Ala asewa ti aChrétien, ala mû tapande ti Jésus!

“Christ . . . [azia] na ala mbeni tapande si ala mû tâ gi peko ti gere ti lo mbilimbili.”​—1 PI. 2:21.

1. (a) Kusala wa Molenge ti Nzapa asara na ngoi ti crééngo aye? (b) Bê ti Jésus ayeke tongana nyen na mbage ti azo?

NA NGOI so Nzapa aleke lani ayayu na sese, kozo Molenge ti lo ayeke na tere ti lo “tongana wakode.” Molenge ti Nzapa asara nga kua maboko na maboko na Babâ ti lo Jéhovah na ngoi so Jéhovah ayeke fa alege nde nde ti sarango na gbâ ti mara ti anyama nde nde nga na aye tongana akeke na afleur na ndo ti sese; na lo mû maboko na Jéhovah na ngoi so lo yeke sara aye so. Lo mû nga lani maboko na Babâ ti lo ti leke Paradis so fade ayeke ga ndo ti duti ti azo so lo sara ala na image ti lo. Molenge ti Nzapa, so na pekoni a hinga lo na iri ti Jésus, aye azo mingi. Lo “wara ngia na popo ti amolenge ti azo.”​—aProv. 8:27-31; Gen. 1:26, 27.

2. (a) Ye wa Jéhovah amû na azo so alingbi kue pëpe ti mû maboko na ala? (b) Mbeni oko ti aye so Bible ayeke fa lege na azo dä ayeke so wa?

² Na pekoni so kozo koli na wali ti lo asara siokpari, sarango mbeni ye ti zi azo na gbe ti siokpari aga mbeni kota ye na yâ ti ye so Jéhovah aleke na bê ti lo ti sara. Jéhovah amû Christ tongana ngere so a futa ti zi azo na gbe ti siokpari (aRom. 5:8). Na ndo ni, Jéhovah amû na e Bible so ayeke fa na zo ye so lo lingbi ti sara si fini ti lo aga nzoni atâa awokongo ti lo (Ps. 119:105). Na yâ ti Bible, Jéhovah afa na azo ye so ala lingbi ti sara si sewa ti ala angbâ ti kpengba nga ti wara ngia. Na ndo ti mariage, mbeti ti Genèse atene so a lingbi koli ‘aduti na wali ti lo; fade ala ga mitele oko.’​—Gen. 2:24.

3. (a) Ye wa Jésus afa na ndo ti mariage? (b) E yeke bâ ande nyen na yâ ti article so?

³ Na ngoi ti kusala ti Jésus na sese, lo fa polele so a leke mariage ti tene a ngbâ lakue. Lo fa akpengba-ndia so, tongana asewa asara ye alingbi na ni, a yeke mû maboko na ala ti kpe abango ndo nga na asarango ye so alingbi ti buba yâ ti mariage ti ala wala so alingbi ti sara si sewa ti ala ayeke na ngia mbeni pëpe (Mat. 5:27-37; 7:12). Na yâ ti article so, e yeke bâ tongana nyen tapande ti Jésus alingbi ti mû maboko na akoli na awali ti ala, ababâ na amama nga na amolenge ti duti na ngia.

Tongana nyen mbeni koli Chrétien ayeke ne wali ti lo?

4. Ye wa ague oko na popo ti kusala ti Jésus na ti aita-koli so asara mariage awe?

⁴ Nzapa azia koli ti duti li ti sewa, gi tongana ti so Jésus ayeke Li ti congrégation. Bazengele Paul atene: “Koli ayeke li ti wali ti lo tongana ti so Christ nga ayeke li ti congrégation, so ayeke tere ti lo na so lo yeke sauveur ni. Akoli, ala ngbâ lakue ti ndoye awali ti ala gi tongana ti so Christ nga andoye congrégation na lo kä tere ti lo na kuâ ndali ti congrégation ni.” (aÉph. 5:23, 25). Biani, lege so Jésus asara ye na adisciple ti lo afa tapande ti lege so a yeke nzoni aita-koli asara ye na awali ti ala. Zia e bâ ambeni lege so Jésus asara ye na komandema so Nzapa amû na lo.

