo ti sara tongaso? (b) Nyen la ayeke pusu ande e ti fa tënë na bê ti e kue?

¹² Bâ tapande ti kusala ti fango tënë so Jésus asara na bê ti lo kue. Jésus asara ye mingi na ngoi so lo yeke lani na sese. Na ngoi so lo de maseka, kite ayeke dä pëpe so lo sara kua ti sarapande na tere ti Joseph, babâ so abata lo. Na ngoi so Jésus ayeke sara kua so Nzapa amû na lo, lo sara amiracle, so na popo ni lo sava akobela nga lo zingo akuâ. Me kua so lo mû ngoi mingi ti sara ni ayeke fango nzoni tënë nga na fango ye na azo so ayeda ti mä lo (Mat. 4:23). Teti so e yeke adisciple ti Jésus, e yeke sara oko kusala so. E yeke mû tapande ti lo tongana nyen? Mbeni lege ni ayeke ti zia si a-oko bibe so apusu Jésus ti sara kua ti lo apusu e nga ti sara kua so.

¹³ Ahon ye kue, ndoye ti Jésus na mbage ti Nzapa la apusu lo ti fa tënë na azo nga ti fa ye na ala. Jésus aye nga atâ tënë so lo yeke fa. Na lê ti Jésus, atâ tënë so ayeke mosoro so ngere ni ayeke ngangu mingi, na lo yeke na ngia ti sara si azo awara ni. E so e yeke awafango ye, e yeke na oko bango ndo so. Tara ti gbu li na ndo ti atâ tënë ti Mbeti ti Nzapa so e manda lani na so ayeke kota ye na lê ti e! E hinga tënë na ndo ti zo so ayeke na droit ti duti gbia ti dunia kue nga tongana nyen a yeke leke ande tënë so. E hinga nzoni mingi ye so Mbeti ti Nzapa afa na ndo ti ye so asi na azo tongana ala kui nga na aye ti nzoni so azo ayeke wara ande na yâ ti fini dunia ti Nzapa. Atâa e manda atâ tënë so ade ti ninga pëpe wala a ninga awe, atâ tënë so angbâ lakue na nene ni. (Diko Matthieu 13:52.) Tongana e fa tënë na ngia na bê, e yeke fa na azo so e ye aye so Jéhovah afa na e.

14. Na lege wa e lingbi ti mû tapande ti fango ye ti Jésus?

¹⁴ Bâ nga lege so Jésus afa na ye. Lo yeke gboto lakue lê ti azo so amä lo na ndo ti Mbeti ti Nzapa. Fani mingi, kozo ti sigigi na mbeni kota tënë, lo yeke tene: “A sû na Mbeti ti Nzapa a tene.” (Mat. 4:4; 21:13). Na yâ ti atënë ti Jésus so a sû na Bible, lo tene a-oko tënë wala lo tene peko ti atënë so ayeke na yâ ti ambeti 19 ti Mbeti ti Nzapa so a sû na yanga ti Hébreu. Tongana ti Jésus, e yeke luti mingi na ndo ti Bible na ngoi so e yeke fa tënë nga e yeke gi ti gboto lê ti azo na ndo ni tongana lege ayeke dä. Na sarango tongaso, e yeke mû maboko na azo so aye ti sara ye ti mbilimbili ti tene ala wani abâ so e yeke fa abibe ti Nzapa, me abibe ti e wani pëpe. E yeke na ngia tongana mbeni zo ayeda ti diko mbeni versê na ti sara lisoro na ndo ti nene ti versê ni nga na nda ti versê ni. Nga tongana mara ti azo tongaso ayeda na tisango ndo ti Jésus na ala mû peko ti lo, e yeke na kota ngia mingi.

Ti mû peko ti Jésus aye ti tene ti ye azo

15. Sarango ye ti Jésus so andu bê ti zo mingi ayeke so wa? Ti gbu li na ndo ni ayeke pusu e ti sara nyen?

¹⁵ Ndangba sarango ye ti Jésus so e yeke bâ ni fadeso andu bê ti zo mingi: ndoye ti lo na mbage ti azo. Bazengele Paul atene: “Ndoye so Christ ayeke na ni apusu e ti sara ye.” (2 aCor. 5:14). Tongana e gbu li ti e na ndo ti ndoye so Jésus ayeke na ni na mbage ti azo kue nga na mbage ti e oko oko kue, ye so ayeke ndu bê ti e nga ayeke pusu e ti mû tapande ti lo.

16, 17. Na alege wa Jésus afa so lo ye azo?

¹⁶ Nyen la afa so Jésus aye azo? Tâ kota ye so Jésus asara ti fa so lo ye azo mingi ayeke so lo yeda ti mû fini ti lo na sandaga ndali ti ala (Jean 15:13). Ye oko, na ngoi ti kusala ti Jésus na sese, lo fa na alege nde nde so lo ye azo. Na tapande, lo bâ mawa ti azo so ayeke bâ pasi. Na ngoi so Jésus abâ Marie nga na azo so ayeke na tere ti lo ayeke toto kuâ ti Lazare, vundu so ala sara agbu bê ti Jésus mingi. Atâa so Jésus ayeke lani nduru ti zingo Lazare na kuâ, vundu asara lo mingi na tongaso Jésus “atoto na ngu ti lê.”​—Jean 11:32-35.

