“Ala yeke akamarade ti mbi”

“Ala yeke akamarade ti mbi tongana ala sara ye so mbi yeke mû yanga na ala ti sara.”​—JEAN 15:14.

1, 2. (a) Akamarade ti Jésus ayeke ândö azo so kua ti ala nga dutingo ti ala ayeke tongana nyen? (b) Ngbanga ti nyen a yeke kota ye ti duti kamarade ti Jésus?

JÉSUS na ambeni koli aduti na yâ ti kubu ti mbeni da na nduzu na Jérusalem; a yeke azo so kua so ala sara nga na dutingo ti ala ândö ayeke nde nde. Pierre na André so ayeke aita ayeke lani azo ti gingo susu. Matthieu ayeke ngbene zo ti rongo nginza ti lapo, mbeni kua so aJuif aye ni pëpe. Azo tongana Jacques na Jean ahinga peut-être Jésus na ngoi so ala ade kete. Ti ambeni, tongana Nathanaël, ala hinga Jésus ade asara ngu mingi pëpe (Jean 1:43-50). Atâa so kue, ala kue so ayeke dä na kpengba matanga ti Pâque so ayeda na bê ti ala kue so Jésus ayeke Messie so a sara tënë ti lo, Molenge ti Nzapa so ayeke na fini (Jean 6:68, 69). Kite ayeke pëpe so bê ti ala ayeke na ngia ti mä lo na tenengo na ala: “Mbi yeke iri ala akamarade ti mbi, ngbanga ti so aye kue so mbi mä na yanga ti Babâ ti mbi, mbi fa ni na ala.”​—Jean 15:15.

² Laso atënë ti Jésus so, so lo tene na abazengele ti lo so ayeke be-ta-zo, andu mbilimbili aChrétien kue so a soro ala ti gue na yayu, nga na akamarade ti ala “ambeni ngasangbaga”. (Jean 10:16). Atâa sewa so e londo dä, wala kamba ti kua ti e wala dutingo ti e ayeke so wa, e lingbi ti duti na pasa ti ga akamarade ti Jésus. Dutingo kamarade ti lo ahon tanga ti aye kue, teti a sara si e ga akamarade ti Jéhovah nga. Biani, e lingbi pëpe ti ga nduru na Jéhovah sân ti lë songo kozoni kue na Christ. (Diko Jean 14:6, 21.) Tongaso, a lingbi e sara nyen ti ga na ti ngbâ kamarade ti Jésus? Kozo si e sara lisoro na ndo ti kpengba tënë so, zia e bâ tapande ti Jésus so ayeke nzoni kamarade nga e bâ tongana nyen adisciple ti lo asara ye na mbage ti lo.

Jésus azia nzoni tapande ti sarango kamarade

3. A hinga Jésus na nyen?

³ Gbia Salomon so ayeke zo ti ndara atene: “Zo ti mosoro ayeke na [akamarade] mingi.” (aProv. 14:20). Tënë so afa na nduru tënë sarango ye ti azo so ayeke awasiokpari: ala ye ti lë songo so aluti gi na ndo ti warango ye ahon mungo ye. Jésus ayeke ti lo tongaso pëpe. Lo zia pëpe si nginza ti mbeni zo wala kamba ti kua ti lo asara ngangu na ndo ti lo. Tâ tënë, Jésus aye lani mbeni mokonzi so ayeke na mosoro mingi nga so ade maseka na lo tisa lo ti ga disciple ti lo. Me, Jésus atene na koli so ti kä aye so lo yeke na ni na ti mû nginza ni na awayere (Marc 10:17-22; Luc 18:18, 23). A hinga Jésus pëpe tongana zo so aye azo ti mosoro nga na kota ndo, me a hinga lo tongana kamarade ti ambumbuse zo na ti azo so azo ake ala.​—Mat. 11:19.

