Nzapa atene ni yeke mû na azo mosoro?

‘Nzapa aye si mo ga zo ti mosoro, mo wara gbâ ti akutukutu, dengo buze ti mo amaï. Mä gi na bê na lo, sigigi na nginza so ayeke na bozo ti mo, na mo mû ye kue na lo.’

AYEKE tënë so ambeni bungbi ti vorongo Nzapa na Brésil ayeke fa, tënë so asigigi na yâ ti mbeni mbeti-sango ti kodoro ni. Tënë so agbu bê ti azo mingi. Na lege ti mbeni tënë so a hunda na ambeni zo so atene ani yeke aChrétien na kodoro ti Amerika, mbeni mbeti-sango (Time) atene: “Tongana a mû azo 100, azo 61 ayeda so Nzapa aye si azo aga azo ti mosoro. Azo 31 . . . ayeda so tongana mo mû nginza ti mo na Nzapa, fade lo yeke iri tënë nzoni na ndo ti mo na mungo na mo gbâ ti nginza na pekoni.”

Mara ti tënë tongaso aluti na ndo ti ye so a iri ni fango tënë ti Nzapa na ndo ti warango mosoro, so a mû ndo mingi na yâ ti akodoro so ayeke na mbongo ti Amerika, tongana Brésil, na azo mingi ague na a-eglize so afa atene Nzapa ayeke mû nginza wala mosoro mingi na azo. A yeke tâ tënë so Nzapa atene ni yeke mû mosoro na azo so ayeke voro ni? Awakua ti Nzapa ti giriri kue ayeke azo ti mosoro?

A yeke tâ tënë so na yâ ti mbage ti Mbeti Nzapa so a sû ândö na Hébreu, e bâ so fani mingi azo so Nzapa airi tënë nzoni na ndo ti ala lo mû na ala mosoro. Na tapande, na Deutéronome 8:18, e diko tënë so: “A lingbi mo dabe mo na L’Éternel Nzapa ti mo, teti a yeke Lo so amû na mo ngangu ti wara mosoro.” Ye so afa na azo ti Israël so tongana ala mä yanga ti Nzapa, fade lo yeke sara si ala ga mbeni mara so ayeke na mosoro mingi.

Ka ti awakua ti Nzapa oko oko ayeke tongana nyen? Job so ayeke be-ta-zo na Nzapa ayeke na mosoro lani mingi; na peko ti so Satan abi lo na yâ ti yere, Jéhovah akiri na lo “lege use” ye so lo yeke na ni kozoni (Job 1:3; 42:10). Abraham nga ayeke lani zo ti mosoro. Genèse 13:2 atene so lo yeke na “mosoro mingi, anyama, na argent, na lor.” Tongana aturugu ti agbia osio so ayeke na tö ti kodoro so lo yeke dä agbu Lot, molenge ti ita ti lo, Abraham ‘akangbi ye ti bira na azo ti lo so ahinga ti sara bira, ala so a dü ala na da ti lo, azo ngbangbo ota na bale-oko na ndo ni miombe’. (Genèse 14:14). Na wungo ti azo 318 “so ahinga ti sara bira”, a fa so azo ti da ti Abraham ayeke mingi. So kota sewa tongaso ayeke na gbe ti lo afa so lo yeke lani kota zo ti mosoro, so ayeke na kota kundu ti anyama.

Biani, mingi ti awakua ti Nzapa ti giriri so ayeke be-ta-zo (na tapande Abraham, Isaac, Jacob, David, Salomon) ayeke azo ti mosoro. So aye ti tene so fade Nzapa asara si zo oko oko so asara kusala ti lo aga zo ti mosoro? Na mbage, tongana mbeni zo ayeke wayere afa so Nzapa airi tënë nzoni na ndo ti lo pëpe? Article ti peko ayeke sara tënë na ndo ni.