Jésus azia na e tapande ti sarango tere kete

“Mbi zia tapande ni na ala, si gi tongana ti so mbi sara na ala, a lingbi ala sara tongaso nga.”​—JEAN 13:15.

KIRINGO TËNË TI MO AYEKE SO WA?

Tongana nyen la Molenge ti Nzapa asara tere ti lo kete kozo ti tene lo ga na sese?

Na ngoi so Jésus ayeke na sese, tongana nyen la lo sara tere ti lo kete?

So Jésus asara tere ti lo kete aga na aye ti nzoni wa?

1, 2. Na ngoi ti ndangba bï ti Jésus na sese, kpengba ye wa lo fa na abazengele ti lo?

NA NDANGBA bï ti Jésus na sese, lo mû ngoi ti duti na abazengele ti lo na yâ ti mbeni kubu so ayeke na nduzu na Jérusalem. Na ngoi so ala yeke te kobe ti lakui, Jésus alondo lo zi abongo ti lo ti ndo ni. Lo kanga mbeni bongo na gbe ti yâ ti lo. Lo tuku ngu na yâ ti mbeni kota dû ti sembe, lo to nda ti sukula gere ti adisciple ni nga lo mbô ni na bongo so lo kanga na gbe ti yâ ti lo. Na pekoni lo yu abongo ti lo ti ndo ni. Ngbanga ti nyen la Jésus asara mbumbuse kua so?​—Jean 13:3-5

² Jésus afa ndani, lo tene: “Ala hinga ye so mbi sara na ala so? . . . Tongana mbi, atâa so mbi yeke Seigneur nga Wafango ye, mbi sukula gere ti ala, a lingbi ala nga ala sukula gere ti mba na popo ti ala. Teti mbi zia tapande ni na ala, si gi tongana ti so mbi sara na ala, a lingbi ala sara tongaso nga.” (Jean 13:12-15). Na dutingo nduru ti sara mara ti mbumbuse kua so, Jésus afa mbeni kpengba ye na abazengele ti lo so ala yeke girisa ni ande pëpe nga a yeke pusu ala ti sara tere ti ala kete na yâ ti alango so ayeke ga.

3. (a) Tongana nyen la na angoi use Jésus afa nene ti sarango tere kete? (b) Nyen la e yeke bâ na yâ ti article so?

³ Na ngoi so Jésus asukula gere ti abazengele, lo fa na ala nene ti sarango tere kete, a yeke kozo ti tene lo fa ye so na ala la pëpe. Ngoi kete kozoni, abazengele adë gaba na popo ti ala ti hinga zo so ayeke kota ahon atanga ni, Jésus amû mbeni kete molenge lo zia lo na tere ti lo na lo tene na ala: “Zo so ayamba kete molenge so ndali ti iri ti mbi, lo yamba mbi nga. Na zo so ayamba mbi, lo yamba nga lo so atokua mbi. Teti zo so asara tere ti lo kete na popo ti ala kue, a yeke lo si ayeke kota.” (Luc 9:46-48). Jésus ahinga so aFarizien ayeke gi gi akota ndo, ni la kete na pekoni na ngoi so lo yeke fa tënë, lo tene: “Zo kue so ayä iri ti lo, fade a sara si lo ga kete. Na zo so asara tere ti lo kete, fade a yä iri ti lo.” (Luc 14:11). Biani, Jésus aye si adisciple ti lo asara tere ti ala kete, so ti tene, ala duti azo ti baba pëpe. Zia e gbu li nzoni na ndo ti lege so Jésus asara tere ti lo kete tongaso si e mû tapande ti lo. E yeke bâ nga tongana nyen zo so asara tere ti lo kete ayeke wara ye ti nzoni na ambeni zo nga kue.