4. Ngbanga ti nyen a lingbi ti tene so akamarade ti Jésus ayeke lani na awokongo?

⁴ Akamarade ti Jésus ayeke lani na awokongo. Ngoi na ngoi Pierre abâ ye na lê ti yingo pëpe (Mat. 16:21-23). Jacques na Jean afa nzara ti warango kota ndo na ngoi so ala hunda na Jésus ti zia ala na kota ndo na yâ ti Royaume. Ye so ala sara so ason bê ti ambeni bazengele ngangu; nga tënë ti warango kota ndo ayeke gunda ti papa so ayeke lani na popo ti ala. Ye oko, Jésus amû ngoi ti leke bango ndo ti akamarade ti lo so yeke na yeke, nga bê ti lo ason hio hio na tere ti ala pëpe.​—Mat. 20:20-28.

5, 6. (a) Ngbanga ti nyen Jésus angbâ kamarade na mingi ti abazengele ti lo? (b) Ngbanga ti nyen Jésus afâ yâ ti kamarade na Judas?

⁵ Jésus angbâ kamarade ti adisciple ti lo. A yeke pëpe ndali ti so lo zia lege na ala ti sara ye ti bê ti ala wala lo kanga lê na ndo ti afaute ti ala, me ndali ti so lo bâ gi anzoni bibe nga na anzoni sarango ye ti ala. Na tapande, Pierre, Jacques na Jean atï na lango ahon ti ngbâ ti kpengba Jésus na yâ ti ngoi ti ngangu so lo yeke na yâ ni lani. A yeke na lege ni ti tene vundu agbu Jésus teti ye so ala sara. Atâa so kue, lo hinga so bibe ti ala ayeke nzoni, ni la lo tene: “Biani, yingo aye ti sara ye, me mitele awoko.”​—Mat. 26:41.

⁶ Nde na so, Jésus afâ yâ ti kamarade na Judas Iscariote. Atâa so Judas asara ye mo bâ mo tene lo ngbâ lakue kamarade ti Jésus, Jésus abâ so ngbene kota kamarade ti lo so azia si ambeni ye abuba bê ti lo. Teti so Judas aga kamarade ti dunia so, lo wani lo sara tere ti lo wato ti Nzapa (Jacq. 4:4). Tongaso, na ngoi so Jésus atomba Judas awe, Jésus atene ni yeke kamarade ti abazengele 11 so angbâ be-ta-zo.​—Jean 13:21-35.

7, 8. Tongana nyen Jésus afa ndoye so lo yeke na ni teti akamarade ti lo?

⁷ Jésus azia lê ti lo na ndo ti afaute ti akamarade ti lo pëpe na lo sara ye ndali ti nzoni ti ala. Na tapande, lo sambela Babâ ti lo ti bata ala na yâ ti atara so ayeke si na ala. (Diko Jean 17:11.) Jésus afa so lo hinga so ala lingbi ti woko (Marc 6:30-32). Ye so agbu bê ti lo ayeke gi pëpe ti fa na ala abibe ti lo me nga ti mä ala na ti hinga abibe na atënë ti bê ti ala.​—Mat. 16:13-16; 17:24-26.

⁸ Fini ti Jésus na kuâ so lo kui ayeke ndali ti nzoni ti akamarade ti lo. Biani, lo hinga so nyen na nyen lo yeke mû fini ti lo tongana ye so ndia ahunda ti tene a lingbi na fango ngbanga ti mbilimbili ti Babâ ti lo (Mat. 26:27, 28; aHéb. 9:22, 28). Me Jésus amû fini ti lo ti fa ndoye so lo yeke na ni. Lo tene: “Tongana mbeni zo akä âme ti lo na kuâ ndali ti akamarade ti lo, mbeni ndoye ti hon so ayeke dä pëpe.”​—Jean 15:13.

Adisciple asara ye tongana nyen na yâ ti songo so Jésus alë na ala?

9, 10. Azo asara ye tongana nyen na peko ti nzoni so Jésus asara na ala?

⁹ Na nzoni bê Jésus amû ngoi ti duti na azo, lo ndoye ala nga lo mû aye ti mitele na ala. Ye so asara si azo alë kpengba songo na lo na ala yeke na ngia ti mû nga ye na lo (Luc 8:1-3). Ye so Jésus abâ na ndo ti lo wani apusu lo ti tene tënë so: “Ala mû ye lakue na azo, na azo ayeke mû ande ye na ala. Fade a haka ye nzoni, a pete ndo ni, a yengi ni, ye ni asi na ayeke tuku tukungo na sese, si a tuku ni na yanga ti bongo ti ala. Teti a yeke oko ye so ala mû ti haka na ye na azo si a yeke mû ande ti haka na ye na ala.”​—Luc 6:38.

