Azo ti mbilimbili ayeke sepela ande Nzapa lakue lakue

‘Fade azo adabe ala na zo ti mbilimbili. Mbilimbili ti lo angbâ lakue.’​—PS. 112:6, 9.

1. (a) Pendere kekereke wa ayeke ku azo kue so Nzapa abâ ala tongana azo ti mbilimbili? (b) Hundango tënë wa abâ gigi?

SO MBENI pendere kekereke si ayeke ku azo kue so Nzapa abâ ala tongana azo ti mbilimbili! Teti lakue lakue, ala yeke duti ande na ngia ti manda aye mingi na ndo ti apendere sarango ye ti Jéhovah. Ala yeke sepela ande Jéhovah mingi na ngoi so ala yeke manda ye mingi na ndo ti aye so lo créé. Mbeni sarango ye ti Jéhovah so ayeke mû lege na zo ti wara aye ti nzoni so ayeke “mbilimbili”, so Psaume 112 agboto lê na ndo ni. Me na lege wa Jéhovah Nzapa so ayeke nzoni-kue nga so ayeke mbilimbili alingbi ti bâ azo ti siokpari tongana azo ti mbilimbili? Atâa ngangu kue so e yeke sara ti sara ye na lege ni, e yeke sara afaute, na ngoi na ngoi e yeke sara akota faute.​—aRom. 3:23; Jacq. 3:2.

2. Ndoye apusu Jéhovah ti sara amiracle use wa?

² Na ndoye, Jéhovah asara mbeni ye ti sara si azo aga mbilimbili na lê ti lo. Lo sara ni tongana nyen? Kozoni kue, na lege so lo sara miracle na lo zia fini ti Molenge ti lo ti yayu so lo ye lo mingi na yâ ti mbeni masia si lo lingbi ti dü lo tongana mbeni zo so ayeke mbilimbili-kue (Luc 1:30-35). Na pekoni so awato ti Jésus afâ lo awe, Jéhovah akiri asara mbeni pendere miracle. Nzapa azingo Jésus tongana mbeni créature ti yingo so ayeke na gloire.​—1 Pi. 3:18.

3. Ngbanga ti nyen Jéhovah ayeke na ngia ti futa Molenge ti lo na mungo na lo fini na yayu?

³ Jéhovah afuta Molenge ti lo Jésus na mbeni ye so Jésus ayeke lani na ni pëpe kozo ti ga na sese: fini so a lingbi ti futi ni pëpe na yayu (aHéb. 7:15-17, 28). Jéhovah ayeke na ngia ti sara tongaso ndali ti so Jésus angbâ be-ta-zo na yâ ti angangu tara. Na ngbango be-ta-zo, Jésus amû lege na Jéhovah ti fa biani na Satan so tënë so lo tene, so bibe ti kion la ayeke pusu azo ti sara na lo Nzapa, ayeke mvene. Ye so Jésus asara afa biani so ndoye la apusu azo ti sara na Nzapa.​—aProv. 27:11.

4. (a) Jésus asara nyen ndali ti e na ngoi so lo kiri na yayu? Ye so apusu Jéhovah ti sara nyen? (b) Mo bâ ti mo ye so Jéhovah na Jésus asara ndali ti mo so tongana nyen?

⁴ Na ngoi so Jésus akiri na yayu, lo “si fadeso na gbele Nzapa ndali ti e” na ngere ti “mênë ti lo wani”. Na nzoni bê, Babâ ti e ti yayu so aye e mingi abâ sandaga so Jésus amû tongana “sandaga ndali ti asiokpari ti e.” Ni la, teti so a “sukula yingo-ti-hinga ti e” awe, e lingbi ti sara “kusala so ayeke nzoni-kue na Nzapa so ayeke na fini”. Ye so amû na e mbeni nda ti tënë ti yeda na akozo tënë ti Psaume 112, so atene: “I sepela L’Éternel.”​—aHéb. 9:12-14, 24; 1 Jean 2:2.

5. (a) A lingbi e sara nyen ti tene Nzapa angbâ ti bâ e tongana azo ti mbilimbili? (b) Kode wa a sû na Psaume 111 nga na Psaume 112?

