Tâ mosoro na yâ fini sese ti Nzapa

DAVID,a ayeke mbeni Chrétien nga babâ ti sewa. Lo gue lani na Amerika teti lo bâ lo tene nzoni ye la ni sara teti sewa ti ni. Atâa so lo ye lani ti zia wali na amolenge ti lo ala oko pëpe, lo tene fade ni lingbi ande ti sara si dutingo ti sewa ti ni aga nzoni gi tongana ni wara nginza mingi. Tongaso lo yeda na iringo ndo ti asewa ti lo so ayeke na kodoro ti New York, na kete na pekoni lo wara mbeni kua kâ.

Ye oko, tongana anze ayeke hon, ngia so David ayeke na ni kozo ato nda ti ga vundu. Ngoi teti akusala ti yingo ayeke lani mingi pëpe. A si na mbeni ngoi, a ngbâ même gi kete ti tene mabe ti lo atï. A yeke gi na peko ti so lo tï na yâ mbeni siokpari si na nda ni lo ga ti bâ tâ dutingo ti lo. Teti lê ti lo ayeke gi na ndo ti warango mosoro, ye so ague na lo yeke yeke yongoro na aye kue so ayeke lani biani kota na lê ti lo. A lingbi lani lo gbian ambeni ye na yâ fini ti lo.

Tongana David, ngu oko oko azo mingi ayeke londo na akodoro ti nzinga ti gue na akodoro ti mosoro, na beku so fade dutingo ti ala ayeke ga nzoni. Ye oko, mingi ni ala yeke wara akota kpale na lege ti yingo. Ambeni ahunda tere ti ala: ‘Mbeni Chrétien alingbi ti gi ti wara mosoro na nga lo yeke na mosoro na gbele Nzapa?’ Awasungo mbeti na awafango tënë ti Nzapa so iri ti ala awu atene zo alingbi ti sara ni. Me tongana ti so David na ambeni zo abâ, ti sara mbeni oko sân ti tene mo girisa tanga ni alingbi ti duti ngangu.​—Luc 18:24.

Nginza ayeke sioni pëpe

Biani, a yeke zo si aleke nginza. Legeoko na ambeni ye mingi so zo aleke, nginza ayeke sioni ye pëpe. Ti bâ ni nzoni, a yeke mbeni ye so zo amû ti wara na mbeni ye na maboko ti mba ti lo. Tongaso, tongana zo asara kusala na ni na lege ni, nginza alingbi ti sara nzoni ye. Na tapande, Mbeti ti Nzapa ahinga so “nginza ayeke ye ti bata zo”, mbilimbili ti leke akpale so ague oko na nzinga (Zo-ti-fa-tene 7:12). A bâ so, ti ambeni zo, “nginza alingbi teti ye kue.”​—Zo-ti-fa-tene 10:19.

Mbeti ti Nzapa ake tënë ti goigoi na lo wa zo ti sara kua ngangu. A lingbi e mû ye na sewa ti e, na tongana mbeni kete ye angbâ na ndo ni, e yeke “mû na zo so ye amanke lo.” (aEphésien 4:28; 1 Timothée 5:8). Na ndo ni, ahon ti wa e ti gbanzi ye na tere ti e, Mbeti ti Nzapa awa e ti wara ngia na yâ aye so e yeke na ni. Lo tene na e ti “kamata ye ti [e]” na ti te ye ti peko ti angangu kusala ti e (Zo-ti-fa-tene 5:17-19). Biani, na yâ ti Bible, atapande mingi ti akoli na awali be-ta-zo so ayeke ândö awamosoro ayeke dä.

Abe-ta-zo so ayeke ândö awamosoro

Abraham, mbeni wakua be-ta-zo ti Nzapa, awara lani gbâ ti akundu ti anyama, gbâ ti argent na lor, na gbâ ti azo ti kusala so ahon ngbangbo mingi (Genèse 12:5; 13:2, 6, 7). Job, so ayeke ândö zo ti mbilimbili, ayeke nga na mosoro mingi: anyama, awakua, lor na argent (Job 1:3; 42:11, 12). Akoli so ayeke lani azo ti mosoro même tongana a haka ni na dutingo ti e ti laso, me ala yeke nga lani azo ti mosoro na gbele Nzapa.