¹⁰ A yeke tâ tënë so ambeni zo agi lani ti sara kamarade na Jésus gi ti wara ye na mbage ti lo. Akamarade ti handango lê so adö Jésus azia na ngoi so lo tene mbeni tënë so ala mä yâ ni pëpe. Ahon ti tene ala ngbâ ti zia bê ti ala na Jésus, gi hio tongaso ala sara ngonzo na ala turnê peko na lo. Me, abazengele so ayeke be-ta-zo asara ti ala ye tongaso pëpe. Fani mingi ambeni ye atara ti buba songo ti ala na Christ, me ala sara ngangu ti mû na lo maboko na ngoi ti ngia wala ti vundu. (Diko Jean 6:26, 56, 60, 66-68.) Na ndangba bï so Jésus asara na ndo ti sese, lo fa tongana nyen bê ti lo anzere na akamarade ti lo so mingi, lo tene: “Ala yeke azo so angbâ na tere ti mbi na yâ ti atara so asi na mbi.”​—Luc 22:28.

11, 12. Jésus adë bê ti adisciple ti lo tongana nyen? Ala sara ye tongana nyen?

¹¹ Kete na peko ti so Jésus agonda adisciple ti lo teti so ala duti be-ta-zo na lo, gi a-oko disciple so adö lo azia. Teti kete ngoi, ala zia si mbeto ti zo ahon ndo ti ndoye ti ala na mbage ti Christ. Jésus akiri apardone ala. Na peko ti so lo zingo na kuâ, lo fa tere ti lo na ala na lo dë bê ti ala so lo na ala angbâ lakue akamarade. Na ndo ni, lo mû na ala mbeni kusala so ayeke nzoni-kue, a yeke ti sara si “azo na popo ti amara kue” aga adisciple nga ti duti atémoin ti lo “juska na ambage ti sese so ayeke tâ yongoro.” (Mat. 28:19; Kus. 1:8). Adisciple ni asara kusala so lo mû na ala so?

¹² Ala sara kue si tënë ti Royaume amû ndo. Na lege ti maboko so yingo vulu ti Jéhovah amû na ala, hio fango tënë ti ala amû yâ ti Jérusalem kue (Kus. 5:27-29). Atâa so a tene a yeke fâ ala ndali ti kusala so, ye so akanga lege na ala pëpe ti sara ye alingbi na yanga so Jésus amû. Ngu mingi pëpe na peko ti yanga so Jésus amû na ala, bazengele Paul atene so a fa nzoni tënë na “création kue so ayeke na gbe ti yayu”. (aCol. 1:23). Biani, adisciple afa so ala bâ na nene ni kamba ti songo so ayeke na popo ti ala na Jésus!

13. Adisciple ti Jésus azia si aye so lo fa asara kusala na yâ ti fini ti ala na alege wa?

¹³ Azo so aga lani adisciple ti Jésus azia nga si aye so lo fa asara kusala na yâ ti fini ti ala. Mingi ti ala abâ so a lingbi ala gbian aye mingi na yâ ti tambela ti ala nga na sarango ye ti ala. Ambeni fini disciple ni ayeke ândö akoli so agi amba ti ala koli wala awali so agi amba ti ala wali, azo ti gingo wali wala koli nde, angbâa ti sämba, wala azo ti nzi (1 aCor. 6:9-11). Ti ambeni, a lingbi ala gbian bango ndo ti ala na ndo ti azo ti mara nde (Kus. 10:25-28). Atâa so kue, ala mä yanga ti Jésus, ala zi ngbene zo na ala yü fini zo (aÉph. 4:20-24). Ala hinga “bibe ti Christ” nzoni, so ti tene fason so lo yeke bi bê ti lo na ni na lo yeke sara na ye ala hinga ni nzoni na ala haka pekoni.​—1 aCor. 2:16.

