Bâ na nene ni place ti mo na yâ ti congrégation
“Nzapa azia amembre ti tere oko oko na place ti ala, tongana ti so bê ti lo aye.”—1 ACOR. 12:18.
1, 2. (a) Nyen la afa so zo oko oko kue na yâ ti congrégation alingbi ti wara mbeni place so lo lingbi ti bâ ni na nene ni? (b) Fade e yeke bâ ahundango tënë wa na yâ ti article so?
TI LONDO na ngoi ti Israël ti giriri ti ga na ni, congrégation ayeke ye so Jéhovah azia na sese ti mû kobe ti yingo na azo ti lo nga ti fa lege na ala. Na tapande, na peko ti so azo ti Israël akinda gbata ti Aï, Josué “[a]diko tënë ti Ndia kue, tënë ti nzoni na tënë ti zonga, na lege ti tënë kue so a sara tënë ni na mbeti ti Ndia . . . na gbele bungbi [wala “congrégation,” FD] ti azo ti Israël kue”.—Jos. 8:34, 35.
2 Na ngoi ti akozo Chrétien, bazengele Paul atene na Timothée, so ayeke lani ancien, so congrégation ti aChrétien ayeke “azo ti da ti Nzapa” nga ye so “ayeke gbu tâ tënë na nduzu na ayeke bata ni.” (1 Tim. 3:15). Laso, “azo ti da ti Nzapa” ni ayeke sewa ti e ti atâ Chrétien so ayeke na yâ ti dunia mobimba. Na 1 aCorinthienchapitre 12 ti kozo mbeti ti lo na aCorinthien, Paul ahaka congrégation na tere ti zo. Lo tene atâa so kusala ti amembre oko oko ayeke nde nde, ala kue ayeke na nene ni. Lo tene: “Nzapa azia amembre ti tere oko oko na place ti ala, tongana ti so bê ti lo aye”. Lo tene nga so “ambage ti tere ni so e bâ e tene a kpa ti mû gonda na ni mingi pëpe, ala si e mû gonda na ni mingi.” (1 aCor. 12:18, 23). Tongaso, kusala so mbeni Chrétien so ayeke be-ta-zo ayeke sara na yâ ti da ti Nzapa ayeke nzoni ahon ti mbeni mba ti lo pëpe wala ayeke sioni ahon ti mba ti lo pëpe. Tâ kangbi ni ayeke so kusala ni ayeke gi nde nde. Tongaso, tongana nyen si e lingbi ti gi ti wara place ti e na yâ ti congrégation ti Nzapa na ti bâ ni na nene ni? Aye wa alingbi ti sara mbeni ye na ndo ti place so e yeke na ni na yâ ti congrégation? Nga tongana nyen si e lingbi ti sara “si azo kue abâ maïngo ti [e]”?—1 Tim. 4:15.
E lingbi ti bâ place ti e na nene ni tongana nyen?
3. Mbeni lege ti wara place ti e na yâ ti congrégation na ti fa so e bâ ni na nene ni ayeke so wa?
3 Mbeni lege ti wara place ti e na yâ ti congrégation na ti fa so e bâ ni na nene ni ayeke ti sara kua maboko na maboko na “ngbâa be-ta-zo so ayeke sara ye na ndara” nga na Bebungbi ti lo. (Diko Matthieu 24:45-47.) A lingbi e gi ti bâ lege so e yeke mä yanga ti ngbâa ni na yâ ti aye so lo yeke fa na e. Na tapande, na yâ ti angu so ahon, e wara awango so ayeke polele na ndo ti tënë ti yungo bongo nga na lekengo tere, angia so alingbi e soro nga sioni ti Internet. E yeke sara ye biani alingbi na nzoni wango so si e bata tere ti e na lege ti yingo? Ka ti wango so a hunda na e ti zia na sese mbeni kapa ti mandango tënë ti Nzapa lakue na sewa ayeke tongana nyen? E sara ye alingbi na wango so awe? E soro mbeni lakui awe ndali ni? Tongana e yeke kumbamba, e soro mbeni ngoi awe ti manda ye e wani? Jéhovah ayeke iri tënë nzoni na ndo ti e oko oko kue nga na ndo ti sewa ti e gi tongana e sara ye alingbi na awango ti ngbâa be-ta-zo so.