Bazengele Paul a-iri Abraham “babâ ti ala kue so amä na bê”. Abraham ayeke lani zo ti kion pëpe wala lo ye amosoro ti lo ahon ndo ni pëpe (aRomain 4:11; Genèse 13:9; 18:1-18). Legeoko nga, Nzapa lo mveni lo fa Job tongana “zo so alingbi kue, na zo ti mbilimbili”. (Job 1:8). Lani lo yeke lakue nduru ti mû maboko na awanzinga nga na azo so ye amanke ala (Job 29:12-16). Abraham na Job kue azia lani bê ti ala na Nzapa ahon ti zia bê ti ala na mosoro ti ala.​—Genèse 14:22-24; Job 1:21, 22; aRomain 4:9-12.

Gbia Salomon nga ayeke mbeni tapande ni. Nzapa amû na lo mbata ti gbia na Jérusalem; Salomon awara lani gi pëpe ndara ti Nzapa, me nga mosoro mingi na yango-iri (1 aGbia 3:4-14). Lo duti lani be-ta-zo na yâ kota mbage ti fini ti lo. Ye oko, na lâ ti mbakoro ti lo, “bê ti [Salomon] ayeke mbilimbili pëpe na L’Eternel Nzapa ti lo”. (1 aGbia 11:1-8). Biani, ye ti vundu so asi na lo afa ambeni mingi ti akpale so dutingo na mosoro alingbi ti ga na ni. Zia e bâ ambeni.

Akpale so mosoro alingbi ti ga na ni

Kota kpale ni ayeke ti ga zo so andoye nginza nga na ye so nginza alingbi ti vo. Mosoro ayeke dü na yâ ti ambeni zo mbeni nzara so ayeke hunzi ka pëpe. Na tongo nda ti lengo gbia ti lo, Salomon abâ bibe so na ambeni zo. Lo sû na mbeti: “Zo so andoye argent, fade argent alingbi na nzara ti lo pëpe; wala lo so andoye ye mingi, fade wungo ni alingbi na nzara ti lo pëpe. So ayeke ye senge senge nga.” (Zo-ti-fa-tene 5:9). Jésus na Paul nga agboto mê ti aChrétien na ndo ndoye so, so ayeke handa zo.​—Marc 4:18, 19; 2 Timothée 3:2.

Tongana nginza aga ye so agbu bê ti e mingi, me pëpe mbeni ye so amû lege na e ti sara ambeni ye, a lingbi ti sara si e tï na yâ atara nde nde tongana mvene, nzi na handango zo. Judas Iscariote, mbeni bazengele ti Jésus, akä lani maître ti lo teti argent 30 senge (Marc 14:11; Jean 12:6). Tongana mbeni zo andoye nginza mingi, a lingbi ti gue na lo ti bâ ni tongana nzapa ti lo (1 Timothée 6:10). Ni la, a yeke nzoni ti tene aChrétien agi lakue ti bâ mbilimbili ye so ayeke pusu ala ti wara nginza mingi.​—aHébreu 13:5.

Gingo mosoro nga aga na ambeni kpale so a yeke ngangu na zo ti bâ ni hio. Kozoni, dutingo na mosoro mingi ayeke pusu zo ti zia bê ti lo na ndo lo mveni. Jésus asara lani tënë ni tongana lo sara tënë ti “handa ti mosoro”. (Matthieu 13:22). Jacques, so asû mbage ti Bible, agboto nga lani mê ti aChrétien ti girisa Nzapa pëpe tongana ala leke ti dë buze (Jacques 4:13-16). Nginza ayeke ye so amû na e lege ti wara ye so e ye; tongaso, ti ala so ayeke na ni, kpale ayeke lakue dä ti zia bê ti ala na ni ahon ti zia bê na Nzapa.​—aProverbe 30:7-9; Kusala 8:18-24.

Use ni, tongana David, so e sara tënë ti lo fade kozo abâ, mingi ni gingo mosoro ayeke mû ngoi na ngangu ti zo kue, tongaso a gboto lo yeke yeke yongoro na peko ti aye ti yingo (Luc 12:13-21). Ti azo so aga awamosoro awe, tara ayeke nga lakue dä ti tene ala mû ye ti ala ti sara na akusala so amû ngia kozoni wala ti sara na ambeni ye so bê ti ala aye.