5. Jésus akomande na ndo ti adisciple ti lo tongana nyen?

⁵ Jésus ‘asara ye na ngangu pëpe na lo yeke na tâ be-ti-molenge’. (Mat. 11:29). Lo yeke nduru ti sara ye lani tongana a hunda ti sara ni. Lo yeke sara akua kue so a ku na mbage ti lo ti sara (Marc 6:34; Jean 2:14-17). Na nzoni bê, lo mû wango na adisciple ti lo, même lo yeke sara ni fani mingi tongana a hunda ti sara ni (Mat. 20:21-28; Marc 9:33-37; Luc 22:24-27). Atâa so kue, lâ oko pëpe Jésus asuku na adisciple ti lo wala lo bi kamene na lê ti ala; lâ oko pëpe lo sara si ala bâ so lo ye ala pëpe wala ala bâ so ala lingbi pëpe ti sara aye so lo fa na ala ti sara. Me lo gonda adisciple ti lo na lo sara si ala yapu (Luc 10:17-21). Ni la adisciple ti Jésus ane lo mingi ndali ti so lo sara ye na ala na ndoye nga na nzoni bê.

6. (a) Lege so Jésus asara na ye na adisciple ti lo afa nyen na akoli ti awali? (b) Wango wa Pierre amû na akoli ti awali?

⁶ Tapande ti Jésus afa na aita-koli so atâa so ala yeke li ti awali ti ala, ye so amû lege na ala pëpe ti komande na ngangu na ndo ti ala. Me a hunda ti tene ala ne ala nga ala ye ala na bê ti ala kue. Bazengele Pierre awa akoli ti awali ti sara ye na ndoye tongana ti Jésus na lege so ala “duti na awali ti ala na lege ti hingango ye” nga ala “ne” ala. (Diko 1 Pierre 3:7.) Tongaso, na lege wa koli alingbi ti sara kua na komandema so Nzapa amû na lo nga na oko ngoi ni ti sara ye na wali ti lo tongana mbeni zo so alingbi ti tene a ne lo?

7. Na lege wa koli alingbi ti ne wali ti lo? Mû mbeni tapande.

⁷ Mbeni lege so koli alingbi ti ne na wali ti lo ayeke ti bâ bango ndo ti lo na nene ni nga ti hinga atënë ti bê ti lo kozo ti mû adesizion so andu sewa ni. Peut-être ala ye ti mû desizion na ndo ti guengo na yâ ti mbeni da nde wala changengo kua wala aye so azo ayeke sara ka ni, aye tongana ndo so ala lingbi ti gue dä ti wu tere wala tongana nyen ti sara ye na ndara na nginza ti ala si ala gbu lê ti ngere ti aye so ayeke gue na li ni mingi. Teti so adesizion so andu sewa ni, koli ni ayeke sara ye na nzoni bê tongana lo hunda wali ti lo ti hinga bibe ti lo na ndo ti tënë ni ndali ti so sarango tongaso alingbi ti mû maboko na koli ni ti mû nzoni desizion so afa so lo yeke bi bê na amba ti lo, na a yeke duti ande ngangu pëpe na wali ti lo ti yeda na ni (aProv. 15:22). Aita-koli so ane awali ti ala, awali ni ayeke ye ala nga ayeke ne ala; na mingi ahon so, Jéhovah ayeke bâ ala na nzoni lê.​—aÉph. 5:28, 29.

Tongana nyen wali ayeke fa so lo ne koli ti lo mingi?

8. Ngbanga ti nyen Ève ayeke tapande so a lingbi a kpe ni?

⁸ Jésus ayeke tâ pendere tapande teti aita-wali na ndo ti tënë ti wokongo tere na gbe ti komandema. Kota kangbi ayeke na popo ti lege so lo bâ na komandema nga na lege so kozo wali abâ na ni. Ève ayeke pëpe mbeni nzoni tapande teti awali ti akoli. Nzapa azia mbeni zo na li ti lo na a yeke na lege ti zo ni so si Jéhovah ayeke fa na lo aye so a lingbi lo sara. Ye oko, Ève ane pëpe komandema ti koli ti lo. Lo sara ye ague nde na ti so Adam afa na lo (Gen. 2:16, 17; 3:3; 1 aCor. 11:3). A yeke tâ tënë so a handa Ève; me a yeke nzoni fade ti tene lo hunda koli ti lo ti bâ wala a yeke na lege ni ti yeda na go so atene ni yeke fa na lo ye so “Nzapa ahinga”. Me atâa so a yeke na lo ti sara ni pëpe, lo fa na koli ti lo ye so a lingbi a sara ni.​—Gen. 3:5, 6; 1 Tim. 2:14.