Sarango kamarade na Christ laso

14. Jésus amû zendo atene ni yeke sara nyen na “ngoi so aye ti ngoi so ayeke gue ti hunzi”?

¹⁴ Mingi ti akozo Chrétien ahinga Jésus wala abâ lo na peko ti so a zingo lo na kuâ. Ti e, e yeke na mara ti pasa so pëpe. Me e lingbi ti duti akamarade ti Christ tongana nyen? Mbeni lege ni ayeke ti yeda na fango lege so ngbâa be-ta-zo so ayeke sara ye na ndara ayeke fa na e; ngbâa so ayeke aita ti Jésus so a soro ala ti gue na yayu na so ade na sese ge. Jésus amû zendo atene na “ngoi so aye ti ngoi so ayeke gue ti hunzi”, ni yeke zia ngbâa so “na ndo ti akungba ti [ni] kue.” (Mat. 24:3, 45-47). Laso, mingi ti azo so agi ti ga akamarade ti Christ ayeke pëpe azo so a soro ala ti gue na yayu. Tongaso, sarango ye ti ala na mbage ti ye so ngbâa be-ta-zo ayeke fa na ala alingbi ti sara nyen na ndo ti songo ti ala na Christ?

15. Ye so ayeke fa ande atene mbeni zo ayeke ngasangbaga wala ngasa ayeke nyen?

¹⁵ Diko Matthieu 25:31-40. Jésus airi ala so ayeke ga ande ngbâa be-ta-zo aita ti lo. Na yâ ti toli ti kangbingo popo ti angasangbaga na angasa, Jésus atene polele so ye so e yeke sara na aita ti lo, lo yeke bâ ni mo bâ mo tene e sara ni na lo. Biani, lo tene so ye so ayeke fa ande atene mbeni zo ayeke ngasangbaga wala ngasa ayeke sarango ye ti lo même na mbage ti lo so “ayeke kete mingi na popo ti aita ti [ni] so”. Tongaso, tâ mbilimbili lege so ala so ayeke na beku ti fini na ndo ti sese ayeke fa nzara ti bê ti ala ti duti akamarade ti Christ ayeke na lege ti mungo maboko na ngbâa be-ta-zo.

16, 17. E yeke fa tongana nyen so e yeke akamarade ti aita ti Jésus?

¹⁶ Tongana mo yeke na beku ti wara fini ti lakue lakue na ndo ti sese, mo yeke fa tongana nyen so mo yeke kamarade ti aita ti Christ? Zia e bâ gi aye ota. Kozoni, mo yeke sara ni na fango tënë na bê ti mo kue. Christ amû yanga na aita ti lo ti fa tënë na ndo ti sese kue (Mat. 24:14). Ye oko, a lingbi ti duti ngangu na tanga ti aita ti Christ so ayeke na ndo ti sese laso ti sara kusala so tongana ambeni ngasangbaga so ayeke akamarade ti ala amû maboko na ala pëpe. Biani, lakue so azo so ayeke ti ambeni ngasangbaga abi tere ti ala na yâ ti kusala ti fango tënë, ala yeke mû maboko na aita ti Christ ti sara kua ti ala so ayeke nzoni-kue. Christ na ngbâa be-ta-zo so ayeke sara ye na ndara abâ na nene ni mingi kusala so, so afa so e yeke akamarade ti ala.

¹⁷ Use ni, ambeni ngasangbaga ayeke mû maboko na aita ti Christ na mungo amosoro ti ala ndali ti kusala ti fango tënë. Jésus awa adisciple ti lo ti gi ti wara akamarade teti ala wani na lege ti “amosoro so ayeke mbilimbili pëpe”. (Luc 16:9). A ye pëpe ti tene so e lingbi ti vo songo ti e na Jésus wala na Jéhovah vongo. Me na mungo amosoro ti e ti mitele ti pusu na kua ti Royaume ti Jéhovah na dawa, e yeke fa ndoye nga na songo ti e gi na yanga pëpe, me “na lege ti kusala nga na tâ tënë.” (1 Jean 3:16-18). E yeke mû amosoro ti e ndali ti kusala so na ngoi so e yeke londo na yanga-da ti gue na fango tënë, na ngoi so e yeke mû nginza ti leke na ada so a yeke voro Jéhovah na yâ ni nga ti bâ na lege ti ada ni; e yeke sara nga ni na mungo nginza ndali ti kusala ti fango tënë na ndo ti sese kue. Atâa e mû nginza mingi wala mingi pëpe, Jéhovah na Jésus abâ na nene ni biani ye so e mû na ngia.​—2 aCor. 9:7.