‘MBI KIRI NA PEKO PËPE’

4. Tongana nyen la oko Molenge ti Nzapa asara tere ti lo kete kozo si lo ga na sese?

⁴ Oko Molenge ti Nzapa asara tere ti lo kete même kozo si lo ga na sese. Kozo si Jésus aga na sese, lo sara angu mingi na tere ti Babâ ti lo ti yayu. Mbeti ti Ésaïe asara tënë ti kpengba songo so Molenge ni ayeke na ni lani na Babâ ti lo, a tene: ‘Seigneur L’Éternel amû na Mbi yanga so ahinga ti sara tënë, si Mbi lingbi hinga lege ti sara tënë nzoni na zo so anze; Lo zingo Mbi na ndapre kue, Lo sara si mê ti Mbi amä tënë tongana adisciple. Seigneur L’Éternel alungula mê ti Mbi, na Mbi ke pëpe, na Mbi kiri na peko pëpe.’ (És. 50:4, 5). Molenge ti Nzapa asara lani tere ti lo kete na lo dengi mê nzoni na aye so Jéhovah afa na lo. Lo ye lani mingi ti manda ye na mbage ti tâ Nzapa. Jésus ayeke bâ lani tapande ti Jéhovah so asara tere ti lo kete na ngoi so lo yeke sara ye na nzoni bê na azo so siokpari ayeke na tere ti ala.

5. Tongana nyen la na yâ ti kua ti Jésus ti archange Michel, lo zia tapande ti sarango tere kete nga lo hinga akatikati ti lo na ngoi so tënë alondo na popo ti lo na Zabolo?

⁵ A yeke pëpe a-ange kue so ayeke na yayu la ayeke na mara ti bibe ti oko Molenge ti Nzapa so. Ahon ti gi ti manda ye na mbage ti Jéhovah, ange so aga Satan Zabolo asara tere ti lo kete pëpe, lo bâ tere ti lo kota nga baba alï lo na lo londo ti ke yanga ti Jéhovah. Ti Jésus, lo yeke na ngia na ndo so lo yeke na ni na yayu nga lo gi ti sara ye kirikiri pëpe na komandema so lo yeke na ni. Jésus so ayeke archange Michel agi pëpe ti sara ye ahon ndo ni na komandema ti lo na ngoi so ‘tënë alondo lani na popo ti lo na Zabolo na ndo ti kuâ ti Moïse’. Molenge ti Nzapa asara tere ti lo kete nga lo hinga akatikati ti lo. Lo ye mingi ti tene Jéhovah, Kota Juge ti dunia, la abâ lege ti tënë ni na ngoi nga na lege so bê ti lo aye.​—Diko Jude 9.

6. Tongana nyen la Jésus asara tere ti lo kete na lege so lo yeda ti sara kua tongana Messie?

⁶ Kite ayeke pëpe so na popo ti aye so Jésus amanda kozo si lo ga na sese, a yeke wara aprophétie so afa anzene nzene ye na ndo ti fini ti lo ti Messie na ndo ti sese. Tongaso, peut-être lo hinga kozoni awe aye ti sioni so ayeke si ande na lo. Me, Jésus ayeda ti ga na sese na ti kui tongana Messie so a mû zendo ti lo. Ngbanga ti nyen? Bazengele Paul afa so oko Molenge ti Nzapa ayeke zo so asara tere ti lo kete, lo tene: “Atâa lani lo yeke na yâ ti tere so ayeke tongana ti Nzapa, lo bi bê ti lo ti gbugburu ndo pëpe, so ti tene ti lingbi tere na Nzapa. Lo sara tongaso pëpe, me lo dö aye ti lo kue lo zia, lo mû tere ti ngbâa na lo ga tongana zo.”​—aPhil. 2:6, 7.

NA NGOI SO JÉSUS AYEKE NA SESE, “LO SARA TERE TI LO KETE”

7, 8. Na yâ ti aye wa Jésus asara tere ti lo kete na ngoi so lo de kete nga na ngoi ti kusala ti lo na sese?

⁷ Paul atene: “Tongana lani [Jésus aga] zo ti mitele, lo sara tere ti lo kete na lo ga zo so amä yanga juska na kuâ, kuâ na ndo ti keke ti pasi.” (aPhil. 2:8). Jésus azia na e tapande ti sarango tere kete ngbene ye na ngoi so lo de kete. Atâa so Joseph na Marie, babâ na mama ti Jésus so abata lo, ayeke azo so alingbi kue pëpe, lo sara tere ti lo kete na lo “ngbâ ti woko tere na gbe ti ala.” (Luc 2:51). Lo yeke mbeni nzoni tapande ndali ti amolenge. Nzapa ayeke iri tënë nzoni na ndo ti amolenge so ayeke nduru ti woko tere na gbe ti ababâ na amama ti ala.