9. Tapande wa Jésus azia na ndo ti woko tere na gbe ti komandema?

⁹ Nde na Ève, Jésus ayeke tâ nzoni tapande na ndo ti tënë ti wokongo tere na gbe ti Mokonzi ti lo. Bango ndo ti lo nga na sarango ye ti lo afa so lo “bi bê ti lo ti gbugburu ndo pëpe, so ti tene ti lingbi tere na Nzapa.” Me “lo dö aye ti lo kue lo zia, lo mû tere ti ngbâa”. (aPhil. 2:5-7). Jésus so laso ayeke komande tongana gbia angbâ lakue ti duti na oko bango ndo so. Na tâ be-ti-molenge lo woko tere ti lo na gbe ti Babâ ti lo na yâ ti aye kue nga lo sara kua maboko na maboko na Mokonzi ti lo.​—Mat. 20:23; Jean 5:30; 1 aCor. 15:28.

10. Tongana nyen mbeni wali alingbi ti yeda na komandema ti koli ti lo?

¹⁰ Mbeni ita-wali ayeke sara nzoni tongana lo mû tapande ti Jésus na lo sara kua maboko na maboko na koli ti lo so ayeke mû li ni. (Diko 1 Pierre 2:21; 3:1, 2.) Bâ mbeni ye so na yâ ni lege azi na lo ti sara tongaso. Molenge ti ala ti koli ahunda lo ti zi lege na lo ti gue ti sara mbeni ye so a hunda ti tene babâ na mama ni ayeda kozoni awe si lo gue lo sara. Teti so ade babâ na mama ni asara lisoro na ndo ti tënë ni pëpe, a yeke nzoni ti tene mama ni ahunda molenge ni, atene: “Mo hunda babâ ti mo awe?” Tongana ade molenge ni asara ni pëpe, a yeke nzoni ti tene wali ni asara lisoro na ndo ni na koli ti lo kozoni si ala mû desizion. Na ndo ni, mbeni ita-wali ayeke ke ande pëpe tënë so koli ti lo atene wala lo yeke dë gaba na lo pëpe na devant ti amolenge ti ala. Tongana wali ni ayeda pëpe na mbeni ye so koli ti lo atene, lo yeke sara tënë ni na lo na ngoi so ala yeke gi use.​—aÉph. 6:4.

Jésus ayeke tapande teti ababâ na amama

11. Tapande wa Jésus azia na ababâ na amama?

¹¹ Atâa so Jésus amû wali pëpe wala lo dü amolenge pëpe, lo yeke tâ nzoni tapande teti ababâ na amama so ayeke aChrétien. Na lege wa? Na ndoye nga na kangango bê ti ku, lo fa ye na adisciple ti lo na lege ti atënë ti yanga ti lo nga na asarango ye ti lo. Lo fa na ala tongana nyen ti sara kua so lo mû na ala (Luc 8:1). Bango ndo ti Jésus nga na asarango ye ti lo na mbage ti adisciple ti lo afa na ala lege so a lingbi ala sara ye na popo ti ala.​—Diko Jean 13:14-17.

12, 13. A hunda ti tene ababâ na amama asara nyen tongana ala ye ti tene amolenge ti ala akpe mbeto ti Nzapa?

¹² Amolenge aye ka mingi ti mû tapande ti ababâ na amama ti ala, atâa a yeke nzoni wala a yeke nzoni pëpe. Ni la, ala ababâ na amama, ala hunda tere ti ala: ‘Nyen la e yeke fa na amolenge ti e tongana a ndu tënë ti ngoi so e yeke mû ti bâ na télé nga ti sara ngia, tongana a haka ni na ngoi so e yeke mû ti manda na Bible nga ti fa tënë? Aye wa sewa ti e azia biani na kozo ndo? E yeke zia nzoni tapande na lege so e zia tâ vorongo na kozo ndo na yâ ti fini ti e?’ Tongana ababâ na amama aye ti tene amolenge ti ala akono na aga azo so ayeke kpe mbeto ti Nzapa, a lingbi ala wani akpe ndia ti Jéhovah.​—Deut. 6:6.