¹⁷ Kete na pekoni so Jésus ato nda ti kusala ti lo, mbeni zo ti buruma aga nduru na Jésus na lo tene: “Tongana mo ye, mo lingbi ti sara si tere ti mbi aga nzoni.” Jésus asara nyen? Bible atene: “Mawa agbu lo.” Na pekoni, lo sara mbeni ye so apika bê ti zo. “Lo yôro maboko ti lo, lo ndu zo ti buruma ni, na lo tene: ‘Mbi ye. Zia tere ti mo aga nzoni.’ Gi na lê ni lê ni, buruma ti lo ni ahon na lo ga nzoni.” Na gbe ti Ndia ti Moïse, a bâ azo ti buruma tongana azo so aga sioni, na Jésus alingbi biani fade ti sava kobela ti zo so sân ti ndu lo. Ye oko, na ngoi so Jésus ayeke sava kobela ti lo, lo ndu lo ti tene lo hinga ye so a yeke sara na ndo ti zo tongana mba ti lo andu lo; peut-être teti angu mingi, a yeke kozo ni la ti tene zo andu lo. So tâ bango mawa ti zo!​—Marc 1:40-42.

18. E lingbi ti sara nyen ti fa so e ‘zia tere ti e na place ti mba ti e’?

¹⁸ Teti so e yeke adisciple ti Christ, a ku na mbage ti e ti fa so e yeke “zia tere ti [e] na place ti mba ti [e]”. (1 Pi. 3:8). A lingbi ti si so a yeke kete ye pëpe ti zia tere ti e na place ti ita ti e so ayeke na ngangu kobela wala atï na yâ ti kota vundu, mbilimbili tongana ade mara ti ye tongaso asi na e pëpe. Me Jésus abâ mawa ti azo ti kobela atâa so tere ti lo ason lâ oko pëpe. E lingbi ti sara nyen ti bâ mawa ti azo tongana ti Jésus? E lingbi ti mû ngoi ti dengi mê na ngoi so azo so ayeke bâ pasi ayeke fa na e tënë ti bê ti ala. E lingbi nga ti hunda tere ti e: ‘Âdu mbi la fade ye so asi na mbi, a yeke sara nyen na ndo ti mbi?’ Tongana e gi ti zia tere ti e na place ti amba ti e, a yeke mû maboko na e ti “sara tënë so adë bê ti a-âme so vundu asara ala mingi”. (1 aThes. 5:14). Na sarango tongaso, e yeke mû peko ti Jésus.

19. Tapande ti Jésus andu e na alege wa?

¹⁹ So tâ apendere ye si e manda na yâ ti atënë ti Jésus Christ nga na akusala so lo sara! Tongana e yeke manda ye mingi na ndo ti Jésus, a yeke sara si e ye ti sara ye tongana ti lo mingi ahon ti kozo, na e yeke ye ti mû maboko na azo ti sara ye tongana ti lo. Tongaso, zia e wara ngia mingi na mungo tapande ti Gbia Messie, laso nga kpu na kpu!

Mo lingbi ti fa nda ni?

• E lingbi ti sara nyen ti sara ye na ndara tongana ti Jésus?

• Na alege wa e lingbi ti fa so e yeke na tâ be-ti-molenge?

• E lingbi ti sara nyen ti fa tënë na bê ti e kue?

• Na alege wa e lingbi ti fa so e ye azo tongana ti Jésus?

[Foto na lembeti 11]

Buku so amû maboko na e ti mû peko ti Christ

Na ngoi ti kota bungbi ti district ti ngu 2007, a sigigi na mbeni buku so alembeti ni ayeke 192 na iri ni ayeke “ Viens, suis-moi. “ A sigigi na buku so ti mû maboko na aChrétien ti hinga ye nzoni na ndo ti Jésus, mbilimbili na ndo ti asarango ye nga na akusala ti lo. Na yâ ti akozo use chapitre ni, a sara nduru tënë na ndo ti Jésus; kozo mbage ti buku ni afa tënë na ndo ti akota sarango ye ti Jésus: sarango ye ti lo na tâ be-ti-molenge nga na mbeto pëpe, ndara ti lo nga na gbungo ngangu ti lo. Lo mä yanga ti Jéhovah na yâ ti aye kue, na buku so asara tënë na ndo ni nga.

Na pekoni, a yeke wara ambage so asara tënë na ndo ti akusala so Jésus asara tongana wafango ye nga na wafango nzoni tënë. Na yâ ti ambage so, a fa nga ambeni lege so lo fa na gigi kota ndoye ti lo. Na yâ ti buku ni kue, a yeke wara asango so ayeke mû maboko na aChrétien ti mû tapande ti Jésus.

E hinga biani so buku so ayeke pusu ande e kue ti gbu li na ti hunda tere ti e: ‘Mbi yeke mû peko ti Jésus biani? Mbi lingbi ti sara nyen ti mû peko ti lo nzoni ahon ti kozo?’ Buku so ayeke mû nga maboko na “ala kue so ayeke nduru ti yeda na tënë ni ti wara fini ti lakue lakue” ti mû peko ti Christ.​—Kusala 13:48.

[Foto na lembeti 11]

“ VIENS,

SUIS-MOI “