⁵ Ti tene Nzapa angbâ ti bâ e na nzoni lê, a lingbi e ngbâ ti fa so e mä na bê na mênë ti Jésus so atuku. A lingbi e zia lango oko ahon pëpe sân ti tene e kiri singila na Jéhovah teti so lo ye e mingi (Jean 3:16). Na ndo ni, a lingbi e ngbâ lakue ti manda Mbeti ti Nzapa nga e sara kue ti sara ye ague oko na atënë ti yâ ni. Na yâ ti Psaume 112, a yeke wara apendere wango ndali ti azo kue so aye ti ngbâ ti bata nzoni yingo-ti-hinga na gbele Nzapa. Atënë ti yâ ti Psaume 112 ague oko na ati Psaume 111. Akozo tënë ti yâ ti apsaume so use kue ayeke “I sepela L’Éternel” wala “Alléluia!” Nga na yanga ti Hébreu ti ândö, akamba ti tënë oko oko (so ayeke 22) ato nda ni na mbeni oko ti akete gere ti tënë ti Hébreu so ayeke 22.a

A sara si zo aduti na ngia

6. Na lege wa a iri tënë nzoni na ndo ti “zo” so akpe mbeto ti Nzapa, so a sara tënë ti lo na Psaume 112?

⁶ “Ngia ayeke na zo so akpe mbeto ti L’Éternel, lo so awara ngia mingi na yâ commandement ti Lo. Fade ahale ti lo aga azo ti ngangu na sese so; fade awagame ti azo ti mbilimbili awara nzoye.” (Ps. 112:1, 2). Bâ so kozoni, zo ti sungo psaume asara tënë ti “zo” oko. Me na hunzingo ti versê 2, lo sara tënë ti “azo ti mbilimbili”. Ye so afa so Psaume 112 alingbi ti sara tënë ti mbeni groupe so azo mingi ayeke na yâ ni. Yingo ti Nzapa apusu bazengele Paul ti fa so atënë ti Psaume 112:9 andu akozo Chrétien. (Diko 2 aCorinthien 9:8, 9.) Psaume so afa tâ nzoni mingi tongana nyen adisciple ti Christ so ayeke na sese laso alingbi ti duti na ngia!

7. Ngbanga ti nyen a hunda ti tene awakua ti Jéhovah akpe mbeto ti lo? A yeke nzoni mo bâ acommandement ti Nzapa tongana nyen?

⁷ Tongana ti so Psaume 112:1 afa, atâ Chrétien so ayeke na kota ngia mingi ndali ti so ala yeke ‘kpe mbeto ti L’Éternel’. Teti so ala ye pëpe ti sara ye so Nzapa ake, ye so amû maboko na ala ti ke yingo ti dunia ti Satan. Ala yeke na “ngia mingi” ti manda Bible nga ti sara ye ague oko na acommandement ti Nzapa. Na popo ni a yeke wara yanga so a mû ti fa nzoni tënë ti Royaume na ndo ti sese kue. Ala yeke sara ngangu ti sara si azo ti amara kue aga adisciple na ngoi so ala yeke fa na azo ti sioni tënë ti lango ti ngbanga ti Nzapa so ayeke ga.​—Ézéch. 3:17, 18; Mat. 28:19, 20.

8. (a) Tongana nyen a futa awakua ti Jéhovah so laso ayeke sara kua ti lo na bê ti ala kue? (b) Aye ti nzoni wa ayeke ku azo so ayeke wara ande fini na sese?

⁸ Teti so awakua ti Jéhovah so ayeke na sese ayeda na yanga so, wungo ti ala asi fadeso kutu mbasambala tongaso. Zo wa la alingbi ti ke so awakua ti Jéhovah aga “azo ti ngangu na sese”? (Jean 10:16; Apoc. 7:9, 14). Nga ala yeke ‘wara nzoye’ ande mingi na ngoi so Nzapa ayeke sara ye so lo leke na bê ti lo ti sara. Tongana mbeni groupe, a yeke bata ande azo so ayeke na beku ti wara fini ti lakue lakue na sese na ngoi ti “kota ye ti vundu” so ayeke ga, si ala ga “fini sese so mbilimbili ayeke duti ande na yâ ni.” Na peko ti Harmaguédon, azo so asö kuâ ayeke ‘wara ande nzoye’ mingi ahon ti kozo. Ala yeke duti ande nduru ti yamba azo kutu mingi so a yeke zingo ande ala na kuâ. So mbeni pendere ye si ayeke ku ala! Na nda ni, azo so awara “ngia mingi” na yâ ti acommandement ti Nzapa ayeke lingbi ande kue nga teti lakue lakue ala yeke wara ande “liberté ti gloire ti amolenge ti Nzapa.”​—2 Pi. 3:13; aRom. 8:21.