¹³ Tongana ababâ na amama asara ngangu ti sara ye lâ oko oko ague oko na akpengba-ndia ti Bible, amolenge ti ala ayeke bâ ni. Tënë so ala yeke tene nga na aye so ala yeke fa ayeke ne na lê ti amolenge ni. Ye oko, tongana amolenge abâ so ababâ na amama ti ala ayeke sara pëpe ye so ala yeke tene, amolenge ni ayeke bâ so a yeke kota ye pëpe ti bata akpengba-ndia ti Bible. Ye ti pekoni ayeke so amolenge ni ayeke duti ande nduru ti woko na gbe ti ngangu so azo ti dunia so ayeke sara na ndo ti ala.

14, 15. A yeke nzoni ababâ na amama asara si amolenge ti ala aduti na nzara ti sara nyen? Mbeni lege ti sara ni ayeke so wa?

¹⁴ Ababâ na amama ahinga so batango molenge ahunda ye mingi ahon gi ti mû na lo aye ti mitele so lo yeke na bezoin ni. Tongaso, a yeke na lege ti ndara pëpe ti fa na molenge ti tomba gi peko ti aye so lo yeke bâ nzoni dä na lege ti mitele (Zo-ti. 7:12). Jésus afa na adisciple ti lo ti gi royaume ti Nzapa na mbilimbili ti lo kozoni (Mat. 6:33). Ni la, ti mû tapande ti Jésus, a yeke nzoni ababâ na amama so ayeke aChrétien asara ngangu ti sara si amolenge ti ala aduti na nzara ti tomba peko ti aye ti yingo.

¹⁵ Mbeni lege so ababâ na amama alingbi ti sara na ni ayeke ti sara si amolenge ti ala asara kamarade na aita so ayeke na yâ ti kusala ti ngoi kue. Tara ti bâ tongana nyen sarango kamarade na apionnier wala surveillant ti circonscription na wali ti lo ayeke ga na ye ti nzoni mingi na amaseka so ayeke na popo ti ngu 13 ti si na ngu 19. Na ngia na bê, amissionnaire, aBéthelite nga na aita so alondo na ando nde nde ti ga ti leke ada so andu kua ti Jéhovah alingbi ti sara tënë na ndo ti ngia so ala yeke na ni ti sara na Jéhovah. Kite ayeke dä pëpe so aita so ayeke na apendere ye so asi na ala ti fa ni. Aita so amû tere ti ala kue ti sara na kua ti Jéhovah. Tongaso, ala yeke mbeni nzoni tapande so alingbi ti mû maboko mingi na amolenge ti mo ti mû adesizion ti ndara, ti zia na gbele ti ala ti sara aye so andu kua ti Nzapa nga ti manda aye so alingbi ti mû maboko na ala ti wara aye so ala yeke na bezoin ni na ngoi so ala yeke sara kua ti ngoi kue.

Amolenge, ye wa ayeke mû maboko na ala ti mû tapande ti Jésus?

16. Na lege wa Jésus ane babâ na mama ti lo na sese nga na Babâ ti lo ti yayu?

¹⁶ Ala amolenge, Jésus azia nga na ala tâ nzoni tapande. Nzapa amû Jésus na Joseph na Marie ti tene ala bata lo, na Jésus amä yanga ti ala. (Diko Luc 2:51.) Lo hinga so, atâa so ala lingbi kue pëpe, Nzapa amû na ala kua ti bango lege ti lo. Nda ni la a yeke ngbanga ti Jésus ti ne ala (Deut. 5:16; Mat. 15:4). Na ngoi so Jésus aga kota, lo yeke sara lakue ye so anzere na Babâ ti lo ti yayu. Ye so ahunda ti tene lo gbu ngangu na yâ ti atara (Mat. 4:1-10). Ala amaseka, na ambeni ngoi ala lingbi ti duti na nzara ti ke yanga ti ababâ na amama ti ala. Tongaso, nyen la alingbi ti mû maboko na ala ti mû tapande ti Jésus?

17, 18. (a) Mara ti kpale wa amaseka ayeke wara na ekole? (b) Ti dabe na aye wa alingbi ti mû maboko na amaseka ti gbu ngangu dä?