E lingbi ti tene tingo ti Salomon ayeke ndali ti so lo zia lege na aye ti nginza ti lo ti buba li ti lo? (Luc 21:34). Lo hinga lani so Nzapa ake ti tene azo ti lo asara mariage na awande. Ye oko, na ndani lo yeke na awali saki oko tongaso (Deutéronome 7:3). Teti lo ye ti nzere na awali ti lo, lo tara ti bungbi sambelango anzapa nde nde ndali ti ala. Tongana ti so e tene fade kozo, yeke yeke bê ti Salomon ague lani yongoro na Jéhovah.

A yeke polele so atapande so afa tâ tënë ti tënë ti Jésus so: “I lingbi ga boi ti Nzapa na ti Mosoro legeoko pëpe.” (Matthieu 6:24). Tongaso, tongana nyen mbeni Chrétien alingbi ti wara lege nzoni ti hon ndo ti akpale ti nginza so lo yeke na ni? Na mingi ahon so, beku wa ayeke dä teti mbeni nzoni gigi ti kekereke?

Tâ mosoro ayeke na gbele e

Nde na ababâ ti sewa so ayeke Abraham na Job nga na mara ti Israël, adisciple ti Jésus awara kusala ti sara si azo ti ‘amara kue aga adisciple’. (Matthieu 28:19, 20). Ti sara kusala so ahunda ngoi na ngangu so zo alingbi fade ti mû ni ti gi na aye ti mitele. Tongaso, ti tene kusala ni aga nzoni, a yeke nzoni ti sara ye so Jésus ahunda na e: “Me i gi royaume ti Nzapa na mbilimbili ti Lo kozoni, na fade A mû ye so kue na i nga.”​—Matthieu 6:33.

Na peko ti so a ngbâ lani gi na lo kete ti girisa fami ti lo, mabe ti lo nga na songo ti lo na Nzapa, na ndani David abâ asioye so lo sara na lo leke fini ti lo nzoni. A lingbi na tënë so Jésus atene lani, na ngoi so David akiri na ndo mandango Bible, sambela na fango tënë, na lo zia aye so kue na kozo ndo na yâ fini ti lo, aye ti lo kue ato nda ti ga nzoni. Yeke yeke, songo ti lo na wali ti lo nga na amolenge ti lo aga nzoni. Ngia na siriri ti lo akiri fadeso. Lo ngbâ lakue ti sara kua ngangu. Lo ga nga mbeni zo ti mosoro pëpe. Ye oko, na yâ ye ti ngangu so asi na lo, lo manda ambeni kpengba ye.

David abâ so desizion so lo mû lani ti gue na Amerika ayeke lege ti ndara pëpe, na fadeso lo tene ni yeke zia lege mbeni pëpe na tënë ti nginza ti komande adesizion ti ni. Fadeso lo hinga so, aye so ayeke kota mingi na yâ fini ti zo tongana nzoni sewa, anzoni ndeko na songo na Nzapa, zo alingbi ti wara ni senge senge (aProverbe 17:17; 24:27; Esaïe 55:1, 2). Biani, ti ngbâ ti bata nzoni tambela ayeke na ngere mingi ahon aye ti mosoro (aProverbe 19:1; 22:1). Legeoko na sewa ti lo, David aleke na bê ti lo ti zia na kozo ndo aye so a lingbi aduti na kozo ndo.​—aPhilippien 1:10.

Ngangu so azo asara ti leke mbeni sese so azo ni kue aduti na mosoro nga na nzoni tambela atï na ngu fani mingi. Ye oko, Nzapa amû zendo so fade Royaume ti lo ayeke mû aye ti mitele na ti yingo mingi so atia e ti tene e duti nzoni (Psaume 72:16; Esaïe 65:21-23). Jésus afa na azo so tâ ngia ayeke ti tene kozoni zo ahinga so ye ti yingo amanke lo (Matthieu 5:3). Tongaso, atâa e yeke awamosoro wala awanzinga, ti zia aye ti yingo na kozo ndo fadeso ayeke tâ nzoni lege ti tene e leke tere ti e teti fini sese ti Nzapa so ayeke na gbele e (1 Timothée 6:17-19). Fade sese so ayeke duti ande biani mbeni sese so na lege ti mitele nga na lege ti yingo mosoro asi singo dä.

[Kete tënë na gbe ni]

[Afoto na lembeti 5]

Job azia bê ti lo lani na Nzapa, me na amosoro ti lo pëpe

[Afoto na lembeti 7]

Aye so ayeke kota mingi na yâ fini ti zo, zo alingbi ti wara ni senge senge