18. Ngbanga ti nyen a lingbi e yeda na awango ti Bible so a-ancien ti congrégation ayeke mû na e?

¹⁸ Ota ni, e kue e yeke fa so e yeke akamarade ti Christ na sarango kua maboko na maboko na a-ancien ti congrégation. A yeke na lege ti yingo vulu nga na gbe ti fango lege ti Christ si a iri akoli so na kusala (aÉph. 5:23). Bazengele Paul atene: “Ala mä yanga ti ala so ayeke mû li ni na popo ti ala na ala woko tere na gbe ti ala.” (aHéb. 13:17). Na ambeni ngoi, e lingbi ti bâ so a yeke ngangu na e ti yeda na awango ti Bible so a-ancien ti congrégation ayeke mû na e. E hinga peut-être awokongo ti ala nzoni, na ye so alingbi ti sara si e duti na nzoni bango ndo pëpe na ndo ti awango ti ala. Atâa so kue, a nzere mingi na Christ, Mokonzi ti congrégation, ti sara kusala na akoli so, so ayeke awasiokpari so. Tongaso, lege so e yeke sara ye na gbe ti komandema ti ala andu biani songo ti e na Christ. Tongana e hon ndo ti awokongo ti ala na e yeda na ngia na fango lege ti ala, e fa so e ndoye Christ.

E lingbi ti wara anzoni kamarade na ndo wa?

19, 20. E lingbi ti wara azo wa na yâ ti congrégation? E yeke bâ ande nyen na yâ ti article ti peko?

¹⁹ Jésus angbâ ti bâ lege ti e na lege ti aberger so ayeke bâ ndo na ndo ti e na ndoye; lo yeke sara nga ni na mungo na e amama, aita ti koli na aita ti wali na yâ ti congrégation. (Diko Marc 10:29, 30.) So mo to nda ni lani ti ga na bungbi ti Jéhovah, afami ti mo asara ye tongana nyen? Biani, ala mû maboko na mo na yâ ti angangu so mo sara ti ga nduru na Nzapa nga na Christ. Me Jésus atene so na ambeni ngoi “fade awato ti zo ayeke duti azo ti da ti lo wani.” (Mat. 10:36). Bê ti e adë ti hinga so na yâ ti congrégation e lingbi ti wara azo so angbâ nduru na e ahon atâ ita ti e!​—aProv. 18:24.

²⁰ Tongana ti so bara ti Paul na hunzingo ti mbeti ti lo na congrégation ti Rome afa, lo sara kamarade na azo mingi (aRom. 16:8-16). Bazengele Jean ahunzi ota mbeti ti lo tongaso: “Mo tene bara ti mbi na aita oko oko na iri ti ala.” (3 Jean 14). Tënë ti Grec so a kiri pekoni na “aita” aye ti tene akamarade. A yeke polele so lo nga lo sara kamarade na gbâ ti azo a ninga. Tongana nyen e lingbi ti mû tapande ti Jésus na ti akozo disciple ti lë songo ti kamarade na aita ti e ti yingo nga ti ngbâ ti bata ni nzoni? Fade article ti peko ayeke kiri tënë na hundango ndo so.

Mo yeke kiri tënë tongana nyen?

• Tapande wa Jésus azia na ndo ti tënë ti dutingo nzoni kamarade?

• So Jésus alë lani songo ti kamarade na adisciple ti lo, ala sara ye tongana nyen?

• Tongana nyen e yeke fa so e yeke akamarade ti Christ?

[Foto na lembeti 21]

Abibe na atënë ti bê ti akamarade ti Jésus agbu bê ti lo mingi

[Foto na lembeti 23]

Tongana nyen e yeke fa so e ye ti duti akamarade ti Christ?