Sara kua na mosoro na ndara

9, 10. Na lege wa atâ Chrétien asara kua na mosoro ti ala na lege ti yingo? Na lege wa mbilimbili ti ala ayeke ngbâ ande lakue?

⁹ “Mosoro na yango-iri ayeke na yâ da ti lo; na mbilimbili ti lo angbâ lakue. Lumière asu na yâ bingo teti zo ti mbilimbili; Lo yeke na grâce, na nzobe, na mbilimbili.” (Ps. 112:3, 4). Ambeni wakua ti Jéhovah so Bible asara tënë ti ala ayeke lani na mosoro mingi. Nga na mbeni lege nde, azo so Nzapa ayeda na ala aga biani azo ti mosoro, même tongana ala yeke pëpe na gbâ ti nginza na akungba. Mingi ti azo so ayeda ti sara tere ti ala kete na gbele Nzapa alingbi ti duti awayere nga azo so azo abâ ala tongana ambumbuse zo, tongana ti so a si lani na ngoi ti Jésus (Luc 4:18; 7:22; Jean 7:49). Me, atâa zo ayeke na mosoro mingi na lege ti mitele wala lo yeke na ni mingi pëpe, lo lingbi ti duti na mosoro na lege ti yingo.​—Mat. 6:20; 1 Tim. 6:18, 19; diko Jacques 2:5.

¹⁰ A-Chrétien so a soro ala ti gue na yayu nga na ala so ayeke na beku ti wara fini na sese abata mosoro ti ala na lege ti yingo gi ndali ti ala wani pëpe. Me ala yeke tongana ‘lumière so asu’ na yâ ti bingo ti dunia ti Satan “teti zo ti mbilimbili.” Ala sara ni na lege so ala yeke mû maboko na azo ti bâ nzoni na lege ti kota ndara ti Nzapa nga na hingango ye ti lo. Awato agi ti kanga lege na fango tënë ti Royaume me aye so ala sara atï na ngu. Ye oko, ye ti peko ti kua ti mbilimbili so ayeke ‘ngbâ lakue.’ Teti so awakua ti Jéhovah angbâ lakue ti sara aye ti mbilimbili, ala hinga na bê ti ala kue so ala yeke ‘ngbâ ande lakue’ na fini.

11, 12. Ambeni lege so awakua ti Jéhovah ayeke sara kua na aye ti ala ayeke so wa?

¹¹ Awakua ti Jéhovah kue, atâa ala yeke ti ala so a soro ala ti gue na yayu wala ala yeke ti “azo mingi mingi”, ala mû ye mingi na azo. Psaume 112:9 atene: “Lo kangbi ye, lo mû ye na azo so ye amanke ala.” Fani mingi, atâ Chrétien laso ayeke mû ye na amba ti ala aChrétien na même na avoizin so ayeke na bezoin ni. Ala yeke mû ye nga ti mû maboko na azo ti ndo so aye tongana kota pupu wala ngu-nzapa so apika mingi abuba aye ti ala. Tongana ti so Jésus atene, mungo aye tongaso ayeke ga nga na ngia na zo.​—Diko Kusala 20:35; 2 aCorinthien 9:7.

¹² Na ndo ni, gbu li nga na ndo ti nginza so a mû ni ti sara si a sigigi na Tour ti Ba Ndo na ayanga ti kodoro 173; mingi ti azo so ayeke tene ayanga so ayeke na mosoro pëpe. A yeke wara nga Tour ti Ba Ndo na ayanga ti awambongi nde nde nga na Braille, wala yanga so a sara na mbeti teti awaziba.