4. Na ndo ti tënë ti sorongo aye so abâ gi zo oko oko, a lingbi e bâ nyen kozoni kue?
4 Ambeni zo alingbi ti tene so aye tongana ngia, yungo bongo nga lekengo tere ayeke aye so abâ gi zo oko oko. Me ti mbeni Chrétien so abâ na nene ni place ti lo na yâ ti congrégation, tënë so abâ gi zo oko oko pëpe. A lingbi lo bâ kozoni kue bango ndo ti Jéhovah na ndo ti tënë so tongana ti so ayeke na yâ ti Bible. A lingbi tënë ti Lo aduti “lampe teti gere ti [e], na lumière teti lege ti [e].” (Ps. 119:105). Nga, e yeke sara ye na ndara ti bâ tongana nyen aye so abâ gi e oko oko ayeke sara mbeni ye na ndo ti kusala ti e ti fango tënë nga na ndo ti ambeni zo, atâa na yâ ti congrégation wala na gigi ni.—Diko 2 aCorinthien 6:3, 4.
5. Ambeni zo aye ti tene mbeni zo akomande ala pëpe. Ngbanga ti nyen ti kpe bibe so?
5 “Yingo so ayeke sara kua fadeso na yâ ti amolenge ti kengo yanga” amû ndo kue mo bâ mo tene pupu so e yeke wu (aÉph. 2:2). Yingo ni so alingbi ti pusu e ti pensé so e yeke pëpe na bezoin ti tene bungbi ti Jéhovah amû wango na e. Tâ tënë, e ye pëpe ti kpa Diotrèphe, lo so ‘ayamba na kpengo mbeto pëpe aye kue so alondo na bazengele Jean.’ (3 Jean 9, 10). A lingbi e sara hange si bibe ti tene zo akomande e pëpe amaï na yâ ti bê ti e. A lingbi e fa lâ oko pëpe na lege ti tënë ti yanga ti e wala na lege ti sarango ye ti e so e bâ na nene ni pëpe lege so Jéhovah amû ti fa ye na e laso. (Nom. 16:1-3). Ahon ti sara tongaso, a lingbi e bâ na nene ni matabisi ti e ti sara kua maboko na maboko na ngbâa be-ta-zo. Na ndo ni, a lingbi e sara kue ti mä yanga nga ti woko tere ti e na gbe ti ala so ayeke mû li ni na yâ ti congrégation so e yeke dä.—Diko aHébreu 13:7, 17.
6. Ngbanga ti nyen a lingbi e gi ti bâ duti ti e wani mbilimbili?
6 Mbeni lege ti fa so e bâ na nene ni place ti e na yâ ti congrégation ayeke ti gi ti bâ duti ti e wani mbilimbili, na ti sara ye kue so e lingbi ti sara ti ‘gonda kusala ti e’ nga ti mû gloire na Jéhovah (aRom. 11:13). Ambeni ita awara lege ti sara kua tongana pionnier permanent. Ambeni asara kua tongana missionnaire, surveillant so ague na ndo nde nde nga tongana Béthélite. Ambeni ita-koli na aita-wali amû maboko na kua ti lekengo aDa ti Royaume. Mingi ti awakua ti Jéhovah ayeke sara ngangu kue ti mû kobe ti yingo na sewa ti ala nga ala yeke mû mbage ti ala kue na yâ ti kusala ti fango tënë yenga oko oko. (Diko aColossien 3:23, 24.) E lingbi ti duti na beku so tongana e mû tere ti e wani na kua ti Jéhovah na e sara na lo na âme ti e kue, e yeke na place ti e lakue na yâ ti congrégation.
Aye so asara si kusala ti e ayeke nde nde
7. Fa tongana nyen duti ti e alingbi ti sara mbeni ye na ndo ti place so e yeke na ni na yâ ti congrégation.
7 A yeke kota ye ti gi ti bâ duti ti e mbilimbili ngbanga ti so a lingbi kamême ti sara mbeni ye na ndo ti ye so e lingbi ti sara na yâ ti congrégation. Na tapande, place so mbeni ita-koli ayeke na ni na yâ ti congrégation ayeke kamême nde kete na ti ita-wali. Ngu ti e, seni ti e na ambeni ye nga alingbi ti sara mbeni ye na ndo ti ye so e lingbi ti sara na yâ ti kua ti Jéhovah. A-Proverbe 20:29 atene: “Ngangu ti apendere-koli ayeke gloire ti ala, na vuru kuali ti ambakoro koli ayeke ye ti yango-iri ti ala.” Aita so ade maseka mingi alingbi ti sara akusala mingi ngbanga ti so ala yeke na ngangu, me ala so aga mbakoro awe ayeke sara nzoni mingi na congrégation ndali ti ndara nga hingango ye so ala yeke na ni. A lingbi e girisa nga pëpe so a yeke gi ndali ti kota nzobe ti Nzapa si e wara lege ti sara aye kue na yâ ti congrégation.—Kus. 14:26; aRom. 12:6-8.
