Kozo mvene ni: Âme ayeke kui pëpe

Tënë so abâ gigi tongana nyen? Mbeni kota bakari atene: “Akozo wasenda-ndara so ayeke aChrétien ayeda na bango ndo ti aGrec so atene âme ayeke kui pëpe nga ala tene ti ala so Nzapa asara âme na lo zia ni na yâ ti tere ti zo na ngoi so a mû ngo ti lo.”​—The New Encyclopædia Britannica (1988), Mbage 11 ni, lembeti 25.

Bible atene ti lo nyen? “Âme so asara siokpari, fade a kui.”​—Ézéchiel 18:4.

Bible afa sarango kozo zo tongaso: ‘L’Éternel Nzapa asara zo na pupu-sese ti sese, Lo wu mbö ti fini na duhon ti lo; na zo aga âme [na Hébreu, nèphèsh] ti fini.’​—Genèse 2:7.

Tënë ti Hébreu nèphèsh so a kiri peko ni na tënë “âme” aye ti tene ‘mbeni créature so ayeke wu pupu.’ Na ngoi so Nzapa asara kozo koli Adam, lo zia pëpe na yâ ti lo mbeni âme so ayeke kui pëpe, ên-ën; me lo mû na lo ngangu ti fini, na ngangu ti fini so ayeke ngbâ gi na lege ti pupu so Adam ayeke wu. Tongaso, na yâ ti Bible “âme” ni ayeke ngbongboro zo wala nyama so ayeke na fini. Tongana a kangbi popo ti âme ni na ngangu ti fini so alondo na Nzapa, âme ni ayeke kui.​—Genèse 3:19; Ézéchiel 18:20.

Tënë so atene âme ayeke kui pëpe asara si ambeni hundango tënë abâ gigi: Âme ni ayeke gue na ndo wa na peko ti kuâ ti zo? Nyen la ayeke si na âme ti asioni zo? Na ngoi so azo so atene ala yeke aChrétien ayeda lani na tënë ti mvene so atene âme ayeke kui pëpe, ye so ague na ala ti yeda na mbeni mvene ni: tënë ti enfer.

Bâ nga aversê so: Zo-ti-fa-tene 3:19; Matthieu 10:28; Kusala 3:23

TÂ TËNË NI AYEKE SO:

Zo akui awe, fini ti lo ahunzi