⁸ Na ngoi so Jésus aga kota zo, lo sara tere ti lo kete na lege so lo zia sarango ye so bê ti Jéhovah aye na kozo ndo, me ti lo wani pëpe (Jean 4:34). Na ngoi ti kusala ti Jésus Christ, lo sara kua na iri ti Nzapa nga lo mû maboko na azo so bê ti ala ayeke nzoni ti hinga asarango ye ti Jéhovah nzoni nga na ye so lo leke ti sara ndali ti azo. Jésus asara nga ye alingbi na aye so lo fa na ndo ti Jéhovah. Na tapande, na yâ ti tapande ti sambela so Jésus afa na adisciple ti lo, kozo ye so lo sara tënë ni ayeke so: “Babâ ti e so mo yeke na yayu, zia a sara si iri ti mo aga nzoni-kue.” (Mat. 6:9). Ge, Jésus afa na adisciple ti lo ti sara si ye so agbu bê ti ala mingi aduti tënë ti sarango si iri ti Jéhovah aga nzoni-kue. A yeke nga ye so agbu bê ti lo. Na nda ti kua ti Jésus na sese, lo tene na Jéhovah na yâ ti sambela, lo tene: “Mbi sara si [abazengele ahinga] iri ti mo na fade mbi yeke sara si a hinga ni.” (Jean 17:26). Nga na ngoi ti kusala ti Jésus na sese ge, lo fa so aye so lo sara a yeke grâce na Jéhovah.​—Jean 5:19.

9. Nyen la Zacharie afa na lege ti prophétie na ndo ti Messie? Tongana nyen la Jésus asara si prophétie so aga tâ tënë?

⁹ Zacharie atene mbeni prophétie na ndo ti Messie, lo tene: “Mo sara ngia mingi, O molenge-wali ti Sion! Mo dekongo, O molenge-wali ti Jérusalem! Bâ, Gbia ti mo ayeke ga na mo; Lo yeke mbilimbili, na Lo hon na ngangu; Lo yeke na tâ be-ti-molenge, na Lo tambela na ndo lele, même na ndo molenge ni, molenge ti lele ti koli.” (Zach. 9:9). Prophétie so aga tâ tënë na ngoi so Jésus alï na Jérusalem kozo na Pâque ti ngu 33. Gbâ ti azo agbara abongo ti ala ti ndo ni nga na amaboko ti keke na ndo ti lege. Biani, gbata ni kue ayengi na ngoi ti lingo ti Jésus na yâ ni. Même na ngoi so azo ayamba Jésus tongana Gbia, lo sara tere ti lo kete.​—Mat. 21:4-11.

10. Nyen la Jésus afa na lege so lo yeke nduru ti mä yanga juska na kuâ?

¹⁰ Jésus Christ asara tere ti lo kete nga lo mä yanga juska na kuâ na ndo ti keke ti pasi. Lo fa na mbeni lege so zo alingbi ti dë kite na ni pëpe so azo alingbi ti ngbâ be-ta-zo na Jéhovah même na yâ ti tara so ayeke ngangu mingi. Jésus afa nga so Satan atene mvene tongana lo tene so azo ayeke sara na Jéhovah gi ndali ti so ala yeke wara ye na pekoni (Job 1:9-11; 2:4). Na ngbango be-ta-zo na mbeni lege so alingbi kue, Christ ayä nga na nduzu droit ti Jéhovah ti komande dunia kue nga lo fa so komandema ti Jéhovah ayeke mbilimbili. Jéhovah ayeke biani na ngia tongana lo bâ so Molenge ti lo asara tere ti lo kete nga lo ngbâ be-ta-zo.​—Diko aProverbe 27:11.