8. Aye so bê ti e aye alingbi ti sara nyen na ndo ti ye so e yeke sara na yâ ti congrégation?
8 Tapande ti amaseka-wali use so ayeke aita afa na e mbeni ye so alingbi ti sara ye na ndo ti place so e yeke wara ande na yâ ti congrégation. Ala use kue ahunzi mandango ye ti ala na lycée. Duti ti ala kue ayeke oko. Babâ na mama ti ala asara kue ti wa ala use kue ti mû kua ti pionnier permanent na peko ti mandango mbeti ti ala. Na peko ti so ala hunzi mandango mbeti ti ala awe, oko asara kua ti pionnier ni, na mbeni ato nda ti sara kua ti nginza so amû ngoi ti lo kue. Nyen la asara si ala sara ye nde nde? A yeke ye so bê ti ala aye. Na nda ni, zo oko oko asoro ti sara ye so bê ti lo aye. Ti mingi ti e ayeke nga tongaso pëpe? E yeke na bezoin ti gbu li ti e nzoni na ndo ti ye so e ye ti sara na yâ ti kua ti Jéhovah. E lingbi ti mû mbage ti e mingi na yâ ti kua ni? Zia e sara ni même tongana a hunda na e ti gbian ambeni ye na yâ ti duti ti e.—2 aCor. 9:7.
9, 10. Nyen la a lingbi e sara tongana nzara ti sarango mingi na yâ ti kua ti Jéhovah ayeke na yâ ti bê ti e pëpe?
9 Ka tongana nzara ti sarango mingi na yâ ti kua ti Jéhovah ayeke na yâ ti bê ti e pëpe na e ye ti e ti sara gi so a hunda na e ti sara awe? Na yâ ti mbeti so lo tokua na aChrétien ti Philippe, Paul atene: “A yeke Nzapa si ayeke sara kusala na yâ ti ala ti tene ala duti na nzara ti sara ye nga ala sara ye, na lo sara tongaso ndali ti so a nzere na bê ti lo.” Biani, Jéhovah alingbi ti sara kusala na yâ ti e na ti sara mbeni ye na ndo ti aye so bê ti e aye.—aPhil. 2:13; 4:13.
10 Tongaso, a lingbi e hunda Jéhovah ti sara si e ye ti sara ye so bê ti lo aye. David, Gbia ti Israël ti giriri, asara tongaso. Lo sambela, lo tene: “O L’Éternel, fa na mbi lege ti Mo; fa nda ti lege ti Mo na mbi. Fa lege ti tene-biani ti Mo na mbi, fa nda ti tënë na mbi, teti Mo yeke Nzapa ti salut ti mbi; mbi yeke ku Mo lakue.” (Ps. 25:4, 5). E lingbi ti sara tongaso na sambelango Jéhovah ti sara si e ye ti sara ye so anzere na bê ti lo. Tongana e gbu li ti e na ndo ti lege so Jéhovah Nzapa na Molenge ti lo abi bê ti ala na ndo ti ye so e yeke sara na yâ ti kusala ti ala, bê ti e asi na singila ndali ti ala (Mat. 26:6-10; Luc 21:1-4). Bibe ti kiringo singila so alingbi ti pusu e ti hunda na Jéhovah ti sara si e ye ti sara ye mingi na yâ ti kua ti lo. Prophète Ésaïe azia na e mbeni tapande ti bibe tongaso, so a lingbi e duti na ni. Na ngoi so lo mä go ti Jéhovah so ahunda ndo atene: “Fade Mbi to zo nyen? Fade zo nyen ague teti E?” Prophète ni akiri tënë: “Mbi yeke, Mo to mbi.”—És. 6:8.
Tongana nyen e lingbi ti sara mingi na yâ ti kua ti Jéhovah?
