“A lingbi mbi dekongo lâ oke?”
Jayne atoto atene: “Mbi ye gi ti tene songo ti kobela ni ahunzi!” Lo yeke na cancer, na a yeke mû yâ ti tere ti lo kue. Asewa ti lo na akamarade ti lo ayeke na nzara ti zi kobela ti lo na pono ti lo. Ala sambela Nzapa ti mû maboko na lo. Lo yeke mä ala? Lo yeke bi bê ti lo na ala?
NZAPA ahinga dutingo ti azo. Mbeti ti lo so ayeke Bible atene: “Création kue angbâ gi ti dema legeoko na ti bâ pasi legeoko.” (aRomain 8:22). Nzapa ahinga so azo kutu ngbangbo mingi ayeke na yâ ti pasi lâ na lâ tongana Jayne, wala a yeke tere ti ala si ason, vundu si ahon ndo ti ala wala kobela ti li si asara ala. Nzapa ayeke bâ azo kutu 800 so alango na nzara lakue, ambeni kutu mingi so abâ pasi na lege ti ye ti ngangu so asewa ti ala ayeke sara na ala, na ababâ na amama mingi so ayeke gi bê ti ala na ndo ti kekereke nga na nzoni duti ti amolenge ti ala. Mo hunda tere ti mo awe so Nzapa ayeke sara mbeni ye ti leke akpale so? Biani, teti e yeke na nzara ti mû maboko na azo so e ndoye ala, fade Nzapa nga ayeke mû maboko na azo ti sese kue pëpe?
Tongana mo hunda tere ti mo na mara ti atënë so awe, hinga so a yeke gi mo oko pëpe. A sara ngu 2600 awe, mbeni koli so ayeke be-ta-zo so iri ti lo ayeke Habakuk ayeke na oko bibe tongana ti mingi ti azo laso; lo hunda Nzapa, lo tene: “O L’Éternel, a lingbi mbi dekongo lâ oke? na Mo mä mbi pëpe. Mbi dekongo na Mo, mbi tene, Sioye ti ngangu ayeke! na Mo sö pëpe. Teti nyen Mo sara si mbi bâ sioye, na mbi bâ vundu tongaso? Ye ti futi na sioye ti ngangu ayeke na gbele mbi. Tiri ayeke, na papa alondo.” (Habakuk 1:2, 3). Habakuk ayeke giriri mbeni prophète ti kodoro ti Israël so abâ na lê ti lo asioni ye ti vundu na ti ngangu so azo ti ngoi ti lo so li ti ala ayeke dä pëpe asara. Laso, amara sarango ye so ayeke ye so azo ayeke mä lâ na lâ na yâ ti asango na so ayeke son bê ti azo ti nzoni bê.
Nzapa abâ tongana mbumbuse ye aye so amû vundu na Habakuk? Ên-ën. Lo mä atënë ti Habakuk, na pekoni Lo dë bê ti lo na Lo wa lo teti vundu so ayeke na bê ti lo. Jéhovah Nzapa akpengba mabe ti Habakuk na lege ti mbeni zendo so fade lo yeke hunzi apasi. Tënë ti Nzapa so amû beku alingbi nga ti dë bê ti mo, tongana ti so adë bê ti Jayne na sewa ti lo. A-article so ayeke ga na peko ti so ayeke kiri tënë na ahundango ndo so: E lingbi ti hinga tongana nyen so Nzapa ayeke bi bê ti lo biani na e? Fade Nzapa ayeke sara nyen ti hunzi apasi kue, na lo yeke sara ni lawa?