Sara ye na nzoni bê nga na lege ni

13. Azo wa la azia tâ nzoni tapande ti mungo ye na nzoni bê? Tongana nyen e lingbi ti mû tapande ti ala?

¹³ “Ye aga nzoni teti zo so asara nzobe, na lo mû ye na azo [na bon].” (Ps. 112:5). Kite ayeke dä pëpe so mo bâ so azo so ayeke mû ye na amba ti ala ayeke sara ni lakue pëpe na nzoni bê. Ambeni amû ye gi ti fa na azo so ala yeke na ye mingi wala ala yeke mû ye na bê ti ala kue pëpe. Bê ti e ayeke nzere pëpe ti wara ye na tîtï mbeni zo so asara si e bâ so e yeke mbumbuse zo wala e yeke kungba na ndo ti lo. Me a yeke nzere na e mingi ti wara ye na tîtï zo so asara ye na nzoni bê. Jéhovah ayeke tâ nzoni tapande ti Zo so ayeke mû ye na nzoni bê nga na ngia (1 Tim. 1:11; Jacq. 1:5, 17). Jésus Christ amû tâ gi tapande ti nzoni bê ti Babâ ti lo (Marc 1:40-42). Ni la ti tene Nzapa abâ e tongana azo ti mbilimbili, e yeke mû ye na ngia nga na nzoni bê, mbilimbili na ngoi so e yeke mû maboko na azo na fango tënë ti hinga Jéhovah.

14. Ambeni lege so e lingbi ti ‘sara ye na lege ti mbilimbili’ ayeke so wa?

¹⁴ “ Lo sara ye ti lo na lege ti mbilimbili.” (Ps. 112:5). Tongana ti so a fa kozoni awe, wabatango ye so ayeke be-ta-zo ayeke bâ lege ti aye ti Wa ti lo na mbeni lege so ague oko na mbilimbili ti Jéhovah. (Diko Luc 12:42-44.) A yeke bâ ni na lege ti awango ti Bible so a mû na a-ancien, so ngoi na ngoi ayeke bâ lege ti akota siokpari na yâ ti congrégation. Ngbâa be-ta-zo ayeke sara ye tâ na lege ni, na a yeke bâ ni polele na lege ti awango ti Bible so a mû ti tene ye atambela nzoni na yâ ti acongrégation, na yâ ti ada ti amissionnaire nga na yâ ti aBéthel. A hunda na a-ancien nga na aChrétien kue ti sara ye na lege ni na mbage ti amba ti ala nga na azo so ayeke aTémoin ti Jéhovah pëpe, même na yâ ti aye so andu nginza.​—Diko Michée 6:8, 11.

Aye ti nzoni teti azo ti mbilimbili

15, 16. (a) Asioni sango ti dunia so ayeke sara nyen na ndo ti azo ti mbilimbili? (b) Awakua ti Jéhovah aleke na bê ti ala ti ngbâ ti sara nyen?

¹⁵ “Fade ye ayengi lo lâ oko pëpe; fade azo adabe ala na zo ti mbilimbili lakue. Mbeto asara lo pëpe tongana lo mä tënë ti sioye; bê ti lo aduti kpô, lo zia bê ti lo na L’Éternel. Bê ti lo akpengba, fade mbeto asara lo pëpe, juska lo bâ ye ti ngangu so aga na ndo awato ti lo.” (Ps. 112:6-8). Laso, azo ayeke mä asioni sango mingi ahon ti kozo. Na popo ti asioni sango so a yeke wara tënë ti abira, sioni sarango ye ti aterroriste, afini kobela nga na angbene kobela so akiri ayeke maï, sarango aye so ake ndia, yere nga na bubango aye tongana pupu nga na ngu. Asioni sango so ayeke sara nga ye na ndo ti azo so Nzapa abâ ala tongana azo ti mbilimbili, me ala yeke zia pëpe si mbeto ahon ndo ti ala. Bê ti ala “aduti kpô” na ‘bê ti ala akpengba’ na ngoi so lê ti ala ayeke na ndo ti ye so ayeke si kekereke, na ala hinga so fini dunia ti Nzapa aga nduru awe. Atâa tongana ye ti ngangu asi, ala lingbi biani ti gbu ngangu dä ndali ti so ala zia bê ti ala na ndo ti Jéhovah ti mû maboko na ala. Lo zia lâ oko pëpe si “ye ayengi” azo ti lo ti mbilimbili: lo mû maboko na ala nga lo kpengba ala ti gbu ngangu.​—aPhil. 4:13.