11. (a) Bezoin wa ayeke dä ndali ti aita-koli na yâ ti bungbi? (b) Tongana nyen si mbeni ita-koli alingbi ti gi ti sara ye mingi na yâ ti congrégation?
11 So na yâ ti ngu ti kusala 2008 wungo ti azo 289 678 si awara batême, afa polele so e yeke na bezoin ti aita-koli mingi ti mû li ni na yâ ti bungbi ti Jéhovah. Tongana nyen si mbeni ita-koli alingbi ti yeda ti mû maboko? Gi ye so lo lingbi ti sara ayeke ti sara kue ti sara aye so Bible ahunda na aita-koli ti sara ti ga awakua ti mungo maboko na a-ancien (1 Tim. 3:1-10, 12, 13; Tite 1:5-9). Tongana nyen mbeni ita-koli alingbi ti sara kue ti sara ye so Bible ahunda ti lingbi na kusala so? A yeke na mungo mbage ti lo na kua ti fango tënë, na sarango na lege ni kua so a mû na lo na yâ ti congrégation, na sarango kue ti maï akode ti kiringo tënë ti lo na abungbi nga na ziango na kozo ndo ye so agbu bê ti amba ti lo Chrétien. Na sarango tongaso, lo yeke fa so lo bâ na nene ni place ti lo na yâ ti congrégation.
12. Tongana nyen si amaseka-koli ayeke fa so ala yapu na yâ ti kusala ti Jéhovah?
12 Nyen la amaseka-koli alingbi ti sara ti sara ye mingi na yâ ti kua ti Jéhovah? Ala lingbi ti sara kue ti duti na “ndara kue nga na gbungo nda ti ye kue na lege ti yingo” na mandango Mbeti ti Nzapa (aCol. 1:9). Ti duti mbeni zo so aye ti manda Mbeti ti Nzapa mingi nga ti mû mbage na abungbi ti congrégation alingbi biani ti mû maboko ti sara tongaso. Amaseka-koli alingbi nga ti wara lege ti sara ye mingi na yâ ti kua ti Jéhovah na gingo lege ti lï na “kota yanga-da [so] azi na [ala] ti sara kusala” na yâ ti alege nde nde ti kusala ti ngoi kue (1 aCor. 16:9). Ti mû fini ti mo kue gi na kua ti Jéhovah ayeke biani mbeni lege so ayeke mû ngia na zo na yâ ti gigi ti lo kue na zo ayeke wara aye ti nzoni mingi na pekoni.—Diko Zo-ti-fa-tene 12:3.
13, 14. Na alege wa aita-wali alingbi ti fa so ala bâ na nene ni place ti ala na yâ ti congrégation?
13 Aita-wali nga kue alingbi ti fa so ala bâ na nene ni kusala so ala yeke na ni ti sara si Psaume 68:12 aga tâ tënë. Versê ni atene: “L’Éternel asara tënë; azo so afa tënë nzoni so na gigi ayeke mingi.” Mbeni lege so aita-wali alingbi ti fa so ala bâ na nene ni place ti ala na yâ ti congrégation ayeke ti mû mbage ti ala mingi na kusala ti sarango adisciple (Mat. 28:19, 20). Tongaso, tongana aita-wali amû ngoi ti ala kue na yâ ti kusala ti fango tënë nga tongana ala yeke nduru ti sara asacrifice ndali ti kusala so, ala yeke fa so ala bâ na nene ni place ti ala na yâ ti congrégation.
14 Tongana lo yeke sû mbeti na Tite, Paul atene: “Zia ambakoro-wali asara ye tongana azo so akpe mbeto ti Nzapa, . . . ala duti awafango na azo ye so ayeke nzoni; si ala lingbi ti sara si li ti amaseka-wali akiri dä ti ndoye akoli ti ala, ti ndoye amolenge ti ala, ti bata bibe ti ala nzoni, ti duti nzoni-kue, ti sara kua ti da ti ala, ti duti anzoni wali, ti woko tere na gbe ti akoli ti ala, tongaso si a bi zonga na ndo ti tënë ti Nzapa pëpe.” (Tite 2:3-5). Biani, aita-wali so ayeke abiazo alingbi ti sara nzoni ye mingi na ndo ti azo na yâ ti congrégation. Tongana ala ne aita-koli so ayeke mû li ni nga ala sara ye na ndara na yâ ti aye tongana yungo bongo, lekengo tere ti ala nga na angia so ala soro ti sara ni, ala yeke duti nzoni tapande teti ambeni ita na ala yeke fa so ala bâ na nene ni mingi place ti ala na yâ ti congrégation.
