Nzapa ayeke zo biani?
Aye so azo mingi ayeke tene:
◼ “Lo yeke na ndo kue, na yâ ti aye kue. Lo yeke tongana pupu.”
◼ “Lo yeke mbeni ndara wala mbeni ngangu so zo alingbi ti gbu nda ni pëpe.”
Jésus atene ti lo nyen?
◼ “Na yâ ti da ti Babâ ti mbi, ando ti lango ayeke mingi.” (Jean 14:2). Jésus atene ge so Babâ ti lo ayeke na da na lege ti fä, wala ndo so lo duti dä.
◼ “Mbi londo na Babâ si mbi ga na yâ ti dunia so. Nga, mbi yeke zia dunia so na mbi yeke gue na Babâ la.” (Jean 16:28). Jésus ahinga so Nzapa ayeke mbeni tâ zo so aduti na mbeni mbilimbili ndo.
JÉSUS atene lâ oko pëpe so Nzapa ayeke mbeni ngangu so zo alingbi ti gbu nda ni pëpe. Me, lo sara tënë na Nzapa nga lo sambela lo. Fani mingi, lo iri Jéhovah Babâ ti lo ti yayu, ti fa so lo yeke na kpengba songo na Nzapa.—Jean 8:19, 38, 54.
A yeke tâ tënë so “mbeni zo ade abâ Nzapa lâ oko pëpe” nga so “Nzapa ayeke mbeni Yingo”. (Jean 1:18; 4:24). Me ye so aye pëpe ti fa so lo yeke pëpe na mbeni tere. Bible atene na e so “tongana tere so ayeke ti zo ti sese ayeke dä, tere so ayeke ti yingo ayeke nga dä.” (1 aCorinthien 15:44). Tongaso, Jéhovah ayeke na mbeni tere so ayeke ti yingo?
En. Na pekoni so a zingo Jésus, lo “lï na yayu ni wani si lo si fadeso na gbele Nzapa ndali ti e.” (aHébreu 9:24). Ye so afa na e akpengba ye use na ndo ti Nzapa. Kozo ni, lo yeke na mbeni ndo so lo duti dä. Use ni, lo yeke mbeni Zo, me pëpe mbeni ngangu so ayeke na ndo kue, na so zo alingbi pëpe ti gbu nda ni.
Na lege wa Nzapa alingbi ti sara ngangu na ndo ti aye na ndo kue? Nzapa alingbi ti tokua yingo vulu ti lo, wala ngangu so lo yeke sara na kua, na ando nde nde kue na yâ ti dunia. Tongana ti mbeni babâ so ayôro maboko ti lo ti sara mbeni ye ti dë bê ti amolenge ti lo wala ti mû maboko na ala, Nzapa ayeke sara kua na yingo vulu ti lo ti sara ye so lo leke ti sara.—Psaume 104:30; 139:7.
Teti so Nzapa ayeke mbeni Zo, lo yeke nga na asarango ye ti lo, aye so lo ye nga na aye so lo ke. Bible atene na e so lo ye awakua ti lo, lo wara ngia na yâ ti akusala ti lo, lo ke vorongo ayanda nga bê ti lo ayeke son tongana zo asara ye ti sioni (Genèse 6:6; Deutéronome 16:22; 1 aGbia 10:9; Psaume 104:31). Na 1 Timothée 1:11, a iri lo “Nzapa so ayeke na ngia”. A yeke ye ti dongo bê pëpe so Jésus atene so e lingbi ti manda ti ye Nzapa so na bê ti e kue.—Marc 12:30.a
[Akete tënë na gbe ni]
a Ti hinga ambeni sango na ndo ti tënë so, bâ chapitre 1 ti buku Bible afa nyen biani? so aTémoin ti Jéhovah asigigi na ni.
[Kete tënë na lembeti 5]
Tongana ti mbeni babâ so ayôro maboko ti lo, Nzapa asara kua na yingo vulu ti lo ti sara ye so lo leke ti sara