¹⁷ Kite ayeke dä pëpe so mingi ti amba ti mo so mo na ala ayeke manda mbeti ane akpengba-ndia ti Bible mingi pëpe wala ala ne ni kete pëpe. Ala lingbi ti tara ti pusu mo ti sara aye so ayeke sioni nga ti he mo tongana mo ke ti sara ni. Amba ti mo ti ekole ayeke zia ambeni iri na ndo ti mo ti tene a son mo ndali ti so mo ke ti sara ambeni ye legeoko na ala? Tongana a yeke tongaso, mo yeke sara tongana nyen? Mo hinga so tongana mbeto asara mo na mo sara ye legeoko na ala, mo yeke zia ande vundu na bê ti babâ na mama ti mo nga na bê ti Jéhovah. Ye wa ayeke si na mo tongana mo sara ye tongana ti amba ti mo ti ekole? Peut-être mo leke na bê ti mo ti sara ambeni ye, na tapande mo ye ti ga pionnier wala wakua ti mungo maboko, mo ye ti sara kua na mbeni territoire so bezoin ti awafango tënë ti Royaume ayeke dä mingi wala ti ga Béthelite. Sarango kamarade na amba ti mo ti ekole alingbi ti mû maboko na mo ti sara kua so mo leke na bê ti mo ti sara?

¹⁸ Ala amaseka so ayeke na yâ ti congrégation, ala bâ lâ oko pëpe so ala tingbi na ambeni ye so atara mabe ti ala? Ala sara ye tongana nyen? Ala dabe ti ala na tapande so Jésus azia na ala. Lo ke ti tï na yâ ti atara nga lo luti ngangu ndali ti ye so lo hinga ayeke na lege ni. Ti dabe ti ala na aye so ayeke mû maboko na ala ti wara ngangu ti tene polele na amba ti ala ti ekole so ala ye pëpe ti bungbi oko na ala ti sara mbeni ye so ala hinga ayeke sioni. Tongana ti Jésus, ala zia lê ti ala gi na ndo ti mungo fini ti ala kue ti sara na Jéhovah na ngia nga ti mä yanga ti lo.​—aHéb. 12:2.

Kota ye so ayeke sara si sewa aduti na ngia

19. Ye wa alingbi ti sara si zo awara tâ ngia na yâ ti fini ti lo?

¹⁹ Jéhovah Nzapa na Jésus Christ aye ti tene azo awara tâ nzoni ye. Atâa so e lingbi kue pëpe, e lingbi ti wara kamême ngia (És. 48:17, 18; Mat. 5:3). Jésus afa atâ tënë na ndo ti Nzapa so ayeke mû lege na azo ti duti na ngia, me a yeke aye kue so Jésus afa na adisciple ti lo la pëpe. Jésus afa nga tâ nzoni ye so ala lingbi ti sara na yâ ti fini ti ala. Ahon so, aye so lo sara na yâ ti fini ti lo nga na nzoni bango ndo so lo yeke na ni ayeke mbeni nzoni tapande ndali ti ala. E kue, atâa ye wa a ku na mbage ti e na yâ ti sewa, tapande ti lo alingbi ti mû maboko na e. Ni la, ala akoli na awali ti ala, ababâ na amama nga na amolenge, ala mû tapande ti Jésus. Mungo tapande ti Jésus nga na sarango ye ague oko na afango ye ti lo ayeke biani kota ye so ayeke sara si sewa aduti na ngia.

Mo yeke kiri tënë tongana nyen?

• A yeke nzoni akoli ti awali asara kusala tongana nyen na komandema so Nzapa amû na ala?

• Na lege wa awali ti akoli alingbi ti mû tapande ti Jésus?

• Lege so Jésus asara ye na mbage ti adisciple ti lo afa nyen na ababâ na amama?

• Tapande ti Jésus afa nyen na amaseka?

[Foto na lembeti 13]

Kozo ti mû mbeni desizion so andu sewa, mbeni koli so aye wali ti lo ayeke sara nyen?

[Foto na lembeti 14]

Na yâ ti aye wa lege azi na mbeni wali ti yeda na komandema ti koli ti lo?

[Foto na lembeti 15]

Amolenge ayeke mû tapande ti anzoni sarango ye ti ababâ na amama ti ala