15. Nyen la mbeni ita-wali so ayeke kumbamba alingbi ti sara ti hon ndo ti kpale ti dutingo gi lo oko?
15 Ngoi na ngoi, a lingbi ti duti ngangu na mbeni ita-wali so ayeke kumbamba ti wara place ti lo na yâ ti congrégation. Mbeni ita-wali so mara ti ye tongaso asi na lo atene: “A lingbi ti si so zo so ayeke kumbamba abâ tere ti lo so lo yeke gi lo oko.” Tongana a hunda lo ti fa nyen la lo sara ti hon ndo ti kpale so, lo tene: “Sambela nga mandango ye amû maboko na mbi ti kiri ti wara place ti mbi na yâ ti congrégation. Mbi manda ye na ndo ti lege so Jéhovah ayeke bâ na mbi. Na pekoni, mbi sara kue ti duti mbeni zo ti mungo maboko na ambeni ita na yâ ti congrégation. Sarango tongaso amû maboko na mbi ti bi bê ti mbi na ambeni zo ahon mbi wani.” Na Psaume 32:8, Jéhovah atene na David: “Fade Mbi wa mo, na lê ti Mbi angbâ na ndo mo.” Biani, Jéhovah ayeke bi bê ti lo mingi na awakua ti lo kue, même aita-wali so ayeke kumbamba, na fade lo mû maboko na ala ti wara place ti ala na yâ ti congrégation.
Bata place ti mo na yâ ti congrégation
16, 17. (a) So e yeda na tisango ndo ti Jéhovah ti ga na yâ ti congrégation ti lo, ngbanga ti nyen a yeke nzoni desizion ahon atanga ni kue so e mû? (b) Tongana nyen si e lingbi ti bata place ti e na yâ ti congrégation ti Jéhovah?
16 Na ndoye, Jéhovah ayeke gboto awakua ti lo oko oko kue na mbage ti lo ti duti na songo na lo. Jésus atene: “Zo oko alingbi ti ga na mbi pëpe, gi tongana Babâ so atokua mbi si agboto lo aga na lo na mbage ti mbi.” (Jean 6:44). Na popo ti azo ngbundangbu so ayeke na ndo ti sese so, Jéhovah atisa e ti ga na yâ ti congrégation ti lo laso. Yengo dä na tisango ndo so ayeke lani nzoni desizion so ahon atanga ni kue so e mû. A sara si e yeke na beku teti gigi ti kekereke. So ngia na nzerengo tere si e wara ndali ti so e yeke na place ti e na yâ ti congrégation!
17 Mbeni wasungo Psaume atene: “O L’Éternel, mbi ndoye ndo so da ti Mo ayeke dä.” Lo kiri lo he bia, lo tene: “Gere ti mbi aluti na ndo so ayeke mbilimbili; fade mbi sara tënë nzoni na L’Éternel na yâ bungbi ti azo.” (Ps. 26:8, 12). Tâ Nzapa aleke place teti e oko oko kue na yâ ti congrégation ti lo. Tongana e ngbâ ti sara ye alingbi na ye so bungbi ti Jéhovah ayeke fa na e nga e ngbâ ti duti na aye mingi ti sara na yâ ti kua ti Jéhovah, e lingbi ti bata pendere place so e yeke na ni na yâ ti congrégation ti Jéhovah.
Mo dabe mo na ni?
• Ngbanga ti nyen a yeke na lege ni ti tene so aChrétien kue ayeke na mbeni place na yâ ti congrégation?
• Tongana nyen si e lingbi ti fa so e bâ na nene ni place ti e na yâ ti congrégation?
• Aye wa alingbi ti sara mbeni ye na ndo ti place so e yeke na ni na yâ ti congrégation?
• Tongana nyen amaseka nga na akangba alingbi ti fa so ala bâ na nene ni place ti ala na yâ ti congrégation?
[Afoto na lembeti 21]
Tongana nyen si aita-koli alingbi ti gi lege ti sara ye mingi na yâ ti congrégation?
[Foto na lembeti 22]
Tongana nyen si aita-wali alingbi ti fa so ala bâ na nene ni place ti ala na yâ ti congrégation?