11. Sandaga ti Jésus Christ amû lege na azo so amä na bê na lo ti wara aye wa?

¹¹ Kuâ ti Jésus na ndo ti keke ti pasi amû nga lege ti futa ngere ti zi na azo (Mat. 20:28). Ye so amû lege na Jéhovah ti sara ye alingbi na andia ti lo so ayeke mbilimbili nga amû lege na azo so siokpari ayeke na tere ti ala ti ngbâ na fini lakue lakue. Paul atene: “Ndali ti kusala oko so amû lege ti diko zo tongana zo ti mbilimbili, ye ti pekoni na ndo ti mara ti azo nde nde kue ayeke so a diko ala tongana azo ti mbilimbili ti wara fini.” (aRom. 5:18). Kuâ ti Jésus amû lege na aChrétien so a soro ala ti gue na yayu ti wara fini so alingbi ti hinga kuâ pëpe na yayu nga na “ambeni ngasangbaga” ti wara fini ti lakue lakue na sese.​—Jean 10:16; aRom. 8:16, 17.

“MBI YEKE NA TÂ BE-TI-MOLENGE”

12. Tongana nyen la Jésus asara ye na ngangu pëpe nga na tâ be-ti-molenge na mbage ti azo so siokpari ayeke na tere ti ala?

¹² Jésus atisa azo kue so “asara ngangu kua na kungba ane ala” ti ga na mbage ti lo. Lo tene: “Ala yô joug ti mbi na ala manda ye na tere ti mbi, teti mbi yeke sara ye na ngangu pëpe na mbi yeke na tâ be-ti-molenge, na fade ala wara dengo bê ngbanga ti âme ti ala.” (Mat. 11:28, 29). So Jésus ayeke na tâ be-ti-molenge nga lo sara ye na ngangu pëpe apusu lo ti sara ye na nzoni bê na azo so siokpari ayeke na tere ti ala nga ti zia kangbi na popo ti azo pëpe. Lo hunda ye ahon ndo ni pëpe na adisciple ti lo. Jésus agonda ala nga lo tene na ala atënë so amû ngangu na zo. Lo sara pëpe si ala bâ tere ti ala so ala lingbi pëpe ti sara mbeni ye wala so ala kpa oko ape. Jésus ason songo na ndo ti ala pëpe nga lo sara ye na ala na ngangu pëpe. Me, lo dë bê ti adisciple ti lo so tongana ala ga nduru na lo nga ala sara aye so lo fa, ala yeke wara dengo bê ndali ti so a yeke ngangu pëpe ti yô joug ti lo na kungba ti lo ayapu. Ni la asara si akoli, awali, amolenge nga na ambakoro aye mingi ti duti na tere ti lo.​—Mat. 11:30.

13. Tongana nyen la Jésus abâ mawa ti azo so dutingo ti ala amû lege na ala pëpe ti wara ambeni ye?

¹³ Na yâ ti songo ti Jésus na asenge zo ti Israël so dutingo ti ala amû lege na ala pëpe ti wara ambeni ye, lo bâ mawa ti ala nga na ndoye lo bi bê ti lo na abezoin ti ala. Nduru na Jéricho, lo tingbi na awaziba use so ayeke azo ti iringo ye so iri ti mbeni ayeke Bartimée. Ala ngbâ ti hunda na Jésus ti mû maboko na ala, me gbâ ti azo asuku na ala ti kanga yanga ti ala. A yeke ngangu pëpe ti tene Jésus asara sanka ti awaziba so ayeke voro yanga ti hunda maboko so. Me, mawa ti ala agbu Jésus, lo hunda ti tene a ga na ala, na lo sara si ala kiri abâ ndo. Biani, Jésus amû tapande ti Jéhovah, Babâ ti lo, na lege so lo yeke na tâ be-ti-molenge nga lo sara nzoni bê na asenge zo so siokpari ayeke na tere ti ala.​—Mat. 20:29-34; Marc 10:46-52.

“ZO SO ASARA TERE TI LO KETE, FADE A YÄ IRI TI LO”

14. So Jésus asara tere ti lo kete aga na aye ti nzoni wa?

¹⁴ So Jésus Christ asara tere ti lo kete aga na ngia nga na aye ti nzoni mingi. Jéhovah ayeke na ngia ti bâ so Molenge ti lo so lo ye lo mingi asara tere ti lo kete ti sara ye so bê ti lo aye. So Jésus asara ye na ngangu pëpe nga lo sara tere ti lo kete asara si abazengele nga na adisciple awara dengo bê. Tapande ti lo, afango ye ti lo nga na atënë so lo tene ti gonda ala apusu ala ti gue na li ni na lege ti yingo. Jésus amû maboko na azo mingi na lege so lo fa ye na ala, lo tene atënë so amû ngangu na ala nga lo mû na ala ye so ala yeke na bezoin ni. Biani, sandaga ti Jésus asara si azo kue so amä na bê na lo ayeke wara ande aye ti nzoni teti lakue lakue.