¹⁶ Na ndo ni, awato ake awakua ti Jéhovah so ayeke sara ye na lege ni nga ala yeke tene atënë ti mvene na ndo ti ala na ndo kue, me aye so ayeke sara ande pëpe si atâ Chrétien azia ti fa tënë. Awakua ti Jéhovah angbâ lakue ti luti ngangu na ala yengi pëpe na yâ ti kua so Jéhovah amû na ala: fango nzoni tënë ti Royaume nga na sarango si azo kue so ayeda na tënë ni aga adisciple. Kite ayeke dä pëpe so na ngoi so nda ni ayeke ga nduru, awato ayeke gi ande mingi ti kanga lege na azo ti mbilimbili. Kengo ndo so ayeke ga ande ngangu na ndo ti sese kue na ngoi so Satan Zabolo, so a iri lo Gog ti Magog ayeke londo ande na tere ti awakua ti Jéhovah. Na nda ni, e yeke ‘bâ ye ti ngangu so aga na ndo awato ti e’ na ngoi so ala yeke kui kuâ ti kamene. So kota pasa ti duti ande dä ti bâ lege so a yeke sara ande si iri ti Jéhovah aga biani nzoni-kue!​—Ézéch. 38:18, 22, 23.

‘A yä lo na lege ti yango-iri’

17. Na lege wa “a yä” zo ti mbilimbili “na lege ti yango-iri”?

¹⁷ A yeke duti ande mbeni pendere ye mingi ti sepela Jéhovah na yanga oko, sân ti tene Zabolo nga na dunia ti lo akanga lege na e. Azo kue so Nzapa angbâ ti bâ ala na nzoni lê, ala yeke duti ande na ngia ti sepela lo teti lakue lakue. Kamene ayeke gbu ande ala pëpe nga mbeni ye ayeke hon ande ala na ngangu pëpe, ndali ti so Jéhovah amû zendo so zo ti lo ti mbilimbili, fade “a yä nza ti lo na lege ti yango-iri.” (Ps. 112:9). Zo ti Jéhovah ti mbilimbili ayeke sara ande matanga ti songo benda na ngoi so lo bâ awato kue ti komandema ti Jéhovah atï.

18. Andangba tënë ti Psaume 112 ayeke ga ande tâ tënë tongana nyen?

¹⁸ “Fade zo ti sioni abâ ye so, na vundu agbu lo; fade lo te pembe ti lo, na lo miro. Fade ye so zo ti sioni azia bê ti lo dä aga ye senge.” (Ps. 112:10). Na yâ ti kete ngoi, azo kue so angbâ ti gi ti kanga lege na awakua ti Jéhovah ayeke “miro” na yâ ti bê so asara ala nga na kengo ndo so ala yeke na ni. Nzara so ala yeke na ni ti sara si kusala ti e aluti ayeke hunzi ande legeoko na ala na ngoi so “kota ye ti vundu” ayeke si.​—Mat. 24:21.

19. E hinga nyen na bê ti e kue?

¹⁹ Mo yeke duti ande na popo ti azo so ayeke duti ande na ngia ti sö kuâ na ngoi ti kota songo benda so? A lingbi ti si so kobela wala ngu ti mo so ague na li ni asara si mo kui kozoni ti tene a futi dunia ti Satan. Tongana a yeke tongaso, mo yeke duti ande na popo ti “azo ti mbilimbili” so a yeke zingo ande ala? (Kus. 24:15). Kiringo tënë ni ayeke duti ande “en” tongana mo ngbâ ti mä na bê na ngere so Jésus afuta ti zi e nga mo mû tapande ti Jéhovah, tongana ti so azo so asara tënë ti ala tongana “zo” ti mbilimbili ti Psaume 112 asara. (Diko aÉphésien 5:1, 2.) Jéhovah ayeke sara ande si azo “adabe ala” lakue na azo so, na lo yeke sara si a girisa pëpe akusala ti mbilimbili so ala sara. Jéhovah ayeke dabe ti lo na ala nga lo yeke ye ala teti lakue lakue nga kpu na kpu.​—Ps. 112:3, 6, 9.

[Kete tënë na gbe ni]

Atënë ti gbu li dä

• Ambeni nda ti tënë so apusu e ti tene “Alléluia” ayeke so wa?

• Ye wa so asi laso asara si atâ Chrétien ayeke na ngia?

• Jéhovah aye zo so amû ye tongana nyen?

[Foto na lembeti 25]

Ti tene Nzapa angbâ ti bâ e na nzoni lê, a lingbi e fa so e yeke na mabe na yâ ti mênë ti Jésus so atuku

[Foto na lembeti 26]

Anginza so azo ayeke mû na bê ti ala wani ayeke mû maboko: na azo so ye ti ngangu asi na ala, na sigingo na ambeti ti Nzapa nga na ambeni kusala so aChrétien ayeke sara