Nzapa ayeda na alege nde nde kue so a yeke voro na lo?
Aye so azo mingi ayeke tene:
▪ “Nzapa kue gi nzapa.”
▪ “Kota ye ni ayeke ti voro Nzapa na bê kue awe.”
Jésus atene ti lo nyen?
▪ “Ala lï na kete yanga ti gbagba ni; teti lege so ayeke gue na futingo ayeke kota nga lê ni akono, na gbâ ti azo si ayeke hon dä; me lê ti lege so ague na fini akono pëpe na yanga ti gbagba ni ayeke kete, na azo mingi pëpe si ayeke wara ni.” (Matthieu 7:13, 14). Jésus atene pëpe so nzapa kue gi nzapa.
▪ “Na lâ ni kâ, fade azo mingi ayeke tene na mbi, ‘Seigneur, Seigneur, e tene aprophétie na iri ti mo pëpe? E tomba asioni yingo na iri ti mo pëpe? E sara akusala ti ngangu mingi na iri [ti] mo pëpe?’ Me fade mbi yeke tene na ala: Mbi hinga ala lâ oko pëpe! Ala hon yongoro kâ na tere ti mbi, ala azo so akpe ndia pëpe.” (Matthieu 7:22, 23). Jésus ayeda pëpe na azo kue so atene ala yeke adisciple ti lo.
GBÂ ti azo so ayeke voro nzapa abâ na nene ni mingi aye so ala mä na bê dä nga na angobo ti azo ti giriri. Me ye wa ayeke si tongana aye so ala mä na bê dä ague nde na ye so ayeke na yâ ti Mbeti ti Nzapa, Bible? Jésus afa so tongana zo amû peko ti angobo ti azo ti giriri, lo lingbi ti wara sioni dä. A yeke ni la lo gboto lani mê ti amokonzi-nzapa ti ngoi ti lo, lo tene: “Ndali ti ngobo ti ala, ala sara si tënë ti Nzapa ayeke na ngangu mbeni pëpe.” Na pekoni, lo kiri na ndo ti tënë so Nzapa atene lani, lo tene: “Azo so agonda mbi gi na yanga ti ala senge, me bê ti ala ague yongoro mingi na mbi. A yeke senge senge si ala ngbâ ti voro mbi, ngbanga ti so aye so ala yeke fa ayeke gi acommandement so alondo na azo.”—Matthieu 15:1-9; Ésaïe 29:13.
Gi ye so zo amä na bê na ni la ayeke kota ye pëpe; sarango ye ti tere ti zo kue ayeke kota ye nga. Bible asara tënë ti ambeni zo so atene ala yeke voro Nzapa atene: “Ala tene na lê ti azo atene ala hinga Nzapa, andâ na lege ti sarango ye ti ala, ala bere tënë ti lo awe.” (Tite 1:16). Bible asara tënë ti azo ti ngoi ti e atene: “Azo so andoye angia ahon ti ndoye Nzapa, ala yeke sara ye mo bâ mo tene ala gbu tënë ti Nzapa ngangu, andâ ala ke ngangu ti tënë ni awe; mo turnê peko ti mo na azo so.”—2 Timothée 3:4, 5.
A hunda ti tene zo avoro Nzapa na bê ti lo kue, me a hunda nga ti sara mbeni ye. Ndali ti nyen? Ndali ti so mbeni zo alingbi ti voro Nzapa na bê kue, me ye so a fa na lo ayeke tâ tënë pëpe. Tongaso, a yeke kota ye ti tene zo ahinga tâ tënë na ndo ti Nzapa (aRomain 10:2, 3). Ti manda ye so Bible atene na ndo ti Nzapa nga ti sara ye alingbi na ni ayeke mû maboko na e ti sara ye so anzere na Nzapa (Matthieu 7:21). Ni la, ti voro Nzapa na lege ni, a lingbi e sara ni na nzoni bibe, ye so e mä na bê dä alondo gi na Bible nga e sara ye so ayeke na lege ni, so ti tene e sara ye so bê ti Nzapa aye lâ na lâ.—1 Jean 2:17.
Tongana mo ye ti hinga ye mingi na ndo ti ye so Bible afa na e na ndo ti Nzapa, bâ aTémoin ti Jéhovah ti tene ala manda Bible na mo senge senge na yanga-da ti mo.
[Kete tënë na lembeti 9]
Ti voro Nzapa na lege ni, a lingbi e sara ni na nzoni bibe, ye so e mä na bê dä alondo gi na Bible nga e sara ye so ayeke na lege ni