15. So Jésus asara tere ti lo kete aga na lo ye ti nzoni wa?

¹⁵ So Jésus asara tere ti lo kete aga na ye ti nzoni na lo? En, ndali ti so Jésus atene na adisciple ti lo, lo tene: “Zo so asara tere ti lo kete, fade a yä iri ti lo.” (Mat. 23:12). Atënë so aga tâ tënë na ndo ti lo. Paul atene: “Nzapa ayä [Jésus] na nduzu na mbeni kota ndo so ahon ti kozo ni, na nzoni bê Nzapa amû na lo iri so ayeke na ndo ti tanga ti airi kue, si na iri ti Jésus likuni oko oko kue akuku, likuni ti ala so ayeke na yayu, ti ala so ayeke na ndo ti sese nga na ti ala so ayeke na gbe ti sese, na menga oko oko kue atene polele so Jésus Christ ayeke Seigneur ndali ti gloire ti Nzapa Babâ ni.” Teti so Jésus asara tere ti lo kete na ndo ti sese nga lo yeke be-ta-zo, Jéhovah ayä lo na nduzu, lo mû na lo komandema na ndo ti acréature so ayeke na yayu nga na azo so ayeke na sese.​—aPhil. 2:9-11.

JÉSUS AYEKE TIRI ANDE NDALI TI TÂ TËNË NA TI TÂ BE-TI-MOLENGE

16. Nyen la afa so Molenge ti Nzapa ayeke ngbâ ti sara tere ti lo kete na yâ ti akusala ti lo?

¹⁶ Molenge ti Nzapa ayeke ngbâ ande ti sara tere ti lo kete na yâ ti akusala ti lo. Mbeni zo ti sungo psaume afa na lege ti prophétie tongana nyen la Jésus so ayeke na kota ndo na yayu ayeke tiri ande na awato ti lo, lo tene: “Mo sigigi na ye ti gloire ti mo ti hon na ngangu, si tene-biani na tâ be-ti-molenge na kusala ti mbilimbili aga nzoni.” (Ps. 45:5). Na Harmaguédon Jésus ayeke tiri ande ndali ti azo so asara tere ti ala kete, ala ye mbilimbili nga ala ye tâ tënë. Nyen la ayeke si ande na nda ti Komandema ti Ngu Saki Oko ti Gbia Messie na ngoi so lo “futi angorogbia kue, akomandema kue nga na ngangu kue”? Lo yeke ngbâ ande ti sara tere ti lo kete? En, ndali ti so lo yeke “mû ande royaume ni na Lo so ayeke Nzapa nga Babâ ti lo.”​—Diko 1 aCorinthien 15:24-28.

17, 18. (a) Ndali ti nyen a yeke kota ye ti tene awakua ti Jéhovah amû tapande ti Jésus so asara tere ti lo kete? (b) Ahundango ndo wa e yeke bâ ni ande na yâ ti article ti peko?

¹⁷ Ka ti e? E yeke mû tapande ti Jésus nga e yeke sara tere ti e kete? Na Harmaguédon, Gbia Jésus Christ ayeke sö ande gi azo so asara tere ti ala kete na ala ye mbilimbili. Ni la, tongana e ye ti sö kuâ, a yeke kota ye ti tene e sara tere ti e kete. Nga, tongana ti so sarango tere ti Jésus kete aga na aye ti nzoni na lo nga na ambeni zo, tongana e sara tere ti e kete ayeke ga na aye ti nzoni na alege mingi.

¹⁸ Nyen la ayeke mû maboko na e ti mû tapande ti Jésus so asara tere ti lo kete? E lingbi ti sara nyen ti sara ngangu ti sara tere ti e kete atâa akpale so e lingbi ti tingbi na ni? E yeke sara ande tënë na ndo ti ahundango ndo so na yâ ti article ti peko.

[Foto na lembeti 12]

Nyen la e lingbi ti manda na lege ti Jésus so asara tere ti lo kete?

[Foto na lembeti 13]

Jésus ahinga ti bâ mawa ti azo