Abungbi ti vorongo Nzapa kue ayeke nzoni?

E YEKE na yâ ti mbeni dunia so asi singo na abungbi ti vorongo Nzapa nde nde. Mbeni gingo nda ti ye so a sara ade ti ninga pëpe afa so, na yâ ti dunia, akota bungbi ti vorongo Nzapa ayeke 19 na akete ni ayeke 10 000 tongaso. Ye so amû lege na azo ti soro bungbi ti vorongo Nzapa so ala ye ti gue dä. Tongaso, bungbi ti vorongo Nzapa so mo soro ti gue dä ayeke kota ye biani?

Ambeni zo atene so abungbi ti vorongo Nzapa nde nde ayeke tongana alege nde nde so ague na mbeni hoto. Ti ala, atâa a yeke lege wa si zo asoro ti mû a sara ye oko pëpe, teti alege so kue ague gi na ndo oko. Ala tene so Nzapa ti Ngangu Ahon Kue ayeke gi oko, tongaso abungbi ti vorongo Nzapa kue ague gi ti si na lo.

Abungbi ti vorongo Nzapa kue ague gi ti si na Nzapa?

Jésus Christ, mbeni oko ti awafango tënë ti Nzapa so azo ane lo mingi na yâ ti mbaï ti azo, atene nyen na ndo ti tënë so? Lo tene na adisciple ti lo: ‘A yeke nzoni ala lï na kete yanga ti da.’ Ngbanga ti nyen? ‘Ngbanga ti so tongana zo alï na kota yanga ti da, andâ lo mû lege ti kuâ. Lege ti kuâ ni ayeke kota si azo mingi ayeke mû ni. Yanga ti da so zo alingbi ti lï dä si lo ngbâ na fini ayeke kete. Lege ni ayeke kete. Azo ti warango lege ni so ayeke mingi pëpe.’​—Matthieu 7:13, 14, Fini Mbuki, 2001.

Jésus aye biani ti tene so ambeni bungbi ti vorongo Nzapa ayeke mû “lege ti kuâ”? Wala lo fa so ala so amä na bê na Nzapa pëpe si ayeke na ndo ti kota lege, na ala so amä na bê na Nzapa (atâa bungbi ti vorongo Nzapa ti ala ayeke so wa) ala yeke na ndo ti kete lege so ague na fini?

Na pekoni so lo tene alege ayeke gi use, Jésus atene: ‘Ala sara hange na awayanga-Nzapa ti mvene! Awayanga-Nzapa ni ayeke yü poro ti tere ti taba si ayeke ga na popo ti ala. Andâ ala yeke tâ asioni mbo ti ngonda.’ (Matthieu 7:15, FM 01). Na pekoni lo tene: ‘Azo so atene na mbi “Gbia, Gbia”, ala lï ande kue na ndo ti Gbia ti yayu pëpe, me ala so asara ye ti bê ti Babâ ti mbi so ayeke na yayu, si a lï ande dä.’ (Matthieu 7:21, Tene ti Nzapa, Fini Mbuki, 1988). Tongana a iri mbeni zo prophète wala zo ni atene so Jésus ayeke ‘Gbia’ ti ni, a yeke na lege ni ti tene so lo yeke zo so avoro Nzapa, lo yeke païen pëpe. A yeke polele so Jésus atene abungbi ti vorongo Nzapa kue pëpe si ayeke nzoni, na a yeke awafango tënë ti Nzapa kue pëpe si e lingbi ti zia bê ti e na ala.

Zo alingbi ti hinga kete lege so?

Teti so alege kue pëpe si ague na Nzapa, tongana nyen mo lingbi ti hinga tâ lege so ague na zo na fini na popo ti alege mingi so? Bâ tapande so: Bâ so mo girisa na yâ ti mbeni kota gbata. Mo hunda azo ti mû maboko na mo. Mbeni zo atene na mo sân kite ti gue na mbage ti koli. Mbeni ahunda na mo ti gue na mbage ti wali. Mbeni zo ni nde atene na mo ti mû lege so bê ti mo aye. Na nda ni, mbeni zo so ayeke tambela tongana mo asigigi na mbeni carte so zo alingbi ti zia bê ti lo na ni ti fa na mo nzoni lege ni. Na pekoni lo mû na mo carte ni ti tene mo bi lê na ndo ni na yâ ti tambela ti mo. Mo lingbi ti hinga so mo yeke si ande na ndo so mo ye ti gue dä pëpe?

Legeoko nga, tongana a ndu tënë ti sorongo tâ bungbi ti vorongo Nzapa, e yeke na bezoin ti mbeni nzoni carte ti fa lege na e. Mbeni ayeke dä? En, a yeke dä. Carte so ayeke Bible, so atene: ‘Mbeti ti Nzapa kue, lo mveni si afa tënë ni na bê ti azo so asara ni, si Mbeti ni alingbi ti fa tënë na azo, ti ke na mvene so aye ti handa ala, ti kiri na ala na tâ tënë, ti fa na ala ye so ayeke mbilimbili.’—2 Timothée 3:16, FM 88.

Mo yeke peut-être na Bible na yanga ti kodoro ti mo so alingbi ti fa na mo lege ti vorongo Nzapa nzoni. Azo ti sarango mbeti so, aTémoin ti Jéhovah, asigigi na mbeni Bible na yanga ti Sango so iri ni ayeke Mbeti ti Nzapa ti fini dunia: Matthieu—Apocalypse. Ye oko, tongana mo yeke Témoin ti Jéhovah pëpe, mo lingbi ti diko ambeni Bible nde ti bê ti mo tongana mo yeke gbu li ti mo na ndo ti lege ti hingango nzoni na sioni bungbi ti vorongo Nzapa. Tongaso, na yâ ti article so nga na amara ni so ayeke ga na pekoni, a sara kusala na aversê ti aBible nde nde so abungbi ti vorongo Nzapa mingi ane ni.

Tongana mo yeke diko a-article so, haka ye so mo hinga na ye so Bible atene. Bata na li ti mo atënë ti Jésus na ndo ti lege so e lingbi ti sara kangbi na popo ti nzoni bungbi ti vorongo Nzapa na sioni bungbi ti vorongo Nzapa. Lo tene: ‘Legeoko, keke so kue ayeke nzoni adü gi alê ti nzoni, si keke ti sioni adü gi alê ti sioni. Keke ti nzoni alingbi ti dü lê ti sioni pëpe, si keke ti sioni alingbi ti dü lê ti nzoni pëpe.’ (Matthieu 7:17, 18, FM 88). E bâ gi anzoni lengo ota senge so Bible afa ti hinga na “keke ti nzoni”.

[Kete tënë na lembeti 3]

Bible ayeke tongana mbeni nzoni carte so alingbi ti mû maboko na mbeni zo ti wara nzoni bungbi ti vorongo Nzapa